LISON 15

Palé Épi Konfyans

1 Tèsalonnika 1:5

WÉZIMÉ: Moutwé ou vwéman kwè sa ou ka di sé lavéwité èk sa ou ka di enpòtan.

Pwépawé byen. Étidyé enfòmasyon-an byen, jis tan ou konpwann sé pwen-an ki pli enpòtan, èk mannyè Bib-la ka sipòté yo. Di moun sé pwen-an ki pli enpòtan adan an mannyè ki senp. Katjilé byen asou mannyè-a enfòmasyon-an kay édé moun ki ka kouté’w. Pwédyé pou lisentèspwi Bondyé.

Palé fò lè ou ka pwatiké pwézantasyon’w pou’w sa tann kò’w. Sa ka édé’w tjenn sé pwen-an klè an lidé’w, èk sa kay édé’w fè pli mèyè lè ou ka fè pwézantasyon’w.
Sèvi pawòl ki ka moutwé ou ni konfyans. Pito ou annèk li sa ki ékwi an sé piblikasyon-an, éséyé pou di’y an pawòl ou menm. Palé adan an mannyè ki ka moutwé ou ni konfyans an sa ou ka di.
Palé adan an mannyè ki vwéman sensè. Palé pou moun tann ou byen. Gadé moun an zyé yo lè ou ka palé bay yo, si sa pa kay ofwansé yo.

Pou palé épi konfyans pa vlé di ou sipozé palé adan an mannyè ki hadi. Osi, sa pa vlé di ou sipozé palé adan an mannyè pou ofwansé moun èben pou fòsé moun aksèpté pwen’w. Menm si ou ka palé épi konfyans, toujou palé épi lanmityé.