Dwi mir 9

Nyo tic ma tek ma Yehova giku Yesu gitimo ubenyutho nia wacikara nitimo tic m’umbe yom? Kumeno ngo. I andha, Yehova beol ungo, pieno embe ku yeny mi yom i ng’ei tic. Ento Biblia yero nia i ng’ei ma Yehova ucwio polo ku ng’om, “eyom man edwoko cwinye.” (Ai 31:17) Wec maeno ubenyutho ngo nia Yehova uyom pilembe eol i ng’ei cwic, ento wecne ubenyutho nia Yehova ujigo cwic, man enwang’u mutoro i kum tic pare. Yesu bende ubed utimo tic lee saa m’ebino iwi ng’om; re asu ebed ekoyo saa pi niyom man nicamu ku jurimbe. (Mat. 14:13; Lk. 7:34) Biblia ubemio amora i kum dhanu pa Mungu nia gimar tic. Jurutic pa Mungu gicikiri nitimo tic ku tego ento gicikiri ngo nibedo junyap. (Rie. 15:19) Saa moko nyo ibetimo tic moko pi nipong’o yeny mi juruot peri. Calu ma watie Jukristu, wacikara bende nidikara i tic mi rweyo lembanyong’a. Re asu ubemito ibed inwang’ saa mi yom. w19.12 mba. 2 udu. 2; mba. 3 udu. 4-5

Kud ibed ikor lembe iwi pajogi. I lembe maeno, Yesu uweko iwa lapor ma ber mandha m’ukwayu walubi. Yesu ular ukwo i polo i wang’ nibino i ng’om, pieno eng’eyo lembe lee iwi Sitani ku pajogi pare. Re ebed ekoro ngo lembe ma Sitani ku pajogi gibed gitimo, ento ebed eponjo dhanu ku lemandha iwi Yehova, kakare nibeweco pi Sitani. Waromo lubo lapor pa Yesu nwang’u wabetadu ngo lembe iwi pajogi ni dhanu mange. Ento wanyutho nikadhu kud i wec mwa nia ‘adundewa upong’ hau ku lembe ma ber,’ niwacu lemandha. (Zab. 45:1) Kud ilwor tipo m’ucido. I ng’om ma tin eni, wacopo nwang’ara ku lembe ma reco dupa. Ku lapor, rek kumeni, wacopo nwang’ara kud aksida, ku remokum, kunoke tho copo nego ng’atu ma wamaru. Ento ukwayu ngo wapar nia tipo m’ucido re m’umio peko maeno i kumwa. Kum Biblia uyero nia ng’atuman copo nwang’ere ku peko ma wok rek. (Ekl. 9:11) Yehova unyutho nia etie ku tego lee dit nisagu pajogi. w19.04 mba. 23-24 udu. 13-14

Nyo judong cokiri giworo cik mi ng’om m’ukwayu nia junyuth ni judongo pa gavmenti ka jumaku nyathin? Eyo. I ng’om moko, cik ukwayu nia ka ng’atu moko uwinjo nia jumaku nyathin moko, ukwayu enyuth lembene ni judongo pa gavmenti. Judong cokiri ma gitie i ng’om ma kumeno, giworo cikne. Cik maeno uturo ngo cik pa Mungu. (Tic. 5:28, 29) Pieno, ka ng’atu moko unyutho ni judong cokiri pi mak ma ku kero m’umulo kum cokiri, gilwong’o biro mi filial ndhundhu pi ning’eyo gin m’ukwayu gitim pi niworo cik pa gavmenti iwi maku awiya. Kinde ma judong cokiri gibeweco ku nyathin ma jumaku, ku junyodo pare kunoke ku ng’atu mange m’ung’eyo lembene, ukwayu gipoi wigi nia gitie ku twero mi nyutho lembene ni judongo pa gavmenti. Dong’ ka judoto ng’atu moko mi cokiri nia umaku nyathin man lembene umew i kind dhanu, nyo Jakristu m’udwoko lembene ucikere niparu nia en re m’ekelo acidi iwi nying’ Mungu? Ungo. Ng’atu m’umaku mak re m’ukelo acidi iwi nying’ Mungu. w19.05 mba. 10 udu. 13-14

Biblia ung’olo ni nico ku dhaku pare nia ginyuth woro i kindgi man gimediri niworo lembang’ola mi gamiri ma gitimo i kindgi. Eyero bende nia nico ku dhaku gimediri nibedo karacelo pi nja. Ewacu kumae: “Nico biweko won ku min, man ebimoko kum cege; man gibidoko kum acel.” (Tha. 2:24) Re tung’ ku maeno, dhanu ma giweko rieko m’i ng’om maeni ubetelo wigi gitie ku paru m’ukoc, giyero nia i gamiri, ng’atuman ucikere nidieng’ i kum yeny pare gire. “I ng’om moko” i nindo mi nyom, nico giku dhaku gikwong’iri i wang’ dhanu nia gibibedo karacelo pi nindo ceke ma gibikwo i ie iwi ng’om. Enre tin dhanu ma dupa giloko wec maeno, giyero nia gibibedo karacelo i gamiri tekene fodi asu gitie ku mer i kindgi. Calu ma dhanu ginwang’u nia gamiri utie ngo gin m’ucikere nibedo pi nja, juruot ma pol gipokiri, eno uketho ju ma dupa gitie ku can i adundegi. Ubenen kamaleng’ nia rieko m’i ng’om maeni iwi gamiri utie lemkasegu. w19.05 mba. 23 udu. 12

