Sa Ou Sa Fè Pou’w Pa Tonbé Anba Tantasyon

1. Kisa tout moun ka èspéyansé?

ÈS OU janmen santi ou vwéman anvi pou fè on bagay, mé ou sav sa ou vlé fè-a sé on bagay ki pa bon an zyé Jéhova? Ében pa kité sa dékouwajé’w, paskè tout moun ka èspéyansé sa. Wi, nou sé péchè, konsa nou tout ka ni dézi-a pou fè sa ki pa bon. Anfen, Bib-la ka di: “Lè ou anba tantasyon, sé pou ou sav i ni lòt moun ki anba menm sé tantasyon sala.” (1 Kòr. 10:13) Sa vlé di, la ni moun ki ka goumen wèd menm kon ou, pou yo pa tonbé anba tantasyon. Mé, ou pa ka goumen pa kò’w. Épi èd Jéhova ou sa kontiné goumen, èk ou sa ganyen batay-la kont vyé dézi.

2. Mansyonnen yonndé vyé dézi, adan di nou pé ni. (Gadé sé pòtwé-a osi.)

² Bib-la ka osi di nou: “Tantasyon ka vini anlè an moun lè i kité sé vyé dézi-a ki andidan tjè’y-la tjenbéʼy, èk mennenʼy alé fè bagay ki pa bon.” (Jémz 1:14) Vèwsé sala ka édé nou pou konpwann, si nou pa kontwolé kò nou, sé vyé dézi-a nou ni-an sa pousé nou pou fè bagay ki pa bon. Èk la ni diféwan mové dézi nou pé ni pou goumen épi. Pou ègzanp, adan di nou pé ni dézi-a pou kouwi vyé lavi, ében on nonm pé ni dézi-a pou kouché épi lòt nonm. Èk on fanm pé ni dézi-a pou kouché épi lòt fanm. Si on moun té ka gadé pònografi avan, yo pé ni dézi-a pou gadé sé vyé pòtwé sal sala ankò. Èk on moun ki té ka pwan dwòg, ében ki té ka bwè twòp, pé ni dézi-a pou fè sé bagay sala ankò. Konsa, nou ni pou goumen pou nou pa fè sa lachè-a vlé nou fè. Èk délè konba nou si tèlman wèd, nou pé santi menm kon zapòt Pòl, lè’y té di: “Mwen ka vlé fè sa ki bon, mé sé bagay ki mové mwen ka wivé fè.”​—Ronm 7:21.

3. Si la ni on vyé dézi ki ka toujou vini an lidé’w, kisa ou pé kwè?

³ Bon, si la ni on vyé dézi ki ka toujou vini an lidé’w, ou pé koumansé kwè ou annèk pa ni fòs-la, pou’w tjébé fò anba tantasyon sala. Osi, ou pé kwè la pa ni pyès èspwa pou ou, paskè Jéhova kay tounen do’y asou’w senpliman paski ou ka ni vyé dézi. Mé ou sa asiwé, sa pa vwé pyès! Èk pou édé nou konpwann sa byen, nou kay wéponn sé dé «2» kwèstyon sala: «1» Ki moun ki vlé’w kwè ou pa ni fòs-la pou’w tjébé fò anba tantasyon? Èk «2», kisa ou sa fè pou’w pa tonbé anba tantasyon?

SA “DÈNMOU-AN” VLÉ NOU KWÈ

4. (a) Kisa Satan vlé nou kwè? (b) Ki mannyè nou sa ni fòs pou tjébé fò anba tantasyon?

