Jéhova Kay Konsolé’w

1. Ki mannyè lavi té yé bay sé Jwif-la ki té an Babilonn?

POU plizyè lanné, sé Jwif-la té ka dézobéyi Jéhova. Èk i té ka toujou voyé sé pwofèt-la pou vèti yo, mé yo pa té ka kouté. Konsa finalman, i ladjé yo an lanmen sé jan Babilonn-an pou kowijé yo. Lawmé sé jan Babilonn-lan détwi vil Jérouzalèm. Èvèk yo mennen sé Jwif-la pou viv an Babilonn kon pwizonnyé. (2 Kw. 36:15, 16, 20, 21) Mé ki mannyè lavi té yé pou sé Jwif-la an Babilonn? Ében, yo té sa fè bagay nòmal, tèl kon bati kay yo, planté jaden yo, èk yo té sa mayé èk fè ich. (Jér. 29:4-7) Mé, bagay pa té ézé pou yo pyès. Anfen, yonn di yo té di on bagay ki ka édé nou pou konpwann mannyè yo té ka santi. I di: ‘Nou té asid bò sé lawivyè-a an Babilonn, èk nou té ka pléwé, lè nou chonjé Zayonn.’ (Sam 137:1) Konsa, sé Jwif-la té bizwen konsolasyon épi soulajman. Mé, ki koté yo té kay jwenn sa?

2-3. (a) Kisa Jéhova té fè pou konsolé sé Jwif-la ki té an Babilonn? (b) Kisa nou kay diskité an atik sala?

² Jéhova enmen pèp li an chay, èk sé li ki ka konsolé yo. Anfen, Bib-la ka di nou, Jéhova sé Dyé-a “ki ka konsolé nou tout.” (2 Kòr. 1:3) Èk Jéhova té sav, adan sé Jwif-la ki té an pwizon an Babilonn té kay wépanti pou sé mové bagay-la yo té fè-a, èvèk yo té kay fè sa ki té dwèt an zyé’y ankò. (Izay. 59:20) Konsa, pli pasé yon san «100» lanné andavans, i fè pwofèt Izaya ékwi on konmisyon ba yo, pou konsolé yo. Izaya 40:1 ka di: ‘Mi sé sa Bondyé nou-an di: “Konsolé pèp mwen, konsolé yo.”’ Wi, Jéhova sèvi sa ki ékwi an liv Izaya, pou konsolé sé Jwif-la ki té an Babilonn.

³ Jòdi jou, nou tout ka èspéyansé difikilté, paskè lavi an vyé sistenm sala byen wèd. Èk tanzantan nou bizwen konsolasyon, menm kon pèp Jéhova an Babilonn té bizwen konsolasyon. Konsa, an atik sala, nou kay gadé twa «3» bagay Jéhova té fè pou konsolé yo: «1» I pwonmèt pou pawdonnen yo, si yo wépanti, «2» i ba yo on bèl èspwa, èk «3» i kalmé tjè yo épi lidé yo. Kon nou diskité sé pwen sala, nou kay wè mannyè Jéhova ka fè menm bagay-la ban nou.

JÉHOVA KA PAWDONNEN NOU

4. Ki mannyè Jéhova moutwé, i sé on Dyé ki ni mizèwikòd? (Izaya 55:7)

⁴ Bib-la ka di nou, Jéhova sé “Papa-a ki ni tout mizéwikòd-la.” (2 Kòr. 1:3) Èk i moutwé sa a klè, lè’y pwonmèt pou pawdonnen sé Jwif-la ki wépanti. (Li Izaya 55:7.) I té di yo: “Paski mwen ni lanmityé fidèl pou ou ki pa kay janmen fini, mwen kay moutwé’w mizèwikòd.” (Izay. 54:8) Mé, ki mannyè Jéhova té kay moutwé yo mizèwikòd? Ében, sé Jwif-la té dézobéyi Jéhova. Èk pou kowijé yo, Jéhova té kay kité yo an Babilonn pou plizyè lanné. Mé Jéhova pwonmèt, i té kay libéwé yo. Konsa, yo pa té kay wèsté an Babilonn pou tout tan. (Izay. 40:2) San dout, pwonmèt sala té kay konsolé tout sé Jwif-la ki té vlé plè Jéhova.

