PONJI MIR 12

Lembang’o ma bikonyi kara imediri asu niponjo Biblia?

Ma juwodho iwi karatasi

Ponjo Biblia tie ku kony man bero lee mandha, ento saa moko ecopo bedo yot ungo niponje. Saa mange icopo caku penjiri ka nyo andha ebicopere iri nia imediri niponjo Biblia. Re pirang’o pire tek nia itim kero m’imediri ko asu niponjo Biblia? Ang’o ma bikonyi kara kadok peko kunoke macero nuti de, kud iwek ponjine? Wanen.

1. Pirang’o ponjo Biblia tie ku kony lee?

“Lembe pa Mungu e kwo man etie ku tego.” (Juebrania 4:12) Biblia tie ku kony lee pilembe ebenyutho iri paru pa Mungu man bende nia Mungu meri man ebedieng’ piri. M’uweko maeno, Biblia ubekonyi kara ibed ku ng’eyong’ec iwi lemandha, man kara ibed ku rieko man genogen pi kwo ma rondo ku rondo nindo m’ubino. Re m’ulund usagu zoo, ebekonyi kara idok jarimb Yehova ma ceng’ini. Kan ibeponjo Biblia, nwang’u ibeweko tego pare uyik kwo peri udok ma ber nisagu.

2. Pirang’o wacikara ning’eyo nia lemandha mi Biblia pire tek lee?

Lemandha mi Biblia tie ve lonyo moko m’ukanere, uketho Biblia ubekwayu nia ‘wang’iew lemandha man kudi [walwore].’ (Lembrieko 23:23) Ka wiwa ubewil ungo nia lemandha mi Biblia pire tek lee, wabitimo kero mwa ceke pi niponje kadok nyo wabenwang’ara i wang’ peko kunoke macero de.—Som Lembrieko 2:4, 5.

3. Yehova copo konyi nenedi kara imediri asu niponjo Biblia?

Yehova en e Jacwic peri man Jategokpo. Pieno eng’eyi ma ber m’usagu man ebemito ekonyi kara iponj lembe i wiye. Ecopo miyo iri “ava man kero mi timo yeny pare.” (Som Jufilipi 2:13.) Dong’ tekene saa moko ubekwayu nia imed amora peri mi ponjo Biblia kunoke mi tiyo ku gin m’ibeponjo, ng’ey nia Yehova tie ayika nikonyi. Tekene itie ku yeny mi tego mange kara ituc nivoyo macero kunoke jai ma jubejai ko iri, ng’ey nia etie ayika nimiyo iri tego maeno. Kende kende bed irwo i bang’e areri pi nikwayu ekonyi kara imediri niponjo Biblia.—1 Juthesaloniki 5:17.

MED NYANG’ PERI

Wanen kawoni gin ma copo konyi kara imediri asu niponjo Biblia, kadok nyo lembe sagu i weng’i kunoke nyo jumange gibediyi nia iwek niponjo de. Wabineno bende kite ma Yehova copo konyi ko kara imediri asu i weng’i ku ponji peri.

4. Keth ponjo Biblia ubed ni lembe ma kwong’a i kwo peri

Saa moko wacopo nwang’u nia lembe upong’ lee i wang’wa ma dong’ wambe ku saa mi ponjo Biblia. Wacopo timo ang’o saa maeno? Som Jufilipi 1:10, man i ng’eye wuwec iwi penji m’ulubo e:

Iparu nia “lembe ma pigi tek nisagu” i kwo mwa copo bedo lembang’o?
Icopo timo ang’o kara ponjo Biblia ubed ni lembe ma kwong’a i kwo peri?

A. Cal ma tung’ tung’ m’ubenyutho kite ma juroyo ko kidi ku kwiyo i bumba. 1. Judhuro kwiyo man kidi ma dongo. 2. Bumba uyenyo pong’o ku kwiyo. 3. Kidi ma dongo umondo i bumba, donge ke uoy i ng’om.

