Cing’ Yehova tie dungulu magwei ungo nyanok de

1. Musa unyutho nenedi nia egeno Yehova kinde m’ebewodho nyithindho mir Israel kud i Misiri?

KUD i kind weg yiyoyic ma juweco pigi i buku mi Juebrania, Musa utie ng’atu acel ma pire tek lee. (Ebr. 3:2-5; 11:23-25) Enyutho yiyoyic ma lee kinde m’ebewodho nyithindho mir Israel kud i Misiri. Eweko ngo Farao kud udul mony pare ginyay lworo i iye. Ento eketho genogen pare zoo iwi Yehova. Pieno etelo wi nyithindho mir Israel nitundo i nam ma kwar man i ng’eye ke i langa. (Ebr. 11:27-29) Juisrael ma dupa gibayu genogen migi iwi copo ma Yehova tie ko mi pong’o yeny migi, ento Musa umedere nigeno Mungu pare. Eyiyo ngo gin ma iye nanu, pilembe Mungu umiyo cam man pii pi nipong’o yeny mi dhanu pare i langa m’uthwo.a—Ai 15:22-25; Zab. 78:23-25.

2. Pirang’o Mungu upenjo Musa nia, “Nyo cing’ Yehova tie dungulu magwei”? (Wel 11:21-23)

² Ento kadok nwang’u Musa ubino ku yiyoyic ma tek de, re kago oro acel i ng’ey ma Juisrael giwok kud i Misiri i ayi mir udu, epenjere ka nyo andha Yehova utie ku copo miyo ring’o ni dhanu pare. Ebino tek ni Musa ninyang’ i kite ma Yehova copo miyo ko ring’o ma romo dhanu milioni dupa ma gigonjo i langa m’uthwo. Pieno Yehova upenje kumae: “Nyo cing’ Yehova tie dungulu magwei?” (Som Wel 11:21-23.) Kakeni, wec ma nia “cing’ Yehova” ubenyutho tipo ma leng’ pa Mungu kunoke tego pare m’etimo ko lembe. I ayi mange, Yehova ubino penjo Musa kumae: ‘Nyo ibeparu nia andha acopo timo ngo gin m’ang’olo?’

3. Pirang’o pi lembe ma Musa ku Juisrael gikadhu kud i iye utie tek iwa?

³ Nyo in de idaru penjiri ka nyo andha Yehova bipong’o yeny peri kunoke mi juruot peri i thenge mi kum? Kadok fodi de, re wakenenu gin m’uketho Musa man Juisrael gibino mbe ku genogen ma nia Yehova copo pong’o yeny migi. Wabing’iyo bende i giragora moko ma bikonyowa nimedo genogen mwa iwi Yehova nia cinge tie dungulu magwei ungo nyanok de.

PONJI MA WACOPO NWANG’U I LAPOR PA MUSA MAN MI JUISRAEL

4. Copere ang’o m’uketho Juisrael ma dupa gicaku penjiri ka nyo andha Yehova copo pong’o yeny migi mi thenge mi kum?

⁴ Ang’o m’ucwalu Juisrael ma dupa nibedo ku jiji iwi copo pa Yehova? Nwang’u gin karacelo kud “udul dhanu ma lee m’ujebiri” ma gi Juisrael ungo gidaru wotho i langa pi kare moko kinde ma gibecidho i Ng’om mi lembang’ola. (Ai 12:38; Poy. 8:15) Udul dhanu m’ujebiri maeno ku Juisrael ma dupa giol ku camu mana. E gin ceke gicaku wagiri. (Wel 11:4-6) Gicaku paru pi cam ma giweko i Misiri. Mac ma dhanu gidhuro i kum Musa uketho eparu nia ukwayu en re m’emii igi cam.—Wel 11:13, 14.

5-6. Udul dhanu m’ujebiri gibino kud atelatela ma kani iwi Juisrael ma dupa, man lembuno copo miyo iwa ponji ma kani?