Paulo ubino dieng’ pilembe Jukristu moko nwang’u giweko rieko mi ng’om pa Sitani ucaku wingo wigi. (Ef. 4:17-19) Lembe maeno copo nwang’u wan bende. Sitani romo tio ku bodho ma tung’ tung’ pi niwingo wiwa, pilembe en re m’etie mungu mi ng’om maeni. I kind bodhone moko, ecopo tio kud ava ma watie ko. Saa moko nyo wabemito nia piwa yiki; pieno, Sitani copo tio kud ava maeno pi nicwaluwa wawek Yehova. Bende, ecopo tio ku lembe ma juponjo kowa i somo kunoke lembsuru moko pi nicwaluwa wapar lembe i kite m’ebemito. Nyo wacopo tundo niwodho paru moko ma rac ma dong’ udaru guro ulage “ma tek” i wiwa? (2 Kor. 10:4) Paulo ukiewo kumae: “Waberedho pidoic m’udhunjo piny, man gin m’utingre kum ng’eyong’ec pa Mungu, man wakelo pidoic ceke kubang’gi ni kol m’edoko ko wor ni Kristu.” (2 Kor. 10:5) Eyo, ku kony pa Yehova, wacopo tuc niwodho cen paru moko ci ma rac m’uguro ulage i wiwa. w19.06 mba. 8 udu. 1-3

Kadok nwang’u Hana, Daudi man jagor Zaburi moko gibino kud ang’abacwiny ma lee de, re gin zoo gituc nijengiri iwi Yehova. Gin zoo gigam gikoro lembe m’ubedieng’o cwinygi ni Yehova nikadhu kud i rwo. Ginyutho ire thwolo thwolo thelembe m’uketho cwinygi ung’abere akeca. Bende gimediri nicidho kaka ma jutimo ie thier ni Yehova. (1 Sam. 1:9, 10; Zab. 55:22; 73:17; 122:1) Yehova udwoko wang’ kwac pa ng’atuman m’i kindgi i ayi ma ber man ku mer. Ku lapor, Hana unwang’u kwiocwiny i adundene. (1 Sam. 1:18) Daudi ukiewo kumae: “Masendi pa won bedopwe gi dupa; ento Yehova bodhe kud i ie ceke.” (Zab. 34:19) Jagor Zaburi ke udok unwang’u nia ve Yehova ‘maku cinge ma yor acwic’ pi nitelo wie nikadhu kud i juk mi mer m’emio ire. (Zab. 73:23, 24) Lapor mi dhanu adek maeno ubeponjowa ku lembang’o? Saa moko wacopo nwang’ara ku peko ma lee mandha ma romo royo ang’abacwiny i iwa. Ento kara wacirgi, ubekwayu wapar cuu mandha pi kite ma Yehova ugam ukonyo ko dhanu mange con, wakor ire peko mwa i rwo, man watim lembe m’ekwayu i bang’wa.​—Zab. 143:1, 4-8. w19.06 mba. 17 udu. 14-15

Kud iwek timo kunoke wec moko ci mi dhanu uketh lewic unegi nibedo Jamulembe pa Yehova. (Mik. 4:5) Lembe ma jukwenda gitimo ing’ei tho pa Yesu copo konyowa niriemo lworo mi dhanu cen kud i iwa. Gigam ging’eyo cuu nia judong dini mi Juyahudi udagugi lee. (Tic. 5:17, 18, 27, 28) Re kubang’ ceng’ gimediri nirweyo i hekalu man kaka ma dhanu pong’ i ie; eno uketho dhanu ng’eyo nia gitie jukwenda pa Yesu. (Tic. 5:42) Giweko ngo lworo ucergi. Wan de wacopo riemo lworo mi dhanu, nwang’u waberweyo wang’ ma pol, man wabenyutho kamaleng’ ni dhanu nia watie Jumulembe pa Yehova, ecopo bedo i tic, i somo, mange i kabedo ma wabekwo i ie. (Tic. 4:29; Rum. 1:16) Pirang’o jukwenda gibino ku mutoro? Gigam ging’eyo thelembe m’uketho dhanu udagugi, man ginwang’u nia etie lembe ma rac ungo ka dhanu udagugi pilembe gibetimo yeny pa Yehova. (Lk. 6:23; Tic. 5:41; 1 Pet. 2:19-21) Wabiweko ngo adegi mi dhanu ucerwa nitimo ni Yehova ka wanyang’ nia gidaguwa pilembe wabetimo lembe m’atira. w19.07 mba. 7 udu. 19-20

