Jéhova Ka Benni Nou Lè Nou Pawdonnen Lézòt

1. Kisa Jéhova pwonmèt pou fè pou moun ki wépanti?

JÉHOVA, Papa nou an syèl, ni an pil lanmityé pou nou. I sé kwéyatè nou, i sé Moun-lan ki ka ban nou lwa, èk i sé Jij nou. (Sam 100:3; Izay. 33:22) Lè nou péché kont li, èk vwéman wépanti, i toujou pawé pou pawdonnen nou. (Sam 86:5) I pwonmèt nou an Izaya 1:18: “Menm si péché zòt pli wouj pasé san, mwen kay fè yo blan kon lannèj. Menm si yo kon on twèl ki byen taché an wouj, yo kay vini blan kon lenn.”​—Izay. 1:18.

2. Kisa Jéhova vlé nou fè pou nou ni on bon wilasyon épi lézòt?

² Paski nou pa pawfé, délè nou ka di bagay èben fè bagay ki ka ofwansé lézòt. (Jémz 3:2) Mé sa pa vlé di nou pa sa ni on bon wilasyon épi yo. Pou nou sa ni on bon wilasyon épi moun, nou ni pou apwann pou pawdonnen yonn-é-lòt. (Pwov. 17:9; 19:11; Maf. 18:21, 22) Si on moun di on bagay èben fè on bagay ki ka ofwansé nou, Jéhova vlé nou pawdonnen’y. (Kòl. 3:13) Paski lè nou menm fè on péché, Jéhova ka pawdonnen nou. Èk lè i pawdonnen nou, i ka ‘pawdonnen konplètman.’​—Izay. 55:7.

3. Ki kèstyon nou kay diskité an atik sala?

³ An atik sala, nou kay diskité sé kèstyon sala: Ki mannyè nou sa imité Jéhova lè i vini pou pawdonnasyon? Ki kalité péché nou sipozé mennen pou atansyon sé ansyen-an? Pouki Jéhova vlé nou pawdonnen lézòt? Épi, kisa nou sa apwann an ègzanp sé fwè èk sè nou-a ki té soufè a kòz di péché lézòt?

LÈ ON KWITYEN FÈ ON PÉCHÉ KI GWAV

4. (a) Lè on sèvant Jéhova fè on péché ki gwav, kisa i sipozé fè? (b) Ki wèskonsabilité sé ansyen-an ni lè yo jwenn épi on moun ki fè on péché ki gwav?

⁴ Nou ni pou di sé ansyen lè nou èben on lòt moun fè an péché ki gwav. 1 Kòrint 6:9, 10 ka mansyonnen déotwa péché ki gwav. Sé péché sala ka kasé lwa Bondyé toubonnman. Konsa, lè on moun fè on péché ki gwav, sa vlé di yo kasé lwa Bondyé toubonnman. Si on Kwityen fè on péché kon sa, i ni pou apwoché Jéhova an lapwiyè, èk osi, alé palé épi sé ansyen-an an kongwigasyon-an. (Sam 32:5; Jémz 5:14) Ki wèskonsabilité sé ansyen-an ni? Sé Jéhova tousèl ki sa pawdonnen péché konplètman. Épi sé wanson sakwifis Jézi Kwi ki fè sa posib.b Mé Jéhova bay sé ansyen-an wèskonsabilité-a pou détèminé si on moun ki fè on péché ki gwav sa wèsté an kongwigasyon-an opa. Pou fè détèminasyon sala, sé ansyen ni pou sèvi sé lévanjil-la, Pawòl Bondyé, pou édé yo. (1 Kòr. 5:12) Osi, yonn a sé bagay-la yo ka éséyé fè, sé pou wéponn sé kwèsyon sala: Ès moun-lan té fè plan andavans pou fè péché-a? Ès i té éséyé séwé péché-a? Ès i té ka pwatiké péché-a pou tjèk tan? Ès i ka moutwé a klè, i vwéman wigwété péché-a i té fè kont Jéhova? Ès i ja moutwé, i ni dézi-a pou wanjé wilasyon’y épi Jéhova? Ès la ni anyen ki ka moutwé ki, Jéhova ja pawdonnen moun-lan?​—Twav. 3:19.

