Ni Konfyans-lan Ki Jéhova Ha Pawdonnen’w

1-2. Kisa Jéhova ka fè lè nou wépanti, èk ki mannyè sa ka fè nou santi? (Gadé pòtwé-a osi.)

BON, Wa David té konnèt mannyè i yé pou santi koupab. Wi, i té ka santi byen twis pou sé mové bagay-la i té fè-a. (Sam 40:12; 51:3) Mé i wépanti èk i fè sé chanjman-an ki té nésésè, èk Jéhova pawdonnen’y. (2 Sm 12:13) Èk pa dé kontan David té kontan lè’y wéyalizé Jéhova té pawdonnen’y.​—Sam 32:1.

² Bon menm kon Wa David, i ka soulajé tjè nou pou konnèt ki, Jéhova kay pawdonnen péché nou! Mé nou ni pou fè sé bagay sala: (1) wigwété péché-a nou fè-a, (2) mandé Jéhova pou pawdonnasyon, (3) palé épi sé ansyen-an, èk (4) fè tout sa nou pé pou pa fè péché-a ankò. (Pwov. 28:13; Twav. 26:20; 1 Jan 1:9) Wi, pa dé kontan nou ka kontan lè nou wéyalizé ki, lè Jéhova pawdonnen nou, i pa kay janmen pini nou pou péché sala ankò!​—Izik. 33:16.

3-4. (a) Ki mannyè yon sésé té ka santi apwé i batizé? (b) Kisa nou kay diskité an atik sala?

³ Bon, pitèt nou pa asiwé Jéhova ha vwéman pawdonnen nou pou sé péché-a nou té fè an tan pasé. Pou ègzanp, ann konsidiwé èspéyans Jennifer. Pawan’y té enstwi’y konsèné Jéhova lè’y té tou piti. Mé lè’y vini pli gwan, i koumansé fè mové bagay, mé pawan’y pa té sav sa. Kanmenm plizyè lanné apwé sa, Jennifer fè chanjman an lavi’y, i dèdiké lavi’y bay Jéhova, èk i batizé. Mé magwé tout pwogwé-a Jennifer té fè, la té ni an bagay ki té ka twakasé’y. Tann sa’y di: “An tan pasé mwen té ka fè imowalité sèksyouwal, mwen té ka vini sou, mwen té toujou faché, èk bagay-la ki té pli enpòtan an lavi mwen sété lajan. Bon, an lidé mwen, mwen té sav Jézi mò pou péché mwen, èk paski mwen té wépanti, Jéhova té ha pawdonnen mwen. Kanmenm, mwen pa té asiwé Jéhova té vwéman pawdonnen mwen.”

⁴ Bon pitèt menm kon Jennifer ou pa asiwé Jéhova ha pawdonnen’w pou péché ou té fè an tan pasé? Ében si sé sa, i bon pou ou chonjé mannyè David té santi konsèné mizéwikòd Jéhova. Wi, David té asiwé Jéhova té pawdonnen’y, paski Jéhova sé an Dyé ki plen mizéwikòd, èk Jéhova vlé’w ni menm asiwans sala. Bon, an atik sala nou kay diskité pouki i enpòtan pou nou ni konfyans-lan ki, Jéhova ha pawdonnen péché nou. Èk osi nou kay diskité déotwa bagay nou sa fè ki sa ban nou asiwans sala.

POUTJI I ENPÒTAN POU NOU NI KONFYANS-LAN KI, JÉHOVA HA PAWDONNEN NOU?

5. Kisa Satan vlé nou kwè? Ba yon ègzanp.

⁵ Lè nou ka vwéman kwè Jéhova enmen nou èk i ha pawdonnen nou, nou pa kay kwè mansonj Satan. Chonjé, Satan pa vlé nou sèvi Jéhova, èk i kay fè tout sa ki posib pou anpéché nou fè sa. Wi, Satan pé éséyé fè nou kwè Jéhova pa kay janmen pawdonnen nou. Mé sa sé an gwo mansonj. Pou ègzanp, katjilé asou sa ki té wivé nonm-lan yo té tiwé an kongwigasyon-an an pwèmyé syèk-la an Kòrint, paski i té fè imowalité sèkyouwal. (1 Kòr. 5:1, 5, 13) Bon, pli ta nonm-lan wépanti, mé Satan pa té vlé sé fwè èk sè-a pawdonnen’y, èk byen vini’y an kongwigasyon-an. Mé si yo pa té pawdonnen nonm-lan, i té kay kwè Jéhova pa té kay janmen pawdonnen’y. Èk i té sa vini tèlman twis, i té sa jis doubout sèvi Jéhova, èk sé sa Satan té kay vlé. Bon, jòdi jou, Satan vlé nou doubout adowé Jéhova, konsa i vlé nou kwè Jéhova pa kay janmen pawdonnen péché nou. Mé kanmenm, “nou konnèt asé byen mannyè Satan ka twavay”, alò nou konnèt mannyè pou goumen kont li.​—2 Kòr. 2:5-11.

