Dwi mir 4

Nyo ibekadhu kud i peko moko ma tek? Saa moko nyo ng’atu moko i cokiri utimi rac. (Yak. 3:2) Nyo ke jurutic wedu kunoke awiya wedu mi somo gibeceyi pilembe ibetimo ni Yehova. (1 Pet. 4:3, 4) Kunoke nyo wedi peri gibeceri nicidho i coko, kunoke ninyutho pi yioyic peri ni jumange. (Mat. 10:35, 36) Kinde ma ka pekone udoko tek, icopo paru nia dong’ iwek nitimo ni Yehova. Re ng’ei nia kadok ibenweng’iri ku peko ma nenedi de, Yehova bimio iri rieko kara imak yub ma cuu man kero m’icir ko pekone. Yehova uketho jukiewo i Biblia, lapor mi dhanu ma gileng’ ungo calu wan, ma giciro peko ma dongo i kwo migi. Pirang’o? Kara lembene umii iwa ponji. Yehova utio ku jakwenda Paulo pi nikiewo tap lembe maeno. Ka wabesomo lembene, wabinwang’u jukocwiny man genogen. Kara wanwang’ bero i lembenegi, ukwayu ngo wajik nisomo Biblia asoma kende. Ento wacikara niweko Lembagora ulok paru mwa man umul adundewa. w21.03 mba. 14 udu. 1-2

Nyo ibed ineno dhanu m’irweyo igi lembanyong’a ve cam m’udaru thwo, ma saa mi kayu uromo? Kan ibed inenogi kumeno, lembe adek ma e bitimere: mi kwong’o, ibimiiri lee i tic mi lembanyong’a m’umbe ninyotho saa. Calu ma nindo mi kayucam bijik, kwayu ngo nigalu. Mir ario, ibibedo ku mutoro kinde ma dhanu gibewinjo lembanyong’a m’iberweyo igi. Biblia uyero nia i nindo mi “mwoka,” dhanu bedo kud anyong’a lee. (Isa. 9:3) Mir adek, ibineno dhanu ceke m’irombo kugi nia giromo doko julub pa Yesu, pieno ibitimo kero niweco kugi iwi lembe ma romo telo nen migi. Ecicopere nia julub pa Yesu moko gibed giparu nia Jusamaria giromo doko ngo julub, ento Yesu ubino ngo ku paru maeno. Enenogi ni dhanu ma copo doko julub pare. Wan bende ubekwayu wanen dhanu mi teritwar ma warweyo i ie ni dhanu ma gicopo doko julub pa Kristu. I lembe maeno, jakwenda Paulo uweko iwa lapor ma ber m’ukwayu walubi. Etimo kero ning’eyo lembe ma dhanu m’eberweyo igi gidaru yio, lembe ma gimaru, man enenogi ni dhanu ma copo doko julub pa Yesu. w20.04 mba. 8-9 udu. 3-4

Kakare nipoko lembe iwi ng’atini pi gin moko m’ineno etimo, tim tego ing’ei kite m’ebewinjere ko. Yehova kende re ma nyang’ kudwa cuu. Pieno, kwaye ekonyi nineno dhanu mange calu ma en de eneno kogi, man ning’eyo kite m’icopo bedo ko ku kisa i kum jumange. Ukwayu ngo wapar nia waromo nyutho kisa ni umego ku nyimego mwa moko, ni jumange ke waromo nyutho ngo. Ju ma pol m’i kindgi gibekadhu kud i peko m’urombo ku pa Yona, Eliya, Hagar man Lot, man pekone moko ginyayu gin gigi i kumgi. I andha, wan ceke wadaru nyayu peko wan giwa i kumwa. Pieno, etie lembe ma kakare ka Yehova ubekwayu nia wanyuth kisa i kindwa. (1 Pet. 3:8) Kan ibeworo Yehova, nwang’u ibetielo bedo i acel mi jutic pare ma ginwang’iri i wang’ ng’om zoo. Dong’ wamedara niwinjo umego ku nyimego mwa, watim kero ning’eyogi cuu, man wabed ku kisa i kumgi. w20.04 mba. 18-19 udu. 15-17

Yesu ubed uworo Yehova i lembe ceke. Pieno, yo acel ma wacopo woro ko Yehova utie nilubo lapor pa Yesu ceng’ini ceng’ini mandha. (Yoh. 8:29) Kara wamedara niwotho i lemandha, ubekwayu wayii m’umbe jiji nia saa ceke Yehova yero lemandha, man wec ceke m’eyero i Lembe pare Biblia utie lemandha. Bende, wacikara niyio m’umbe jiji nia Yesu utie Masiya ma jular jung’olo pire. Tin eni dhanu dupa giyio ngo nia Yesu utie Rwoth ma Mungu uwiro pi nibimo iwi Ker pare. Yohana upoyo Jukristu nia ‘weg awondi’ ubino dupa ma gicopo wingo ju ma gitie ngo ayika nicero ba lemandha iwi Yehova man iwi Yesu. (2 Yoh. 7-11) Ekiewo kumae: “Ng’a ma jandra ndhu ng’atu m’ukwero nia Yesu en e Kristu ngo ngo?” (1 Yoh. 2:22) Kara kud juwondwa, gin acel kende ma copo konyowa utie niponjo Biblia. Tek watimo kumeno re ma wabing’eyo Yehova giku Yesu. (Yoh. 17:3) Bende, wabiyio m’umbe jiji nia wani lemandha. w20.07 mba. 21 udu. 4-5