5. Lè sé ansyen-an jwenn épi on moun ki fè on péché ki gwav, ki mannyè sa ka bennéfisyé kongwigasyon-an?

⁵ Lè sé ansyen-an jwenn épi on moun ki fè on péché ki gwav, yo ka éséyé pou fè menm disizyon Jéhova té ja fè. (Maf. 18:18) Ki mannyè awanjman sala ka bennéfyé kongwigasyon-an? I ka pwotéjé kongwigasyon-an. Koumannyè? Lè sé ansyen-an mété on moun ki pa wépanti dèwò kongwigasyon-an, sa ka anpéché yo afébli lafwa lézòt. (1 Kòr. 5:6, 7, 11-13; Titòs 3:10, 11) Osi, disizyon sala sa édé moun-lan ki péché-a, pou wépanti èk pou wésouvwé pawdonnasyon Jéhova. (Louk 5:32) An plis di sa, si moun-lan wépanti, sé ansyen-an ka apwoché Jéhova an lapwiyè èk yo ka mandé’y pou édé moun-lan wanjé wilasyon’y épi’y. ​—Jémz 5:15.

6. Si on moun twapé kò’y eskonminiké, ès i posib pou Jéhova pawdonnen moun sala? Èspliké.

⁶ Si on moun pa wépanti lè sé ansyen-an jwenn épi’y, i ka twapé kò’y eskonminiké hòd kongwigasyon-an. Osi, si i fè on kwim èben kasé lwa gouvèdman-an, sé ansyen-an pa kay anpéché moun-lan péyé pou mové aksyon’y. Jéhova ka pèwmité gouvèdman-an pou jijé èk pini népòt moun ki kasé lwa yo—ki yo wépanti opa. (Ronm 13:4) Wannman, si apwé on tan moun-lan wéyalizé sa i té fè té mové, èk i chanjé atitid li èk doubout fè sa ki mové, Jéhova kay vwéman pawdonnen’y. (Louk 15:17-24) Menm si péché’y té byen gwav!​—2 Kw. 33:9, 12, 13; 1 Tim. 1:15.

7. Ki sa i vlé di pou pawdonnen on moun ki fè nou an bagay ki mové?

⁷ Nou byen kontan pou sav sé pa nou ki ni wèskonsabilité-a pou désidé si Jéhova kay pawdonnen on péchè! Mé la ni on bagay nou ni pou désidé. Kisa i yé? Délè, on moun ka fè nou on mové bagay, épi apwé, i ka mandé nou pou pawdonnen’y. Èben délè on moun ka fè nou on bagay, èk i pa ka mandé nou pou pawdonnen’y. Kanmenm, nou sa chwazi pou pawdonnen moun-lan ki i mandé nou pou pawdonnasyon opa. Épi nou sa chwazi pou pa tjenn moun-lan an tjè nou. Lavéwité sé sa, i pé pwan tan èk éfò, sitou si sa moun-lan té fè nou-a té afèkté nou an chay. Gad-la li 15 Sèptanm, 1994, di: “Lè’w padonnen on moun ki péché kont ou, sa pa vlé di ou ka aksèpté sa yo té fè-a. Pou Kwityen, pawdonnasyon vlé di, pou kité on matyè an lanmen Jéhova. Épi sé li ki pli mèyè jij ki ni. Èk Jéhova kay fè asiwé nou twapé jistis a lè.” Mé pouki Jéhova ka ankouwajé nou pou padonnen, mé kité jistis an lanmen’y?