Yesu ku julubne ma gibino Juyahudi gibed giyom i ceng’ Sabatu pilembe gibino woro Cik pa Musa. Ento lembe ma Yesu yero ku m’etimo unyutho nia etie rac ungo nitimo bero ni jumange i ceng’ Sabatu. (Mat. 12:9-11) Eneno nia etie rac ungo nitimo lembe ma ber man nikonyo dhanu i ceng’ Sabatu. Lembe ma Yesu timo unyutho nia enyang’ cuu i thelembe m’uketho Mungu wacu nia dhanu pare giyom i ceng’ Sabatu. I nindo maeno dhanu pa Mungu gibed gitimo ngo tic, pieno gibed giketho wigi zoo i kum lembe mi tipo. Yopagi Yesu jubed jutio ku nindo mi Sabatu pi niworo Mungu. Wang’eyo lembe maeno ni kum wec ma Biblia uyero pi Yesu saa m’ebedongo i Nazareti. Biblia uwacu kumae: “Man [Yesu] mondo i kacokri i ceng’ sabatu, calu kurane, man ecungo.” (Lk. 4:15-19) M’umedo maeno, julub gibed giworo cik mi Sabatu cuu dit, uketho gijigo niyiko udok ma ng’wice ng’ar man mo ma gibiwiro ko avuj Yesu nitundo ma Sabatu ukadhu.​—Lk. 23:55, 56. w19.12 mba. 4 udu. 10

Jakristuman ubetimo tic ma tek pi ninwang’u dhanu ma gicopo doko julub pa Kristu. Wacopo poro Jukristu ma gibetimo tic maeno ku dhanu m’ubesayu nyathin m’urwinyo. Pirang’o? Kenen lembe m’utimere kinde ma nyathin moko mi oro adek urwinyo. Dhanu ma romo 500 gigam gicaku keyo wang’ lum pi nisayu nyathin maeno. I ng’ei saa ma romo 20 niai ma nyathin ne rwinyo, ng’atu acel ugam unwang’e i podho moko. Kinde ma dhanu mito yungo jalwo maeno pilembe nia en re m’enwang’u nyathin ne, ekwero. Ewacu kumae: “Nyathin maeni unwang’ere pilembe wan ceke watuc nimiyara pi nisaye.” Tin dhanu ma dupa gitie calu nyathin maeno. Ginwang’iri nia girwinyo, man gimbe ku genogen; ento gibemito jukonygi. Jumulembe pa Yehova ma kadhu milioni abora gibetimo tic karacelo pi nisayu dhanu ma giromo. Saa moko nyo in, i kabedo ma wubed wurweyo ie lembanyong’a, ibenwang’u ngo ng’atu m’ubemaru iponj kude Biblia. Ento umego ku nyimego mange ma giberweyo i kabedo ma rom eno gicopo nwang’u ng’atu moko m’ubemito niponjo lemandha mi Biblia. Kinde m’umego kunoke nyamego moko unwang’u ng’atu m’ubeyenyo nidoko jalub pa Yesu, ng’atu moko ci m’udikere i tic mi rweyo lembanyong’a ucikere nibedo ku mutoro. w19.07 mba. 16-17 udu. 9-10

Jakwenda Paulo uketho cwiny Jukristu mi Filipi nia gimediri niciro man nitimo ni Yehova. Kinde ma cokiri ucaku acaka i adhura maeno ci, dhanu mir adhurane gicaku nyayu ragedo i kum umego ku nyimego. I kum oro 50 mi rundi mwa, Paulo giku Sila gicidho pi nirweyo lembanyong’a i adhura mi Filipi, i ng’ei ma ng’atu moko ukwaye i ginmawokiwang’ nia “bin lokani i Makedoni.” (Tic. 16:9) Kuca, giwok ginwang’u dhaku moko ma nyinge Ludia, m’uwok uwinjo lembanyong’a pio pio pilembe ‘Yehova yabu adundene.’ (Tic. 16:14) E gigam gilimo batizo ku juruot pare ceke. Re ndhundhu nica, Sitani umito ecer tic m’ucaku i adhura maeno. E dhanu mir adhurane gimaku Paulo giku Sila, giwayugi nitundo i wang’ jurucik, man gikelo adote mi ndra i wigi nia gibenyayu yakini i kind dhanu. Jugam jufwodo Paulo giku Sila, jubologi i kol man i ng’eye jung’olo nia giai kud i adhurane. (Tic. 16:16-40) Nyo cwinygi utur? Nyanok de ngo! Kan umego ku nyimego mi cokiri mir adhura maeno ma fodi uai ucaku ma nyen ke? Gin de gigam giciro! M’umbe jiji, lapor pa Paulo giku Sila utielo cwinygi magwei. w19.08 mba. 2 udu. 1-2

M’umbe jiji, “nying’ mi bedopwe” uketho i ie mer ma wamaru ko Yehova man dhanu pare. Eketho i ie bende ninyutho pi yioyic ma watie ko i Yesu man pi genogen mwa ni jumange. Kara wapong’ ku “nying’ mi bedopwe,” ukwayu wamiyara ku kero mwa ceke nitimo tic ma pire tek mandha mi ketho dhanu dok julub. (Mat. 28:18-20) Kadok wabekadhu kud i lembe ma nenedi de, waromo rieny calu der. Saa moko, wacopo nwang’ara i wang’ lembe ma tek ma romo cerowa ku rweyo lembanyong’a; ento lembe ma rom eno re ma copo dok mio iwa kaka mi rweyo lembanyong’a. Ku lapor, kinde ma jakwenda Paulo ubekiewo barua ni Jufilipi, nwang’u eni kol i Roma. Re nyoro ma jutwie ko ucere ngo nirweyo lembanyong’a ni juaskari m’ubed ukure, man ni ju m’ubed ucidh unene. Lembe ma Paulo unwang’ere ko ucere ngo nirweyo kud amora; eno ugam uketho umego mange de ginwang’u tegocwiny mi “yero lembe pa Mungu ma lworo mbe.”​—Flp. 1:12-14; 4:22. w19.08 mba. 12 udu. 15-16