6. Si nou pa asiwé Jéhova ha pawdonnen nou, kisa nou sa fè?

⁶ Lè nou ka vwéman kwè Jéhova ha pawdonnen nou, nou sa ni lajwa ankò. Bon, lè nou péché, nou ka santi twis a kòz di sa nou fè. (Sam 51:17) Èvèk sa sé an bon bagay. Paski lè nou ka santi koupab, sa sa pousé nou pou fè népòt chanjman ki nésésè pou nou fè sa ki bon. (2 Kòr. 7:10, 11) Mé si nou ka kontiné santi Jéhova p’òkò pawdonnen nou, nou sa vini si tèlman dékouwajé nou pé jis doubout sèvi Jéhova. Mé lè nou ni konfyans-lan ki, Jéhova ha pawdonnen nou, nou sa doubout santi koupab. Èk a lè sala, nou sa sèvi Jéhova épi an konsyans ki nèt, èk épi an chay lajwa. Èk sé sa Jéhova vlé pou nou. (Kòl. 1:10, 11; 2 Tim. 1:3) Mé, kisa nou sa fè pou nou sa ni konfyans-lan ki, Jéhova ha pawdonnen nou?

KISA NOU SA FÈ POU NOU SA NI KONFYANS-LAN KI, JÉHOVA HA PAWDONNEN NOU?

7-8. Kisa Jéhova té di Moziz konsèné kò’y, èk pouki nou sa kwè sa Jéhova té di? (Ègzodòs 34:6, 7)

⁷ Katjilé asou sa Jéhova té di konsèné kò’y. Pou ègzanp, lè Moziz té vlé konnèt pli konsèné Jéhova, chonjé sa Jéhova di’y.a (Li Ègzodòs 34:6, 7.) Bon, Jéhova ni an chay bèl kawaktè, mé i chwazi pou di Moziz, i sé ‘an Dyé ki plen mizéwikòd èk konpasyon’. Alò lè an moun ki enmen Jéhova péché èk i wépanti, ès ou kwè Jéhova kay wifizé pawdonnen moun sala? Mé non! Sé sèlman an moun ki ni tjè wèd èk ki pa ni mizéwikòd ki kay fè sa. Èk Papa nou Jéhova pa kon sa!

⁸ Alò, nou sa asiwé lè Jéhova di i plen mizéwikòd, i ka di lavéwité-a. (Sam 31:5) Paski Jéhova pa sa manti. Konsa, si’y difisil pou ou kwè Jéhova ha pawdonnen’w, mandé kò’w: ‘Ès mwen kwè Jéhova ni mizéwikòd èk konpasyon, èk i kay pawdonnen népòt moun ki wépanti?’ Ében si wépons ou sé wi, ou sa ni konfyans-lan ki Jéhova ha pawdonnen’w osi.

9. Kisa Sam 32:5 ka di nou konsèné mannyè-a Jéhova ka pawdonnen péché nou?

⁹ Katjilé asou sa Bib-la ka di nou konsèné mannyè-a Jéhova ka pawdonnen nou. Pou ègzanp an Sam 32:5, Wa David ékwi konsèné mannyè Jéhova ka pawdonnen péché nou. (Li Sam 32:5.) Bon, mo pawòl-la “pawdonnen” an vèwsé sala an langaj Hibrou vlé di, “pou lévé” èben “chayé”. Alò lè Jéhova pawdonnen David, David santi konmsi Jéhova té tiwé an gwo chay asou zépòl li èk i chayé’y alé. (Sam 32:2-4) Konsa, David té sa ni lajwa, paski i té ni konfyans-lan ki Jéhova té pawdonnen’y konplètman. Èvèk nou sa santi menm kon David! Wi, lè nou vwéman wépanti, nou pa ni pou kontiné santi koupab. Anfen nou sa ni lajwa ankò, paski Jéhova ha vwéman pawdonnen nou.

