Nyo Jumulembe pa Yehova gitie ku Biblia ma migi gigi?
Jumulembe pa Yehova gibed gitiyo ku lok ma tung’ tung’ pi niponjo Biblia. Ento i dhok ma Biblia—Lok mi ng’om ma nyen nwang’ere i iye, watiyo kude pilembe nying’ Mungu nwang’ere i iye, eloko lembe tap tap man terere.
Nying’ Mungu. Jumoko ma giloko Biblia gimiyo ngo yung ni Won Bibliane. Ku lapor, Biblia moko ukwanu nying’ dhanu ma kadhu pier abiro (70) ma gitimo tic kara juwodhe, ento elund ekabu nying’ Yehova Mungu ma tie Won Bibliane cen kud i iye!
Tung’ ku maeno, Biblia—Lok mi ng’om ma nyen udwoko nying’ Mungu i kaka ma kadhu wang’ elufu, kakare ma nying’ne ubed unwang’ere i iye i gor ma con. Bende, junyutho ngo nying’ dhanu ma gitimo i komite mi ju m’uwodhe.
Eloko lembe tap tap. Biblia ma pol uloko ngo tap tap lembe m’ubino i gor ma con. Ku lapor, Biblia moko uloko Matayo 7:13 i ayi mae: “Wumond kud i dhugang’ ma diny, pilembe dhugang’ ma terojo i mac ma kuthum utie lac man etie yot niwotho i yo ma terojo i iye.” Ma ke i gor ma con, jutiyo ku wec ma nia “nyoth,” ento ungo “mac ma kuthum.” Copere nia julok dhok gitiyo ku wec “mac ma kuthum” pilembe giyiyo nia judubo gibisendiri rondo ku rondo i mac ma kuthum. Ento Biblia ucwaku ngo ponji maeno nyanok de. Pi thelembe maeno re ma Biblia—Lok mi ng’om ma nyen uloko giragora maeno tap kumae: “Wumond kud i dhugang’ ma diny, kum dhugang’ ma lac man gengi ma her terojo i nyoth.”
Eloko lembe terere. Lok ma cuu mi Biblia ucikere kende kende ngo niloko lembe tap tap, ento kwayu elok bende lembe terere i ayi ma junyang’ i iye yot yot. Wakenen lapor moko. I Jurumi 12:11, jakwenda Paulo utiyo ku wec moko ma i dhok ma con thelembene tie “nicego kumjo i tipo.” Calu ma i dhu Alur jucopo nyang’ ungo i wec maeno yot yot, Biblia—Lok mi ng’om ma nyen uloke i ayi mange ma yot. Ewacu nia Jukristu ‘giwek tipo ma leng’ umii igi tego.’
M’uweko nying’ Mungu, niloko lembe tap tap man niloko lembe terere, Biblia—Lok mi ng’om ma nyen ukoc ku Biblia mange pi thelembe mange mae: Jupoke ni dhanu m’umbe cul. Eno uketho dhanu milioni dupa gicopo somo Biblia i dhok migi mir anyoli, uketho i iye kadok ju ma nwang’u gicopo ng’iewo ngo Biblia migi gigi.