Kapang buku n’i cingi

“Oro ukadhu lee ngo niai ma wacaku nwang’u ko cemo mi tipo i ayi mir elektronik i kite ma nwang’u waparu de ngo.” Nyo in de icwaku wec maeno? Eno ubedo theng wec mi tielocwiny mi ponji m’umego Geoffrey Jackson umiyo i Lembe ma nyen mir 6 i kind oro 2020 m’uai i Guriri m’utelowic. Emedo kumae: “Ka nwang’u JW Library umbe, nwang’u wabeci nyego nenedi ku thong’om maeni. Yehova ubino ng’iyowa i kind oro maeno zoo kara wabed ayika i kum lembe ma kumeni.”

Yehova ubino ng’iyowa nenedi? Tic ma nenedi m’utimere kara juyik aplikasio JW Library, man jubino ku yeny mir ang’o pi nigwoko man nidwoke edok ber nisagu?

Ayi mi kwong’o m’ukoc zoo

I dwi mir 5, 2013, Guriri m’utelowic ukwayu ju ma timo iwi program mi MEPS mi departema ma gini kabedo mwa ma dit m’i wi ng’om zoo nia giroy bodho i kum aplikasio maeno ma giketh ko i iye Biblia​—Lok mi ng’om ma nyen ma jung’iyo iye kendo. Paul Willies, ma timo kud ungu mi program mi MEPS eno ukoro kumae: “Nwang’u niai con de fodi wayiko ngo aplikasio moko acel de ma nia wakethe i kaka ma jupangu iye aplikasio iwi yamu. Ento wacoko dhogwa i ungu, wajigo nyithi tic moko, man wacaku timo tic ku departema ma tung’ tung’ pi ning’iyo aplikasione, nigiere, man niketho piny m’i iye. Wabed warwo wang’ ma pol, man ku kony pa Yehova, ing’ey dwi abic kende ci jutwong’o pir aplikasione i coko ma jubed jutimo kubang’ oro nia edaru wok!”

I ng’eye, peko udok ubedo nidwoko aplikasione udok ni kapang buku mandha m’utie ku girasoma dupa man i dhok ma tung’ tung’. I kum dwi mi 1, oro 2015, girasoma mwa ma pol mir Anglais ubino nuti iwi aplikasione, man i ng’ey dwi abusiel kumeni kende ci, dhanu ma dupa ma gitiyo kud aplikasio maeno nwang’u dong’ giromo toko girasoma maenogi i dhok dak swa.

Niai eca ci, i yore ma tung’ tung’ dupa umego mwa giwotho beroyo lembe ma nyen i aplikasione, calu ve nimedo video, nidiko dhu girasoma ma tung’ tung’ ku video mi coko ceke i sanduku acel, man nimiyo kare ni ju ma tiyo kude nitimo sayusac wang’ acel niai kud i verse mi Biblia ku Guide de recherche.

Niketho kapang buku ubed ma ber

Kubang’ nindo, jamtic ma tung’ tung’ ma jumondo ko i JW Library tundo milioni 8, man kubang’ dwi acel ke kadhu milioni 15! Ang’o m’ugam ukwayere kara aplikasio maeno utim tic ma ber i jamtic maenogi? Umego Willies ukoro kumae: “I andha, tic mir aplikasio thum ungo, uketho saa ceke wawotho timo tic pi nimedo lembe ma tung’ tung’ ma nyen, nidwoke ebed ku kony lee, man niketho tiyo kude udok yot nisagu. Wang’ ma pol, dikiri mi lemkuloka ubewotho dwoko jamtic mir elektronik udok nyen, eno re m’uketho wan bende ubewotho kwayere nia saa ceke waketh aplikasio mwa de ubed uromb ku lembe m’ubelokerene. Ukwayere bende nia wagwoki man wayiki lembe mi iye udok ber nisagu kara girasoma mwa man piny ma jumaku amaka umedere asu nicidho i wang’e i JW Library.” Ka ju kwanu dhok ceke, junwang’u nia wend girasoma utie ma tundo 200 000 kumeni, man piny ma jumaku ma pir awinja man video kadhu 600 000 ma ginwang’iri i JW Library!

Pi niketho aplikasione utii ma ber, jubedo ku yeny mi piny mange dupa m’uweko jamtic mi ordinater. Bende, ukwayere nia jung’iew jamtic mange pi program mi ordinater. Jamticne acel kende ci camu dolar 1 500 (U.S.) kubang’ oro. M’umedo maeno, kubang’ oro ungu mi program mi MEPS tiyo ku dolar ma romo 10 000 (U.S.) pi ning’iewo jamtic ma tung’ tung’ i bang’ ju ma yiko jamticne kara aplikasione umedere nitiyo ma ber ku jamtic ma nyen ma calu ve ordinater, tablet, man thelefon.