Thelembe ma pire tek ma cwaluwa ninyutho jwigiri utie nia, jwigiri nyayu mutoro i Yehova. Jakwenda Petro unyutho lembuno kamaleng’ kinde m’ekiewo wec mi giragora mwa ma tin. Iwi wec maeno ma Petro ukiewo, buku “Viens, suis-moi” wic mir 3, udukuwec mi 23 ukoro kumae: “Kuhaya tie ve adra, pilembe ecopo kelo matoke ma rac mandha. Ng’atini romo bedo ku copo lee, re kan etie ku kuhaya, Yehova copo tio ngo kude. Ento Yehova copo tio ku ng’atu ma jwigere kadok nwang’u embe ku copo moko de. . . . Yehova bimio iri sukulia tekene itie ng’atu ma jwigere.” Eyo, ninyayu mutoro i Yehova tie lembe ma ber nisagu zoo ma wacopo timo. (Rie. 23:15) M’umedo nyayu mutoro i Yehova, wanwang’u bende bero dupa ka wabenyutho jwigiri i kwo mwa. Ka wajwigara, dhanu mange de bimaru gibed jurimbwa. Pirang’o? Pilembe wan de wacopo maru ngo wabed jurimb jukuhaya.​—Mat. 7:12. w19.09 mba. 4 udu. 8-9

Judong cokiri gitimo tic ma tek pi kony mir umego ku nyimego. Bende ginwang’u ngo nia dito migi uketho pigi tie tek nisagu pir umego ku nyimego mange. Ento gitimo lembe ni umego ku nyimego ku bero. (1 Tes. 2:7, 8) Calu ma gitie ku jwigiri man gimaru umego, giweco i bang’gi i ayi ma ber. Umego Andre ma tie jadit cokiri niai con ukoro kumae: “Anwang’u nia ka jadit cokiri utie dhanu ma ber man eweco nza nza, eno mulo adunde umego ku nyimego. Kite maeno cwalugi nitimo lembe ma judong cokiri ukwayu.” Umego Tony ma tie bende jadit cokiri m’utimo oro dupa uyero kumae: “Abed aii nitio ku juk ma nwang’ere i Jufilipi 2:3, man saa ceke atimo kero nineno nia pi jumange tie tek nisagu pira. Eno ketho adiyo ngo umego ku nyimego kara giwora.” Judong cokiri gicikiri nibedo ku jwigiri calu Yehova. Kadok Yehova tie Ubimo ma malu ngbir de, re Biblia uyero nia ‘ejwigre gire’ kara eting’ “dhanu ma sai kud i utur.” (Zab. 18:35; 113:6, 7) Bende, Biblia uyero nia Yehova udagu dhanu ma gi jukuhaya. w19.09 mba. 16-17 udu. 11-12

Kara wamedara ninwang’u yom i the mberembere pa Yesu, ukwayu wabed ku nen ma ber. Calu wabetimo tic pa Yehova, ukwayu watime i ayi m’emito. Wan watie jurutic, ento Yehova re ma tie Won tic. (Lk. 17:10) Ka wabetimo tic pare i ayi ma wamaru wan giwa, wabidwoko tije tek mananu. Enre ka walubo telowic pa Yehova, wabitimo ire tic lee man wabivoyo kadok peko ma rukani de. Wang’ei nia ng’atu moko mbe ma copo cero yeny pa Yehova nitimere! (Rum. 8:31; 1 Yoh. 4:4) Wabemito wamii yung ni Yehova, Wegwa ma jamer. I rundi pa Yesu, dhanu ma gibino lubo toke pi nisayu yeny migi gigi gikoso mutoro man giweko niyeyo mberembere pare. (Yoh. 6:25-27, 51, 60, 66; Flp. 3:18, 19) Ento ju ma gigam gilubo tok Yesu pilembe gimaru Mungu, man gimaru dhanu mange gibino ku mutoro niyeyo mberembere pa Yesu saa ceke ma gikwo i ie iwi ng’om, man gibino ku genogen mi citimo karacelo ku Kristu i polo. Ka wan de thelembe ma cuu re m’ubecwaluwa niyeyo mberembere pa Yesu, wabibedo ku mutoro. w19.09 mba. 20 udu. 1; mba. 24-25 udu. 19-20

Kepar pi mugisa ma dupa m’ibenwang’u pilembe dong’ imbe i the ng’eca mi ponji mi ndra. Watie ku mutoro ma yawe mbe ninwang’u gony maeno! Wabinwang’u gony ma lee mandha i nindo m’ubino. Ceng’ini eni, Yesu binyotho dini mi ndra pet man ebijigo the bimobim ma rac mi dhanu. Ento Mungu bigwoko “udul dhanu ma dit” m’ubetimo ire, man ebimio igi mugisa lee i ng’om ma bidoko ni paradiso. (Nyu. 7:9, 14) Dhanu ma wendgi lee mandha gibicer man gibibedo agonya i kum matoke ceke ma dubo p’Adamu ukelo. (Tic. 24:15) I saa mi Bimobim mi oro elufu acel, Yesu ku ju ma gibibimo kugi gibidaru dubalaga kud i kum dhanu man gibikonyogi kara gibed ku winjiri ma ceng’ini ku Yehova. Saa maeno dhanu bibedo agonya kud i dubo man gibidoko leng’. Ebibedo calu Oro mir anyong’a mi nyithindho mir Israel ma con. Eno ubenyutho nia dhanu ceke ma gibetimo ni Yehova ku bedopwe gibidoko leng’ man gibitimo ngo dubo kendo nyanok de. w19.12 mba. 12-13 udu. 14-16