Kara kud wabed ni cudho mi kier ni umego ku nyimego mwa ma waberingo kugi kwaya, yo acel utie niweko gitim lembe calu ma ging’iyo tek ecopere, kakare nirido nia gitim lembe kwa i ayi ma wamaru wan. (Rum. 14:19-21; 1 Kor. 8:9, 13) I lembe maeno, wakoc bor ku jaring kwaya mi ng’wec ma timo kero kara enwang’ sukulia ire kende. Juring kwaya gisayu mi kwong’o yeny migi gigi. Pieno, jaring kwaya moko copo cwalu juwagi kara elar etund en. Ento tung’ kugi, wan wabemito ngo waloi Jukristu wadwa. (Gal. 5:26; 6:4) Lembakeca mwa utie nikonyo dhanu dupa kara watund wakugi kaka ma waberingo i ie, man kara wanwang’ sukulia mi kwo ma rondo ku rondo. Eno uketho watimo kero nitio ku juk ma Mungu uyuyo i wie, m’uwacu nia ‘ng’atuman ie pid kum piny pare kende ngo, ento ng’atuman ie pid kum piny mi juwadi bende.’ (Flp. 2:4) I ng’wec ma waberingo, Yehova udaru nyutho ni dhanu pare pi sukulia ma gibinwang’u ka gidaru ng’wec migi: jumoko gibinwang’u kwo ma rondo ku rondo i polo, jumange ke iwi ng’om ma bidoko ni paradiso. w20.04 mba. 28 udu. 10; mba. 29 udu. 12

Jukristu milioni dupa gibiboth ‘kud i masendi ma dit,’ man gibimondo i ng’om ma nyen. Dhanu maeno ma giboth, gibineno ku wang’gi aloci mange iwi tho, saa ma dhanu milioni dupa m’utho bicer. Kepar pir anyong’a ma dit ma bibedo nuti saa maeno! (Tic. 24:15) Dhanu ceke ma gigwoko bedoleng’ migi ni Yehova, gibinwang’u aloci iwi tho ma walagu i bang’ Adamu. Man gibinwang’u bende kaka mi kwo rondo ku rondo. Wan ceke wacikara nibedo ku foyofoc pi wec mi jukocwiny ma jakwenda Paul uyero ni Jukorinto iwi cer. Lembe m’eyerone bicwaluwa nitimo “tic pa Rwoth” ku kero mwa ceke. (1 Kor. 15:58) Tek wabetimo tic maeno kud amora man ku gwoko bedoleng’, e wabinwang’u anyong’a m’i nindo m’ubino. Nindo maeno bibedo ber nisagu lembe ceke ma ber ma wabed waparu. Wabineno kamaleng’ nia tic pa Rwoth ma wabed watimo ubino ngo mi mananu. w20.12 mba. 13 udu. 16-17

Ubenen nia lembila ma nwang’ere i Ezekiel 38:10-23; Daniel 2:43-45; 11:44–12:1; man Lembanyutha 16:13-16, 21 ubeweco zoo iwi lembe ma rom. Ka tie kumeno andha, wabeparu nia lembe m’ulubo e bitimere: Nyanok i ng’ei ma masendi ma dit bicaku, jubim “m’i ng’om ngung’” gibidikiri karacelo ni ungu acel. (Nyu. 16:13, 14) Biblia ulwong’o ungu maeno mi thek nia ‘Gog mi ng’om mi Magog.’ (Eze. 38:2) Ungune bikelo masendi iwi dhanu pa Mungu, man gibimito gidargi kpo. I lembila moko m’uweco pi nindo mwa eni, jakwenda Yohana uwacu nia lungu pei ma dongo mandha bicwii iwi judegi pa Mungu. Lungu pei maeno ubenyutho rwonglembe ma kwiny mi pokolembe ma dhanu pa Yehova gibitwong’o. Rwonglembene biketho Gog mi Magog bikelo masendi iwi dhanu pa Mungu, man ebimito edargi pet kud iwi ng’om.​—Nyu. 16:21. w20.05 mba. 15 udu. 13-14