WÉZON JÉHOVA KA ANKOUWAJÉ NOU POU PAWDONNEN

8. Ki mannyè nou sa moutwé apwésiyasyon pou mizèwikòd Jéhova?

⁸ Lè nou pawdonnen lézòt, nou ka moutwé apwésiyasyon pou mizèwikòd Jéhova. Adan yon pawabòl, Jézi konpawé Jéhova épi on wa ki tiwé on gwo dèt asou chèf ofisyéʼy-la ki pa té sa péyé’y. Mé menm chèf ofisyé sala pa té moutwé mizèwikòd pou on lòt ofisyé ki té dwé’y mwens lajan. (Maf. 18:23-35) Ki lison Jézi té ka enstwi nou? Si nou vwéman apwésyé gwan mizèwikòd-la Jéhova ka moutwé nou, nou kay vlé pawdonnen lézòt. (Sam 103:9) Mi sé sa Gad-la té di détwa lanné ki pasé: “Menm si nou pawdonnen lézòt konmen fwa, i pa sa janmen égal pou pawdonnasyon èk mizèwikòd Bondyé pou nou gwanmèsi sakwifis Jézi.”

9. Kisa nou ni pou fè pou Bondyé pawdonnen nou? (Mafyou 6:14, 15)

⁹ Si nou pawdonnen lézòt, Jéhova kay pawdonnen nou. Lè “moun ni konpasyon asou lézòt moun, [Jéhova] kay ni konpasyon asou yo” èk i kay moutwé yo mizèwikòd. (Maf. 5:7; Jémz 2:13) Nou konnèt listwa Jòb. I té ni twa bon jan: Élifaz, Bildad, èk Zofa. Yo té di’y détwa pawòl ki té fè’y lapenn an chay. Mé Jéhova di Jòb pou pwédyé ba yo. Èk sé apwé Jòb té fè sa, Jéhova té benni’y. Konsa nou ka wè, si nou vlé Jéhova pawdonnen nou, nou ni pou pawdonnen lézòt. (Jòb 42:8-10) Jézi moutwé sa a klè lè i té di sé disip li-a mannyè-a pou pwédyé. I té di yo: “Si ou pawdonnen moun ki fèʼw mové, Papaʼw Bondyé ki an syèl kay pawdonnen péchéʼw tou.”​—Li Mafyou 6:14, 15.

10. (a) Pouki i pa bon pou tjébé moun an tjè? (b) Silon Èfésòs 4:31, 32, kisa nou vlé fè?

¹⁰ I danjéwé lè nou ka tjébé moun an tjè. Lè nou tjébé moun an tjè, sé akwèdi nou ka pòté on chay ki byen lou. Èk Jéhova pa vlé nou pòté chay sala. I vlé nou ladjé’y paski nou pé blésé kò nou. (Li Èfésòs 4:31, 32.) Bondyé ka di nou an Sam 37:8 “Sé pa pouʼw twakasé kòʼw ében faché. [Paski] sa kay fèʼw fè movèzté.” Sa sé bon konsèy pou nou swiv paski sa kay édé nou wèsté an bon santé. (Pwov. 14:30) Lè nou tjébé moun asou tjè, sé konmsi nou ka bwè pwézon, èk nou kwè sé lòt moun-lan ki kay mò. Pito sa, annou pawdonnen lézòt. (Pwov. 11:17) Èk lè nou fè sa, nou kay bay kò nou on bèl kado. Nou kay twapé lapé an lidé nou èk an tjè nou. Épi nou kay sa kontiné pou sèvi Jéhova épi tjè kontan.

11. Kisa Bib-la ka di konsèné wivanj? Èk pouki? (Ronm 12:19-21)

¹¹ Wivanj sé sa Jéhova. Jéhova di nou pou pa pwan wivanj asou pyèsonn. (Li Ronm 12:19-21.) Nou enpawfé èk nou pa sa wè bagay a klè menm kon Jéhova. Konsa, nou pa an pyès pozisyon pou jijé bagay menm kon li. (Hib. 4:13) Délè imosyon nou sa afèkté abilité nou pou fè bon jijman. Bib-la di an Jémz 1:20: “An moun ki faché pa sa fè sa ki ka plè Bondyé.” Konsa, lè nou faché, pa pwan wivanj. Èk toujou chonjé ki, Jéhova, ki ni jistis ki pawfé, kay toujou fè sa ki dwèt.