B. Cal: 1. Judhuro kwiyo man kidi ma rom. 2. Bumba ma rom uyenyo pong’o kawoni ku kidi ma dongo. 3. Kwiyo umondo asu i bumba i ng’et kidi man i wiye man epong’o bumbane pik. Dong kwiyone moko udong’ asu nyanok i ng’om.

Kan idaru konjo kwiyo i bumba kunoke i usawu moko man ibemito iroy bende kidi i iye, kidi moko bimondo ngo
Ento kan ilar iroyo kidi zoo, kwiyo ma pol bidonwang’u bende kaka. Kumeno bende, kan ilar iketho “lembe ma pigi tek nisagu” i kabedo ma kwong’a i kwo peri, ibitimogi ceke man ibidonwang’u saa mi timo bende lembe mange

Ponjo Biblia pong’o yeny mwa mi tipo, niwacu ava ma dit ma watie ko mi ng’eyo Mungu man mi timo ire. Som Matayo 5:3, man i ng’eye wuwec iwi penji m’ulubo e:

Bero ang’o ma waromo nwang’u ka waketho ponjo Biblia ubed ni lembe ma kwong’a i kwo mwa?

5. Mediri asu kadok jubejai de

Saa mange, dhanu moko copo caku nituro cwinyi kara iwek niponjo Biblia. Kenen lembe ma Francesco ukadhu i iye. Nen VIDEO, man wuwec iwi penji m’ulubo e:

VIDEO: Bero mi mediri asu (5:22)

Cal mi video ‘Bero mi mediri asu.’ Francesco ubeweko jurimbe i ng’ei m’eyero igi nia dong’ ebidikere kendo ngo kugi.

I video maeni, min Francesco man jurimbe gitimo ang’o kinde m’ekoro igi pi lembe m’ebeponjo?
Bero ma kani m’edok enwang’u pilembe eweko ngo niponjo Biblia?

Som 2 Timoteo 2:24, 25, man i ng’eye wuwec iwi penji m’ulubo e:

Paru mi wedi peri ku jurimbi utie ang’o iwi Biblia m’ibeponjo?
Nimakere ku verse ma waay wasomo, kwayu ibed idwok lembe nenedi ka ng’atu moko ubefoyo ngo ku Biblia m’ibeponjo? Pirang’o ibeyero kumeno?

6. Jengiri iwi Yehova nia ebikonyi

Ka wabecoro ceng’ini i vut Mungu, ava mi nyayu mutoro i iye medere i kumwa. Ento asu, ecopo bedo yot ungo nitimo alokaloka i kwo mwa pi niworo cik pare. Kan ibekadhu i peko maeno, cwinyi kud utur. Yehova bikonyi. Nen VIDEO, man i ng’eye wuwec iwi penji m’ulubo e.

VIDEO: Yehova konyowa nitimo alokaloka (3:56)

I video maeni, Jim utimo alokaloka ma kani pi ninyayu anyong’a i i Yehova?
Lembang’o m’unyeng’i lee i lapor pare?

Som Juebrania 11:6, man i ng’eye wuwec iwi penji m’ulubo e:

Yehova bitimo ang’o ni “dhanu m’ubeyenye ku cwinygi ceke,” niwacu dhanu m’ubetimo kero migi zoo ning’eye man ninyayu mutoro i iye?
Nimakere ku verse maeni, Yehova winjere nenedi kan ebeneno kero ceke m’ibetimo pi niponjo Biblia?

NG’ATU MOKO ROMO PENJI KUMAE: “Pirang’o ibeponjo Biblia ku Jumulembe pa Yehova?”

Iromo dwoko ire nenedi?

I ADUNDO

Kadok etie yot ungo de, re ponjo Biblia copo konyi kara ikwo kud anyong’a tin man rondo ku rondo. Mediri nijengiri iwi Yehova, e ebipoko mugisa iwi kero m’ibetimo.