Tipo maleng’ pa Mungu utie giramia ma wacikara ninego ni gin mi tuko ngo. Wacopo nyutho foyofoc mwa pi tipo ma leng’ nwang’u wabeparu pi lembe ceke ma tipo ma leng’ ubetimo i rundi mwa eni. I wang’ nidok i polo, Yesu uyero ni julub pare kumae: “Wubinwang’u tego, nwang’u tipo maleng’ uwok i wiwu: man wubibedo jumulembe para . . . cil i tung’ ng’om.” (Tic. 1:8) Ku kony pa Yehova, dhanu ma romo milioni abora ku nusu ma ginwang’iri i tung’ ng’om zoo gibetimo thier ni Yehova. Bende, wa dhanu pa Yehova wabekwo i acel pilembe tipo maleng’ ubekonyowa nicego kite ma beco ma calu ve mer, mutoro, kwiocwiny, mwonyolembe hai, bedo ber ku dhanu, berocwiny, yioyic, molcwiny, man kwerigijo. Ka jucoko dhu kite maeno zoo, giwodho gin ma julwong’o “nying’ tipo.” (Gal. 5:22, 23) Andhandha, tipo maleng’ utie giramia ma yawe mbe! w20.05 mba. 28 udu. 10; mba. 29 udu. 13

Thelembe tie dupa m’ucwaluwa niyero nia, ebibedo yot ni dhanu ning’io wedi migi m’ucer. Ku lapor, nimakere ku cer m’ular utimere con, ubenen nia Yehova biketho dhanu m’ucer gibibedo kud ayi migi, ayi wec migi man paru migi de m’urombo ku ma gilar gibino ko i wang’e ma fodi githo ngo. Poi nia Yesu uporo tho ku nindo, man cer ke eporo ku cew kud i wang’ nindo. (Mat. 9:18, 24; Yoh. 11:11-13) Ka ng’atini ucew kud i wang’ nindo, ayi pare man kite m’eweco ko lokere ngo, man ebedo ku ng’eyong’ec ma rom ku m’elar ebino ko kinde m’ebecinindo. Ku lapor, Lazaru utho man etimo nindo ang’wen i liel, ma nwang’u dong’ kume ucaku betop. Re kinde ma Yesu ucere, nyimego pare ging’ie ndhundhu, man en de ayi migi urwinyo ngo i wang’e.​—Yoh. 11:38-44; 12:1, 2. w20.08 mba. 14 udu. 3; mba. 16 udu. 8

Tung’ tung’ moko nuti i kind Jukristu ma juwiro ku tipo man rombe mange. Re Yehova umaru ngo ungu moko nisagu wadi, ento gin ceke pigi tie tek i wang’e. Pilembe kadok Jukristu ma juwiro ku tipo man rombe mange de, ceke Mungu ng’iewogi ku kwo pa Wode m’emaru. Tung’ tung’ m’utie i kindgi utie genogen migi m’ukoc. Ento gin ceke gicikiri nigwoko bedoleng’ migi ni Mungu man ni Kristu. (Zab. 31:23) Man poi nia tipo pa Mungu copo tio ku tego ma rom iwi ng’atu moko ci m’i kindwa. Eno nyutho nia Yehova bemio tipo pare ma leng’ nimakere ku yeny ma ng’atuman utie ko. Yehova umio genogen ma ber mi nindo m’ubino ni jurutic pare ceke ma githiero kwo migi ire. (Yer. 29:11) Poi pi tho pa Kristu mio kaka ma ng’atuman m’i kindwa paku ko Mungu man Kristu pi gin ceke ma gitimo iwa kara wanwang’ kwo m’ajikine mbe. M’umbe jiji, Poi pi tho pa Kristu utie acel m’i kind coko ma pigi tek ma Jukristu mandha betimo kubang’ oro. w21.01 mba. 18 udu. 16; mba. 19 udu. 19

Dhanu ma pol ma gicokiri i Poi pi tho pa Yesu, gitie ku genogen mi kwo iwi ng’om. Dong’ pirang’o gibed gicidho ke? Gin gicidho ku thelembe ma rom ku pa ng’atu ma julwong’o ucidh i foc mi nyom. Ka julwong’i i foc mi nyom, icidho pi ninyutho nia imaru ju m’ubenyomo man ibemito idik cingi kugi. Kumeno bende, rombe mange de gicidho i Poi pi tho pa Yesu pilembe gimito ginyuth mer migi man gidik cing’gi ku Kristu man Jukristu ma juwiro ku tipo. Gicidho bende pi ninyutho foyofoc migi pi lam ma Yesu thiero, m’umio igi kaka ma gibikwo ko rondo ku rondo iwi ng’om. Thelembe mange ma pire tek m’uketho rombe mange gicidho i Poi pi tho pa Yesu, utie pi niworo lembang’ola pa Yesu. Cing’ ma Yesu ucaku the Cemo mir uthieno pa Rwoth karacalo ku jukwenda pare ma gigwoko bedoleng’ migi, ewacu igi kumae: “Wutim kumeni wupoi ko pira.” (1 Kor. 11:23-26) Pieno, ka fodi Jukristu moko ma juwiro ku tipo utie iwi ng’om keni ci, rombe mange gibimediri migi asu nicokiri i Cemo mir uthieno pa Rwoth. w21.01 mba. 17-18 udu. 13-14

