PONJI MIR 15
Yesu tie ng’a?
Yesu tie ng’atu ma pire yik lee akeca niai con. Re dhanu ma dupa ging’eyo kende kende nyinge, ento ging’eyo ngo lembe mange i wiye. Bende, kan ipenjo nia Yesu tie ng’a, ju ma dupa gidwoko wang’ penji maeno i ayi ma tung’ tung’. Dong’ Biblia ke ubeponjo lembang’o i wiye?
1. Yesu tie ng’a?
Yesu tie giracwiya mi tipo kunoke malaika ma kwo i polo. Yehova Mungu re m’ucwiye i wang’ nicwiyo piny mange ceke. Pieno re ma Biblia ulwong’e nia “kayu mi giracwiya ceke.” (Jukolosai 1:15) Biblia ulwong’e bende nia “Wod [Mungu] ma kulong’” pilembe en kende re ma Yehova ucwiye gire ku cinge m’umbe kony pa ng’atu mange. (Yohana 3:16) Yesu utimo tic karacelo ku Yehova ma Won; ekonye kinde m’ebecwiyo piny mange ceke. (Som Lembrieko 8:30.) Kawoni de Yesu gitie ku winjiri ma ceng’ini mandha giku Yehova. Ebetimo ma ber mandha calu “Lembe,” niwacu jakoblembe pa Mungu, pilembe Mungu betiyo kude pi ninyutho lembe man telowic pare ni jumange.—Yohana 1:14.
2. Pirang’o Yesu ubino i ng’omi?
Oro udaru kadhu elufu ario (2 000) kumeni, Yehova utimo udu moko: Etiyo ku tipo ma leng’ pare, eting’o ko kwo pa Yesu m’ubino malaika i polo, man edok eroye ni ic i usau-nyodo pa nyaku moko ma nyinge Maria i ng’om keni, ma nwang’u fodi Mariane utimo de ngo ribiri ku co. Kumeno re ma Yesu ugam unyolere m’etie dhanu. (Som Luka 1:34, 35.) Yehova uoro Yesu i ng’om keni kara ebed Masiya kunoke Kristu m’elar eng’olo pire, man kara ebodh dhanu kud i dubo man tho.a Lembe ceke ma Yehova ular uyero i Biblia iwi Masiya ugam utimere kubang’e kubang’e i kum Yesu. Eno ukonyo dhanu ninyang’ cuu nia Yesu tie “Kristu, Wod Mungu ma kwo.”—Matayo 16:16.
3. Kawoni Yesu ni kani?
Kinde ma Yesu utho, eweko nibedo dhanu. Mungu udok ucere m’etie kendo giracwiya mi tipo kunoke malaika, man i ng’eye edok i polo. Kuca, “Mungu [uwok] udode malu dit apila.” (Jufilipi 2:9) Kawoni, Yesu tie ku dito ma lee mandha; Yehova kende re m’ukadhe ku dito.
MED NYANG’ PERI
Wakenen kawoni lembe mange m’ubenyutho nia i andha Yesu tie ng’a, man nia pirang’o pire tek ya waponj ning’eye cuu.
4. Yesu tie ngo Mungu ma Jategokpo
Biblia ubeponjo nia kadok Yesu en e giracwiya ma tie ku tego lee kuca i polo de, re eworo telowic pa Yehova ma tie Mungu pare man Won. Pirang’o wayero kumeno? Nen VIDEO pi ninyang’ nia nimakere ku Biblia, tung’ tung’ ma lee dit utie i kind Yesu ku Mungu ma Jategokpo.
Verse ma jurieyo e ubekonyowa ninyang’ iwi tung’ tung’ m’utie i kind Yesu ku Yehova. I ng’ei somo verseman, wuwec iwi penji m’ulubo versene.
Som Luka 1:30-32.
Malaika uyero nia Yesu bibedo ng’a ka jupore ku Yehova Mungu ma tie “Ng’atu ma malu ngbiri”? Eno nyutho nia ng’a ma dit nisagu?
Som Matayo 3:16, 17.
I saa mi batizo pa Yesu, dwal m’uai i polo uyero ang’o?