12. (a) Koumannyè nou ka moutwé nou ni konfyans an jistis Jéhova? (b) Kisa Jéhova kay fè an latè nèf-la?

¹² Lè nou pawdonnen lézòt, nou ka moutwé konfyans an jistis Jéhova. Lè nou kité tout bagay an lanmen Bondyé, nou ka moutwé nou ni konfyans ki, i kay wanjé tout donmaj péché té annékòz. Jéhova pwonmèt, an latè nèf-la, “moun pa kay chonjé sé mové bagay-la ki té fè yo soufè. Sé mové bagay sala pa kay menm vini an lidé yo èk yo pa kay vini an tjè yo non plis.” Non, janmen ankò! (Izay. 65:17) Mé, lè nou ja soufè an chay, ès i posib pou tiwé tout waj èk hayisans ki an tjè nou? Annou konsidiwé yonndé ègzanp di moun ki té fè sa.

BENNÉFIS-LA NOU SA TWAPÉ LÈ NOU PAWDONNEN LÉZÒT

13-14. Kisa nou apwann an èspéyans Tony èk José, lè i vini pou pawdonnasyon?

¹³ Plizyè an sé fwè èk sè nou-an, ja pawdonnen moun ki té fè yo soufè an tan pasé. Ki bennéfis yo té twapé lè yo pawdonnen?

¹⁴ Nou ni èspéyans Tony,c ki ka wété an Philippines-la. Avan Tony vini on Tèmwen Jéhova, yon nonm té tjwé fwè’y. Non nonm sala sé José. Lanmò fwè’y fè’y ni an chay waj. Èk i vini on moun ki vyolan. I té vlé pwan wivanj. Kanmenm, polis awété José èk mété’y an pwizon. Apwé i fè tan’y an pwizon, yo ladjé’y. Mé Tony sèwmanté: ‘Mwen ni pou jwenn José pou mwen tjwé’y.’ Épi i achté on fizi, èk i di: ‘Sa sé pou José.’ Kanmenm, Tony koumansé étidyé Bib-la épi Tèmwen Jéhova. Épi i di: “Kon mwen té ka étidyé, mwen apwann mwen ni pou fè chanjman. Èk mwen ni pou tiwé waj-la mwen té ni an tjè mwen.” Apwé i fè chanjman, Tony batizé èk i fè pwogwé jis lè’y vini on ansyen an kongwigasyon-an. Alò, imajiné mannyè Tony té sipwi lè i apwann ki, José té batizé kon on sèvant Jéhova! Lè yo dé-a jwenn, yo anbwasé yonn-a-lòt. Épi Tony di José, ‘Mwen ja pawdonnen’w.’ Tony di paski i té pawdonnen José, sa mennen’y an chay lajwa. I pa sa menm èspliké mannyè i ka santi. Wi Tony twapé bennéfis paski i té pawdonnen José.

15-16. Kisa nou apwann an èspéyans Peter èk Sue, lè i vini pou pawdonnasyon?

¹⁵ Mi sa ki wivé Peter èk Sue. An lanné mil nèf san katwiven senk (1985), yo té ka atandé on mitin lè on bonm pété an Sal Wéyòm-lan. Ni Peter ni Sue té blésé. Mé Sue té blésé pli mové paski i pa té sa ni tann ni wè byen apwé sa. Osi, i pa té sa pwan lòdè ankò.d Peter èk Sue té ka toujou katjilé, ‘’Ki kalté moun ki té kay fè on bagay ki si tèlman mové konsa?’ Moun-lan ki mété bonm-la adidan Sal Wéyòm-lan pa té on Tèmwen Jéhova. Détwa lanné apwé, yo awété’y èk yo voyé’y lajòl pou lavi diwant. Lè moun mandé Peter èk Sue èskè yo ja pawdonnen moun sala, yo ka di: “Jéhova enstwi nou pou pa tjenn waj èben tjébé moun asou tjè paski sa sa donmajé santé nou. Konsa, touswit apwé bonm-la pété, nou mandé Jéhova pou tiwé tout waj ki an tjè nou èk édé nou pawdonnen moun-lan ki fè sa, pou nou sa viv lavi nou an lapé.”