⁴ Satan vlé nou kwè, nou pa ni asé fòs pou nou sa tjébé fò anba tantasyon. Èk Jézi té konnèt sé sa Satan ka fè. Sé pou sa i té di sé disip li-a pou pwédyé, èk mandé Bondyé pou “pa kité [yo] tonbé anba tantasyon, mé délivwé [yo] anba lanmen Denmou-an.” (Maf. 6:13) Wi, Satan Denmou-an ka di kon sa, pyèsonn pa kay wèsté fidèl pou Jéhova lè yo jwenn tantasyon. (Jòb 2:4, 5) Ès ou ka konpwann sa ki ka fèt la? Satan kité vyé dézi’y fè’y tounen do’y asou Jéhova. Èvèk i ka kwè, lè nou jwenn tantasyon pou fè sa ki pa bon, nou kay fè menm kon li, èk tounen do nou asou Jéhova. Satan té ka jis kwè, i té sa tanté Gason Bondyé pou fè sa ki pa bon! (Maf. 4:8, 9) Mé ès sa vwé? Ès nou vwéman pa ni fòs-la pou tjébé fò anba tantasyon? Ében, si nou ka dépan asou kò nou, nou pa kay ni fòs. Mé dépi nou dépan asou Jéhova, nou kay ni fòs-la nou bizwen pou nou sa goumen kont népòt vyé dézi. Paskè kon zapòt Pòl té di: “Tout pouvwa-a menm sé an Bondyé i yé.”​—2 Kòr. 4:7.

5. Pouki nou sa di, Jéhova ni konfyans ki, nou sa goumen kont vyé dézi?

⁵ Paditan Satan ka di, nou kay tonbé anba tantasyon, Jéhova ni konfyans ki, nou kay tjébé fò lè nou jwenn tantasyon. Ki mannyè nou sav sa? Ében, Jéhova pa sa manti. Èk i di, on gwan popilas moun kay chapé anba gwan twibilasyon-an. I osi di, gwan popilas moun sala té ‘ja lavé had yo, èk yo blanchi’y an san Ti Mouton-an.’ (Wév. 7:9, 13, 14) Sa vlé di, Bondyé ka gadé gwan popilas-la kon moun ki ka fè sa ki dwèt an zyé’y. Konsa la pa ni pyès dout ki, Jéhova sav nou sa goumen kont mové dézi, pou nou sa wèsté nèt an zyé’y.

6-7. Ki lòt bagay Satan vlé nou kwè?

⁶ On lòt bagay Satan vlé nou kwè sé sa, la pa ni pyès èspwa pou nou. Wi, i ka éséyé pou fè nou kwè, Jéhova kay tounen do’y asou nou senpliman paski, nou ka ni vyé dézi. Mé katjilé asou sa: Sé Satan ki pa ni èspwa. Jéhova ja jijé’y, èk i pa vo lavi étonnèl. (Jen. 3:15; Wév. 20:10) Mé i pa vlé nou menm twapé lavi étonnèl. Sé pou sa i ka éséyé pou fè nou santi akwèdi nou pa ni èspwa. Kanmenm, sa pa vwé. Nou ni èspwa. Èk Bib-la ka ban nou asiwans-lan ki, Jéhova vlé édé nou. Kon lévanjil-la ka di, Jéhova “pa vlé pyèsonn péwi, mé i vlé tout moun wépanti péché yo.”​—2 Pita 3:9.

⁷ Konsa si nou ka kwè nou pa ni fòs-la pou tjébé fò anba tantasyon, ében nou ka kwè, la pa ni pyès èspwa pou nou, nou ka kwè sa Satan vlé nou kwè. I bon pou nou konpwann ti pwen sala byen, paskè a lè sala nou kay sa fòtifyé détèminasyon nou pou nou doubout fò kont Satan.​—1 Pita 5:8, 9.

MANNYÈ PÉCHÉ-A NOU ÉWITYÉ HÒD ADANM SA FÈ NOU SANTI

8. Apa di sé mové bagay-la nou ka fè-a, ki lòt bagay mo pawòl-la péché vlé di? (Sam 51:5) (Osi, gadé ti sèksyon-an “Sa Mo Pawòl Sala Vlé Di.”)

⁸ Apa di Satan, la ni on lòt bagay ki sa fè nou kwè nou pa ni fòs-la pou tjébé fò anba tantasyon, èk la pa ni èspwa pou nou. Kisa sa yé? Ében bagay sala sé péché-a nou té fèt épi-a. Wi, péché-a nou éwityé hòd pwèmyé pawan nou, Adanm épi Èv.a​—Jòb 14:4; li Sam 51:5.

9-10. (a) Lè Adanm épi Èv vini péchè, ki mannyè sa afèkté yo? (Gadé pòtwé-a osi.) (b) Ki mannyè péché-a nou éwityé hòd Adanm ka afèkté nou?