I rundi ma kwong’a, jalwo moko ma nyinge Yosefu (ma jubed julwong’o bende Barnaba) uweko Yehova utio kude. (Tic. 4:36, 37) Kinde ma Saul udoko Jakristu, umego ma pol gibino lwore pilembe egam enyayu ragedo i kum dhanu ceke m’uyio Yesu. Ento Barnaba ujuko cwiny Saul, man ekonye. (Tic. 9:21, 26-28) I ng’eye, judong cokiri m’i Yerusalem ginwang’u nia kwayu gior ng’atu moko ucidh utiel cwiny umego ma gibino kwo bor i adhura mir Antiokia mi Cami. Gioro ng’a? Barnaba! Gitimo ng’iong’ic ma tap! Biblia ukoro nia Barnaba uwok ujuko cwiny umego ku nyimego ceke nia “ku tego mir adundegi gimok ndhu kum Rwoth.” (Tic. 11:22-24) Tin bende, Yehova copo tio kudwa pi nijuko cwiny umego ku nyimego wadwa. Ku lapor, ecopo tio kudwa pi nijuko cwiny ju ma wedi migi tho. Kunoke eromo cwaluwa niciliewo ng’atu moko m’uberemo kunoke ma cwinye tur, nyo ke nilwong’e alwong’a i telefon pi niyero ire wec moko ma copo juko cwinye. Nyo ibiweko Yehova utii kudi calu m’egam etio ko ku Barnaba?​—1 Tes. 5:14. w19.10 mba. 22 udu. 8

Saa moko ka wabetimo tic karacelo ku jurimbwa, wang’eyo kite migi ma beco kende ngo, ento wang’eyo bende ng’ico migi. Dong’ ang’o ma copo konyowa kara kud walal mer m’i kindwa kugi kadok saa ma gitimo kosa moko? I andha, ukwayu wang’ei nia umego mwa gileng’ ungo, pieno lembe copo vuth igi. Dong’ ka wadaru twiyo mer kugi, wacikara nitimo kero kara merne kud ulal. Tek kosa moko uvuth ni jarimbwa, ukwayu wanyuth ire kamaleng’ juk m’uai i lembe pa Mungu, ento i ayi ma ber. (Zab. 141:5) Bende, ka jarimbwa utimo lembe m’uton i iwa, ukwayu wawek ire. Ka wadaru weko ire ke, wacikara ngo nidok kendo kendo iwi kosane. I nindo maeni ma rac, pire tie tek lee dit niketho wiwa akeca i kum kite ma beco mir umego ku nyimego mwa, kakare nineno kwa ng’ico migi! Ka watimo kumeno, mer mwa kugi bitudere magwei. Wacikara nitudo mer kugi kawoni pilembe i saa mi masendi ma dit wabibedo ku yeny mi jurimo mandha. w19.11 mba. 6 udu. 13, 16

Kinde ma wabetelo wi ponji mi Biblia, ukwayu watim kero ‘waketh dhanu udok julub . . . waponjgi giwor gin ceke ma Yesu ung’olo.’ Bende, ukwayu watim kero wakonygi ginyang’ nia pire tie tek lee ya gimar Yehova man gimar Ker pare. Eno uketho i ie nikonyo dhanu kara gimar lemandha man giketh gin ma gibeponjone i timo, githier kwo migi ni Yehova, man gilim batizo. Ka gitimo kumeno re ma gibiboth i ceng’ pa Yehova. (1 Pet. 3:21) Saa udong’ nyanok magwei i wang’ ajiki mi ng’om maeni. Pieno, kwayu ngo wanyoth saa mwa niponjo Biblia ku dhanu m’ubemaru ngo nidoko julub pa Kristu. (1 Kor. 9:26) Saa udong’ nyanok magwei! Ento dhanu fodi utie lee ma copo winjo rwonglembe mi Ker ma fodi ajiki utundo ngo. w19.10 mba. 11-12 udu. 14-15

Kubang’ oro i Ceng’ mir adunya, thek mir Israel gibed gicokiri karacelo, man jalam ma dit ubed uthiero lei ni lam ni Yehova. Lam maeno ubed upoyo wi nyithindho mir Israel nia gitie judubo, man nia kwayu dubo migine ukabere! Jalam gam konjo udok ma ng’wice ng’ar iwi cugmac m’ubogere, man ng’wic kusika maeno doko ma ng’ar. Wacopo nwang’u ponji ma kani niai kud i lembuno? Biblia uporo rwo mi jurutic pa Yehova ma gigwoko bedoleng’ migi kud udok ma ng’wice ng’ar. (Zab. 141:2; Nyu. 5:8) Jalam ma dit ubed utero udok ma ng’wice ng’ar i wang’ Yehova ku woro ma dit. Rom rom kumeno, kinde ma waberwo i bang’ Yehova, warwo ku woro ma dit. Anyong’a negowa lee ning’eyo nia Jacwic mwa uyio nia kindwa ubed ceng’ini kude calu ma kind nyathin bedo ko ceng’ini ku won. (Yak. 4:8) Eyio nia wabed jurimbe! (Zab. 25:14) Rwom maeno pire tie tek lee i iwa, uketho wayio ngo nyanok de nitimo lembe moko ma romo nyayu can i Yehova. w19.11 mba. 20-21 udu. 3-5