Tek wamaru ng’atini andha, wacikara ninyutho mer mwane ku timo. (Nen bende Yakobo 2:17, 26.) Ku lapor Yehova umaruwa. (1 Yoh. 4:19) Enyutho mer parene nikadhu kud i wec ma beco m’eketho jukiewo i Biblia. (Zab. 25:10; Rum. 8:38, 39) Re wang’eyo nia Mungu umaruwa, ungo kende kende pi lembe m’eyero iwa, ento bende ni kum lembe m’ebetimo iwa. Yehova uyio nia Wode m’emaru unen can man utho piwa. (Yoh. 3:16) Nyo eno ubenyutho ngo nia Yehova umaruwa? Wanyutho nia wamaru Yehova giku Yesu nwang’u wabeworogi. (Yoh. 14:15; 1 Yoh. 5:3) Yesu ung’olo iwa nia wamarara i kindwa. (Yoh. 13:34, 35) Ukwayu ngo wabed wanyuth mer mwa ni umego ku nyimego kende kende ku wec, ento wabed wanyuthe bende ku timo.​—1 Yoh. 3:18. w21.01 mba. 9 udu. 6; mba. 10 udu. 8

Jukristu ma tipo wiro gitie ku genogen mi kwo rondo ku rondo karacelo ku Yesu, man gibibimo kugi i Ker mi polo. Gibinene, gibiweco kude, man gibibedo karacelo kude. (Yoh. 14:2, 3) Dhanu ma gitie ku genogen mi kwo i ng’om de Yesu bimarugi man ebitimo igi bero dupa. Kadok gibineno ngo Yesu de, re gibibedo jurimbe ma ceng’ini, kinde ma gibefoyo ku kwo ma Yehova giku Yesu gimio igi. (Isa. 9:6, 7) Ka wayio lwong’o ma Yesu ulwong’o kowa nia wadok jurimbe, wanwang’u mugisa dupa. Ku lapor, tin eni emaruwa man ebekonyowa. Watie ku genogen mi kwo rondo ku rondo. M’usagu zoo, mer ma wamaru ko Yesu biketho wabibedo jurimb Ng’atu ma pire tek nisagu i polo kud i ng’om zoo, niwacu Yehova ma tie Won Yesu. M’umbe jiji, etie rwom ma lee mi tuko ngo nibedo jurimb Yesu! w20.04 mba. 25 udu. 15-16

Jakwenda Paulo ukiewo wec maeno ni Jukristu mi Korinto, ma gibino ku genogen mi cer pi nicikwo i polo. Jukristu maeno “judwokogi leng’ ni kum Kristu Yesu, ma julwong’ogi ya gibed jumaleng’.” Eweco bende pi dhanu ma “ginindo [i tho] i Kristu.” (1 Kor. 1:2; 15:18; 2 Kor. 5:17) I barua mange ma Paulo ukiewo, eyero nia dhanu ma ‘giribiri ku Yesu i ayi mi tho pare, giribiri bende kude i ayi mi cer pare.’ (Rum. 6:3-5) Yesu ucer ku kum mi tipo man eidho i polo. Ebibedo kumeno bende ni dhanu ceke ma gini “i Kristu,” niwacu Jukristu ceke ma juwiro ku tipo. Paulo ukiewo nia Kristu ucer ni “mwoka ma kwong’a mi ju m’unindo [i tho].” (1 Kor. 15:20) Yesu ubino ng’atu ma kwong’a m’ucer ku kum mi tipo ku kind ju m’utho man enwang’u kwo ma rondo ku rondo. w20.12 mba. 5-6 udu. 15-16

Jukristu ma juwiro ku tipo ma gibetho i nindo ma tin, gicer ndhundhu i ng’ei tho migi pi nicidho i polo. Lembe ma jakwenda Paulo ukiewo i 1 Jukorinto 15:51, 52 unyutho lembuno kamaleng’. I saa mi cer, umego pa Kristu gibinwang’u anyong’a ma yawe mbe. Biblia unyutho tic ma ju ma julokogi “nyapil calu goyowang’” gibitimo i polo. Yesu wacu igi kumae: “ng’atu m’uloyo, ku ng’atu m’ukuro tic para de cil i kajikne, abimie ng’ol wi thek, man ebibimogi ku dul mi nyunyu, [e gibing’eny] calu agulu pa jacwiagulu ng’eny nziki nziki; calu [ma] an bende ajolo ba Vwa.”​—Nyu. 2:26, 27. w20.12 mba. 12 udu. 14-15

Kinde ma jakwenda Paulo uwacu nia Yesu tie “mwoka,” ebino nyutho nia i ng’eye dhanu mange de bibedo nuti ma bicer pi nicikwo i polo. Eno uketho i ie jukwenda ku jumange bende ma gini “i Kristu.” (1 Kor. 15:18) I saa m’ukwayere, gin de gibicer ku kit cer ma rom ma calu pa Yesu. Kinde ma Paulo ukiewo barua ni Jukorinto, nwang’u fodi cer ma ju ma gini “i Kristu” gibicer ko pi nicikwo i polo, ucaku ngo. Paulo ubino weco pi cer ma bitimere i ng’eye. Ekiewo kumae: “[Kubang’ dhanu ng’atuman kakare]: Kristu landu wi mwoka; macen ju ma gi pa Kristu, i [bedo nuti] pare.” (1 Kor. 15:23; 1 Tes. 4:15, 16) Tin wabekwo i nindo maeno mi “bedo nuti” pa Kristu ma juweco pire. Ugam ukwayere nia jukwenda karacelo ku Jukristu mange ma juwiro ku tipo ma gidaru tho, gikegikur nindo mi bedo nuti pa Kristu pi ninwang’u sukulia migi i polo man ‘niribiri kude i ayi mi cer pare.’​—Rum. 6:5. w20.12 mba. 5 udu. 12; mba. 6 udu. 16-17

