Ukwayu itim ang’o kara ikwo rondo ku rondo?
Lembe ma Biblia uyero
Biblia ung’olo kumae: “Ng’ati ma timo gin ma Mungu mito ebikwo pi naka.” (1 Yohana 2:17, Biblia ma leng’) Mungu ubemito itim ang’o?
Ponj lembe iwi Mungu giku Wode ma Yesu. Kinde ma Yesu ubino rwo i bang’ Mungu, eyero kumae: “E kwo ma rondo ku rondone e eni, nia ging’ei in m’i Mungu mandha i kendi, ku ng’atu m’ioro, ma Yesu Kristu.” (Yohana 17:3) Pi nitundo ‘ning’eyo’ Mungu giku Yesu, ukwayu watim ang’o? Waromo ng’eyogi nwang’u wabeponjo Biblia man wabetio ku lembe ma wabeponjone i kwo mwa.a Biblia unyutho paru pa Jacwic mwa, Yehova Mungu ma tie Jamii kwo. (Tic mi Jukwenda 17:24, 25) Biblia uweco bende iwi Wode, Yesu m’uponjo “lembe mi kwo ma rondo ku rondo.”—Yohana 6:67-69.
Nyuth yioyic i lam mi jamgony ma Yesu uthiero. Yesu ubino i ng’om ‘kara etim, emi kwo pare de ni jamgony.’ (Matayo 20:28) Lam mi jamgony ma Yesu uthiero uyabu yo ni dhanu kara gikwo rondo ku rondo iwi ng’om ma bidoko ni paradiso.b (Zaburi 37:29) Yesu uyero kumae: “Mungu maru ng’om mumbe, ketho emio Wode kulong’, kara ng’atu ma tek uyie kud erwiny ki, endre ebed ku kwo ma rondo ku rondo.” (Yohana 3:16) Pieno, kwayu wabed ku yioyic i ie, wakwo nimakere ku ponji pare man nimakere ku yeny pa Won.—Matayo 7:21; Yakobo 2:17.
Tim kero iketh kindwu ku Mungu ubed ceng’ini. Mungu ubemito wacor ceng’ini i vute man wadok jurimbe. (Yakobo 2:23; 4:8) Mungu bedo rondo ku rondo. Ebitho ngo nyanok de, man ebemito jurimone bende gikwo rondo ku rondo. Nikadhu kud i Lembe pare, Mungu unyutho lembe m’emito pi dhanu ceke ma gibeyenye kumae: “Wek adundeni bed kwo mi nja.”—Zaburi 22:26.
Paru mandha ngo ma dhanu tie ko iwi kwo ma rondo ku rondo
Paru mandha ngo: Kero ma dhanu ubetimo bikelo kwo ma rondo ku rondo.
Lembe mandha: Kadok nwang’u jururieko ma neno lembe pa yath giparu nia mediri mi thieth copo medo kwo pa dhanu pi nindo moko de, re kero maeno romo ketho ngo dhanu kwo rondo ku rondo. Mungu kende ma copo mio iwa kwo ma rondo ku rondo, pileme en kende re m’etie “kulo mi kwo.” (Zaburi 36:9) Eng’olo nia ‘ebimwonyo tho pi nja’ man nia ebimio kwo ma rondo ku rondo ni dhanu ceke ma gigwoko bedoleng’ migi.—Isaya 25:8; 1 Yohana 2:25.
Paru mandha ngo: Dhanu mi rangi moko kende re ma bikwo rondo ku rondo.
Lembe mandha: Mungu mbe kud akoyakoya. Ento “i thek ceke ng’atu m’ulwore, m’utimo bedopwe de, e eyie.” (Tic mi Jukwenda 10:34, 35) Dhanu mi thek man mi suru ceke ma gibeworo Mungu giromo kwo rondo ku rondo.
Paru mandha ngo: Kwo ma rondo ku rondo biolo dhanu.
Lembe mandha: Mic mi kwo ma rondo ku rondo uai i bang’ Mungu m’umaruwa man m’ubemito wabed kud anyong’a. (Yakobo 1:17; 1 Yohana 4:8) Eng’eyo nia kara wabed kud anyong’a, ukwayu wabed ku tic ma beco. (Eklizia 3:12) Mungu ung’olo nia ju ma bikwo rondo ku rondo iwi ng’om gibibedo kud anyong’a, pilembe gibibedo ku tic ma beco ma bimio bero igi man wedi migi ma gimaru.—Isaya 65:22, 23.
M’umedo maeno, dhanu ma bikwo rondo ku rondo gibimediri niponjo lembe ma nyen iwi Jacwic migi man tic ma dwong’ m’etimo pi nicwio piny. Ecwio dhanu kud ava mi kwo rondo ku rondo man mi ponjo lembe i wie, ento dhanu gibitundo ngo ‘ninwang’u tic ma Mungu utimo ugambre i thangambere cil i ajikine.’ (Eklizia 3:10, 11) Pieno, ju ma gibikwo rondo ku rondo, saa ceke gibibedo ku lembe ma beco ma bikwayu giponji man ma gitim.
a Jumulembe pa Yehova giponjo Biblia ku dhanu m’umbe cul. Pi ninyang’ lee, nen video ma thiwie tie Jutimo ponji mi Biblia nenedi?
b Nen thiwiwec “Yesu ubodho dhanu nenedi?”