Iparu nia eca ubino dwand ng’a?
Som Yohana 14:28.
Ng’a ma bebedo dit nikadhu wadi, nyo wego kunoke wod?
Yesu ulwong’o Yehova nia Won. Eno ubenyutho ang’o?
Som Yohana 12:49.
Nimakere ku verse maeni, nyo Yesu ubeparu nia giku Won gitie ng’atu ma romi? In ke iparu nenedi, nyo gitie ng’atu ma romi?
5. Gin m’unyutho nia Yesu re m’ubino Masiya
I Biblia, junwang’u lembila dupa ma Mungu uketho jubila uewo pi nikonyo dhanu kara ging’ii Masiya, niwacu, ng’atu ma Mungu ung’iyo pi nibodho dhanu. Nen VIDEO pi ning’eyo lembilane moko m’uwok upong’o i kum Yesu kinde m’ebino i ng’om.
I ng’ei somo lembila mi verseman, wuwec iwi penji m’ulubo versene:
Som Mika 5:2 pi ning’eyo kaka ma Masiya ucikere ninyolere i iye.b
Nyo lembila maeno upong’o kubang’e kubang’e? —Matayo 2:1.
Som Zaburi 34:20 man Zekaria 12:10 pi ning’eyo lembe ma Biblia ular uewo pi tho pa Masiya.
Nyo lembila maeno upong’o kubang’e kubang’e?—Yohana 19:33-37.
Iparu nia Yesu romo ketho en gire lembila maeno upong’ tap tap kumeno?
Kite ma lembila maeno upong’o ko ubenyutho nia Yesu ubino ng’a?
6. Wabinwang’u bero ka wabeponjo lembe iwi Yesu
Biblia unyutho nia pire tek lee niponjo lembe iwi Yesu man iwi tic ma Mungu umiyo i kore. Som Yohana 14:6 man 17:3, man i ng’eye wuwec iwi penji m’ulubo e:
Pirang’o pire tek akeca ya waponj ning’eyo lembe lee iwi Yesu?
Yesu uyabu iwa yo mi doko jurimb Mungu. Eponjo lemandha iwi Yehova, man nikume, waromo nwang’u kwo ma rondo ku rondo
DHANU MOKO BEYERO KUMAE: “Jumulembe pa Yehova giyiyo ngo Yesu.”
In iromo dwoko nenedi?
I ADUNDO
Yesu tie giracwiya mi tipo, niwacu malaika. Etie bende Wod Mungu man Masiya.
Penji mi poyowic
Pirang’o Biblia ulwong’o Yesu nia “kayu mi giracwiya ceke”?
I wang’ bino i ng’om keni, Yesu utimo ang’o i polo?
Wang’eyo nenedi nia Yesu tie Masiya?
TIM SAYUSAC
Nen lembe mange m’ubenyutho nia Yesu tie andha Masiya.
“Nyo Yesu re ma tie Masiya ma lembila ular uewo pire?” (Thiwiwec mi jw.org)
Som thiwiwec ma e pi ninyang’ ka nyo Mungu udoko Won Yesu i ayi ma rom ma dhanu benyolo ko awiya kunoke ngo.
“Pirang’o Biblia ulwong’o Yesu nia Wod Mungu?” (Thiwiwec mi jw.org)
Nen nia pirang’o Trinita utie ngo ponji mi Biblia.
“Nyo Yesu tie Mungu?” (Otkur ma Wiw, nindo 1, dwi mir 4, 2009)
Som thiwiwec ma e pi nineno kite ma kwo pa dhaku moko ulokere ko i ng’ei m’etimo kero niponjo gin ma Biblia uyero iwi Yesu.
“Dhaku moko mir anyoli mi Juyahudi ubekoro gin m’ucwale niwilo yiyoyic pare” (Cew!, dwi mir 5, 2013)
a Wabineno i Ponji mi 26 ku 27 nia pirang’o wa dhanu watie ku yeny ma jubodh kowa man kite ma Yesu ubodho kowa.
b Som Thenge ma jumedo, mir 2 pi ning’eyo oro ma lembila ular unyutho nia Yesu bidoko i iye Masiya.