Nicoro ceng’ini i vut jumange e ber iwa

1-2. Lembang’o ma pire tek lee i Yehova, man ebemito watim ang’o?

KUD I KIND lembe ma pigi tek lee i Yehova, acel utie kite ma wakwo ko ku dhanu wadwa. Yesu uponjo nia wacikara nimaru dhanu wadwa calu wan giwa. (Mat. 22:37-39) Eno uketho i iye nitimo bero kadok ni ju ma yiyoyic mwa ukoc ku migi. Tek wabetimo bero i ayi maeno, nwang’u wabelubo lapor pa Yehova Mungu ma ‘ketho ceng’ pare wok iwi ju ma reco ku ju ma beco man eketho koth cwii iwi ju ma pwe ku ju ma pwe ngo de.’ —Mat. 5:45.

² Re kadok nwang’u Yehova umaru dhanu ceke de, ju m’emaru lee utie ju m’ubetimo gin m’atira. (Yoh. 14:21) Ebemito nia walub lapor pare. Pieno ebekwayuwa nia wanyuth nia wamaru umego ku nyimego mwa “lee mandha.” (1 Pet. 4:8; Rum. 12:10) Ebekwayu wanyuth igi kit mer ma wanyutho ni jufwa ma wamaru kunoke ni jurimbwa ma kindwa ceng’ini lee kugi.

3. Wacikara nipoy i kum lembang’o iwi mer?

³ Tap calu yen ma jupidho i dhu lela, mer de utie ku yeny ma nia jutunge kara edongi. Jakwenda Paulo umiyo juk ma e ni Jukristu: “Wumeduru nimeruru i kindwu calu umego.” (Ebr. 13:1) Yehova ubemito nia wamedara nitungo mer ma wamaru ko jumange. I thiwiwec maeni wabineno nia pirang’o ukwayu wacor ceng’ini nisagu i vut juyic wadwa, man wabineno ayi ma waromo medara ko nitimo kumeno.

PIRANG’O UKWAYU NG’ATUMAN M’I KINDWA UCOR CENG’INI NISAGU I VUT WADI?

4. Wacopo nyutho nenedi nia wabeneno bedo i acel m’i kindwa ma juweco pire i Zaburi 133:1 ni gin ma pire tek? (Nen bende cal.)

⁴ Som Zaburi 133:1. Wabecwaku jagor zaburi m’ukiewo nia “e ber” man “etie lembe mi mutoro” nibedo ku jurimo m’umaru Yehova. Ento tap calu ma ng’atini romo caku dieng’ ungo ku piny moko m’emaru m’eneno nja, wan de ka wabedo ngo ku wang’wa wacopo caku neno ngo valer mi bedo i acel ma n’i kind umego ku nyimego. Waneno umego ku nyimego mwa wang’ ma pol, saa moko nyo wang’ dupa kubang’ yenga. Wacopo timo ang’o kara wamedara nineno valer migi? Mer ma wamaru ko umego ku nyimego mwa bidongo nwang’u wacuku ting’o saa mi paru pi kite ma pi ng’atuman m’i kindgi utie tek ko i cokiri man iwa.

5. Mer m’i kindwa copo bedo kud atelatela ma kani iwi jumange?

⁵ Dhanu moko m’ubino i coko mwa wang’ ma kwong’a igi wok wang’ lii nineno mer ma watie ko i kindwa. Lembe maeno copo ketho giyiyo nia ginwang’u lemandha. Andha de Yesu uyero kumae: “Ni kum lembe maeni dhanu ceke bing’eyo nia wu julubna, tek wumeruru i kindwu.” (Yoh. 13:35) Wakewecu iwi lapor pa Chaithra. Ebed esomo iniversite man ebed eponjo Biblia ku Jumulembe pa Yehova. Saa moko eyiyo lwong’o mi cidho i coko ma dit mir adhura. Ing’ey m’ecidho i nindo ma kwong’a mi cokone wang’ ku wang’, eyero ni japonjo pare mi Biblia kumae: “Fodi junyodo para gigwaka ngo zoo de! Ento i coko ma dit mwu jugwaka wang’ 52, ke pi nindo acel kende! Aneno nia Yehova unyutho nia emara nikadhu kud i bang’ juruot maeni mi tipo. An de abemito abed acel m’i kind juruot maeni.” Chaithra umedere niponjo Biblia, etimo alokaloka i kwo pare man elimo batizo i oro 2024. Andhandha, wang’ ma pol kinde ma ka dhanu m’ubino ma nyen i kindwa gineno tic mwa ma beco ma calu ve mer ma n’i kindwa, eno cwalugi nitimo ni Yehova.—Mat. 5:16.

