Watie ngo kendwa nyanok de

1-2. (a) Pirang’o wacopo yero nia wanyego ngo ku peko mwa kendwa? (b) Wabineno ang’o i thiwiwec maeni?

KA WABENYEGO ku peko ma dongo, waromo winjara ve watie kendwa i nyathi yey moko i die nam m’avuvu ubekoto i wiye. Ento wanyego ngo ku peko mwa kendwa. Wegwa mi polo m’umaruwa neno peko ma wabenyego ko, man eng’olo nia ebikonyowa. Yehova ubetielo cwiny jutic pare ceke ku yaw yaw ku wec ma e: “Abikonyi.”—Isa. 41:10.

² I thiwiwec maeni, wabineno kite ma Yehova konyo kowa: (1) Etelo wiwa, (2) epong’o yeny mwa, (3) egwokowa, man (4) ejuko cwinywa. Yehova ubetielo cwinywa nia kadok wabenwang’ara ku peko ma rukani i kwo mwa de, ebiwil kudwa tak de ngo; ebiwekowa ki ngo. Pieno watie kendwa ngo nyanok de.

YEHOVA TELO WIWA

3-4. Yehova telo wiwa nenedi? (Zaburi 48:14)

³ Som Zaburi 48:14. Yehova ubemito ngo nia watel wiwa giwa. Dong’ tin etelo wi jutic pare nenedi? Yone acel utie nikadhu kud i Biblia. (Zab. 119:105) Yehova tiyo ku lembe pare pi niponjowa kud ayi mi maku yub ma beco man mi kwanyu ba kurayung pare. Tek wabetiyo ku ponji pare, wabikwo kwo mir anyong’a niai kawoni man wabibedo ku genogen mi kwo rondo ku rondo.a Ku lapor, ebeponjowa nia kud wabed dhanu ma kayu lembe, nia wabed dhanu m’atira i lembe ceke ma wabetimo, man nia wamar jumange lee mandha niai kud i adundewa. (Zab. 37:8; Ebr. 13:18; 1 Pet. 1:22) Ka wabetimo kumeno, wadoko junyodo, cogmon, mon man jurimo ma beco.

⁴ M’umedo maeno, Yehova uketho jukiewo kpawa mi dhanu m’ukadhu kud i peko ma rom kudwa man ma giwinjiri de ve wan. (1 Kor. 10:13; Yak. 5:17) Ka wabesomo kpawa mi dhanu maeno m’ukwo andha man ka wabetiyo ku ponji ma wanwang’u, wanwang’u bero moko ario ma e: Mi kwong’o, wanyang’ nia watie ngo kendwa, pilembe nwang’u jumange de gikadhu kud i kit peko ma rom ku ma wabenwang’ara ko man gicire de ma ber. (1 Pet. 5:9) Man mir ario, waponjo ayi mi nyego ku peko mwa.—Rum. 15:4.

5. Yehova tiyo ku jukani pi nitelo wiwa kinde ma wabewotho i yo mi kwo?

⁵ Yehova umaku bende yub ma wek kara juyic wadwa bende utel wiwa.b Ku lapor, juliew mi twodiri giliewo cokiri thiri thiri pi nitielo cwinywa. Korolembe migi teng’o yiyoyic mwa man konyowa nigwoko bedo i acel m’i kindwa. (Tic. 15:40–16:5) Judong cokiri bende gitimo kero nikonyo jarweyman ubed ku winjiri ma ceng’ini ku Yehova. (1 Pet. 5:2, 3) Junyodo giponjo awiya migi gimar Yehova; pieno gikonyogi nimaku yub ma beco man nibedo ku kura ma ber. Giponjogi bende ku somo Biblia, ku cidho i coko man ku rweyo lembanyong’a nja. (Rie. 22:6) Jukristu ma mon m’uteng’ini lundo gikonyo nyimego m’aradu nikadhu kud i lapor migi ma beco. Gimiyo igi juk man gitielo cwinygi.—Tito 2:3-5.

6. Wacikara nitimo ang’o kara wanwang’ bero i kum telowic pa Yehova?

⁶ Yehova udaru timo ma kapare; emiyo iwa telowic ma watie ku yenyne. Dong’ wacikara nitimo ang’o kara wanwang’ bero i kum juk pare? Lembrieko 3:5, 6 uyero kumae: “Gen Yehova kud adundeni ceke, man kud ijengri kum ng’eyothelembe peri giri.” Ka watimo kumeno, “ebinyutho yo [mwa],” niwacu ebikonyowa niuro peko ma dupa man nikwo kwo mir anyong’a. Watie ku foyofoc lee pi juk ma Yehova umiyo iwa, ma ng’atuman m’i kindwa utie ku yenyne.—Zab. 32:8.

