Jaˇliꞈ dzaw zaˬ˗ahˇ maˬ muiˬ˗eu cawˬ deuˬ˗ahˇ byehˇ nya ni caw ba nehˬ

Jaˇliꞈ dzaw zaˬ deuˬ Yeˬhawˇbaˬ nehˬ˗ehˇ cawˬ cawˬ mawꞈ naˇ, muiˬ˗eu cawˬ deuˬ nehˬ˗ehˇ cawˬ ya cawˬ˗eu meh. (Ja ceuˬ 15:1, 4) Muiˬ˗eu cawˬ deuˬ naˇ, aˬ yawꞈ maꞈ˗ahˇ yaw tsaˬ yaw dawˇ dawˇ˗ehˇ dehꞈ nya ni caw ba nehˬ˗eu meh.—Dawˬdaˬ 13:20; lff dzaw deuˆ 48.

Aˬ dui Jaˇliꞈ dzaw zaˬ˗ahˇ maˬ muiˬ˗eu cawˬ deuˬ˗ahˇ byehˇ ni caw ba ngeh, aˬ yawꞈ maꞈ˗euˬ nui ma˗ahˇ ya noeˬ keuˆ nehˬ meh. Aˬ jeˬ miˇ neh ehˇ naˇ, aˬ yawꞈ maꞈ˗euˬ gʼaˇ duˬ cawˬ yaw oeˇ deuˬ˗ahˇ byehˇ dzeh˗eu maˬ awˬ˗eu kʼawꞈ pyeuꞈ nya meh. Teu miˇ neh Jaˇliꞈ mehˬ ngeh aˬ yawꞈ˗ahˇ kʼahˬ lahˇ˗awˇ maˇ diˇ caw ba mawꞈ˗eu lehˇ bi siˬ. Aˬ yawꞈ˗ahˇ sahˬ boꞈ sha nehˬ nya˗awˇ, naˬ gaˬ neh ngehˬ cawˬ nya˗eu uˬ taꞈ, aˬ yawꞈ jawˇ gaˇ jiˇ gʼa iˇ nya meh. Dzaw zaˬ gʼaˬ huiˬ laˇ mahˇ laˇ luꞈ ngeh, mehˇ nmˇ deuˬ nehˬ˗ehˇ gʼoeˇ ni jiˇ caw ba nehˬ nya meh. Heu loꞈ˗ehˇ jahˇ naˇ aˬ yawꞈ maꞈ cawˬ yaw oeˇ deuˬ˗ahˇ byehˇ dzeh kʼawꞈ, cawˬ yaw shuiꞈ gʼawˬ mya gʼaˬ baw laˇ ngaˇ lehˇ mawˇ leˇ˗eu meh. (Maˬkuˆ 10:29, 30) Aˬ dui jiˇ Yeˬhawˇbaˬ˗euˬ nymˇ jiˇ laꞈ kʼoeˇ yaw shuiꞈ deuˬ lahˬ laˇ gaˇ ya mawˇ ngeh, laˬ kʼaˬ cehˇ˗eu meh.

Nawˬ˗euˬ Jaˇliꞈ dzaw zaˬ˗ahˇ maˬ muiˬ˗eu cawˬ deuˬ˗ahˇ byehˇ nya ni caw ba nehˬ lehˇ ehˇ˗eu biˬdiˬoˬ haw gʼaˬ naˇ, naˇ haˬ˗eu jeˬ heu deuˬ˗ahˇ dawˬ kʼoꞈ biꞈ.

• Maˬ muiˬ˗eu deuˬ nehˬ˗ehˇ cawˬ cawˬ˗eu jeˬ heu naˇ, aˬ jeˬ˗ahˇ ehˇ mawꞈ˗eu nga?—1 Gawˇliˬtu 15:33

• Jeꞈ Ka li zaˬ deuˬ dzaˬ byawˬ dawˇ byawˬ˗eu aˇ baˇ˗ahˇ, aˬ joˆ˗ehˇ gʼeh˗eu lehˇ noeˬ taˬ˗euˬ nga?

• Niˇtaˬ, Jeꞈ˗ahˇ maˬ muiˬ˗eu cawˬ deuˬ˗ahˇ byehˇ ni, aˬ joˆ˗ehˇ caw ba nehˬ˗euˬ nga?