PONJI MIR 16
Lembe ma Yesu utimo kinde m’ebino i ng’om keni
Dhanu ma dupa ging’eyo lembe lee iwi Yesu. Re jumoko ging’eyo pi kwo pare kende kende kinde m’ebino mukere, jumange ging’eyo kende kende nia ebino jabila man ng’atu ma pire ber lee, ento jukurucel ging’eyo kende kende ayi m’egam etho ko. Dong’ kara watuc ninyang’ cuu i wiye, kwayu wakeponj lembe iwi kwo pare i ng’om keni. Pieno i ponji maeni, wabineno lembe moko ma pigi tek ma Yesu ugam utimo man kony m’iromo nwang’u i kum lembene.
1. Tic ma kwong’a ma Yesu ubed utimo ubino ma kani?
Tic ma kwong’a ma Yesu ubed utimo man ma pire bino tek nisagu zoo i iye, utie ‘nirweyo lembanyong’a mi Ker pa Mungu.’ (Som Luka 4:43.) Ebed eponjo nia Mungu biketho Ker, kunoke bimobim, ma bidaru kwond peko ceke mi dhanu.a Yesu urweyo pi lembe maeno ma tielo cwiny kud amora pi oro adek ku nusu.—Matayo 9:35.
2. Pirang’o Yesu ubed utimo udu?
Biblia uweco pir ‘udu, thangu, man giranyutha [dupa] ma Mungu utimo nikadhu kud i bang’ [Yesu].’ (Tic mi Jukwenda 2:22) Ku copo ma Mungu umiyo ire, Yesu utuc nijuko yamu ma tek, enyayu cam ni dhanu elufu ma lee, ekeyo kum jurutwoyo, man ecero kadok ju m’utho de. (Matayo 8:23-27; 14:15-21; Marko 6:56; Luka 7:11-17) Pirang’o etimo udu maeno ceke? Etimogi pi ninyutho kamaleng’ nia Mungu re m’uore man nia Yehova tie ku copo mi daru kwond peko ceke mi dhanu.
3. Ayi ma Yesu ukwo ko iwi ng’om ubeponjowa ku lembang’o?
Yesu unyutho woro ni Yehova i lembe ceke. (Som Yohana 8:29.) I kwo pare zoo, ebed etimo kubang’e kubang’e lembe ceke ma Won ukwayu nia etim, kadok dhanu dupa gibino judhoge de. Enyutho kamaleng’ nia dhanu copo timo ni Mungu kadok gibenwang’iri i lembe ma tek. I ayi maeno, Yesu uweko iwa ‘lapor kara wakwany ba tiende tap tap.’—1 Pethro 2:21.
MED NYANG’ PERI
Wakenen kwoni ayi ma Yesu ubed urweyo ko lembanyong’a man udu ma tung’ tung’ m’etimo.
4. Yesu urweyo lembanyong’a
Yesu ubed uwotho kilometre dak ma lee dit i gengi m’upong’ kud utur, pi nirweyo lembanyong’a ni kwond dhanu ceke m’enwang’u. Som Luka 8:1, man i ng’eye wuwec iwi penji m’ulubo e:
Nyo Yesu ubed urweyo kende kende ni dhanu m’ucokiri i vute pi niwinje?
Yesu ubed utimo kero nenedi pi ninwang’u dhanu m’erwey igi?
Mungu ular unyutho nia Masiya birweyo lembanyong’a. Som Isaya 61:1, 2, man i ng’eye wuwec iwi penji m’ulubo e:
Yesu upong’o lembila maeni nenedi?
Nyo tin de dhanu copo bedo ku yeny mi winjo lembanyong’a? Pirang’o iparu kumeno?
5. Yesu uponjo lembe dupa ma beco
Yesu urweyo ngo kende kende lembanyong’a, ento eponjo bende lembe dupa ma tie iwa ku kony. Wakenen lembene moko m’eweco pigi i saa mi Ponji pare ma pire yik lee mi wi got. Som Matayo 6:14, 34 man 7:12, man i ng’eye wuwec iwi penji m’ulubo e:
Yesu umiyo juk ma kani ma beco i verse maeni?
Iparu nia juk maeno copo bedo asu ku kony iwa tin eni de? Pirang’o iyero kumeno?
6. Yesu utimo udu ma tung’ tung’
Yehova umiyo ni Yesu copo mi timo udu dupa. Pi ning’eyo udune moko acel, som Marko 5:25-34 kunoke nen VIDEO. I ng’eye, wuwec iwi penji m’ulubo e.
I video maeni, dhaku m’ubino ku twoyo ubino ku yiyoyic nia ang’o?
Lembang’o m’unyeng’i i kum udu maeno ma Yesu utimo?
Som Yohana 5:36, man i ng’eye wuwec iwi penji m’ulubo e:
Udu ma Yesu utimo ‘unyutho’ lembang’o?
Nyo ing’eyo?
Lembe ma pol ma wang’eyo iwi Yesu nwang’ere i buku ang’wen mi Biblia ma julwong’o Injili kunoke lembanyong’a. Bukune tie Matayo, Marko, Luka, man Yohana. Ng’atuman m’ukiewo Injili eno ukoro lembe moko kokoro ma jumange ukoro ngo iwi Yesu. Ka wasomo buku ang’wen maeno ceke, wabing’eyo lembe iwi kwo pa Yesu cuu mandha.
MATAYO
ular ukiewo buku pare. Eweco iwi lembe dupa ma Yesu uponjo, asagane lembe m’eponjo iwi Ker pa Mungu.
MARKO
ukiewo lembanyong’a m’adundo nisagu mi juwadi. Eweco iwi lembe dupa ma wang’u ijo ma Yesu utimo.
LUKA
uweco akeca iwi kite ma Yesu ubed uneno ko rwo ni gin ma pire tek lee man ayi m’ebed enyutho ko woro ni jumamon.
YOHANA
ukoro akeca lembe ma Yesu uweco pire ku jurimbe ma ceng’ini man ku dhanu mange bende. Eno ubekonyowa ninyang’ nia Yesu ubino ng’atu ma nenedi.
DHANU MOKO BEYERO KUMAE: “Yesu re ma tie Mungu ma Jategokpo.”
In ke iparu nenedi?
I ADUNDO
Yesu urweyo pi Ker pa Mungu, etimo udu ma tung’ tung’, man eworo Yehova i lembe ceke.
Penji mi poyowic
Tic ma kwong’a ma Yesu ubed utimo iwi ng’om keni ubino tic ma kani?
Udu ma tung’ tung’ ma Yesu utimo unyutho ang’o?
Yesu uponjo lembang’o ma beco?
TIM SAYUSAC
Yesu ubed uweco akeca iwi lembang’o?
“Pi Ker pa Mungu ubino tek rukani i Yesu?” (Otkur ma Wiw, nindo 1, dwi mi 10, 2014)
Nen thelembe ma romo cwaluwa niyiyo nia andha Yesu utimo udu.
“Ponji ma waromo nwang’u i kum udu ma Yesu utimo” (Otkur ma Wiw, nindo 15, dwi mir 7, 2004)
Nen kite ma kwo pa jalwo moko ulokere ko kinde m’eponjo ayi ma Yesu ubed udieng’ ko pi dhanu mange.
“Con abed adieng’ kwa pira gira” (Otkur ma Wiw, nindo 1, dwi mir 10, 2014)
Nen ayi ma lembe ma pigi tek ma Yesu utimo ugam ulubiri ko.
a Wabineno lembe mange dupa iwi Ker pa Mungu i Ponji mi 31-33.