Jakwenda Paulo ubino weco pi dhanu ma bicer ku kum ma gicopo kwo ko i polo, niwacu “kum mi tipo.” (1 Kor. 15:43, 44) Kinde ma Yesu ubino kwo iwi ng’om, ebino ku kum mi ring’kum. Ento kinde m’ecer, ‘edoko ni tipo ma mio kwo’ man eidho i polo. Jukristu ma juwiro ku tipo bende gibicer ku kum mi tipo ma copo ketho gikwo i polo. Paulo ukoro kumae: “Calu wan wadaru bedo kud ayi maeni mi ng’om, e wabibedo kud ayi maeni mi polo bende.” (1 Kor. 15:45-49) Ubenen kamaleng’ nia Yesu ucer ungo ku kum mi dhanu. Paulo ukoro lembene kinde m’ebino daru wec pare iwi cer. Ewacu kumae: “Ring’kum ku rimo copo camu pacu mi Ker pa Mungu ngo.” (1 Kor. 15:50) Pi nicikwo i polo, jukwenda ku Jukristu mange ma juwiro ku tipo, gibicer ungo ku kum mi ring’kum ku rimo ma copo nyothere. w20.12 mba. 10-11 udu. 10-12

Mungu utelo wi jumoko m’i kind julub pa Yesu i rundi ma kwong’a, pi nikiewo lembe iwi cer mi kwo mi polo. Jakwenda Yohana ukoro kumae: “Kawono wa nyithindho pa Mungu, endre fodi enyuthre ngo nia wabibedo ni ang’o. Wang’eyo nia, tek ebinyuthre, wabibedo calkude.” (1 Yoh. 3:2) Eno ubenyutho nia Jukristu ma juwiro ku tipo fodi ging’eyo ngo kite ma gibibedo ko kinde ma gibicer ku kum mi tipo. Re gin ma ging’eyo utie nia, kinde ma gibinwang’u sukulia migi, gibineno Yehova. Biblia ukoro lembene moko nyanok. Jukristu ma juwiro ku tipo gibidikiri karacelo ku Kristu kinde m’ebekabu “bimobim ceke ku ng’ol ceke man tego.” Eno uketho i ie bende nyoth m’ebinyotho ko “Jakwor macen ma . . . en e tho.” I ng’eye, Yesu karacelo ku ju m’ebibimo kugi, gibijwigiri gin gigi ni Yehova man gibidwoko piny ceke wor ire. (1 Kor. 15:24-28) Eno bibedo nindo maber mi tuko ngo! w20.12 mba. 8 udu. 2

Jukristu ma gigwoko bedoleng’ migi, ma gimbe ku genogen mi cikwo i polo ku Kristu de gitie ku genogen mi cer. Biblia uwacu nia jakwenda Paulo ku jumange ma gibicidho i polo, gibicer i “cer ma kwong’a ku kind ju m’utho.” (Flp. 3:11, NWT) Eno ubenyutho nia cer mange de bibedo nuti i ng’eye. Lembuno urombo ku genogen ma Yob ubino ko pi nindo m’ubino. (Yob 14:15) “Ju ma gi pa Kristu,” ma gicer i nindo mi “[bedo nuti] pare,” gibibedo karacelo ku Yesu i polo, kinde m’ebenyotho bimobim, dito man tego ceke. Kadok “Jakwor macen ma . . . en e tho” de jubikabu cen. Andha, ju ceke ma gibicer pi nicikwo i polo, gibitho ngo. (1 Kor. 15:23-26) Dhanu ma bikwo i ng’om keni ke gicopo bedo ku genogen iwi lembe ma Paulo yero, ma tie ukungu mi giragora mwa mi nindo ma tin. Ubenen kamaleng’ nia won bedopwe ngo acel de mbe ma bicidho i polo. Pieno, wec maeno ubenyutho pi cer ma bitimere iwi ng’om i nindo m’ubino. w20.12 mba. 6-7 udu. 18-19