YEHOVA PONG’O YENY MWA

7. Yehova pong’o yeny mwa i ayi moko ma kani? (Jufilipi 4:19)

⁷ Som Jufilipi 4:19. M’umedo nitelo wiwa i thenge mi tipo, Yehova miyo bende mugisa iwi kero ma wabetimo pi ninwang’u cam, kendi man kabedo ma watie ku yenyne. (Mat. 6:33; 2 Thes. 3:12) Kadok etie rac ungo nidieng’ pi yeny mwa mi thenge mi kum de, re Yehova ubekwayuwa nia kud wadieng’ pigi nikadhu mukero. (Nen nyathi korolembe iwi Matayo 6:25.) Pirang’o? Pilembe ebiwekowa ki ngo. (Mat. 6:8; Ebr. 13:5) Kan eyero nia ebipong’o yeny mwa, ukwayu wagene ku cwinywa zoo.

8. Yehova utimo ang’o ni Daudi?

⁸ Wakenen kite ma Yehova ukonyo ko Daudi. I saa mi peko ma Daudi unwang’ere ko kinde m’eberingo ubimo Saul, Yehova umiyo ire man ni jumaco pare gin ma gibino ku yenyne pi nikwo. Kinde ma Daudi uparu pi kite ma Yehova ugwoke ko pi oro maeno ceke, ekiewo kumae: “Naka abino aradu man kawoni atii, ento aneno ngo won bedopwe moko ma juwenjo, kadi nyithindhe m’ubeyenyo cam.” (Zab. 37:25) Calu Daudi, copere nyo in de idaru neno kite ma Yehova upong’o ko yeny peri kunoke mir umego ku nyimego peri ku mer i saa mi peko.

9. Tin Yehova pong’o yeny mi dhanu pare nenedi i saa mi peko ma wok rek? (Nen bende cal.)

⁹ Yehova pong’o bende yeny mi dhanu pare i saa mi peko ma wok rek. Ku lapor, kinde ma ndru moko upodho i rundi ma kwong’a, Jukristu mi ng’om ma tung’ tung’ gioro kony ni umego ku nyimego migi ma gibino i yeny. (Tic. 11:27-30; Rum. 15:25, 26) Tin de dhanu pa Mungu ginyutho kit berocwiny ma rom eno. Ka peko ma wok rek utundo, Yehova cwalu dhanu pare ku mer pi nimiyo piny ma calu ve cam, pii, kendi man yath ni umego ma kwo i kabedo ma pekone uwok i iye. Ungu mi giedo giyiko udi mi bedo ku Udi Ker m’unyothiri. Man m’umbe galu dhanu pa Yehova gitiyo ku Biblia pi nitielo man nijuko cwiny ju ma gibayu udi migi, wedi migi, kunoke jurimbgi.c

10-11. Lembe ma Borys ukadhu kud i iye ubemiyo iri ponji ma kani?

¹⁰ Yehova pong’o bende ku berocwinye yeny mi ju ma fodi gibetimo ngo ire. Kumeno bende, wayenyo kaka mi timo bero ni ju ma yiyoyic mwa ukoc ku migi. (Gal. 6:10) Eno romo miyo igi kaka mi sayu ning’eyo lembe i wiwa man iwi Yehova. Wakewecu iwi lapor pa Borys m’utie prefe i ng’om moko mir Ukraine. Kadok etie Jamulembe pa Yehova ngo de, re ebed etiyo ma ber ku Jumulembe pa Yehova ma somo i bang’e, man ebed eworo yiyoyic migi. Ebed ekwo i kabedo ma lwiny ubekadhu i iye. Kinde m’eng’iyo niringo i theng ng’ombe ma kwiyocwiny moko n’i iye, umego mwa gikonye. E i ng’eye Borys ucidho i Poy pi tho pa Yesu. Kinde m’eparu pi lembe ceke m’umego gitimo ire, ewacu kumae: “Jumulembe pa Yehova gidieng’ kuda man gigwoka. Abefoyogi lee mandha.”

