1925​—⁠Oro 100 udaru kadhu

GENOGEN MA GALU

Juponj Biblia ma dupa gibed giparu nia ng’om bidoko ni paradizo i oro 1925. Pirang’o? Umego Albert Schroeder m’ubino acel m’i kind ju m’i Guriri m’utelowic ukoro kumae: “Wabed waparu nia i oro maeno dong Jukristu ma juwiro bicidho pi nibimo i polo, man nia weg bedopwe ma calu Abraham, Daudi ku jumange bende gibicer pi nibimo iwi ng’om.” Lembe maeno utimere ngo calu ma gibino paru, eno uketho cwiny jumoko utur.—Rie. 13:12.

Juponj Biblia gimediri ku tic mi lembanyong’a kadok i saa mi turcwiny maeno. Ginyang’ nia nimiyo lembatuca iwi Yehova re m’utie gin ma pire tek nisagu. Wakenenu tic ma gitimo pi nirweyo lembanyonga i ng’om ma bor.

JUGIERO STUDIO MI RADIO DUPA

I kind oro m’ulubo gigiero Radio ma nyinge WBBR, gigiero bende Radio mange ma tek ceng’ini ku Chicago, i Illinois. Gicaku nyinge WORD. Ralph Leffler ma ng’atu m’ugiero radione uwacu nia “uthieno i saa pa koyo, dhanu ubed uwinjo radio WORD ku bor mandha.” Ku lapor, juruot moko ma kwo bor i kilometre ma romo 5000 kud Alaska, kaka ma radione ni iye, giwinjo radio maeno. I ng’eye gikiewo barua ni ju ceke m’utimo tic i radione pi nifoyogi pi program mi tielocwiny mi tipo ma gimiyo.

Otkur ma Wiw mi nindo 1, dwi mir 12, 1925 unyutho pi gin m’uketho dhanu dupa ubed winjo program mi radione. Ekoro kumae: “Radio eni utie acel m’i kind radio ma tek m’i ng’om mir Amarika. Dhanu ubed uwinje kadok yo nyangu man yo reto mi ng’ombe. Ju ma pol ma nwang’u fodi uwinjo ngo lemandha de, gicaku maru lembene nikum winjo radio eni.”

I kind nindo ma rom eno, Juponj Biblia bende gibed gitimo tego nitiyo ku radio pi nirweyo lembanyong’a i ng’om mi Canada. I oro 1924, jugiero radio ma nyinge CHUC i adhura mi Saskatoon. Ebino radio ma kwong’a mi jurudini i ng’om mi Canada. I kum oro 1925, gidok ginwang’u kaka mange ma lac. Pieno, dilo mwa udwoko radione i Regent Building, ma con ubino kabedo mi tuko i Saskatoon, ma jung’iewo man judok juyiko pi radione.

Nikum radio eno, dhanu dupa ma kwo bor i adhura mi Saskatchewan giwinjo lembanyong’a wang’ ma kwong’a. Ku lapor, i adhura mi McKague, ma tie bor i kilometre ma romo 185; i ng’ey winjo lembanyong’a i radio, dhaku moko ma nyinge Graham ukiewo nia juor ire girasoma. Umego George uwacu nia dhakune ukwayu nia jukonye pio pio mandha, uketho waoro ire jamtic ceke mi ponjo Biblia. Ndhu ndhu i ng’eye, Graham ucaku mewo rwonglembe mi Ker bor kadok yo malu mi kulo Carrot River Valley i Saskatchewan.

LEMANDHA MA PIRE TEK

Otkur ma Wiw mi nindo 1, dwi mir 3, 1925 (mir Anglais), ubino ku thiwiwec moko ma pire tek m’uwacu nia “Thek unyolere.” Pirang’o pi thiwiwec eno ubino teki? Pilembe pi kare moko, Juponj Biblia gigam ging’eyo nia Sitani utie ku dilo pare, m’uketho i iye giracwiya mi tipo ma reco m’ubekwo i polo man bende jurudini, jukuloka, man weg lemgamba i ng’om. Ento nikadhu kud i thiwiwec maeno, “jamiru mandha man ma riek” ukonyo umego ninyag’ nia Yehova de utie ku dilo pare m’ukoc bor ku pa Sitani. (Mat. 24:45) M’umedo maeno, jamiru ukoro nia Ker pa Mungu ucaku bimo i oro 1914, man i oro ma rom eno ‘lwiny m’utuk i polo’ uketho jubayu Sitani ku pajogi pare kud i polo man kawoni dong’ gin’iwi ng’om.—Nyu. 12:7-9.

Jumoko uyiyo ngo lamandha maeno, uketho Otkur ma Wiw umiyo cimowang’ ma e: “Ka jusom moko unuti ma giyiyo ngo lembe ma jukoro i Otkur ma Wiw maeni, wakwayugi nia ginyuth cirocir, gigen Yehova man gimediri nitimo ire ku gwoko bedoleng’.”

Tom Eyre, m’ubino colporteur (ma kawoni julwong’o jayab yo) i ng’om mi Grande bretagne, ukoro ayi ma juponj Biblia ma dupa gijolo ko girasoma maeno. Ewacu kumae: “Umego gibino kud anyong’a ma lee kinde ma giwinjo kite ma jukoro ko i Lembanyutha 12. Saa ma wanyang’ nia Ker pa Mungu ucaku bebimo i polo, lembene umiyo iwa amora mi nyutho pi lembanyong’ane ni dhanu mange. M’umbe jiji, ecwaluwa nimedo tic mwa man eketho waneno ayi ma Yehova ubetelo ko wi dhanu pare pi nineno lembe ma wang’uic m’ebitimo.”