6. Nicoro ceng’ini i vut umego ku nyimego mwa gwokowa nenedi?

⁶ Nicoro ceng’ini i vut umego ku nyimego mwa utie bende gwok ma lee. Paulo ukwayu Jukristu wagi kumae: “Wumeduru nijuko cwinywu i kindwu kubang’ ceng’ . . . kara cwiny ng’atu moko m’i kindwu kud udok nwang’ ni kum awondi mi tego mi dubo.” (Ebr. 3:13) Tek cwinywa utur lee cil ma tiendwa ucaku kier ko kud i yo mi bedopwe, Yehova copo cwalu jayic wadwa moko m’ung’eyo lembene umii iwa kony ma watie ku yenyne. (Zab. 73:2, 17, 23) I andha, kony ma kumeno utie ber iwa.

7. Winjiri ma kani m’utie i kind mer ku bedo i acel? (Jukolosai 3:13, 14)

⁷ Wan’i kind ungu mi dhanu ma gibeii ku kero migi ceke ninyutho mer ng’atuman ni wadi, eno uketho wabenwang’u mugisa dupa. (1 Yoh. 4:11) Ku lapor, mer cwaluwa kara ‘wamedara nicirara i kindwa ng’atuman ciro wadi man ciro wadi,’ man eno ketho bedo i acel i kindwa wa Jukristu. (Som Jukolosai 3:13, 14; Efe. 4:2-6) E kumeno, i coko mwa wanwang’u mutoro m’umbe i kind ungu moko ci mi dhanu mi ng’om maeni.

WUNYUTH YUNG NI JUMANGE

8. Yehova timo ang’o pi nikonyowa niketho bedo i acel i kindwa?

⁸ Bedo i acel m’utie i kindwa i wang’ ng’om zoo utie lembe mir udu. Yehova uketho lembe maeno ubecopere kadok watie ku dub’alaga de. (1 Kor. 12:24, 25) Biblia uyero nia ‘Mungu uponjowa nia wamarara i kindwa.’ (1 Thes. 4:9) I ayi mange, Yehova ubenyutho iwa nikadhu kud i Lembe pare gin ma tap m’ukwayu watim pi nicoro ceng’ini ng’atuman i vut wadi man i vut wadi. Waweko bende nia ‘Mungu uponjwa’ nwang’u wabeng’iyo kilili mandha i ponji pare man wabetiyo kugi. (Ebr. 4:12; Yak. 1:25) Eno ke utie tap gin ma Jumulembe pa Yehova giii nitimo.

9. Jurumi 12:9-13 ubemiyo iwa ponji ma kani iwi nyutho yung ni jumange?

⁹ Lembe pa Mungu ubeponjowa ku lembang’o iwi kite mi coro ceng’ini i vut jumange? Paulo unyutho ponjine i Jurumi 12:9-13. (Som.) Poy nia eyero nia wabed “ma kwong’a i nyutho yung ni jumange.” Eno ubenyutho ang’o? Ukwayu wan re ma wabed ma kwong’a i nyutho “mer” ni jumange nikadhu kud i weko lembe, nyutho jol, timo bero, ku lembe mange bende. (Efe. 4:32) Ukwayu ngo wakur nia umego ku nyimego mwa re ma gicor ceng’ini i vutwa. Mito wan re ma ‘wabed ma kwong’a.’ E wabinwang’u mugisa ma Yesu ung’olo kinde m’eyero kumae: “Nimiyo nyayu anyong’a lee ma sagu nigamu agama.”—Tic. 20:35.