¹¹ Wan ceke wacopo lubo lapor pa Wegwa mi polo ma jakisa nwang’u wabenyutho mer ni dhanu ma gin’i yeny, dok gibed juyic wadwa kunoke ngo. (Luka 6:31, 36) Watie ku genogen nia mer ma wabenyutho igi bikonyogi nidoko julub pa Kristu. (1 Pet. 2:12) Ento kadok gidoko ngo de, wabibedo kud anyong’a ma lee ma junwang’u ka jubemiyo piny ni jumange.—Tic. 20:35.

YEHOVA GWOKOWA

12. Yehova ung’olo nia ebigwoko dhanu pare zoo nenedi? (Zaburi 91:1, 2, 14)

¹² Som Zaburi 91:1, 2, 14. Yehova ung’olo nia tin ebigwokowa i thenge mi tipo; ebiweko tak de ngo nia Sitani unyoth thier mandha. (Yoh. 17:15) Man i saa mi “masendi ma dit,” cwinywa copo bedo tek nia ebipong’o lembang’ola pare: Ebigwokowa i thenge mi tipo kende ngo, ento bende i thenge mi kum.—Nyu. 7:9, 14.

13. Yehova gwoko ng’atuman acel acel m’i kindwa nenedi?

¹³ Yehova gwoko ng’atuman acel acel m’i kindwa nenedi? Emiyo iwa Biblia ukonywa kara wang’ey ning’iyo gin ma ber ku gin ma rac. (Ebr. 5:14) Ka wabekwo nimakere ku cik mir ukungu ma nwang’ere i iye, eno gwokowa i thenge mi tipo kende ngo, ento i thenge mi kum bende. (Zab. 91:4) Yehova gwokowa bende nikadhu kud i cokiri. (Isa. 32:1, 2) Ka wabedikara ku ju m’umare man ma gibekwo nimakere ku cik pare mir ukungu, wanwang’u tielocwiny man tego mi cerara i kum atelatela ma reco.—Rie. 13:20.

14. (a) Pirang’o Yehova goyo ngo gang’ i kumwa ni peko ceke? (b) Zaburi 9:10 ubetego cwinywa i kum lembang’o? (Nen bende korolembe mi there.)

¹⁴ I rundi ma con, saa moko Yehova ubed ugwoko jutic pare kara kud junyay ret i kumgi kunoke kara kud juneggi. Ento ebed etimo ngo kumeno saa ceke. Biblia unyutho nia peko moko copo rubowa rek. (Ekl. 9:11) Bende, Yehova ubed uweko jutic pare ginwang’iri ku ragedo man githo kadok athoa ngi pi ninyutho nia Sitani tie javupo. (Yob 2:4-6; Mat. 23:34) Tin bende kumeno. Ento kadok nwang’u Yehova romo kabu ngo peko mwa ceke de, re cwinywa copo bedo tek nia ebiweko tak de ngo ju m’umare.d—Zab. 9:10.

YEHOVA JUKO CWINYWA

15. Rwo, Lembe pa Mungu man Jukristu wadwa juko cwinywa nenedi? (2 Jukorintho 1:3, 4)

¹⁵ Som 2 Jukorintho 1:3, 4. Saa moko wanwang’ara ku can i cwinywa, kud adieng’acwiny kunoke ang’abacwiny. Saa moko nyo kawoni ibenweng’iri ku peko ma lee m’uketho ibewinjiri nia itie kendi. Nyo ng’atu moko nuti de m’ubenyang’ i kite m’ibewinjiri ko? Eyo, utie Yehova. Ewinjo bende litho mwa man ‘ejuko cwinywa i masendi mwa ceke.’ Nenedi? Ka warwo i bang’e pi nikwayu kony, emiyo iwa “kwiyocwiny [pare] m’ukadhu gin ceke ma jucopo nyang’ i iye.” (Filip. 4:6, 7) Wanwang’u bende jukocwiny kinde ma wabesomo lembe pare m’eketho jukiewo piwa i Biblia. Wec mi mer, mi rieko man mi genogen m’i iye ketho yamu kadhu i korwa. Man wanwang’u jukocwiny i coko mwa, pilembe kuca wawinjo lembe ma tielo cwinywa niai kud i Biblia man wadikara kud umego ku nyimego mwa ma gimaruwa.

