Gaˇ kawˆ 8
Nymˇ jiˇ laꞈ kʼoeˇ maˬ muiˬ˗eu jeˬ pyeuꞈ laˇ ngeh
“Lawˬ haw˗eu gʼawˬ mya jeˬ˗ahˇ ya daˬ˗eu baˬ da neh, nymˬ˗mˇ tiˬ kʼehˬ laꞈ kʼoeˇ naw maꞈ ya noeˬ shaˬ kʼawꞈ, Miˬyehˇ neh lehˬ hmˬ taˬ˗euˬ kʼoeˇ˗ahˇ laꞈ kʼaˬ cehˇ˗awˬ.”—1 Beˬtuˆluˆ 1:6
Laꞈ kʼaˬ cehˇ˗eu nymˇ jiˇ pyeuꞈ laˇ ni leh jeh luꞈ gaˇ, maˬ noeˬ taˬ˗euˬ jeˬ pyeuꞈ laˇ˗awˇ, nawˬ˗euˬ nymˇ jiˇ laꞈ kʼaˬ cehˇ˗eu jeˬ˗ahˇ, laˆ cawˆ laˇ nya˗eu meh. (Dawˬtsoˆtsoˆ˗eu 9:11) Shaˬ zahˬ puˬ le ngeh jawˇ, nui gaˬ ahˇ˗eu Miˬyehˇ aˬ dui˗ahˇ caw ba nehˬ meh. Jaˇliꞈ mehˬ nehˬ˗eu jeˬ˗ahˇ mˇ caw naˇ, nawˇ hawˇ˗eu nawˬ˗euˬ nymˇ jiˇ aˇ naˆ ni doeˇ˗eu jeˬ˗ahˇ ya tahˬ puˬ kʼawꞈ, buˬ iˇ dzeuˇ iˇ nya˗eu meh.
1 Yeˬhawˇbaˬ Miˬyehˇ˗ahˇ gʼoe˗awˬ
Jaˇliꞈ ehˇ˗eu: “Noeˬ shaˬ noeˬ zahˬ˗eu dawˬ tawˆ luꞈ Miˬyehˇ˗ahˇ a nehˬ˗awˬ . . . aˬ yawꞈ naw maꞈ˗ahˇ ngehˬ gʼeh” nehˬ meh. (1 Beˬtuˆluˆ 5:7) Shaˬ zahˬ heu Miˬyehˇ neh bi pyeuꞈ laˇ˗euˬ maˬ ngeuˇ˗a lehˇ, aˬ myah luꞈ noeˬ taˬ. (Yaˬkoˆ 1:13) Nawˇ Miˬyehˇ nehˬ˗ehˇ cawˬ yaw muiˬ˗ehˇ cawˬ naˇ, Miˬyehˇ kʼawꞈ nawˬ˗ahˇ caw ba nehˬ laꞈ meh. (Iˇsaˬyaˇ 41:10) “Nawˬ˗euˬ shaˬ zahˬ dawˬ tawˆ luꞈ aˬ yawꞈ˗ahˇ dzawˇ nehˬ˗awˬ.” —Ja ceuˬ 62:8.
Jaˇliꞈ˗ahˇ yawˬ nah na luꞈ gui˗awˇ neh pyehˆ tseˇ naˇ gʼaˬ za laˇ meh. “Shaˬ zahˬ dawˬ tawˆ luꞈ laꞈ kʼoeˇ Miˬyehˇ aˬ dui˗ahˇ” aˬ joˆ˗ehˇ “ngehˬ gʼeh” nehˬ laꞈ nga lehˇ ya siˬ tehꞈ˗a. (2 Gawˇliˬtu 1:3, 4; Loˇmaˆ 15:4) “Maˬ noeˬ doˆ coeˇ˗eu Miˬyehˇ˗euˬ nui saˇ oꞈ˗eu jeˬ” biꞈ ma lehˇ saˇ jaˇ dzaˬ taˬ˗euˬ meh.—Piˇliˇpiˆ 4:6, 7, 13.
Nawˇ mˇ nya˗eu jeˬ:
Nui ma saˇ˗awˇ yaw muiˬ˗ehˇ shaˇ noeˬ nya ni, Miˬyehˇ˗ahˇ guiˬ lahˬ shaˇ˗awˬ
Aˬ jeˬ jeˇ jahˇ nya nga lehˇ shaˇ noeˬ poˆ˗awˇ, muiˬ dzehˬ˗eu kahˇ˗ahˇ tseˇ˗awˬ
2 Yawˬ ha˗euˬ mawˇ do hawˇ˗eu nymˇ jiˇ˗ahˇ ngehˬ gʼeh
Jaˇliꞈ ehˇ˗eu: “Nui noeˬ dehꞈ˗eu tsawˇ haˬ tsawˇ gahˇ za˗awˇ, zaˬ siˬ naˬ bawˇ tsawˇ gahˇ ciˬ kʼmˇ˗eu meh.” (Dawˬdaˬ 18:15) Nymˇ jiˇ laꞈ kʼoeˇ jawˇ˗eu deuˬ, aˬ jeˬ loˬ nga lehˇ haw˗awˬ. Yawˬ jeˬ na luꞈ˗ahˇ siˬ nya˗eu gʼaˇ duˬ, aˬ yawꞈ maꞈ nehˬ˗ehˇ ngehˬ cawˬ˗awˬ. Aˬ yawꞈ maꞈ ngehˬ gaˇ jiˇ ni naˇ haˬ˗awˬ. —Dawˬdaˬ 20:5.