10-11. Lè Bib-la ka di Jéhova ‘pawé pou pawdonnen’, kisa sa ka di nou konsèné Jéhova? (Sam 86:5)

¹⁰ Li Sam 86:5. Bon, David ékwi Jéhova ‘pawé pou pawdonnen’. Sa vlé di lè nou fè lèwè, Jéhova pa ka faché vit, èk i toujou pawé pou pawdonnen moun ki wépanti. Mé poutji? Ében Wa David di, i ‘ni an chay lanmityé fidèl pou tout sa ki ka kwiyé asou’y.’ Wi kon nou apwann an atik twant twa {33}, Jéhova pwonmèt pou moutwé moun ki enmen’y lanmityé fidèl, èk i pa kay janmen abandonnen yo. Alò si yo péché èk yo wépanti, Jéhova kay kontiné moutwé yo lanmityé fidèl, èk i kay vwéman pawdonnen yo. (Izay. 55:7) Bon, si’w pa asiwé Jéhova ha pawdonnen’w pou an bagay ou té fè an tan pasé, katjilé asou sa: ‘Si’w ni konfyans-lan ki, Jéhova pawé pou pawdonnen tout moun ki wépanti, èk ki mandé’y pou moutwé yo mizéwikòd, ou sa asiwé i ha pawdonnen’w tou, lè’w té mandé’y pou pawdonnasyon èk pou moutwé ou mizéwikòd.

¹¹ Wi, i ka soulajé nou lè nou chonjé Jéhova byen konnèt nou, èk i sav nou sé péchè. (Sam 139:1, 2) Bon. Annou gadé sa David ékwi adan an lòt Sam ki sa édé nou pou ni konfyans-lan ki, Jéhova vwéman vlé pawdonnen nou.

PA OBLIYÉ SA JÉHOVA KA CHONJÉ KONSÈNÉ NOU

12-13. Silon Sam 103:14, kisa Jéhova ka chonjé konsèné nou, èk ki mannyè i ka twété nou?

¹² Li Sam 103:14. Bon. An Sam sala, David ka ban nou an lòt wézon Jéhova pawé pou pawdonnen moun ki wépanti. David di, Jéhova ka chonjé nou pa pawfé. Bon. Annou fouyé pli fon pou nou sa byen kopwann kisa David té ka vwéman di.

¹³ An Sam sala David di, Jéhova “konnèt èk ki sa nou fèt”. Wi, Bondyé ‘fè [Adanm] épi lapousyè ki sòti an tè-a.’ Konsa Jéhova konnèt mannyè-a i fè nou èk sa nou bizwen. Pou ègzanp nou bizwen manjé, sonmèy, èk lèspiwasyon. Anfen, jis moun ki pawfé bizwen sé bagay sala. (Jen. 2:7) Mé paski Adanm épi Èv péché, nou sé lapousyè adan an lòt mannyè. Wi, nou sé lapousyè paski nou pa pawfé, èvèk nou ni pou goumen pou fè sa ki bon. Èk Jéhova konnèt paski nou éwityé péché, nou kay fè lèwè. Mé lè nou fè lèwè èk nou wépanti, i ka moutwé nou mizéwikòd èk i ka pawdonnen nou.​—Sam 78:38, 39.

14. (a) Ki lòt bagay David té di konsèné mannyè-a Jéhova ka pawdonnen? (Sam 103:12) (b) Kisa nou sa apwann an mannyè-a Jéhova té pawdonnen David? (Gadé osi bwèt-la: “Jéhova Ka Pawdonnen Èk I Ka Obliyé Péché Nou.”)

¹⁴ Ki lòt bagay nou sa apwann an Sam yon san twa «103» konsèné mannyè-a Jéhova ka pawdonnen péché? (Li Sam 103:12.) Wi, David di Jéhova ka jété fòt nou byen lwen, ‘menm kon koté-a sòlèy-la ka lévé-a lwen koté-a i ka kouché-a.’ Bon. Kisa sa ka di nou konsèné mannyè-a Jéhova ka pawdonnen péché? Ében, koté-a sòlèy-la ka lévé-a byen lwen koté-a i ka kouché-a. Alò nou sa ni konfyans-lan ki, Bondyé pa kay janmen chonjé péché sala ankò èk i pa kay janmen fè nou chonjé’y.”​—Izik. 18:21, 22; Twav. 3:19.