Nitoko piny gwoko giramiya mi sente

JW Library ujwigo wend sente ma jutiyo ko pi niwodho girasoma iwi karathasi, nimwono kume, man nipangu dhoge. Ku lapor, kenen nyathi buku Wang’iyu i lembagora kubang’ ceng’. I oro 2013 wawodho nyathi buku eno iwi karathasi ma romo milioni 12. Re i oro 2020, wawodho milioni abic kende mi nyathi buku maeno iwi karathasi kadok nwang’u wend jurwey ma nyen umedere ma kadhu 700 000 i ng’om zoo de. Pirang’o alokaloka maeno? Pilembe kawoni dong’ umego ku nyimego mwa ma pol gisomo lembagora ma kubang’ ceng’ i JW Library.a

“Beine mbe magwei”

JW Library ubekonyo bende dhanu ma gibetiyo kude i ayi ma dupa dit. Geneviève, ma kwo i ng’om mi Canada, unwang’u nia aplikasio eno ukonye uketho i ponji pare cot ungo. Eyero kumae: “Ku lemandha, ka nwang’u ukwayu nia abed acok dhu buku ceke ma tie ku yenyne pi ponji, aparu ngo nia nwang’u aromo timo ponji para kubang’ kugweno. Ento nikum aplikasio eni, ating’o dhu tablet para i cinga ci e anwang’u piny ceke ma tie ku yenyne keca wang’acel. Ponji maeno m’atimo nja uteng’o yiyoyic para man udwoko kindwa udoko ceng’ini mandha ku Yehova.”

Aplikasio maeno ukonyo i ayi ma segi i saa mi thong’om mi Korona. Charlyn, ma kwo i Etats unis ukoro kumae: “Nikum thong’om mi Korona m’uromo ng’om ceke, anwang’u ngo girasoma mwa moko acel de ma nyen ma juwodho iwi karathasi pi oro ma kadhu acel zoo. Ento JW Library utungowa ma ber mandha i thenge mi tipo, man abefoyo Yehova pi cemo maeno mi mer m’emiyo iwa.”

Dhanu ma pol giwinjiri calu Faye ma kwo i ng’om mi Philippines, m’uyero kumae: “Kwo para mi thenge mi tipo ku ng’iyone zoo ujengere iwi aplikasio maeni ma tie ku tego ma lee. Kugweno i wang’ lembe mange ceke, eno tie gin ma kwong’a m’alar amondo i iye. Awinjo piny kud i iye i saa mi tic para ma kubang’ ceng’. Kan abeyiko coko de atiyo kude. Pi niyiko telo wi ponji mi Biblia bende atiyo kude. Kinde ma ka wang’a twolo de atiyo kude pi nineno video. Asomo kude thiwiwec ma tung’ tung’ kunoke Biblia kinde ma kan abekuro saa mi tugo woth. Beine mbe magwei.”

I tic mi rweyo lembanyong’a bende, pir aplikasio maeno utie tek. Ku lapor, kinde ma nyamego moko mi Cameroun ubino rweyo lembanyong’a, emito etii ku giragora m’egam eneno nyamego moko mange utiyo ko nyathi yenga moko i wang’e. Ento ebino poy ungo kaka m’eromo nwang’u iye versene. Ekoro kumae: “Lembe ma ber ubino nia apoy i kum wec mi versene moko. Ayabu aplikasio, amondo i Biblia, man akiewo dund wecne pi nisaye. E anwang’u versene wang’acel. Nitiyo kud aplikasio maeno uketho dong’ atie ku copo mi nwang’u verse dupa ma saa moko nwang’u adaru wil ko.”

Giramiya peri m’imiyo ku berocwiny nikadhu kud i yore mi donate.jw.org re m’uketho ecopere iwa nimedo lembe i aplikasio JW Library, nigwoko man nidwoke edok ber nisagu ni umego ku nyimego mwa mi wang’ ng’om zoo. Wafoyi lee dit pi berocwiny peri.

Lembe ma pigi tek iwi JW Library

1. 

   I dwi mir 10, 2013—Aplikasione ucaku m’etiye ku Biblia—Lok mi ng’om ma nyen ma jung’iyo iye kendo

2. 

   I dwi mi 1, 2015—Girasoma ma tung’ tung’ mir Anglais ucaku nwang’ere i iye, i ng’eye ke mi dhok mange de swa

3. 

   I dwi mir 11, 2015—Jumedo rangi mi riedo piny i iye

4. 

   I dwi mir 5, 2016—Jumedo ayi m’ubenyutho coko i iye

5. 

   I dwi mir 5, 2017—Jumedo thenge ma jukiewo iye piny

6. 

   I dwi mir 12, 2017—Jumedo thenge mi ponji mi Biblia

7. 

   I dwi mir 3, 2019—Jumedo copo mi toko piny ma pir awinja, mi neno video ku wi yamu, man kare mi timo sayusac niai kud i Guide de recherche

8. 

   I dwi mi 1, 2021—Jumedo lembe i iye ma juroyo ko buku Icopo kwo kud anyong’a rondo ku rondo!