Wacopo penjara kumae: ‘Acopo ng’eyo nenedi nia Yehova uweko dubo para?’ Kan ipenjiri kumeno, nyutho nia Yehova copo weko iri. Oro dupa udaru kadhu, Otkur ma Wiw moko ukoro kumae: “Saa moko wacopo nwang’u nia wabed watimo dubo lee ma dong’ kurane unyang’, man parune de bedwogo i wiwa wang’ ma pol. Kan iwinjiri kumeno, kud ipar nia itimo dupa ma wekere ngo. Kum eno tie tap lembe ma Sitani ubemito ipar. Cwinyi m’ubedieng’ pi dubo m’itimo kende ci, ubenyutho nia itie dhanu ma rac ungo, man Yehova copo timo iri kisa. Lworo kud unegi, nyuth jwigiri man kway Mungu utim iri kisa, ekonyi kara ibed ku pidocwiny ma leng’ kendo.” I wang’ nidoko Jakristu, jakwenda Paulo utimo dubo dupa ma dongo. Saa moko ebed epoi bende i kum lembe m’ebed eetimo. (1 Tim. 1:12-15) Ento ebed eneno jamgony ni giramia ma Mungu umio ire athothi. Lembuno uketho Paulo upodho ngo i awic mi dieng’ akeca pi dubo m’ukadhu, ento eketho wie i kum timo ni Yehova ku tego pare ceke. w20.11 mba. 27 udu. 14; mba. 29 udu. 17

Sitani betio ku piny dupa pi nibidhowa kara watim lembe ma reco. Dong’ ubekwayu watim ang’o? Ecopo bedo iwa yot nicaku paru nia, eni tie lembe ma rac ungo. Ku lapor, icopo paru kumae: ‘Ma jubikoya de ngo kud i cokiri e, nen nia etie gin ma rac ungo.’ Paru ma kumeno tie rac magwei. Dong’ i saa maeno, etie ber nia ikepenjiri kumae: ‘Nyo eni romo bedo ngo abidhe ma Sitani ubetio ko pi nipoko adundena? Kan aweko awanya ma rac umondo i ia, nyo abikelo ngo acidi iwi nying’ Yehova? Nyo timo maeno copo ketho kindwa bedo ceng’ini ku Yehova kunoke copo poko kindwa apoka?’ Ubekwayu ikenyam i penji maeno cuu. Kwai Yehova ukonyi idwok wang’ penji maeno m’umbe umbili. Kan itimo kumeno, ibibedo agwoka. Bende, eno bikonyi nikwero magwei abidhe pa Sitani, tap calu ma Yesu utimo; ewacu kumae: “Ai kakeni, Jok!” (Mat. 4:10) Poi nia adunde m’upokere tije mbe. w20.06 mba. 12-13 udu. 16-17

Wajwigara niworo cik pa Yehova, pilembe wanyang’ nia en re m’eng’eyo gin ma ber nisagu zoo ma watie ku yenyne. (Efe. 4:22-24) Jwigiri cwaluwa niketho yeny pa Yehova i kabedo ma kwong’a, man nineno jumange nia pigi tek nisaguwa. Eno ketho wabedo ku winjiri ma cuu ku Yehova, man kud umego ku nyimego mi cokiri. (Flp. 2:3) Re ka wabedo ngo ku wang’wa, wan bende wacopo mondo i kura mi dhanu mi ng’om maeni ma giting’iri, man ma gimariri gigi. Cicopere nia lembuno ugam utimo Jukristu moko mi rundi ma kwong’a bende, pilembe jakwenda Paulo ugam ukiewo ni Jukristu mi Roma kumae: “Ayero . . . ni dhanu ceke ma ni i kindwu kubang’gi kubang’gi, ng’atuman ie kud upid pire gire ma sagu ma maku ie pidi; ento ie pid kumeni calu pidoie bedo nger.” Paulo ugam ung’eyo nia etie rac ungo nia ng’atini upar pire gire i kadhiri moko. Ento jwigiri bikonyowa kara wabed ku nen ma cuu i wiwa giwa, man kara kud wapar piwa giwa nikadhu mukero. w20.07 mba. 2 udu. 1-2

Kwiocwiny m’ubino i rundi p’ubimo Asa ugam ubedo ngo mi nja. Udul mony ma kadhu milioni acel mir Ethiopia ucoro i wigi. Zera ma tie jadit mi monyne cwinye bino tek nia ebinyotho adhura mi Yuda. Asa uketho ngo genogen pare iwi wend juaskari m’ebino ko, ento egeno pare Yehova. Erwo kumae: “Konywa, E Yehova Mungu mwa; kum wageno in, man wabino kum udul maeni i nyingi.” (2 Kei. 14:11) Kadok wend jurumony mir Ethiopia ubino lee ma romo sagu p’ubimo Asa wang’ ario de, re Asa ung’eyo nia Yehova utie Mungu ma Jatego man ebikonyo dhanu pare. Andha Yehova uwekogi ngo, ekonyogi man lwiny uloyo udul mony mir Ethiopia. (2 Kei. 14:8-13) Kadok wang’eyo ngo peko ma ng’atuman acel acel m’i kindwa binwang’ere ko i nindo m’ubino de, re wang’eyo nia kwiocwiny, niwacu bedagonya ma wabetimo ko ni Mungu tin bibedo nja ngo. Yesu ular uwacu nia i nindo mi kajik ceng’, “thek ceke bidagu” julub pare.​—Mat. 24:9. w20.09 mba. 17-18 udu. 14-16

