KWÈSYON JENN MOUN KA MANDÉ
Ki Mannyè Bib-la Sa Édé Mwen?—Dézyenm Pa-a: Enjwi Li Bib-la
An jenn moun yo ka kwiyé Will di, “Si ou pa konnèt kòrèk mannyè-a pou li Bib-la, Bib-la pé sanm an liv ki pa antéwésan.”
Ès ou té kay kontan konnèt yonndé bagay ou sa fè pou édé’w enjwi li Bib-la? Ében atik sala kay édé’w.
Imajiné Sa ou Ka Li-a
Sé pou’w antéwésé an sa ou ka li-a. Mi mannyè ou sa fè sa:
Chwazi yon wakont Bib ou té kay kontan étidyé. Ou sa chwazi wakont-la an Bib-la, ében ou sa chwazi on lèkti Labib an fòm dranma asou jw.org.
Li wakont-la. Ou sa li wakont-la pa kò’w, ében ou sa li’y ansanm épi fanmi’w ében jan’w. Yonn di zòt sa li wakont-la, èvèk sé lézòt-la sa li sa sé lòt moun-lan an wakont-la ka di.
Éséyé fè yonndé an sé pwen sala:
Fè pòtwé pou moutwé sa ki ka fèt an wakont-la. Ében, ou sa fè plizyè ti pòtwé senp pou moutwé mannyè bagay té fèt an wakont-la yonn apwé lòt. Èvèk ékwi an ti nòt anba chak pòtwé pou di sa ki ka fèt an pòtwé-a.
Ékwi sa’w apwann konsèné on moun an Bib-la. Pou ègzanp, si’w ka li yon wakont konsèné on moun an Bib-la ki té fidèl, ou sa ékwi sé bèl kawaktè-a moun-lan té ni, sé bon bagay-la i té fè-a, èvèk sé bennédiksyon-an i té wisouvwè.
Wakonté sa ki fèt an wakont-la akwèdi ou ka bay an wapò an nouvèl-la. Ou sa wakonté sa ki tè fèt silon mannyè diféwan moun té wè’y. Ou sa fè konmsi ou ka “antwévi” sé pwensipal moun-lan an wakont-la, èvèk lòt moun ki té wè sa ki té fèt.
Si on moun an wakont-la té fè an mové disizyon, éséyé pou imajiné kisa ki té kay fèt si moun-lan té fè a bon disizyon pito. Pou ègzanp, Pita té anba an chay tèt cho swè-a i té di, i pa konnèt Jézi. (Mak 14:66-72) Konsa, si’w ka li wakont sala, ou sa mandé kò’w, ‘kisa Pita té sa fè diféwan?’ Ében, ‘ki mannyè Pita té sa aji pli byen an sitiwasyon sala?’
Si’w kontan ékwi, ou sa ékwi yon listwa ki bazé asou on wakont an Bib-la. Èvèk ou sa mété sé lison-an nou sa apwann an wakont-la, an listwa-a ou ékwi-a.—Ronm 15:4.
Lè’w ka li Bib-la imajiné sa ou ka li-a!
Fè Wichach!
Si ou pwan tan pou ègzanminé sé ti détay-la adan on wakont an Bib-la, ou sa dékouvè bèl wichès. Anfen, délè ou sa apwann bagay ki byen enpòtan an yonn (1) ében dé (2) mò pawòl adan an wakont ki an Bib-la.
Pou ègzanp, annou konpawé Mafyou 28:7 épi Mak 16:7.
Ès ou obzòvé Mak 16:7 mansyonnen “Pita épi sé lézòt disip-la,” mé Mafyou 28:7 pa té mansyonnen non Pita pyès? Pouki ou kwè Mak ban nou ti détay sala?
Mi An Ti Pwen Pou Édé’w: Mak pa té la lè sé bagay sala fèt. Konsa san dout, sé Pita ki bay enfòmasyon-an i ékwi-a.
Bèl wichès-la: Pouki ou kwè Pita té kontan pou tann, Jézi té vlé wè’y ankò? (Mak 14:66-72) Ki mannyè Jézi moutwé i té bon jan Pita? Ki mannyè ou sa imité Jézi, èk moutwé lézòt ou sé an bon jan?
Lè’w ka li Bib-la, si’w imajiné sa ou ka li-a èvèk ou fè wichach, ou kay enjwi li Bib-la pli!