5. Jòdi jou, pouki nou ni pli wézon pou kwè, Jéhova kay pawdonnen péché nou?

⁵ Kisa ki lison-an pou nou? Lison-an sé sa: Jéhova pawé pou pawdonnen sèvant li, èk i ka pawdonnen yo konplètman. Apipwé sèt san «700» lanné apwé pwofèt Izaya ékwi konmisyon-an bay sé Jwif-la, Jéhova voyé Gason’y, Jézi asou latè-a pou bay lavi’y kon yon sakwifis. Gwan mèsi sakwifis sala, Jéhova sa ‘éfasi péché’ tout moun ki wépanti. Konsa, jòdi nou ni pli wézon pou kwè, Jéhova kay pawdonnen nou, paskè nou konnèt tout sa i ja fè, pou fè sa posib. (Twav. 3:19; Izay. 1:18; Èfés. 1:7) Vwéman, Papa nou Jéhova, sé on Dyé ki plen mizèwikòd.

6. Kisa mizèwikòd Jéhova ka pousé’y pou fè ban nou? (Gadé pòtwé-a osi.)

⁶ Délè, apwé nou wépanti pou on péché, nou ka kontiné santi koupab pou menm péché-a. Si sa sé sitiwasyon’w, pwan tjè paskè sa Jéhova té di sé Jwif-la an Izaya 55:7 sa konsolé’w. Wi, Papa nou Jéhova, plen mizéwikòd. Konsa, dépi ou wépanti ou sa asiwé, i kay pawdonnen’w konplètman. Sa vlé di, lè’y pawdonnen’w, i ka mété lèwè-a ou té fè-a dèyè do’y. I pa kay chonjé’y ankò. (Gadé Jérémaya 31:34.) Bon, si Jéhova ka chwazi pou obliyé sé lèwè-a nou té fè an tan pasé, asiwé la pa ni pyès wézon pou nou kontiné chonjé sé lèwè sala. I osi bon pou nou chonjé, sa ki enpòtan pou Jéhova, sé sa nou ka fè apwézan. I pa antéwésé an sé lèwè-a nou té fè an tan pasé. (Izik. 33:14-16) Èvèk touswit, i kay tiwé tout sé difikilté-a péché ka mennen asou nou.

7. Si nou fè on péché ki gwav, kisa ki kay édé nou pou palé épi sé ansyen-an?

⁷ Bon, annou di, konsyans ou ka bat ou paskè ou fè on péché ki gwav, èk ou p’òkò alé oti sé ansyen-an. Kisa’w sa fè pou’w jwenn soulajman? Ében Bib-la ka ankouwajé nou pou alé oti sé ansyen-an. (Jémz 5:14, 15) Mé kanmenm, i pa toujou ézé pou fè sa. Konsa, kisa ki kay fè’y pli ézé pou’w alé palé épi yo? Ében chonjé, Jéhova ka sèvi sé fwè sala pou édé nou, konsa yo kay twété’w épi lanmityé èk mizèwikòd, menm kon Jéhova ka fè. Si’w chonjé sa, èk ou vwéman wépanti, sa kay fè’y pli ézé pou’w alé palé épi yo. Annou konsidiwé yon èspéyans ki ka moutwé, mannyè Jéhova té sèvi sé ansyen-an pou konsolé yon fwè yo ka kwiyé Arthur.a Pou apipwé yon lanné, fwè sala té ka gadé vyé pòtwé sal. Èk konsyans li té ka bat li pou sa’y té ka fè-a. Mé, apwé i tann on diskou konsèné konsyans-lan, i di madanm li sa’y té ka fè, èvèk i alé oti sé ansyen-an osi. Apwé i fè sa, konsyans li pa té ka bat li tèlman, mé i té ka santi byen hont pou sa’y té fè-a. Kanmenm, fwè-a di: “Sé ansyen-an fè mwen chonjé, Jéhova pa té tounen do’y asou mwen. I ka kowijé nou paskè i enmen nou. Sé pawòl sala touché tjè mwen, èk yo édé mwen pou chanjé katjil mwen.” Apwézan, fwè Arthur sé on sèvant ministiriyal, èk i ka wann sèvis kon yon piyonnè wéglé. Wi, dépi nou wépanti, Jéhova toujou pawé pou pawdonnen nou. Èk sa sé on bagay ki ka ankouwajé nou an chay.

JÉHOVA KA BAN NOU ON BÈL ÈSPWA

8. (a) Ki bèl èspwa Jéhova té bay sé Jwif-la ki té an Babilonn? (b) Silon Izaya 40:29-31, kisa bèl èspwa sala té kay fè ba yo?