⁵ Ubenen nia pidoic mi koso foyofoc m’udul dhanu m’ujebiri ginyutho re m’ubino kud atelatela ma rac iwi Juisrael. Calu ma wabekwo i kind dhanu m’ukoso foyofoc, wan de wacopo caku foyo ngo ku gin ma Yehova ubemiyo iwa. Lembuno romo timere tek wabeparu kwa pi piny ma wadaru weko kunoke tek kumira ubenegowa i kum piny mi jumange. Ento wabibedo jumutoro nwang’u wabeponjo niketho cwinywa ucungi i kum kadhiri piny ma watie ko.

⁶ Nwang’u ukwayu Juisrael gipoy nia Mungu utego cwinygi nia gibibedo ku piny bik i thenge mi kum nwang’u gitundo i kabedo migi ma nyen, niwacu i Ng’om mi lembang’ola, ento ungo kinde ma gibewotho i langa. Kumeno bende, kakare niketho wiwa i kum piny ma wacopo nwang’u i ng’om maeni, ecibedo ber nia wabed wapar asagane pi piny ma Yehova ung’olo nia ebimiyo iwa i ng’om ma nyen. Wabed wanyam bende i giragora ma copo medo genogen mwa iwi Yehova.

7. Pirang’o ukwayu cwinywa ubed tek nia cing’ Yehova tie dungulu magwei ungo?

⁷ Saa moko nyo fodi asu ibepenjiri nia pirang’o Mungu upenjo Musa nia, “Nyo cing’ Yehova tie dungulu magwei?” Copere nia ebino konyo Musa upar pi tego pare kende ngo, ento bende pi kaka ma cinge m’erieyo copo tundo i iye. Yehova ubino ku copo mi miyo ring’o lee ni Juisrael kadok gibino bor i die langa. Mungu unyutho tego pare “ku cinge ma tek man ku bote m’erieyo.” (Zab. 136:11, 12) Pieno ka wan’i peko moko, cwinywa ubed tek nia cing’ Yehova bitundo i bang’wa athothi.—Zab. 138:6, 7.

8. Ang’o ma bikonyowa kara kud wapodh i kosa ma rom ku ma Juisrael gipodho i iye i langa? (Nen bende cal.)

⁸ De andha Yehova umiyo ring’o calu m’eng’olo; e dhanu gicoko aywer bik. Ento Juisrael gifoyo ngo Mungu pir udu maeno. Kakare nitimo kumeno, ju ma dupa gicoko aywer kud abamba dieceng’ ku diewor. Ng’eicwiny umaku Yehova i kum “dhanu ma juwanya,” man emiyo igi matira. (Wel 11:31-34) Lapor maeni copo miyo iwa ponji ma kani? Ukwayu wabed ku wang’wa i kum ketho cwiny hai i kum piny. Kadok watie julonyo kunoke jucan, ukwayu ku kwong’a ‘wakan lonyo mwa i polo.’ Pieno mito watim kero wabed ku winjiri ma ceng’ini ku Yehova man ku Yesu. (Mat. 6:19, 20; Luka 16:9) Tek watimo kumeno, cwinywa ubed tek nia Yehova bipong’o yeny mwa.

9. Cwinywa copo bedo tek i kum ang’o?

⁹ Tin de Yehova rieyo cinge pi nikonyo dhanu pare. Ento eno ubenyutho ngo nia wabikoso ngo sente kunoke cam.b Re Yehova biwenjowa ngo. Ebitielowa i saa mi peko. Dong’ wacopo nyutho nenedi nia watie ku genogen nia Yehova bipong’o yeny mwa mi thenge mi kum, asagane (1) kinde ma watie ku peko pa sente man (2) kinde ma wabeyiko anyim mwa?