⁹ Bon, lè Adanm épi Èv vini péchè, ki mannyè sa afèkté yo? Ében Bib-la ka moutwé, apwé yo dézobéyi Jéhova, yo koud fè’y fig fwans ansanm pou kouvè kò yo. Èk lè yo tann vwa Jéhova, yo alé séwé. Liv-la Insight on the Scriptures ka fè on bèl ti pwen asou sa. I di: “Péché annékòz [Adanm épi Èv] pou santi koupab. Yo té antjèt, yo pa té ka santi konfòtab, èk yo té hont.” Konsa lè Adanm épi Èv péché, yo twapé kò yo adan on mové sitiwasyon, èk yo pa té sa chapé. Sé akwèdi yo té laklé andidan on kay, èk yo pa té sa sòti.

¹⁰ Kanmenm, nou pa an menm sitiwasyon-an Adanm èk Èv té yé-a. Paskè, gwan mèsi sakwifis Jézi, nou sa twapé pawdonnasyon pou péché nou, èk nou sa ni on konsyans ki nèt an zyé Jéhova. (1 Kòr. 6:11) Mé wonnman, nou éwityé péché hòd Adanm. Èk péché sala ka afèkté nou menm mannyè i té ka afèkté Adanm. I ka fè nou santi koupab, i ka fè nou santi antjèt, i ka fè nou santi hont, èk nou pa ka santi kò nou konfòtab. Anfen, Bib-la ka moutwé, péché-a Adanm ban nou-an, ka kondwi nou. Wi, i “ka kondwi jik anho sé moun-an ki pa té péché menm mannyè Adanm té fè-a.” (Ronm 5:14) Vwéman, sa pa anyen ki bon. Mé, sa pa vlé di nou pa kay sa janmen fè sa ki dwèt an zyé Jéhova.

11. Ès nou oblijé fè sa ki pa bon, èk pouki ou di sa? (Ronm 6:12)

¹¹ Péché-a nou éwityé hòd Adanm, ka fè nou santi akwèdi nou pa ni fòs-la pou tjébé fò anba tantasyon. Mé sé pa pou nou janmen kwè sa, paskè Bib-la ka di nou pou pa kité péché “kondwi” nou. (Li Ronm 6:12.) Konsa, menm si nou ni dézi-a pou fè on bagay ki pa bon, nou pa oblijé fè’y. (Gal. 5:16) Èk Jéhova konnèt nou sa tjébé fò anba tantasyon. Sé sa ki fè i ka mandé nou pou viv on lavi ki nèt an zyé’y, èk i ka di nou pou pa mété kò nou èslav anba péché.—Dito. 30:11-14; Ronm 6:6; 1 Tèsa. 4:3.

12. Lè nou ka santi akwèdi Jéhova kay kondanné nou senpliman paski nou ni dézi-a pou fè sa ki pa bon, kisa i bon pou chonjé?

¹² Sé menm péché-a nou éwityé hòd Adanm, ki ka fè nou santi akwèdi, Jéhova kay kondanné nou senpliman paski nou ni dézi-a pou fè sa ki pa bon. Mé, sa pa vwé. Konsa, lè’w ka santi kon sa, i bon pou chonjé, Jéhova ka konpwann sitiwasyon nou. I sav nou sé péchè. (Sam 103:13, 14) Èk i konnèt mannyè péché-a nou éwityé hòd Adanm ka afèkté chak di nou, èk pousé nou pou fè sa ki pa bon. Wi, Bondyé “konnèt tout bagay.” (1 Jan 3:19, 20) Konsa vyé dézi kay toujou vini an lidé nou. Mé dépi nou pa fè sé mové bagay-la nou vlé fè-a, nou kay sa wèsté nèt an zyé Jéhova. Ki mannyè nou sav sa?

13-14. Ès Jéhova kay tounen do’y asou nou senpliman paskè, vyé dézi ka vini an lidé nou? Èspliké wépons ou.