15. Kisa ou sa fè si’w ka santi Jéhova p’òkò pawdonnen’w pou sé péché-a ou té fè an tan pasé?

¹⁵ Bon. Sa David ékwi an Sam yon san twa «103» sa vwéman édé’w pou ni konfyans-lan ki, Jéhova ha pawdonnen’w pou sé péché-a ou té fè an tan pasé. Mé si’w pa asiwé sa, katjilé asou mannyè Jéhova ka santi. Wi, i ka chonjé ou pa pawfé èk i ka pawdonnen tout moun ki wépanti èk ki ka fè sé chanjman-an ki nésésè. Èk ou ha fè sa! Osi chonjé, Jéhova pa kay janmen chonjé ében pini’w ankò pou péché i ha pawdonnen. (Sam 130:3) Bon, i enpòtan pou nou kwè sa, paski lè nou ni konfyans-lan ki Jéhova ha pawdonnen nou, sa kay édé nou pou doubout santi koupab èk nou kay sa kontiné sèvi Jéhova épi lajwa.

16. Poutji i danjéwé pou kontiné chonjé péché Jéhova ha pawdonnen? Bay an ègzanp. (Gadé pòtwé-a osi.)

¹⁶ Bon. Katjilé asou ègzanp sala: Lè an moun ka drayv an vwati, i pé gadé an miwè-a tanzantan pou wè sé bagay-la ki dèyè’y. Mé si i ka kontiné gadé dèyè’y sa byen danjéwé, paski i sa fè yon aksidan. Konsa pou’y drayv adan an mannyè ki sòv, i ni pou kontiné gadé chimen-an ki douvan’y. Èvèk an menm mannyè-a, i bon pou nou chonjé sé lèwè-a nou té fè an tan pasé, paski sa kay anpéché nou fè yo ankò. Mé si nou ka kontiné chonjé péché Jéhova ha pawdonnen, nou sa pèd lajwa nou èk nou pa kay bay Jéhova pli mèyè nou an sèvis nou pou li. Chonjé, nou asou chimen-an ki kay mennen nou an latè nèf-la, koté sé péché-a nou té fè an tan pasé ‘pa kay menm vini an lidé [nou]’. Alò annou fiksé asou bèl pwonmèt sala èk asou sèvis nou pou Jéhova.​—Izay. 65:17; Pwov. 4:25.

KONTINÉ POU NI KONFYANS-LAN KI, JÉHOVA ENMEN’W ÈK I PAWÉ POU PAWDONNEN’W

17. Pouki i enpòtan pou nou kontiné ni konfyans-lan ki, Jéhova enmen nou èk i pawé pou pawdonnen nou?

¹⁷ Bon. I byen enpòtan pou nou ni konfyans-lan ki, Jéhova enmen nou èk i toujou pawé pou pawdonnen nou. (1 Jan 3:19) Mé poutji? Ében sa sé paski, Satan kay kontiné éséyé fè nou kwè nou twò mové pou Jéhova enmen nou, èk i pa kay janmen pawdonnen nou. Èvèk i kay kontiné fè sa pou anpéché nou sèvi Jéhova. Èk kon nou ka vini pli pwé bout-la i kay twavay pli wèd pou fè sa, paski i sav tan’y byen kout. (Wév. 12:12) Kanmenm, nou vlé goumen kont Satan èk kontiné wèsté fidèl pou Jéhova!

18. Kisa ou sa fè pou fòtifyé konfyans ou ki, Jéhova enmen’w èk i toujou pawé pou pawdonnen’w?

¹⁸ Bon. Si’w vlé fòtifyé konfyans ou ki Jéhova enmen’w, i kay bon pou’w fè sé bagay-la nou té diskité an atik twant twa «33». Èvèk si’w vlé fòtifyé konfyans ou ki Jéhova pawé pou pawdonnen’w, i kay bon pou’w wéfléchi asou sa nou diskité an atik sala. Pou ègzanp, chonjé sa Jéhova menm di konsèné kawaktè’y èk mannyè i pawé pou pawdonnen. Èk pa obliyé, Jéhova konnèt nou pa pawfé. Konsa lè nou fè lèwè èk nou wépanti i kay moutwé nou mizéwikòd. Èk toujou chonjé, lè Jéhova pawdonnen i pa kay chonjé péché-a ankò. Bon. Si ou fè sé bagay sala, ou kay ni lakontantman, paski ou kay asiwé Jéhova ka moutwé’w mizéwikòd. Èk menm kon David, ou kay sa di Jéhova: “Mèsi Papa, paski ‘ou pawdonnen mwen èk ou pa pini mwen pou péché mwen’!”​—Sam 32:5.