KINDE MA WATIE KU PEKO PA SENTE

10. Ang’o ma romo ketho wanwang’ara ku peko pa sente?

¹⁰ Calu m’ajiki mi ng’om maeni udhingo magwei, ukwayu wang’ey nia peko pa sente bimedere ameda. Anyobanyoba mi lemgamba, lwiny, peko ma wok rek kunoke thong’om romo ketho mbwang’ kumeni wabayu tic mwa, jamcingwa kunoke udi mwa. Saa moko ke romo kwayere nia wasay tic ma nyen kunoke wanen ayi ma wacopo dwoko ko juruot mwa kaka mange kara yeny migi upong’ ma ber. Ang’o ma copo konyowa nimaku yub m’ubenyutho nia wageno cing’ Yehova?

11. Ang’o ma copo konyi ninyego ku peko pa sente? (Luka 12:29-31)

¹¹ Lembe ma kwong’a man ma bikonyi nisagu zoo utie nikoro adieng’a peri ni Yehova. (Rie. 16:3) Pieno kwaye emii iri rieko m’itie ku yenyne pi nimaku yub ma beco, man kwiyocwiny mir adunde kara kud idieng’ pi peko peri ‘nikadhu mukero.’ (Som Luka 12:29-31.) Kwaye ekonyi iponj niketho cwinyi ucungi i kum piny m’itie andha ku yenyne pi nikwo. (1 Tim. 6:7, 8) Tim sayusac i girasoma mwa iwi ayi mi nyego ma ber ku peko pa sente. Ju dupa giyero nia video ku girasoma m’i jw.org m’uweco iwi peko pa sente ukonyogi lee.

12. Penji ma kani ma copo konyo ng’atini nimaku yub ma beco pi juruot pare?

¹² Jumoko gituc niyiyo tic m’uketho giweko juruot migi udong’ i ng’eygi, re i ng’eye ju ma dupa ginwang’u nia eno ubino ngo yub mi rieko. I wang’ niyiyo tic moko, kud ipar kende kende pi sente m’ibinwang’u, ento bende pi matoke m’ebibedo ko i thenge mi tipo. (Luka 14:28) Pieno penjiri kumae: ‘Ang’o ma romo wok iwi gamiri para ka ani bor? Nyo ebibecopere ira nicidho i coko, nirweyo lembanyong’a man nidikara ku Jukristu wada nja?’ Tek itie kud awiya, ukwayu ipenjiri bende ku penji ma pire tek ma e: ‘Abitungo awiya para nenedi “nimakere ku telowic pa Yehova” kan ambe i ng’etgi?’ (Efe. 6:4) Wek paru pa Mungu re m’utel wii, ento ungo paru mi jupewu kunoke mi jurimbi ma gibekwo ngo nimakere ku cik mir ukungu mi Biblia.c Jukwayu umego Tony ma kwo i Azia ma yo Reto wang’ dupa nia ecidh etim tic i ng’om mange. Ento i ng’ey m’erwo pi lembene man eweco i wiye ku dhaku pare, emaku yub mi kwero tije ceke man gitimo kero nijwigo kadhiri sente ma juruot migi tiyo ko. Kawoni Tony uyero kumae: “Anwang’u rwom mi konyo dhanu dupa ning’eyo Yehova, man awiya mwa gimaru lemandha lee. Juruot para unwang’u ponji ma nia saa ceke ma ka wabekwo nimakere ku wec ma nwang’ere i Matayo 6:33, Yehova gwokowa.”

KINDE MA WABEYIKO ANYIM MWA

13. Wacopo timo ang’o kawoni ma romo konyowa nipong’o yeny mwa saa ma wabitii?

¹³ Genogen ma watie ko iwi cing’ Yehova copo nwang’ere bende i amulaic kinde ma wabeparu pi kite ma kwo mwa bibedo ko saa ma wabitii. Biblia ubekwayuwa nia watim tic ku tego kara ebin ecopere iwa nipong’o yeny mwa mi nindo m’ubino. (Rie. 6:6-11) Ka watie ku copone, etie rac ungo nigwoko piny moko ang’et pir urwo. Biblia de uyero nia sente copo gwokowa i kadhiri moko. (Ekl. 7:12) Re mito ngo waketh lem pa sente ubed ni lembe ma kwong’a i kwo mwa.