¹³ Bon, nou pa sa anpéché vyé dézi vini an lidé nou, mé nou sa kontwolé kò nou pou nou pa fè sé mové bagay-la ki ka vini an lidé nou-an. Annou pwan sé fwè-a ki té an kongwigasyon Kòrint pou ègzanp. Avan yo té vini Kwityen, adan di yo té ka kouché épi lòt nonm. Mé lè yo aksèpté lavéwité-a, yo doubout fè sé mové bagay sala. Ès ou kwè, dézi-a pou kouché épi lòt nonm pa janmen viwé an lidé sé fwè sala ankò? Mé non! Zapòt Pòl té di, sé konsa yo té yé. Èk souvan, kalité dézi sala sé on bagay ki byen wasiné adan on moun. Konsa asiwé, tanzantan yo té kay ni menm vyé dézi-a. Mé, yo té vlé plè Jéhova, konsa yo té ka kontwolé kò yo pou yo pa fè sé mové bagay sala ankò. Èk Jéhova té plè épi yo. I té ka gadé yo kon moun ki té nèt an zyé’y. (1 Kòr. 6:9-11) Jéhova sa fè menm bagay-la ba’w.

¹⁴ Wi, ou sa ganyen a bout népòt vyé dézi ou ka goumen épi. Menm si ou pa sa anpéché dézi-a vini an lidé’w, ou sa kontwolé kò’w pou’w pa “fè népòt bagay ki vini an [lidé’w].” (Èfés. 2:3) Mé ki mannyè ou sa fè sa?

SA NOU SA FÈ POU NOU PA TONBÉ ANBA TANTASYON

15. Pou nou pa tonbé anba tantasyon, kisa chak di nou sipozé konnèt?

¹⁵ Pwèmyéman, pou nou pa tonbé anba tantasyon, chak di nou sipozé konnèt kisa ki fèblès nou, èk nou ni pou pwan wèskonsabilité pou aksyon nou. Konsa, pa “kwennen kò’w.” (Jémz 1:22) Èk sé pa pou’w blanmé lézòt, ében fè èskiz pou sa’w fè ki pa bon nonpli. Pou ègzanp, si’w ni dézi-a pou bwè twòp alkòhòl, pa di, ‘lòt moun ka bwè pli pasé mwen.’ Ében si’w ni dézi-a pou gadé pònografi, pa di, ‘si madanm mwen té ka moutwé mwen pli afèksyon, mwen pa té kay ni pyès dézi pou gadé pònografi.’ Paskè, si sé kon sa ou ka katjilé, i kay pli ézé pou’w tonbé anba tantasyon-an. Mé si’w konnèt fèblès ou, èk ou ka pwan wèskonsabilité pou sa’w fè, i kay pli ézé pou’w tjébé fò anba tantasyon.​—Gal. 6:7.

16. Ki mannyè ou sa fòtifyé détèminasyon’w pou’w pa tonbé anba tantasyon?

¹⁶ Bon, lè’w ja konnèt sé diféwan bagay-la ki ka tanté’w, ou kay osi ni pou fòtifyé détèminasyon’w pou’w pa tonbé anba sé tantasyon sala. (1 Kòr. 9:26, 27; 1 Tèsa. 4:4; 1 Pita 1:15, 16) Ki mannyè ou sa fè sa? Éséyé pou’w òbzòvé kisa ki ka tanté’w pli, ében ki lè tantasyon-an ka pli fò. Pou ègzanp, ès i ka pli fò lè’w las, ében i ka pli fò lannwit? Lè’w konnèt sé bagay sala, ou kay sa pwépawé kò’w andavans. Wi, avan ou jwenn tantasyon-an, désidé kisa ou kay fè, ében kisa ou kay di, pou’w pa tonbé anba’y.​—Pwov. 22:3.

17. Kisa nou sa apwann an ègzanp Jozèf? (Jennésis 39:7-9) (Gadé sé pòtwé-a osi.)

¹⁷ Annou pwan ègzanp Jozèf. Lè madanm Pòtifa té vlé fòsé Jozèf pou kouché épi’y, Jozèf pa gaspiyé pyès tan pou’y di madanm-lan, non! (Li Jennésis 39:7-9.) Kisa nou sa apwann an ègzanp Jozèf? Ében i a klè, Jozèf té ja fè lidé’y andavans, pou’y pa kouché épi madanm on lòt nonm. Konsa lè madanm Pòtifa vini asou’y, i té ja konnèt kisa pou’y fè. An menm mannyè-a, si’w ja fè lidé’w pou’w obéyi Jéhova an tout bagay, i kay pli ézé pou’w fè sa ki dwèt an zyé’y, lè’w anba tantasyon.