10. Wacopo nyutho nenedi nia watie ngo junyap kinde ma ‘wabenyutho yung ni jumange’? (Nen bende cal.)

¹⁰ Etie ber nineno nia ndhu ndhu i ng’ey ma Paulo uyero nia wabed ma kwong’a i nyutho yung ni jumange, ekwayuwa nia ‘watim tic ma tek, man kud wabed junyap.’ Ng’atu ma timo tic ma tek kume bedo mor, man ka jumiye tic moko, etime mii. Lembrieko 3:27, 28 ubekwayuwa kumae: “Kud icer bero ni ju m’emakugi, kinde m’eni i tego mi cingi m’itime ko.” Pieno kinde ma waneno nia ng’atu moko utie i yeny, watimo gin ma wacopo pi nikonye. Wadwoko ngo lembene ku ng’eye, kadi waparu ngo nia ng’atu moko mange re ma bikonye.—1 Yoh. 3:17, 18.

11. Ang’o ma copo konyowa nicoro ceng’ini i vut jumange?

¹¹ Ayi mange ma wacopo nyutho ko yung ni jumange utie niweko igi m’umbe galu kinde ma gikierowa. Juefeso 4:26 uwacu kumae: “Kud wuwek ceng’ umwony ma fodi wutie asu ku ng’eicwiny.” Pirang’o? Pilembe verse mi 27 uwacu nia ka watimo ngo kumeno, ‘wabiweko kaka ni Wonabali.’ Yehova uyero iwa i Lembe pare wang’ udul nia wawek lembe i kindwa. Jukolosai 3:13 ubekwayuwa nia ‘wamedara . . . niweko lembe m’i kindwa yot yot.’ Niweko kosa mi jumange utie acel m’i kind yo ma ber m’usagu zoo ma wacopo coro ko ceng’ini i vutgi. Ka watimo kumeno, wabimedara ‘nikwo ku kwiyocwiny i kindwa kara wagwok bedo i acel mwa ma tipo umiyo.’ (Efe. 4:3) I adundo, weko lembe ketho kwiyocwiny man bedo i acel i kindwa.

12. Yehova konyowa nenedi nibedo dhanu ma weko lembe?

¹² Andha eromo bedo tek niweko ni ju m’ukierowa. Ento tipo pa Mungu copo konyowa. I ng’ey ma Biblia ukwayuwa nia ‘ng’atuman m’i kindwa unyuth mer ni wadi’ man nia ‘wabed dhanu ma timo tic ma tek,’ emedo kumae: “Wek tipo ma leng’ umii iwu tego.” Eno ubenyutho nia tipo ma leng’ pa Mungu copo ketho wabedo weg amora man weg yaw yaw ma lee. (Rum. 12:11) Pieno tipo pa Mungu copo konyowa ninyutho mer ni jumange man niweko lembe i kindwa yot yot. Dong’ ubemito wakway kony i bang’ Yehova ku cwinywa zoo.—Luka 11:13.

“POKIRI KUD UBED I KINDWU”

13. Ang’o ma copo nyayu pokiri i kindwa?

¹³ I cokiri junwang’u “kwond dhanu ceke,” m’udongo i karamlembe de m’ukoc. (1 Tim. 2:3, 4) Pieno wacopo timo ng’iyong’ic m’ukoc i lembe ma calu ve kendi man ruko, i ayi thieth m’ukwayu walubi kunoke galuwang’. Tek wabedo ngo ku wang’wa, tung’ tung’ maeno copo nyolo pokiri i kindwa. (Rum. 14:4; 1 Kor. 1:10) Ento calu ma ‘Mungu uponjowa nia wamarara i kindwa,’ wacikara nibedo ku wang’wa ma kud warid ko nia ng’iyong’ic mwa usagu mi jumange.—Filip. 2:3.