GIMIYO LEMBATUCA IWI YEHOVA

Tin Jumulembe pa Yehova ging’iyo ku wec ma nwang’ere i Isaya 43:10 m’uwacu nia “‘wutie jumulembe para,’ Yehova wacu, ‘eyo, jatic para m’ang’iyo.’” I caku mi oro 1925, jubed jutiyo ngo akeca ku giragora maeni i girasoma mwa. Ento lembe udok ulokere. I kind oro 1925, Otkur ma Wiw uweco iwi Isaya 43:10 man 12 i thiwiwec 11 m’i iye!

I thum mi dwi mir abora oro 1925, Juponj Biblia gitimo Coko ma dit mir adhura i Indianapolis, i Indiana. Joseph Rutherford uyero wec ma e i program ma juwodho iwi karatasi pi nijolo dhanu: “Wabino i coko maeni kara wanwang’ . . . tego i bang’ Rwoth, man i ng’eye wabidok ku tego ma nyen pi nibedo jumulembe pare.” I kind nindo abora ma jutimo iye coko ma dit mir adhurane, jukwayu juceke m’ubino i cokone nia gimii lembatuca ni dhanu iwi Yehova i kare ceke m’unen igi.

Ceng’ soko nindo 29, dwi mir abora, umego Rutherford umiyo korolembe m’umiyo amora i kum dhanu pi nimiyo lembatuca iwi Yehova . I korolembene, eketho nwoc nia pire tie tek nimiyo lembatuca, kum “Yehova uyero ni dhanu pare nia . . . : ‘Wutie jumulembe para . . . an a Mungu.’ I ng’eye emiyo igi ng’ol ku dwande ma tek kumae: ‘Wuyab yo pi dhanu.’ Dhanu mange mbe iwi ng’om ma jumiyo igi twero mi yabu yo, kende kende dhanu pare, dhanu m’utie ku tipo pa Rwoth man ma gitie jumulembe pare.”—Isa. 43:12; 62:10.

Kinde m’umego Rutherford udaru korolembe pare, esomo thiwiwec moko m’uwacu nia “Rwonglembe mi genogen.” Juwinj ujolo wec maeno m’uketho nwoc nia Ker pa Mungu re m’utie genogen mandha pi ninwang’u “mugisa mi kwiyocwiny, leng’kum, kwo, bedagonya man anyong’a ma rondo ku rondo.” I ng’eye judok juloko wec maeno i dhok dupa man juwodhe iwi karatasi i ayi mi trakt. Jupoko traktne ma romo milion 40 ni dhanu.

Pi oro dupa, Juponj Biblia giloko ngo nying’gi udok ni Jumulembe pa Yehova. Re giwotho nyang’ nia gitie ku rwom mi bedo Jumulembe pa Yehova.

GICAKU LIEWO DHANU M’UNYUTHO NEN MA BER

Calu ma wend Juponj Biblia ucaku medere i wang’ ng’om zoo, pieno juketho cwinygi nia kud gijik kende kende nipoko girasoma, ento giliew bende dhanu m’ujolo lembanyong’a. I ng’ey kampany mi poko trakt Rwonglembe mi genogen, girasoma Bulletina uwacu kumae: “Ukwayu ngo juliew ot ma juweko ngo girasoma i iye, ento mito juliew kaka ma juweko iye trakt Rwonglembe mi genogen.”

Bulletin mi dwi mi 1, 1925, uweco pi raport m’ulubo e iwi Japonj Biblia moko mi Plano, i Texas: “Iwa uwang’ nia teritwar ma juliewo wang’ dupa, wang’ ma pol junwang’u adwogi ma ber nisagu ma fodi jurweyo ngo i igi. Juliewo adhura moko ma nok i teritwar mwa wang’ abic i kind oro apar. . . . Ceng’ini eni, nyamego Hendrix ku mama girweyo lembanyong’a man gimiyo girasoma i kabedone wang’ dupa nisagu m’i wang’e.”

I ng’om mi Panama, colporteur moko ukiewo kumae: “Dhanu dupa m’ukwero niwinja wang’ ma kwong’a, gidok giwilo pidoic migi kinde m’adok i bang’gi wang’ mir ario kunoke mir adek. Tic ma pol m’atimo i oro maeni ubino mi liewo dhanu m’alar arweyo igi man anwang’u adwogi ma beco i bang’ jumoko.”

GINENO BOR

I barua ma kubang’ oro ma jukiewo ni ba colporteurs ceke, umego Rutherford udwogo iwi tic m’utimere i oro maeca man tic m’ucikere nitimere i oro m’ulubo. Ewacu kumae: “I oro m’ukadhu, wubino ku rwom mi juko dhanu m’ubino ku can i cwinygi. Tic eno unyayu anyong’a i adundewu . . . I oro m’ubino, wubibedo ku kaka mi miyo lembatuca iwi Mungu man iwi Ker pare man ninyutho nia jukani dhe m’ubetimo ire. . . . Dong’ wek wating’u dwandwa karacelo pi nipaku Mungu mwa man Rwoth mwa.”

Kinde ma oro 1925 ubethum, umego gimaku yub mi giero udi mange i Bethel mi Brooklyn. Pieno, oro 1926 bibedo oro mi caku giedo mi udi ma dongo i dilo mwa, giedo ma nang’ fodi i wang’e ugierere ngo.