Wan ceke wabed wamito ngo nia jucidwa. Pieno ka judegi mwa gibecidowa, lembene copo nyayu can lee i iwa, e cwinywa romo tur. (Rie. 24:10) Dong’ wacikara nibedo ku paru ma nenedi kinde ma judegi mwa gibecidowa? Calu jakwenda Paulo, wacopo bedo kud ‘anyong’a . . . ka jubecidowa.’ Pirang’o? Pilembe ka dhanu becidowa man gibenyayu ragedo i kumwa, eno nyutho nia watie julub mandha pa Yesu. (1 Pet. 4:14) Yesu uyero ni julub pare nia jubinyayu ragedo i kumgi. (Yoh. 15:18-20) Lembe maeno utimere de andha i kum Jukristu mi rundi ma kwong’a. Con eca, dhanu ma ging’io ku kura mi Jugiriki gibed gineno nia Jukristu tie dhanu ma rieko migi mbe man ma thelem migi de mbe. Bende i kind Juyahudi, jubed juneno Jukristu nia gitie dhanu ma gisomo ngo man ma tijgi mbe, calu ma jugam juneno ko Petro giku Yohana. (Tic. 4:13) Dhanu ma dupa gibed gineno nia Jukristu thelem migi mbe man kero migi de mbe. Nyo Jukristu mi rundi ma kwong’a giweko wec ma reco ma judegi migi beyero ku nying’gi ucergi ku timo ni Yehova? Ungo. w20.07 mba. 14-15 udu. 3-4

Jakwenda Yohana umaru umego pare lee dit man emito gibed ku yioyic ma tek. Mer man adieng’a pare unen kamaleng’ i juk m’emio igi, ma nwang’ere i barua adek m’ekiewo. Etie lembe ma tielo cwinywa lee dit ning’eyo nia jumaco ku jumamon ma gibicibimo ku Kristugi i polo gimaruwa man gidieng’ piwa calu Yohana! (1 Yoh. 2:27) Dong’ ukwayu ng’atuman m’i kindwa utii ku juk m’emio. Wamedara niwotho i lemandha, niwacu wawor Yehova i lembe ceke m’ebetimo i kwo pare. Ponj Biblia, man bed ku genogen iwi Bibliane. Dwok yioyic m’itie ko i Yesu udok tek. Kud iwek ponji m’ucungo iwi rieko mi dhanu man ponji mi ju m’ujai i kum yioyic umond i wii. Kud ikwo ve ulik, niwacu ve itie Jakristu man ve itie Jakristu ngo de. Wor cik ma Yehova umio iwi kurajo, man wan ceke wakony umego ku nyimego mwa kara gimediri nibedo i lemandha. Wawek lembe ni ju m’utimowa rac man wakony ju m’utie ku yeny mi kony. Ka watimo kumeno, wabimedara niwotho i lemandha, kadok nwang’u wabenwang’ara ku peko ma nenedi de. w20.07 mba. 24-25 udu. 15-17

Yehova umaru jurutic pare ceke ma gibegwoko bedoleng’ migi ire, uketho emio igi kaka ma gibed ko i cokiri pare. Kadok ng’atuman m’i kindwa utie ku tic ma tung’ tung’ i cokiri de, re wan ceke piwa tie tek, man ng’atuman utie ku yeny pa wadi. Jakwenda Paulo unyutho kamaleng’ nia ng’atu moko mbe i kindwa m’umaku uwac ni wadi nia “ambe ku yeny peri.” (1 Kor. 12:21, NWT) Ka wamito kwiocwiny ubed i cokiri, ukwayu wanen ng’atuman ni dhanu ma pire tek man watim tic i acel. (Efe. 4:16) Ka wabetimo tic i acel, ng’atuman binwang’u nia jumare man cokiri bicungo ma tek. Judong cokiri ceke tipo ma leng’ pa Yehova re m’ung’iogi. Ng’atuman m’i kindgi utie ku copo m’ukoc ku pa wadi. (1 Kor. 12:17) Jumoko m’i kindgi copo bedo ngo ku ng’eyong’ec ma rom ku mi juwadi, pilembe nwang’u fodi gidoko judong cokiri i nindo ma nok. Jumange ke, peko mi tio ku remo copo cerogi nitimo lembe dupa. Kadok kumeno de, jadit cokiri moko mbe m’ucikere nicayu wadi, m’ewac ko ire nia, “kony peri mbe i bang’a.” Jadit cokiriman ucikere niworo juk ma jakwenda Paulo ukiewo ma nwang’ere i Jurumi 12:10. w20.08 mba. 26 udu. 1-2; mba. 27 udu. 4