Dhanu ma pol mi kabedo m’ibekwo i ie gitie ku nen ma nenedi iwi tic? Tin, i ng’om ma dupa dhanu gibetimo tic ku tego man pi saa ma lee. Jumoko gitimo tic nikadhu mukero uketho ginwang’u ngo saa mi yom, mi bedo karacelo ku juruot migi man mi ponjo lembe pa Mungu. (Ekl. 2:23) Jumange ke gimaru ngo tic amara zoo de, pieno giweko kadok lembe ma haki migi mbe de cerogi ku timo tic. (Rie. 26:13, 14) Re kepar kite ma Yehova giku Yesu gineno ko tic. M’umbe jiji, Yehova umaru nitimo tic. Yesu unyutho lembe maeno ngbeng’ kumae: “Vwa ubetimo tic cil ku kawono.” (Yoh. 5:17) Kepar pi tic ceke ma Mungu utimo saa m’ebecwio udul jumalaika, nyikaluku, ng’om, man piny ma tung’ tung’ ma nwang’ere i kor polo! Wabed waneno bende piny dupa ma beco ma Mungu ucwio iwi ng’om keni. w19.12 mba. 2 udu. 1-2

Daudi utimo ang’o kara kindgi ubed ceng’ini ku Yehova? Eponjo lembe iwi Yehova nikadhu kud i giracwia. Kinde ma Daudi ubino aradu, wang’ ma pol ebed ebedo i thim pi nikwayu rombe pa won. Copere saa maeca re m’ecaku paru lembe akeca iwi piny ma tung’ tung’ ma Yehova ucwio. Ku lapor, kinde ma Daudi ubed uting’o wang’e malu kud uthieno, ebed eneno nyikaluku ma wendgi swa. Re copere enyang’ bende nia ng’atu m’ucwiogi utie ku kite ma tung’ tung’ ma beco. (Zab. 19:1, 2) Saa ma Daudi unyamu i lembe lee iwi ayi ma Mungu ucwio ko dhanu, enyang’ nia Mungu tie ku rieko ma kajikne mbe. (Zab. 139:14) Kinde m’eparu akeca iwi piny ma Yehova ucwio, enwang’u nia etie nok dit ka jupore ku Yehova. (Zab. 139:6) Lembuno ubemio iwa ponji ma kani? Kubang’ ceng’, nen giracwia ma tung’ tung’ m’utie i ng’eti, ku lapor lum, lei man dhanu; par kilili i wigi man nen nia gibeponji ku lembang’o iwi Yehova. Kan itimo kumeno, kubang’ nindo ibiponjo lembe dupa iwi Wegwa ma jamer. (Rum. 1:20) M’umedo maeno, nja ibineno nia mer m’imare ko ubemedere ameda. w19.12 mba. 19-20 udu. 15-17

Musa utio ku lembe m’eponjo. Saa ma Musa doko ku oro 40, eng’io nidok i bang’ dhanu pa Mungu, niwacu nyithindho mir Israel kakare nibedo “wod Nyafarao.” Kinde ma Musa ung’io nidok i thenge mi Juisrael, eweko kabedo mi yung. M’umedo maeno, eng’eyo nia kwinyo biopo lee i Farao m’ubino ubimo ma won tego, man ma Jumisiri ubed uneno ni mungu buu. Eno unyutho nia Musa bino ku yioyic ma tek mi tuko ngo! Bende, egeno Yehova. Genogen maeno re m’ukonye nibedo ku mer ma ceng’ini ku Mungu i kwo pare zoo. (Rie. 3:5) Lembuno ubemio iwa ponji ma kani? Calu Musa, saa moko kwayu wan ceke watim ng’iong’ic ma pire tek i kwo mwa: Nyo wabitimo ni Mungu man wabidikara ku dhanu pare? Saa moko, copo kwayere nia watwonara ku lembe moko kara watim ni Mungu, kunoke dhanu ma gibetimo ngo ni Yehova giromo nyayu ragedo i kumwa. Ento ka wageno Wegwa mi polo, wang’ei nia ebikonyowa! w19.12 mba. 17 udu. 5-6

Kadok nwang’u jucwiowa kud utur de, re piwa tie tek ma sagu utur. Wakenen thelembe moko kende m’uketho wayero nia piwa tie tek i Yehova. Yehova ucwio dhanu ku copo mi lubo kite pare ma tung’ tung’, eno uketho wasagu giracwia mange ceke mi ng’om. (Tha. 1:27) Emio iwa bende dito iwi lei ceke man ng’om bende. (Zab. 8:4-8) Yehova umedere asu ninyutho nia pi dhanu tie tek lee i ie kadok i ng’ei m’Adamu dubo. Pi ninyutho nia piwa tie tek akeca i ie, emio Yesu ma tie Wode m’emaru akeca ubin utho pi dubo mwa. (1 Yoh. 4:9, 10) Iwi ukungu mi jamgony, Yehova bicero dhanu ceke ma githo nikum dubo p’Adamu, dok ebed ‘weg bedopwe ku weg bedopwe ngo de.’ (Tic. 24:15) Biblia ma tie Lembe pa Yehova ubenyutho nia piwa tie tek i ie kadok saa ma waberemo, wani can sente, man saa ma tio udaru kero mwa.​—Tic. 10:34, 35. w20.01 mba. 15 udu. 5-6