Nawˇ gaˬ˗eu tsawˇ haˬ shiˇ ngeh, ngoeˇ doˆ leꞈ˗eu gʼaˇ duˬ taˬ shaꞈ dawˇ. Yeˬsuˇ kʼawꞈ “myaˆ biˇ doˆ” yaꞈ˗euˬ meh. (Yoˇhaˬ 11:35; Dawˬtsoˆtsoˆ˗eu 3:4) Gʼaˬ naˬ naˬ˗awˇ yuꞈ kʼaˆ dehˆ˗eu heu naˇ, aˇ yehˇ huiˬ˗eu meh. (Dawˬtsoˆtsoˆ˗eu 4:6) Heu˗aˬ, maˬ muiˬ˗eu jeˬ˗ahˇ oˇ daˬ coeˇ˗eu meh.
Nawˇ mˇ nya˗eu jeˬ:
Nawˬ˗euˬ nymˇ jiˇ laꞈ kʼoeˇ jawˇ˗eu deuˬ nehˬ˗ehˇ, yawˬ jawˇ na luꞈ ngehˬ cawˬ˗awˬ. Teu loꞈ˗ehˇ jahˇ naˇ, gaˇ kawˆ doˆ laˇ ngeh, aˬ yawꞈ maꞈ bya cehˆ ni ngehˬ cawˬ laˇ peuˬ˗eu meh
Nawˇ loꞈ˗ehˇ gaˇ kawˆ pyeuꞈ luꞈ˗eu deuˬ nehˬ˗ehˇ ngehˬ cawˬ˗awˬ
3 Aˬ cawˬ caw ba nehˬ laꞈ˗eu jeˬ˗ahˇ ha geuꞈ
Jaˇliꞈ ehˇ˗eu: “Cawˬ yaw muiˬ yamˬ maˬ tseˇ ni gʼoeˇ˗awˇ, mehˇ nmˇ˗aˬ, shaˬ zahˬ haw piˇ˗eu gʼaˇ duˬ meh.” (Dawˬdaˬ 17:17) Cawˬ deuˬ nawˬ˗ahˇ caw ba nehˬ mawꞈ meh. Ehˇ kʼawꞈ, aˬ joˆ˗ehˇ ya caw ba˗eu lehˇ maˬ siˬ nya nga. Teu miˇ neh, loˬ˗eu jeˬ cawˬ deuˬ˗ahˇ ehˇ nehˬ˗awˬ. (Dawˬdaˬ 12:25) Jaˇliꞈ zahˇ˗ahˇ aˬ joˆ˗ehˇ ya zmˬ˗eu lehˇ, Jaˇliꞈ˗ahˇ yaw kʼaˆ˗ehˇ siˬ nya˗eu deuˬ neh bi caw ba˗awˬ. Aˬ yawꞈ maꞈ neh caw ba nehˬ˗euˬ heu naˇ, nawˬ˗euˬ gʼaˇ duˬ gaˇ dahˇ tsoeˬ tehꞈ˗a.—Yaˬkoˆ 5:14.
Miˬyehˇ˗euˬ saˇ jaˇ dawˬ˗ahˇ jah˗eu deuˬ nehˬ˗ehˇ aˬ myah luꞈ cawˬ cawˬ naˇ, nawˇ loˬ˗eu jeˬ˗ahˇ za meh. Kʼoeˇ naˇ, nawˇ jiˇ ni gʼaˬ baˬ luꞈ˗eu deuˬ˗ahˇ ya caw ba˗eu meh. Yeˬhawˇbaˬ hawˇ˗eu aˬ yawꞈ˗euˬ saˇ jaˇ dawˬ˗ahˇ, nawˇ aˬ jeˬ miˇ neh jah le lehˇ, aˬ yawꞈ maꞈ˗ahˇ ja nehˬ˗awˬ. Gʼaˬ baˬ˗eu deuˬ˗ahˇ caw ba˗eu gʼaˇ duˬ noeˬ tsoˆ taˬ˗awˬ. Tiˬ gʼaˬ tehꞈ˗ehˇ yaw ceuˆ ceuˆ lehˇ maˬ jawˇ ni, nawˬ˗ahˇ gaˬ˗awˇ kʼahˬ lahˇ˗eu deuˬ nehˬ˗ehˇ tiˬ kawˆ loꞈ˗ehˇ jawˇ˗awˬ.—Dawˬdaˬ 18:1; 1 Gawˇliˬtu 15:58.
Nawˇ mˇ nya˗eu jeˬ
Cawˬ yaw gʼoeˇ deuˬ˗ahˇ ja nehˬ˗awˬ. Aˬ yawꞈ maꞈ neh caw ba nehˬ laꞈ˗euˬ jeˬ˗ahˇ ha geuꞈ˗awˬ
Nawˇ aˬ jeˬ loˬ nya lehˇ dawˇ coe ni ehˇ nehˬ˗awˬ