16. Lembe ma Nathan giku Priscilla gikadhu kud i iye ubemiyo iri ponji ma kani?

¹⁶ Lembe ma Nathan giku Priscilla ma gikwo i États-Unis gikadhu kud i iye ubekonyowa ninyang’ i kite ma Yehova juko ko cwinywa man etielo ko cwinywa nikadhu kud i Lembe pare. Oro ma dupa udaru kadhu niai ma ging’iyo nidok kaka ma yeny mi jurwey lembanyong’a mi Ker utie lee i iye. Nathan ukoro kumae: “Wabedo ku genogen ma nia Yehova bipoko mugisa iwi kero mwa.” Ento kinde ma gitundo pi nicaku tic migi ma nyen, rek kumeni gin ario zoo ginwang’iri ku peko pa yotkum man pa sente. Tokcenne, ging’iyo nidok i pacu man gimediri asu ninwang’iri ku peko pa sente. Nathan ubepoy kumae: “Apenjara ka nyo pirang’o Mungu upoko ngo mugisa i wiwa kite ma wabino paru. Acaku paru bende nia nyo atimo lembe moko ma rac.” E yo ku ng’eye, Nathan giku Priscilla ginyang’ nia karaman Mungu uwekogi ngo. Nathan ukoro kumae: “I saa mi peko maeno ceke, Biblia udoko iwa calu jarimo ma riek m’ubed umiyo iwa tielocwiny man telowic. Niketho wiwa i kum kite ma Yehova ukonyo kowa niciro peko kakare niketho wiwa kende kende i kum peko ukonyowa nibedo ayika niciro peko mi nindo m’ubino ku yiyoyic.”

17. Nyamego moko ma nyinge Helga unwang’u jukocwiny nenedi? (Nen bende cal.)

¹⁷ Umego ku nyimego mwa bende gicopo juko cwinywa. Nenedi? Wakewecu iwi lapor pa nyamego Helga ma kwo i ng’om mi Hongrie. Pi oro ma dupa, enyego ku peko ma tung’ tung’ dupa m’uketho ecaku winjere nia tije mbe man m’uketho ebayu genogen. Ento saa m’eneno ng’eye, enyang’ nia Yehova utiyo kud umego ku nyimego mi cokiri pi nijuko cwinye. Ekiewo kumae: “Yehova ubed ukonya saa ceke ma kan eneno nia tego para ujwik nikum tic para mi kum, gwoko nyathin para m’ubino remo man nikum peko mange. I kind oro 30 m’ukadhu ceng’ini eni, nindo acel de mbe m’ekoso nipong’o lembang’ola pare ma nia ebijuko cwinya. Saa ceke emiyo ira tego nikadhu kud i wec mi tielocwiny mi jumange. Gibed gikiewo ira mesaj, barua kunoke wec mi foyofoc tap i saa m’atie ku yenyne lee nisagu.”

18. Wacopo juko cwiny jumange nenedi?

¹⁸ Watie ku rwom mi lubo lapor pa Mungu mwa ma tie Mungu mi jukocwiny. Wacopo timo kumeno nenedi? Nwang’u wabewinjo jumange ku cirocir, wabeyero igi wec mi jukocwiny man wabekonyogi ku piny ma gitie ku yenyne. (Rie. 3:27) Watimo kero nijuko cwiny ju ceke ma gibesendiri, kadok ju ma fodi gibetimo ngo ni Mungu. Tek jirani mwa gitie ku can i cwinygi, tek gibetwoyo kunoke gitie kud adieng’acwiny, waliewogi, wawinjogi man wasomo igi giragora ma juko cwiny. Ka wabelubo lapor pa Yehova ma “Mungu mi jukocwiny ceke,” wacopo konyo juyic wadwa kendgi ngo niciro peko migi, ento wacopo miyo bende ava mi ponjo lembe iwi Yehova i kum dhanu ma fodi gibetimo ngo ire.—Mat. 5:16.

YEHOVA BIKONYOWA SAA CEKE

19. Yehova timo ang’o iwa, man wacopo lubo lapor pare nenedi?

¹⁹ Yehova dieng’ lee mandha pi ju ceke m’umare. Ewekowa ngo kinde ma wan’i peko. Tap calu ma janyodo ma jamer dieng’ ku nyathin pare, Yehova bende dieng’ ku jutic pare ma gibegwoko bedoleng’ migi ire. Etelo wiwa, epong’o yeny mwa, egwokowa man ejuko cwinywa. Walubo lapor pa Wegwa mi polo ma jamer nwang’u wabekonyo jumange man wabetielo cwinygi i saa mi peko. Kadok waromo nwang’ara ku peko man ku can i cwinywa de, re cwinywa ubed tek nia Yehova ni kudwa. Andha de eng’olo kumae: “Lworo kud unegi, kum wanuti wakudi.” (Isa. 41:10) Pieno, cwinywa ubed tek nia watie ngo kendwa nyanok de.