¹⁶ Ès i té ézé pou pawdonnen moun-nan ki té fè sa? Mé non. Yo di: “Délè lè Sue ka soufè annékòz di sa moun-nan té fè-a, sa ka lévé waj nou ankò. Mé nou ka fè asiwé nou pa fiksé lidé nou asou sa èk waj-la ka dispawèt byen vit. Anfen nou ka di: ‘Pitèt moun-sala sa vini on fwè yon jou, èk nou kay ni pou byenvini’y.’ Èspéyans sala ka fè nou wè, lè nou apliké pwensip Bib, i ka vwéman libéwé nou! Osi, lè nou chonjé touswit Jéhova kay tiwé tout soufwans èk wanjé tout donmaj ki ja fèt, sa ka soulajé èk konsolé nou.”

17. Kisa nou apwann an èspéyans Myra, lè i vini pou pawdonnasyon?

¹⁷ Lè Myra té apwann lavéwité-a, i té ja mayé èk i té ni dé ti gason. Kanmenm, mawi’y pa té aksèpté lavéwité-a èk apwé an tan, i fè adiltè èk i abandonnen fanmi-a. Myra di: “Lè mawi mwen abandonnen mwen épi sé manmay-la, mwen santi i twayi mwen; mwen té an lapenn; mwen té ni an chay waj; m’a té sa kwè i fè mwen sa èk mwen té ka blanmé kò mwen. Mwen té jis wigwété mwen mayé’y. Magwé nou pa ansanm ankò, mwen ka santi penn-la toujou. Pou plizyè mwa, sa té ka chagwinen lidé mwen. Èk mwen wéyalizé, sa té ka afèkté wilasyon mwen épi Jéhova èk lézòt. Mé apwézan, mwen pa ni pyès waj. Èk mwen pa ka tjébé’y asou tjè mwen. Anfen, m’a vlé anyen ki mové wivé’y. Èk mwen ni èspwa, yon jou, i kay apwann lavéwité-a èk vini on Tèmwen Jéhova.” Magwé sé difikilté-a Myra té èspéyansé, i ka fiksé asou lavi an tan ki ka vini an pawadi. Myra té lévé dé ich li pa kò’y. Èk jòdi, i ni tjè kontan kon i ka adowé Jéhova épi yo èk fanmi yo.

JÉHOVA SÉ PLI MÈYÈ JIJ-LA

18. Pouki nou sa mété konfyans nou an Jéhova, pli mèyè jij-la?

¹⁸ Nou byen kontan sé pa nou ki ni wèskonsabilité-a pou désidé ki mannyè pou jijé on moun! Sé Jéhova, pli mèyè jij-la ki ni twavay sala. (Ronm 14:10-12) Nou ni konfyans-lan ki, lè Jéhova fè on jijman, i kay dwèt. Paski i sav sa ki bon èk sa ki mové. (Jen. 18:25; 1 Wa 8:32) I pa kay janmen fè anyen ki pa dwèt!

19. Kisa Jéhova kay akonpli an tan ki ka vini?

¹⁹ Nou tout anvi wè tan-an lè Jéhova kay tiwé tout soufwans péché ja mennen asou lézòm èk péché menm. Alè sa-a, nou kay toujou ni bon santé. Èk tout penn nou ka èspéyansé jòdi, pa kay la ankò. Nou pa kay menm chonjé yo ankò. (Sam 72:12-14; Wévé. 21:3, 4) Wi sa kay on bon tan! Mé paditan nou ka èspéwé bon tan sala, nou ka wimèsyé Jéhova paski i ban nou abilité-a pou imité’y èk pou pawdonnen lézòt.