‘KONTINÉ GADÉ LAVI’W’

18. An ling épi 2 Kòrint 13:5, ki lòt bagay nou sa fè pou nou pa tonbé anba tantasyon?

¹⁸ Bib-la ka ankouwajé nou pou kontiné “gadé lavi [nou].” Sa vlé di, nou ni pou toujou ègzanminé kò nou, pou wè si nou ka doubout fò an lafwa-a. Èk sa sé on lòt bagay ki kay édé nou pou pa tonbé anba tantasyon. (Li 2 Kòrint 13:5.) Konsa, tanzantan ègzanminé katjil ou épi aksyon’w, èk fè sé chanjman-an ki nésésè. Pou ègzanp, apwé ou tjébé fò anba on tantasyon, ou sa mandé kò’w: ‘Ki otan tan i pwan, avan mwen di non?’ Èk si’w wéyalizé ou pa té di non la menm, pa kité sa dékouwajé’w. Pito sa, katjilé asou sa ou sa fè pou’w aji pli mèyè lòt kou-a on tantasyon vini asou’w. Osi, ou sa mandé kò’w sé kwèstyon sala: ‘Lè on vyé katjil vini an lidé mwen, ès mwen sa tiwé’y an lidé mwen pli vit? Ès sé bagay-la mwen ka fè pou anmizé kò mwen, ka fè’y pli difisil pou mwen tjébé fò anba tantasyon? Lè mwen wè on bagay ki pa pwòp, ès mwen ka doubout gadé’y la menm? Ès mwen ka konpwann, tout sa Jéhova ka mandé mwen pou fè, sé bagay ki kay pòté mwen bennéfis?’​—Sam 101:3.

19. Si’w ka fè bon disizyon an bagay ki piti, ében bagay ou ka kwè ki pa tèlman enpòtan, ki mannyè sa kay édé’w?

¹⁹ Bon, lè’w ka ègzanminé kò’w èk ou wè bagay ou bizwen chanjé, pa fè èskiz pou kò’w. Paskè Bib-la ka di, ‘tjè-a pli twèt pasé tout lòt bagay èk i pa bon pyès.’ (Jér. 17:9) Èk Jézi té di: ‘Vyé lidé ka sòti andidan tjè on moun.’ (Maf. 15:19) Annou pwan yon ègzanp pou édé nou konpwann pwen sala. Annou di, on moun té ka gadé pònografi, mé i doubout vyé labitid sala. Apwé tjèk tan i sa di an tjè’y, i sa gadé yonndé pòtwé ki pa tèlman sal. Ében i sa di, si’y ka katjilé asou vyé bagay sal an lidé’y, la pa ni anyen mové an sa, dépi i pa fè yo. Mé si’y kontiné katjilé asou sé bagay sal sala, sé akwèdi i ka fè plan andavans ‘pou’y fè sa lachè-a vlé’y fè-a.’ (Ronm 13:14) Kisa ou sa fè pou’w pa tonbé an zatwap sala? Ében, si’w ka fè bon disizyon an bagay ki piti, ében bagay ou ka kwè ki pa tèlman enpòtan, ou kay sa fè bon disizyon an lòt bagay. Tèl kon, lè’w anba tantasyon pou fè bagay ki ka déplè Jéhova.b Konsa, widjèkté tout vyé katjil.

20. Ki bèl èspwa nou ni pou tan ki ka vini, èk kisa Jéhova ka fè ban nou dépi apwézan?

²⁰ Kon nou apwann an atik sala, Jéhova ka ban nou sa nou bizwen pou nou sa tjébé fò anba tantasyon. Èk gwan mèsi wanson-an, nou ni bèl èspwa-a pou viv an pawadi asou latè-a pou tout tan. Tjè nou épi lidé nou kay vini nèt a lè sala, èk sé pa dé kontan nou kay kontan pou sèvi Jéhova! Mé paditan nou ka èspéyé tan sala, nou sa asiwé, épi èd Jéhova nou sa kontiné goumen kont vyé dézi, èk nou sa ganyen batay-la!