Nyo Mungu ni kakare ceke?
Lembe ma Biblia udwoko
Mungu utie ku copo mi neno lembe ceke man ecopo timo lembe kaka moko ci m’emito. (Lembrieko 15:3; Juebrania 4:13) Ento Biblia ubeponjo ngo nia Mungu ni kakare ceke, niwacu nia enwang’ere kaka moko ci man i piny moko ci. Enre ebenyutho nia etie ng’atu m’unuti man nia etie kku kaka m’ebedo i iye.
Ayi pa Mungu: Mungu tie ng’atu mi tipo. (Yohana 4:24) Dhanu copo neno ngo kume. (Yohana 1:18) Ginmawokiwang’ ceke ma nwang’ere i Biblia ma juneno i iye Mungu, unyutho nia etie ku kabedo pare ma segi. Ginmawokiwang’ moko acel de mbe m’unyutho nia enwang’ere kakare ceke.—Isaya 6:1, 2; Lembanyutha 4:2, 3, 8.
Kaka ma Mungu bedo i iye: Mungu bedo i kaka mi tipo, niwacu kaka m’ukoc ku ma giracwiya ma kumgi nen gibedo i iye. I kabedo maeno mi tipo, Mungu bedo ‘i polo ma tie kabedo pare.’ (1 Ubimo 8:30) Biblia ukoro nia nindo moko giracwiya mi tipo “gicidho nithieri gigi i wang’ Yehova,”a eno unyutho nia Mungu bedo i kaka moko ma tap.—Yob 1:6.
Ka Mungu ni kakare ceke ngo, nyo andha ecopo dieng’ kuda?
Eyo. Mungu dieng’ akeca ku ng’atuman. Kadok nwang’u Mungu kwo i kaka mi tipo de, re ku kuca eneno dhanu mi wi ng’om ma gibemito andha ninyayu anyong’a i iye man etimo lembe moko pi nikonyogi. (1 Ubimo 8:39; 2 Lemkei 16:9) Wakenen kite ma Yehova nyutho ko nia andha ebedieng’ pi ju ma gibetimo ire:
Kinde m’ibekwaye: Yehova winjo rwo peri ndhundhu i saa m’ibekwaye i iye.—2 Lemkei 18:31.
Kinde ma cwinyi tur: ‘Yehova ni ceng’ini ku ju ma adundegi tur, man ebodho wagi ju ma cwinygi dieng’.’—Zaburi 34:18.
Kinde m’itie ku yeny mi telowic: Yehova ‘bidwoki riek man ebiponji’ nikadhu kud i Lembe pare, niwacu Biblia.—Zaburi 32:8.
Paru ma cuu ngo ma dhanu tie ko iwi ponji ma nia Mungu ni kakare ceke
Paru ma cuu ngo: Mungu nwang’ere kaka moko ci i kind giracwiya.
Lemandha: Mungu bedo ngo nyanok de iwi ng’om kunoke kaka moko ma juromo neno ku wang’. (1 Ubimo 8:27) Etie lemandha nia nyikaluku ku giracwiya mange ‘gibeyero pi dwong’ pa Mungu.’ (Zaburi 19:1) Enre, Mungu bedo ngo i piny m’ecwiyo, tap calu ma jawir rangi de bedo ngo i piny moko m’ewiro rangi i kume. Re lundo piny moko ma juwiro ku rangi, copo konyowa ning’eyo lembe moko iwi ng’atu m’uwire ku rangine. Rom rom kumeno, ng’om maeni ubenyutho iwa ‘kite ma nen ungo’ pa Jacwic calu ve tego, rieko, man mer.—Jurumi 1:20.
Paru ma cuu ngo: Ukwayu Mungu ubed kakare ceke kara eng’ey lembe zoo man kara ebed jategokpo.
Lemandha: Tipo ma leng’ pa Mungu utie tego m’etimo ko tic. Nikadhu kud i tipo pare ma leng’, Mungu neno man etimo piny moko ci i kaka moko ci i saa ma rom m’umbe nia ekebed keca en ku kume.—Zaburi 139:7.
Paru ma cuu ngo: Wec ma nwang’ere i Zaburi 139:8 ubenyutho nia Mungu ni kakare ceke; ewacu kumae: “Tek aidho i polo, ini kuca: Tek aketho kavuto para i liel, nen, ini kuca.”
Lemandha: Giragora maeni ubeweco ngo iwi kaka ma Mungu bedo i iye. Ento ebenyutho nia kaka moko mbe ma bor ni Mungu ma nia ecopo ngo nikonyowa i iye.
a Yehova tie nying’ Mungu ma nwang’ere i Biblia.