⁸ Bon, tout moun té sav, lè jan Babilonn té pwan moun lapwiz, yo pa té ka ladjé yo. Konsa, pitèt sé Jwif-la ki té pwizonnyé an Babilonn té ka kwè, yo pa té kay sa janmen viwé an péyi yo. (Izay. 14:17) Kanmenm, Jéhova té bay pèp li on bèl èspwa. I pwonmèt, i té kay libéwé yo, èk yo té kay witounen an péyi yo. Èk la pa té ni anyen ki té sa anpéché Jéhova fè sa. (Izay. 44:26; 55:12) Wi, magwé gouvèdman Babilonn té ni an chay pouvwa, an zyé Jéhova yo té menm kon on ti lapousyè. (Izay. 40:15) Dépi ou souflé on ti lapousyè, i ka dispawèt kouman! Ében, sé menm kon sa i té kay ézé pou Jéhova libéwé pèp li anba lanmen jan Babilonn. Sa sété on bèl èspwa ki té kay konsolé sé Jwif-la. An plis di sa, pwofèt Izaya té di: “Moun ki mété èspwa yo an Jéhova kay twapé fòs yo ankò.” (Li Izaya 40:29-31.) Konsa bèl èspwa sala té kay fòtifyé yo osi.

9. Pouki sé Jwif-la an Babilonn té sa asiwé, Jéhova té kay tjenn pwonmèt li pou libéwé yo?

⁹ Jéhova té bay sé Jwif-la an chay wézon pou kwè, i té kay fè tout sa’y té pwonmèt pou fè ba yo. Pouki nou sa di sa? Ében, Jéhova ka toujou tjenn pawòl li, èk sé Jwif-la té ja wè sa plizyè fwa. Pou ègzanp, mi yonndé pwofèsi yo té ja wè Jéhova akonpli: Péyi Asiriya té détwi péyi Izwayèl, èk yo té pwan pèp Bondyé kon pwizonnyé. (Izay. 8:4) Lawmé Babilonn té kwazé bwizé vil Jérouzalèm, èk yo mennen sé Jwif-la an Babilonn kon pwizonnyé. (Izay. 39:5-7) Èk, lè Wa Babilonn té tjébé Wa Zèdikaya, i té kwévé zyé’y. Lè’y fini, i mawé’y épi chenn, èk i mété’y an pwizon an Babilonn kon yon avèg. (Jér. 39:7; Izik. 12:12, 13) Wi, sé Jwif-la té sav, tout ti détay an sé pwofèsi sala té fèt, menm kon Jéhova té di yo té kay fèt. (Izay. 42:9; 46:10) Konsa apwézan, lè Jéhova pwonmèt i té kay libéwé pèp li, yo té sa asiwé, Jéhova té kay tjenn pwonmèt sala osi.

10. Ki mannyè bèl èspwa-a nou ni-an sa édé nou, èk ki mannyè nou sa tjenn èspwa nou fò?

¹⁰ Kisa ki lison-an pou nou? Ében, bagay an latè sala ka vini pli mové jou apwé jou. Èk an plis di sa, sé lèlmi nou-an ka opozé nou. Akòz di sa, délè nou ka santi dékouwajé, èk nou ka santi akwèdi nou pa ni pyès fòs. Mé, katjilé asou bèl èspwa-a Jéhova ban nou-an. I pwonmèt, touswit nou kay viv an lapé an pawadi-a, nou kay ni bon santé, èk nou kay ni bon bagay alabondans. Sé pou nou toujou tjenn bèl èspwa sala byen fò an tjè nou épi an lidé nou, paskè sa kay ankouwajé nou. Osi, i kay ban nou fòs-la nou bizwen pou nou kontiné tjébé fò. Mé, kisa’w sa fè pou’w tjenn èspwa’w fò? Ében, toujou pwan tan pou katjilé asou mannyè lavi nou kay dou an latè nèf-la. Wi, nou ni an chay atik, vidéyo, épi chanson ki ka palé konsèné lavi an pawadi-a. Konsa fè tan pou’w li, kouté, ében gadé sé bagay sala. Èvèk lè’w ka pwédyé, toujou di Jéhova sé bèl bagay-la ou vlé fè an latè nèf-la. Si’w fè sa, ou kay tjenn èspwa’w byen fò, an tjè’w épi an lidé’w.