14. Ukwayu saa ceke waii nibedo dhanu ma nenedi, man pirang’o?

¹⁴ Wacopo cero bende pokiri ku nyay i cokiri nwang’u wabeii nibedo dhanu ma tielo cwiny jumange man ma teng’ogi. (1 Thes. 5:11) I kind nindo m’ukadhu ceng’ini eni, dhanu ma dupa ma gikegikwiyo i tipo kunoke ma jukejuwodho kud i cokiri gidwogo. Wabejologi ku yaw yaw ma lee! (2 Kor. 2:8) Kenen lembe ma juwok jutimo ni nyamego moko m’ucaku cidho kendo i coko i ng’ey m’ekwiyo pi oro 10. Eyero kumae: “Dhanu ceke uvonjo i bang’a man umotha.” (Tic. 3:19) Mer maeno ma junyutho ire uketho ewinjere nenedi? Emedo kumae: “Lembuno uketho abewinjara nia Yehova ubetelo wiya kara adog anwang’ anyong’a para kendo.” Ka wabetimo kero nitielo cwiny jumange, nwang’u wabeweko Kristu utii kudwa pi niketho ‘ju m’uol man ma ter ma pek ubenurogi’ ginwang’ yom.—Mat. 11:28, 29.

15. Wacopo diko cingwa i kum bedo i acel ma n’i kindwa i ayi mange ma kani? (Nen bende cal.)

¹⁵ Ayi mange ma wacopo diko ko cingwa i kum bedo i acel ma n’i kindwa utie nikadhu kud i wec mwa. Yob 12:11 uwacu kumae: “Nyo ith bilo ngo wec calu ma leb bilo ko mido cami?” Tap calu ma jatedo ma ber lar bilo kadu i wang’ niwodho cam i wang’ dhanu, wan de ukwayu walar wapar cuu i gin ma wabemito yero i wang’ niyere. (Zab. 141:3) Ukwayu saa ceke walar wabed wanyang’ nia lembe ma wabeciyero bibedo ma gierojo, ma yomo cwiny man ma “miyo bero ni ju m’ubewinjo.”—Efe. 4:29.

16. Ukwayu asagane jukani ma gibed giii niyero wec ma gierojo?

¹⁶ Ukwayu asagane cog mon ku junyodo re ma gibed giii nitiyo ku wec ma gierojo. (Kol. 3:19, 21; Tito 2:4) Ukwayu judong cokiri bende gibed jukwac ma tielo cwiny rombe pa Yehova man ma juko cwinygi. (Isa. 32:1, 2; Gal. 6:1) Lembrieko moko mi Biblia ubepoyo wiwa kumae: “Lembe [ma juyero] i nindo ma kakare; e ber mire ma!”—Rie. 15:23.

MAR “KU TIMO MAN LEMANDHA”

17. Wacopo nyang’ nenedi nia wamaru umego ku nyimego mwa ku mer mandha?

¹⁷ Jakwenda Yohana ukwayuwa nia wamar “ku wec kadi ku dhok kende ngo, ento ku timo man lemandha.” (1 Yoh. 3:18) Ukwayu mer ma wamaru ko umego ku nyimego mwa uai kud i adundewa. Wacopo timo kumeno nenedi? Tek wabed watimo saa ma lee kud umego ku nyimego mwa, eno biketho kindwa bidoko ceng’ini kugi, man mer m’i kindwa kugi de bidoko tek. Pieno, wabed wanwang’ kaka mi bedo karacelo ku jumange i coko man i tic mi lembanyong’a, man wabed wating’ saa mi liewogi. Tek watimo kumeno, wabinyutho nia wabeweko ‘Mungu uponjwa nia wamarara i kindwa.’ (1 Thes. 4:9) Man wabimedara nineno ku wang’wa “maram e ber ko man etie lembe mi mutoro ni umego nia gibed karacelo i acel!”—Zab. 133:1.