Ng’atini lagu ngo genogen mi cidho i polo alaga. Mungu re ma mio ire genogen maeno. (1 Tes. 2:12) Pieno, wacikara ngo nipenjo penji ma copo timo jumange rac. Ku lapor, wabipenjo ngo dhaku p’umego moko ma tipo wiro nia ewinjere nenedi kan eparu nia ebikwo i ng’om kende ma won ot pare mbe. Wacikara ning’eyo m’umbe jiji nia i ng’om ma nyen, Yehova bipong’o yeny mi giracwia “ceke ma kwo kubang’gi.” (Zab. 145:16) Ka wabed waneno ngo Jukristu ma tipo wiro nia pigi tek nisagu jumange, nwang’u wabegwokara wan giwa. Nenedi? Biblia uwacu nia copere Jukristu moko ma tipo wiro gibigwoko ngo bedoleng’ migi. (Mat. 25:10-12; 2 Pet. 2:20, 21) Tek wadodo ngo dhanu nikadhu mukero, wabilubo ngo dhanu, nik’ebed Jukristu ma tipo wiro, ju m’ung’eiri lee, kunoke ju ma gitimo ni Yehova pi oro ma dupa. (Yud. 16) Bende, saa ma gigwoko ngo bedoleng’ migi ni Yehova kunoke giweko cokiri, yioyic ma watie ko i Yehova bikwio ngo, man wabiweko ngo nitimo ire. w20.01 mba. 29 udu. 9-10

Calu ma watie “nyithindho ma jumer” pa Yehova, ukwayu watim kero nilubo lapor pare. Pieno wacikara ninyutho mer ni jumange, nibedo ber kugi man niweko igi ka gitimowa rac. Ka dhanu m’ung’eyo Yehova ngo gineno nia watie ku kura ma ber, eno copo cwalugi niponjo lembe dupa i wie. (1 Pet. 2:12) Junyodo ma Jukristu gicikiri nikwo kud awiya migi i ayi ma nyutho nia gibelubo lapor pa Yehova. Tek gitimo kumeno, awiya migi bende copo mito gibed jurimb Yehova. Watie kud anyong’a i kum Yehova Wegwa mi polo, man wamito jumange bende ging’eye. Wawinjara i adundewa calu Ubimo Daudi m’ukiewo kumae: “Ng’eyong’ec para bilule ni kum Yehova.” (Zab. 34:2) Re saa moko lworo weco pi Yehova ni jumange romo negowa. Dong’ wacikara nitimo ang’o kara wanwang’ tegocwiny? Ukwayu wapar pi bero ma jumange gicopo nwang’u ka ging’eyo Yehova, man anyong’a ma Yehova romo bedo ko tek wabeweco pire ni dhanu mange. Yehova bimio iwa tegocwiny ma watie ku yenyne. Calu m’ekonyo umego mwa mi rundi ma kwong’a, ebikonyo wan bende.​—1 Tes. 2:2. w20.02 mba. 11 udu. 12-13

Ju ma pol ma waponjo kugi Biblia gitimo mediri man gilimo batizo. Ento jumoko ma waponjo kugi gilworo nidoko julub. I andha, gimaru niponjo Biblia, re gitimo ngo mediri nitundo i batizo. Kan ibeponjo Biblia ku ng’atu moko, m’umbe jiji itimo kero nikonye kara etii ku lembe m’ebeponjone i kwo pare, man kara edok jalub pa Kristu. Yehova ubemito mer re m’ucwal dhanu pare nitimo ire. Pieno lembakeca mwa utie nikonyo ng’atu ma waponjo kude Biblia unyang’ nia Yehova umare lee dit, man ebedieng’ pire nisagu. Wamito wakonygi ginen nia Yehova tie ‘won nyithikic, man japoklembe mi mon ma coggi tho.’ (Zab. 68:5) Saa ma ju ma wabeponjo kugi Biblia ginyang’ nia Yehova umarugi, lembene copo mulo adundegi man copo cwalugi nitimo mediri i thenge mi tipo. Pieno kony ju m’iponjo kugi ginyang’ nia Mungu mwa ma jamer ubemito ginwang’ kwo ma rondo ku rondo man etie ayika nikonyogi kara ginwang’ kwone. w20.01 mba. 3 udu. 7-8