Yehova ubetelo wiwa wawoth i yo mi kwo nikadhu kud i thenge mi ng’om mi dilo pare. Saa ma ka dilo pa Mungu ubemio iwa telowic iwi lembe mi kurajo, kunoke der ma nyen iwi nyang’ mwa iwi giragora moko, wajolo lembene yot yot man watio kude. Dong’ wabitim’ang’o ka dilo pa Mungu umaku yub m’ubedo kud adwogi iwi lembe mange mi kwo mwa, calu ve nilworo Ot Ker ma wacokara i ie? Ka wapoi nia tic ceke ma wabetimo wabetimogi ni Yehova, man nia en re m’ebetelo wi dilo pare, eno biketho wabibedo asu kud anyong’a. (Kol. 3:23, 24) Ubimo Daudi uweko iwa lapor ma ber pi lembuno kinde m’ebino coko dhu sente mi giero hekalu. Ewacu kumae: “An a ng’a, man dhanu para en e ang’o, ma nia wacopo thiero ku wagi berocwiny ma kumeni? Kum gin ceke ai i beng’i, man wamio iri kum gin ma peri giri.” (1 Kei. 29:14) Wan bende, kinde ma wabemio giramia ni Yehova, eca nwang’u wabemio de gin m’uai kud i bang’e gire. Re kadok kumeno de, anyong’a nege pi saa, kero, man jukupiny mwa ma watio ko pi tic pare.​—2 Kor. 9:7. w20.11 mba. 22-23 udu. 14-16

Iwa wan ma watie Jumulembe pa Yehova, gin ma nyutho nia tic mwa ubewotho cuu utie ngo wend dhanu ma wabekelo i dilo. (Lk. 8:11-15) Yehova neno nia wabetimo tic mwa ubewotho cuu, nwang’u wabemedara nirweyo lembanyong’a man wabeponjo jumange. Pirang’o? Pilembe eno nyutho nia wabetimo lembe ma ging’olo iwa giku Wode. (Mk. 13:10; Tic. 5:28, 29) Wan wa judwar dhanu bende watie ku thelembe ma rom mi dhulo tic mwa, pilembe ajiki mi ng’om maeni dong’ ni ceng’ini mandha! Saa m’udong’ ma wacopo dikara ko i tic mi bodho kwo utie nok magwei. Kud igal man kud ikur nia lembe m’i weng’i ukeuthum ka dong’ icak tic maeni ma pire tek. Med amora peri, med ng’eyong’ec peri i Lembe pa Mungu, bed ku tegocwiny man tim tego. Dikiri karacelo ku judwar dhanu ma kadhu milioni abora, e ibinwang’u anyong’a pa Yehova. (Neh. 8:10; Lk. 5:10) Keth lembakeca m’idikiri ko i tic maeni nitundo ma Yehova re ma biwacu nia dong’ eromo. w20.09 mba. 7 udu. 18-20

Ukwayu ngo wawek awanya mi giki mi kum uwing wiwa. “Awondi mi lonyo” copo jwigo mer ma wamaru ko Yehova man ma wamaru ko Lembe pare, man ecopo jwigo bende amora mwa mi rweyo lembanyong’a. (Mat. 13:22) Ka waneno ariti moko, ukwayu watim pio niure kara wagwok gin ma Yehova umio iwa. Mito walar wayikara con con pi ning’eyo gin ma wabitimo ka wanwang’ara mbwang’ i wang’ lembe mi tarwang’, lemb rop, man ponji mi ju m’ujai i kum yioyic kinde ma wabetio kud Internet kunoke wabeneno Televizio. Ka walar wayikara pi lembe ma kumeno ma copo wok, wabitimo pio nikabu gin ma copo nyotho winjiri mwa ku Yehova, e wabibedo leng’ i wang’e. (Zab. 101:3; 1 Tim. 4:12) Ukwayu wagwok piny ma pire tek ma Yehova umio iwa, niwacu lemandha mi Biblia man rwom mi rweyo lembanyong’a. Ka watimo kumeno, wabibedo ku pidocwiny ma leng’, wabibedo ku genogen i kwo mwa man wabinwang’u anyong’a pilembe wabekonyo dhanu ning’eyo Yehova. w20.09 mba. 30 udu. 16-19

Nyo idaru limo batizo? Ka eyo, eno idaru nyutho kamaleng’ i wang’ dhanu mange nia itie ku yioyic i Yehova man itie ayika nitimo ire karacelo ku dilo pare.Tin, ayi ma Yehova ubetelo ko wi dilo pare ubenyutho kite pare ma beco, lembakeca pare, man cik mi kurajo m’ebemito walubi. Kenen kite pa Yehova adek m’ubenen kamaleng’ i dilo pare. Mi kwong’o, Yehova mbe kud akoyakoya. (Tic. 10:34) Mer pa Yehova ucwale nimio Wode “ni jamgony ni dhanu ceke.” (1 Tim. 2:6; Yoh. 3:16) Yehova ubetio ku dhanu pare pi nirweyo lembanyong’a ni ng’atu moko ci m’utie ayika niwinjo. Kumeno re m’ebekonyo dhanu ceke m’umaru ninwang’u bero mi jamgony kara gibothi. Mir ario, Yehova maru lembe m’upangere cuu man ku kwiocwiny. (1 Kor. 14:33, 40) Jutic pare gibetimo ire i ungu m’upangere cuu, man gitie ku kwiocwiny i kindgi. Mir adek, Yehova tie Japonjo ma dit. (Isa. 30:21) Pi thelembe maeno re ma dilo pare timo kero niponjo dhanu ku Biblia ma tie Lembe pare, nik’ebed i cokiri kunoke i tic mi rweyo lembanyong’a. w20.10 mba. 20 udu. 1-3