11. Magwé sésé Joy byen malad, kisa ki ka édé’y pou kontiné tjébé fò?

¹¹ Pou édé nou wè mannyè bèl èspwa-a nou ni-an sa konsolé nou èk ankouwajé nou, annou pwan èspéyans yon sè yo ka kwiyé Joy. Sè sala byen malad, èk délè i ka santi dékouwajé. Mé i di: “Mwen sav Jéhova ka konpwann sitiwasyon mwen. Konsa, lè mwen ka santi dékouwajé, mwen ka vidé tjè mwen ba li an lapwiyè. Èk i ka wéponn mwen. I ka ban mwen fòs-la mwen bizwen, pou mwen kontiné tjébé fò.” (2 Kòr. 4:7) On lòt bagay sésé Joy ka fè sé sa, i ka imajiné mannyè lavi’y kay yé an latè nèf-la, ‘lè pyèsonn pa kay di, yo malad.’ (Izay. 33:24) Konsa, si nou vidé tjè nou bay Jéhova an lapwiyè, èk nou fiksé asou bèl èspwa-a i ban nou-an, sa kay édé nou pou kontiné tjébé fo.

12. Pouki nou sa asiwé Jéhova kay fè tout sa i pwonmèt pou fè? (Gadé pòtwé-a osi.)

¹² Kon nou ja wè, Jéhova té bay sé Jwif-la an chay wézon pou ni konfyans an pawòl li. Èk, i ka fè menm bagay-la ban nou. Pouki nou sa di sa? Ében annèk katjilé asou tout sé pwofèsi-a ki ka fèt vwé an tan nou. Pou ègzanp, yon pwofèsi an liv Dannyèl ka moutwé, diwan dènyé tan-an, la té kay ni on gouvèdman ki ni an chay pouvwa èk lotowité owon latè-a. Mé gouvèdman sala té kay ‘an ti miyèt fò, èk an ti miyèt fèb.’ (Dann. 2:42, 43) Gouvèdman-an ki ka akonpli pwofèsi sala an tan nou, sé gouvèdman Anglo-American. On lòt pwofèsi ka di, diwan dènyé tan-an, la kay ni “twanblanntè” an yon plas apwé on lòt, èk moun kay pwéché “Bon Nouvèl-la” toupatou an latè-a. (Maf. 24:7, 14) Ès nou pa ka wè sa ka fèt jòdi jou? Wi, lè nou katjilé asou pwofèsi Bib ki ka akonpli, sa ka fòtifyé lafwa nou, èk i ka édé nou pou ni pli konfyans an sa Jéhova pwonmèt pou fè ban nou an tan pou vini.

JÉHOVA KA KALMÉ TJÈ NOU ÉPI LIDÉ NOU

13. (a) Ki mannyè bagay té kay yé pou sé Jwif-la ki té an Babilonn, kon tan-an té ka vini pli pwé pou Jéhova libéwé yo? (b) Silon sa nou li an Izaya 41:10-13, kisa Jéhova té di sé Jwif-la pou konsolé yo?

¹³ Jéhova té bay sé Jwif-la ki té an pwizon an Babilonn on bèl èspwa. Mé, i té osi di yo kisa ki té kay fèt avan i libéwé yo. I té di, wa péyi Pècha épi lawmé’y té kay ataké sé nasyon-an ki té oliwon vil Babilonn. Èk, yo té kay détwi vil Babilonn. Sé apwé sa, sé Jwif-la té kay witounen Jérouzalèm. (Izay. 41:2-5) Konsa san dout, bagay té kay vini pli wèd pou sé Jwif-la, kon tan-an té ka vini pli pwé pou yo kité Babilonn. Jéhova té konnèt sa. Èk i té osi sav, adan di yo té kay pè, èvèk yo té kay bizwen konsolasyon. Konsa, plizyè lanné andavans, i sèvi pwofèt Izaya pou ékwi on konmisyon ba yo. I té di yo: “Ou pa bizwen pè, paski mwen épi’w. Pa bay kò’w mal tèt, paski mwen sé Bondyé’w.” (Li Izaya 41:10-13.) Mé lè Jéhova té di yo, ‘I sé Bondyé yo,’ ès i té ka di sé Jwif-la, yo té ni pou adowé’y? Mé non! Sé Jwif-la té ja konnèt sa. Pito sa, Jéhova té sèvi sé pawòl sala pou fè yo chonjé, i té la épi yo èk i té kay sipòté yo.​—Sam 118:6.