Jakwenda Paulo ubino ng’atu ma jwigere pieno ebed eyenyo jukojuk i bang’ jurimbe. Ebed elworo ngo nia jumange gibinene ni ng’atu ma ng’ic kan enyutho igi ya jurimbe gijuko cwinye i saa mi peko pare. (Kol. 4:7-11) Ka wanyutho jwigiri man wayio nia watie ku yeny mi jukojuk, umego ku nyimego mwa gibikonyowa ku mutoro. Paulo ugam ung’eyo nia Lembagora copo juko cwinye. (Rum. 15:4) I Lembagorane, enwang’u rieko m’ukonye niciro amulaic ceke. (2 Tim. 3:15, 16) Kinde ma jutwio Paulo i Roma wang’ mir ario, enyang’ nia tho pare udhingo. Ekwayu Timoteo ucidh i bang’e pio pio, man kud ewek bende ‘kitabu m’adola.’ (2 Tim. 4:6, 7, 9, 13) Pirang’o? Pilembe copere kitabu m’adola maeno ubino kum Lembagora mi Juebrania m’ecopo wok timo ko ponji pare ma segi. Calu Paulo, ka wan de wabed waponjo Biblia wang’ ma pol, Yehova bitio ku Lembe pare maeno pi nikwio cwinywa kadok wabenwang’ara i lembe ma tek rukani de. w20.02 mba. 23-24 udu. 14-15

Elifaz, Bildad man Zofar giting’o ngo saa ma lee pi niparu pi kite ma gicopo konyo ko Yob. Ento gibino paru wec ma gibiyero pi ninyutho nia Yob utimo dubo. Wec migi moko ubino lemandha, ento lembe ma pol ma giyero iwi Yehova man iwi Yob ubino vupo, man lembe ma turo cwinyjo. Gipoko lembe iwi Yob nia etie dhanu ma rac. (Yob 32:1-3) Yehova uwinjere nenedi pi lembe ma dhanu adek maeno giyero? Ng’ecwiny unege lee mandha i kumgi. Elwong’ogi nia jukusegu, man eorogi nia gicidh i bang’ Yob urwo pigi. (Yob 42:7-9) Lapor ma rac pa Elifaz, Bildad man Zofar romo mio iwa ponji dupa. Mi kwong’o, wacikara ngo nipoko lembe iwi umego ku nyimego mwa. (Mat. 7:2-5) Ento wacikara niwinjogi cuu i wang’ niweco. Ka watimo kumeno re ma wabinyang’ ma ber i peko ma gibemuliri ko. (1 Pet. 3:8) Mir ario, saa ma wabeweco, wacikara niyero wec ma juko cwinyjo man mandha. (Ef. 4:25) Mir adek, Yehova ketho wie kilili i kum lembe ma wabeyero ni juwadwa. w20.03 mba. 22-23 udu. 15-16

Wang’ ma pol ka wabeponjo jumange ku lemandha iwi Yehova, eno konyo wan de ning’eye cuu. Ku lapor, waneno kisa pa Yehova kamaleng’ kinde m’ebekonyowa ninwang’u dhanu ma gimito gibed jurimbe. (Yoh. 6:44; Tic. 13:48) Bende, wabed waneno kamaleng’ nia Lembe pa Mungu tie ku tego kinde ma ng’atu ma wabeponjo kude Biblia ubeweko timo ma reco man eberonyo ng’atu ma nyen. (Kol. 3:9, 10) M’umedo maeno, wabed waneno nia Mungu tie ku cirocir kum ebeorowa wang’ udul i bang’ dhanu mi teritwar mwa pi nikonyogi kara giponj lemandha i wie man gibin gibothi. (Rum. 10:13-15) Ento kadok nwang’u dong’ wadaru timo ni Yehova pi oro ma rukani de, wacikara ngo niparu nia dong’ wambe ku yeny mi ponjo lembe iwi Mungu. Yo acel ma pire tek ma wanyutho ko nia winjiri mwa ku Yehova pire tek i iwa utie nirwo i bang’e. Kan ibemito mer mwu ku jarimbi udok tek, kwayu ibed iwec kude wang’ ma pol. Kumeno bende, kara icor i vut Mungu, bed irwo i bang’e wang’ ma pol; lworo kud unegi nibekoro ire paru m’upondo i adundeni. w19.12 mba. 19 udu. 11, 13-14

Ka wabeparu pi lembe maeno, wanwang’u jukocwiny ma lee dit! Yesu ma tie Jabim mi Ker pa Mungu bidaru peko ceke ma Sitani ku ng’om pare ginyayu i kumwa. (Isa. 65:17; 1 Yoh. 3:8; Nyu. 21:3, 4) Eno uketho watie ku genogen ma ber mandha pi nindo m’ubino! Bende kadok nwang’u Yesu umio iwa tic ma tek de, re etie karacelo kudwa, man ebekonyowa i nindo maeni mi kajikceng’. (Mat. 28:19, 20) Eno uketho watie ku tegocwiny ma yawe mbe! Ma jiji mbe, jukocwiny, genogen man tegocwiny gitie giki ma pigi tek akeca ma copo konyowa nibedo ku kwiocwiny i adundewa. I adundo, icopo timang’o kara imediri nibedo ku kwiocwiny i adundeni kadok i saa m’ibekadhu kud i amulaic ma pek? Iromo timo kit lembe ma Yesu ugam utimo. Mi kwong’o, rwo; kadok ibenweng’iri ku peko ma rukani de, kud iwek nirwo. Mir ario, nyuth woro ni Yehova, man rwei lembanyong’a kud amora kadok i saa m’etie yot ungo de. Man mir adek, kwai jurimbi gikonyi i peko peri. Kan itimo kumeno, kwiocwiny pa Mungu bikuro adundeni. (Flp. 4:6, 7) E ibitundo niciro amulaic moko ci, calu ma Yesu ugam uciro.​—Yoh. 16:33. w19.04 mba. 13 udu. 16-17