Jubewodho buku moko ma pire tek lee nisagu buku mange ceke

“Akuro pinjuni pi oro 19 ma zoo!” Umegwa ubino kuro ang’o? Biblia​—Lok mi ng’om ma nyen (Matayo-Lembanyutha) i dhok pare mir anyoli mi Bengali. Dhanu mange dupa de beyero lembe ma rom ka Biblia​—Lok mi ng’om ma nyen uwok i dhok migi mir anyoli. Nyo idaru penjiri pi tic ma jutimo pi niloko Biblia eno man niwodhe iwi karatasi?

Mi kwong’o, ungu mi ju ma loko dhok, gitimo tic i the telowic mi Komite mi kiewo girasoma m’i Guriri m’utelowic. Loko Bibliane ting’o nindo ma rukani? Nicholas Ahladis ma timo i tic mi loko dhok i Warwick i New York, ukoro kumae: “Lembe utie dupa dit, m’uketho i iye wend dhanu m’umito utim tic mi loko dhokne, lembe ma tung’ tung’ ma dhokman utie ko, kite ma ju ma gibesomo Bibliane ginyang’ ko i ayi ma kwo ubino ko con, man bende nineno kite ma wec mi dhokne ubed ukoc ko nimakere ku kabedoman. I adundo, ungu acel mi loko dhok copo loko Biblia thengene ma niai i Matayo-Lembanyutha kende pi oro 1 kunoke 3, man niloko Bibliane zoo ke, copo ting’o oro ma kadhu 4. Pi dhok mi babuba ke ecopo ting’o oro ma lee.”

Lembe mange de utie dupa m’ukwayere pi niloko Biblia. Dhanu mange m’i kabedo ma tung’ tung’ man saa moko m’i ng’om de ma tung’ tung’, ma gitie ngo i kind ungu mi ju m’ubeloko Biblia, gisomo gin ma julokone man gimiyo paru migi iwi gin ma gisomo. Paru migi konyo ju m’ubeloko Biblia niwodho Biblia ma wec m’i iye utie tap tap, ma terere man ma junyang’ i iye cuu. M’umedo maeno, calu japonji mi julok Biblia i ng’om mir Afrique du Sud uyero, “julok dhok gibenwang’iri i tic ma lee dit m’ukwayu gitim ni Yehova man ni ju ma gibisomo Lembe pare.”

Ka juloko Biblia uthum, ekwayere nia juwodhe iwi karatasi man judik dhoge. Kara judike, jutiyo ku jamtic ma tung’ tung’ ma romo apar: karatasi, vino, jamtic mi boyo kume, udok, poke, karatasi mi mola ma tar, thol, bongu ma ve kitambala, poke ma tek ma juroyo yor i dende, man jamtic ma ketho judiko Bibiane. I oro 2019, jamtic maeno ma jutiyo ko pi niwodho Biblia kende ci, ucamu dolar ma kadhu milion 20. Masini mwa mi wodho buku iwi karatasi utimo tic pi saa ma kadhu elufu dak adek (300 000).

Pirang’o watiyo ku saa man sente mwa lee pi tic maeno? Umego Joel Blue ma timo i departema mi wodho buku iwi karatasi i wang’ ng’om zoo uyero kumae: “Biblia utie buku ma pire tek lee kud i kind buku ma wabewodho. Pieno, wabemito ewoki ma ayi pare miyo yung’ ni Mungu ma waworo man ni rwonglembe ma warweyo.”

M’uweko Biblia​—Lok mi ng’om ma nyen maeni ma watiyo kudo, wabewodho bende lokne mange ni jusom ma gitie ku yeny ma segi. Ku lapor, Biblia​—Lok mi ng’om ma nyen mi ju ma wang’gi tho, utie kawoni i dhok ma tung’ tung’ apar. Biblia mi ju ma wang’gi tho (ma jusomo nang’ jubemule amula ku cing’). Pi ning’iko kum acel zoo, lembene camu saa abora man calu ma dhoge thithiri, ka jukethoman i dhu wadi, borne copo tundo metre 2.3. Wabewodho bende Bibliane moko ma segi pi nikonyo dhanu ma jutwiyo i kol, kum kuca juyiyo kende kende buku ma dende yom.

Biblia​—Lok mi ng’om ma nyen utie kud adwogi ma ber iwi kwo mi ju m’ubesome. Wakewec iwi cokiri kunoke kanisa mi Tombe ma juweco dhu Kiluba i iye, ma nwang’ere i ng’om mi Congo (Kinshasa). Tombe utie bor i kilometre 1 700 kud adhura ma dit mi Kinshasa. Biblia mi dhu Kiluba ubino acel kende i cokiri mi Jumulembe pa Yehova ma keca, man ebino dhu Kiluba ma jubed juweco de con. Umego gibed gilawu Biblia acel eno i kindgi pi niyiko ponji ma gibimiyo i coko migi. Ento niai i dwi mir 8, oro 2018, Biblia​—Lok mi ng’om ma nyen uwok i dhok mi Kiluba; ewok i Lembariba ma con ku ma nyen ceke man juloke i kite ma juweco ko kawoni. Bende, ng’atuman m’i cokirine unwang’u ma pare gire.

Nyamego moko ma dhok pagi utie Allemand, uyero pi Biblia​—Lok mi ng’om ma nyen kumae: “Dong’ apenjara ngo nia ukwayu asom Biblia. Ento ayero nia, ‘Atie kud ava mi some lee.’” Ng’atu moko ma jutwiyo i kol ukiewo kumae: “Jumiyo ira Biblia moko acel mi Lok mi ng’om ma nyen. Bibliane ubekonya nitimo alokaloka i kwo para. I wang’e abed anyang’ ungo i Lembe pa Mungu, ento ma juloko maeni re m’uketho abenyang’ i iye. Abemito ang’ey lembe lee iwi Jumulembe pa Yehova man an de adok acel m’i kindgi.”

Dhanu ceke ma gitie jusom mi Biblia​—Lok mi ng’om ma nyen gitie ku foyofoc pi giramiya ma jumiyo pi nitielo tic m’uketho ebewok. Giramiya maeno ma jubemiyo i wang’ ng’om zoo, jumiye i ayi ma jukoro pire i donate.jw.org. Wabefoyi pi berocwiny peri.