14. Ki lòt bagay Jéhova té fè pou kalmé sé Jwif-la ki té an Babilonn?

¹⁴ On lòt mannyè Jéhova édé sé Jwif-la pou wèsté kam, sé lè’y fè yo chonjé, i ni pouvwa èk nòlaj ki èstòdinè. Pou ègzanp, i di yo kon sa, sé li Jéhova ki fè tout sé étwal-la. Èk i di yo ankò, i konnèt chak étwal pa non. (Izay. 40:25-28) Konsa pwen-an té klè: Si Jéhova té konnèt non chak sé étwal-la, nou sa asiwé i konnèt non chak sèvant li. Èvèk si’y té ni pouvwa-a pou fè tout sé étwal-la, san dout i ni pouvwa-a pou édé pèp li. Wi, lè sé Jwif-la té katjilé asou kantité nòlaj èk pouvwa Jéhova ni, yo té kay wéyalizé yo pa té ni pyès wézon pou pè, ében pou santi antjèt.

15. Ki mannyè Jéhova té pwépawé sé Jwif-la pou sa yo té kay èspéyansé pli ta?

¹⁵ Bon, on lòt bagay Jéhova té fè sé sa, i pwépawé sé Jwif-la pou sa yo té kay èspéyansé pli ta. Pli bonnè an liv Izaya, i té di yo: “Alé, pèp mwen, antwé andidan chanm ou, épi fenmen lapòt-la dèyè’w. Séwé kò’w pou an ti mouman, jistan kòlè-a pasé.” (Izay. 26:20) Èk sa sété bon konsèy, paskè yon ékwiven di: ‘Lè Wa Sayròs ataké vil Babilonn, i koumandé sòlda’y pou tjwé tout moun ki pa té andidan kay yo.’ Ès ou sa imajiné mannyè sé moun-lan ki té an Babilonn té pè! Mé, sé Jwif-la obéyi diwèksyon-an Jéhova té ba yo-a. Èk pitèt sé sa ki sové lavi yo a lè sala.

16. Pouki nou pa sipozé twakasé kò nou twòp konsèné gwan twibilasyon-an? (Gadé pòtwé-a osi.)

¹⁶ Kisa ki lison-an pou nou? Ében, gwan twibilasyon-an kay koumansé touswit. Èk kon Jézi té di, tan sala kay pli mové pasé pyès lòt tan ki ja janmen ni, dépi an koumansman latè-a pou jis atjwèlman. A lè sala, moun kay tèlman pè, yo pa kay konnèt kisa pou yo fè. Mé, Jéhova sé Dyé nou. Konsa pito nou pè, nou kay ni kouwaj paskè nou sav ‘Jéhova kay délivwé nou.’ (Louk 21:28) Èk lè gwoup nasyon-an ataké nou diwan gwan twibilasyon-an, nou kay kontiné dépan asou Papa nou, Jéhova. A lè sala, i kay sèvi sé nanj-lan pou pwotéjé nou, èk i kay ban nou diwèksyon. Si nou obéyi sé diwèksyon sala, nou kay sové. Mé, pitèt ou ka di an lidé’w, ki mannyè Jéhova kay ban nou diwèksyon a lè sala? Ében, nou p’òkò sav. Kanmenm, Jéhova pé sèvi kongwigasyon-an pou ban nou diwèksyon. Anfen, adan on sans nou sa di, sé kongwigasyon-an sé ‘chanm nou.’ Konsa, nou kay sòv la. Èk wi, tan sala kay byen difisil. Mé si nou ni konfyans ki, Jéhova ka djidé pèp li, èk nou ka swiv sé diwèksyon-an ògannizasyon-an ka ban nou, èk nou ka vansé pli pwé sé fwè èk sè nou-an dépi atjwèlman, nou kay byen pawé pou tan sala.​—Hib. 10:24, 25; 13:17.

17. Menm si nou pa sav kisa denmen kay mennen, kisa nou ni pou kontiné fè?

¹⁷ Bon, bagay té byen difisil pou sé Jwif-la an Babilonn. Mé, Jéhova ba yo tout sa yo té bizwen pou konsolé yo. Èk nou sa asiwé, i kay fè menm bagay-la ban nou. Konsa menm si nou pa sav kisa denmen kay mennen, annou kontiné dépan asou Jéhova. Wi, kité Jéhova konsolé’w. Ni konfyans, Jéhova kay pawdonnen’w konplètman. Tjenn bèl èspwa-a i ban nou-an fò an tjè’w épi an lidé’w. Èk toujou chonjé, Jéhova sé Bondyé’w. Konsa ou pa ni pyès wézon pou pè.