14. Pirang’o ukwayu wapar pi Juebrania 13:5 kinde ma wabeyiko anyim mwa?

¹⁴ Yesu umiyo lapor moko m’ubenyutho nia etie lemkasegu nikanu sente m’umbe nibedo jalonyo “i wang’ Mungu.” (Luka 12:16-21) Wan ceke wang’eyo ngo nia urwo bikelo ang’o. (Rie. 23:4, 5; Yak. 4:13-15) Bende, Yesu uyero nia wa julub pare wacikara nibedo ayika ‘niweko’ piny mwa ceke. (Luka 14:33) Jukristu mi rundi ma kwong’a mi Yudea giyiyo niweko piny migi ku mutoro. (Ebr. 10:34) I rundi ma tin, umego mwa ma dupa gibayu piny migi mi thenge mi kum pilembe gikwero nicwaku thenge moko ci mi lemgamba. (Nyu. 13:16, 17) Ang’o m’ukonyogi nitimo kumeno? Gitie ku tegocwiny ma nging’ nging’ iwi lembang’ola pa Yehova m’uyero kumae: “Abiweki ki ngo, man kadok akuna de abikuni ki ngo.” (Som Juebrania 13:5.) Pieno watimo gin ceke ma wacopo pi niyiko anyim mwa, man ka lembe moko uwok rek i wiwa, wabedo ku genogen ma tek nia Yehova bigwokowa.

15. Ukwayu junyodo ma Jukristu gibed ku nen ma ber ma kani iwi awiya migi? (Nen bende cal.)

¹⁵ I suru moko, thelembe ma kwong’a ma ketho ju m’ugamiri ginyolo awiya utie kara awiya migi ubin ukonygi ku sente saa ma gitii. Ento Biblia uyero nia ukwayu junyodo re m’upong’ yeny mir awiya migi. (2 Kor. 12:14) Andha re kinde ma junyodo gitii, giromo bedo ku yeny ma nia awiya migi ukonygi ku sente man ku piny mange. Awiya ma dupa de gitie kud anyong’a nikonyo junyodo migi. (1 Tim. 5:4) Re junyodo ma Jukristu ging’eyo nia gin ma miyo igi anyong’a nisagu zoo utie ngo nitungo awiya ku paru ma nia awiya bidok gwokogi, ento nikonyo awiya migi gidok jutic pa Yehova.—3 Yoh. 4.

16. Junyodo gicopo ponjo awiya migi nenedi kara ging’ey ninwang’u sente pi nipong’o yeny migi gigi? (Juefeso 4:28)

¹⁶ Nikadhu kud i lapor peri, ponj awiya gigen Yehova kinde m’ibeponjogi kud ayi mi pong’o yeny migi gigi. Niai ma gi thindho, nyuth igi nia pire tie tek nitimo tic ku tego. (Rie. 29:21; som Juefeso 4:28.) Kinde ma gibedongo, konygi kara gimiyiri lee i somo. Junyodo ma Jukristu gicopo sayu cik mir ukungu mi Biblia ma copo konyo awiya migi ning’iyo ku rieko kit ponjiri m’ukwayu gilubi. Lembakeca migi utie nikonyo awiya migi ging’ey ayi mi pong’o yeny migi gigi man nibedo ku saa mi timo lee i tic pa Mungu.

17. Cwinywa copo bedo tek i kum ang’o?

¹⁷ Jutic pa Yehova ma gigene gicopo bedo kud andha nia etie ku copo man kud ava mi pong’o yeny migi mi thenge mi kum. Calu ma wadhingo ajiki mi ng’om maeni, ukwayu wabed ma wang’eyo nia genogen ma watie ko iwi Yehova binwang’ere i amulaic. Ento kadok ang’o ngi m’uwok de, wek wabed ku lembakeca mi bedo ku genogen ma nia Yehova bitiyo ku tego pare pi nipong’o yeny mwa mi thenge mi kum. Cwinywa ubed tek nia cinge ma tek man bote m’erieyo bibedo dungulu magwei ungo nyanok de ma nia kud gitund ko i bang’wa.