Kony jumange kara gicir peko migi

1. Wang’ ma pol Yehova dwoko wang’ rwo mi jurutic pare i yo ma kani?

ING’EYO ngo nia Yehova copo tiyo kudi pi nidwoko wang’ rwo pa ng’atu moko m’ubekwaye kud adundene ceke? Ecopo tiyo kudi i jadit cokiri, jakony tic, jayab yo, kunoke jarwey lembanyong’a. Ecopo tiyo bende kudi kadok nwang’u i nyathin, i ng’atu m’utii, umego kunoke nyamego. Tek ng’atu moko m’umaru Yehova ubekwayu kony i bang’e, wang’ ma pol Mungu mwa tiyo ku judong cokiri man jurutic pare mange pi ‘nitielo cwiny’ ng’atune. (Kol. 4:11) Etie iwa rwom ma lee dit nitimo ni Yehova man ni umego mwa i ayi maeno! Wacopo timo lembuno i saa mi peko mi thong’om, peko ma wok rek, kunoke i saa mi ragedo.

KONY JUMANGE I SAA MI PEKO MI THONG’OM

2. Pirang’o eromo bedo tek iwa nikonyo jumange i saa mi peko mi thong’omi?

² Thong’om copo ketho nikonyara i kindwa bedo lembe ma tek. Ku lapor, wacopo maru nia wacidh wanen jurimbwa, re liewogi copo bedo iwa ni ariti. Wacopo maru nia walwong’ ju ma gitie ku peko mi nwang’u giracama kara wacam kugi, re timo lembuno de bedo tek. Bende, wacopo maru nia wakony jumange, re lembene romo bedo tek ka juruot mwa giwa de uberemo. Kadok kumaeno, re asu wabemito wakony umego mwa, man anyong’a nego Yehova ka wabetimo tego nikonyogi. (Rie. 3:27; 19:17) Dong’ wacopo timo ang’o?

3. Lapor mi judong cokiri mi cokiri pa Desi ubemiyo iwa ponji ma kani? (Yeremia 23:4)

³ Gin ma judong cokiri copo timo. Tek itie jadit cokiri, tim kero ing’ey rombe cuu. (Som Yeremia 23:4.) Nyamego Desib ma waweco pire i thiwiwec m’ukadhu uwacu kumae: “Judong cokiri mir ungu mwa mi lembanyong’a, gibed gidikiri kudwa i tic mi lembanyong’a man ninambu karacelo kudwa.” Lembuno uketho nikonyo Desi ubedo yot ni judong cokiri i saa mi thong’om mi Korona man kinde ma wedi pare utho i lembene.

4. Pirang’o ebino yot ni judong cokiri nikonyo Desi, man eno ubemiyo ponji ma kani ni judong cokiri?

⁴ Desi ukoro kumae: “Calu ma judong cokiri gibino ira ni jurimo, ebedo ira yot nikoro igi kite m’awinjara ko man lembe m’udieng’o cwinya.” Eno ubemiyo ponji ma kani ni judong cokiri? Wubed wuliew ju ma gin’i the telowic mwu ma fodi peko k’utundo ngo i wigi. Wubed jurimbgi. Tek thong’om uketho liewogi utie tek, say yo mange m’icopo weco ko kugi. Desi uwacu nia, “saa moko i nindo acel kende ci, judong cokiri ma tung’ tung’ lwong’a ku simu kunoke gikiewo ira mesaj. Giragora ma gisomo ira ubed umulo adundena kadok nwang’u ang’eyo giragorane de.”

5. Judong cokiri copo ng’eyo nenedi yeny mir umego ku nyimego, man nikonyogi?

⁵ Yo acel m’icopo ng’eyo ko yeny mir umego ku nyimego peri, utie nipenjogi ku penji ma nyayu ngo lewic i wigi. (Rie. 20:5) Nyo gitie ku yeny mi cam, mi yath kunoke mi piny mange? Nyo tic uwekogi kunoke gikoso sente ma gicul ko ot? Tek kony moko nuti ma gavmenti ubemiyo, nyo umito jukonygi kara ginwang’ konyne? Desi ubed unwang’u kony mi giki mi kum i bang’ juyic wagi. Ento mer ku tielocwiny ma judong cokiri ginyutho ire re m’ukonye nisagu. Ewacu kumae: “Judong cokiri gibed girwo kuda. Kadok abepoy ungo tap tap i kum gin ma gibed giyero de, re abepoy pi kite m’awinjara ko. Ebino yo ma Yehova ubino yero ko ira kumae: ‘Itie ngo kendi.’”​—Isa. 41:10, 13.

6. Pi nikonyo jumange i cokiri, judupa copo timo ang’o? (Nen cal.)

⁶ Gin ma jumange copo timo. Andha judong cokiri gicikiri nibedo ma kwong’a nidieng’ pir umego ku nyimego. Ento Yehova ubekwayu wan ceke watiel cwiny jumange man wakonygi. (Gal. 6:10) Lembe ma wabetimo pi ninyutho mer, kadok ebed ma nyanok, copo bedo ku kony lee ni ng’atu m’uberemo. Nyathin ma nyanok copo cidho karacelo ku junyodo pare pi nicikonyo umego kunoke nyamego moko. Aradu ma wang’e woy copo konyo nyamego moko ku ng’iewo piny kunoke ku tic mange. Jumange i cokiri ke copo konyo ng’atu m’uberemo ku tedo cam man nitero ire i pacu. I andha, i saa mi thong’om, ng’atu moko ci m’i cokiri bedo ku yeny mi tielocwiny. Ka copere, waromo bedo pi kare moko i ng’ey coko pi niweco kud umego ku nyimego wang’ ku wang’ kunoke nikadhu kud i video. Judong cokiri bende gitie ku yeny mi tielocwiny. Jumoko ubed uoro wec mi foyofoc iwi karatasi ni judong cokiri ma wang’ ma pol gibetimo tic lee pi nikonyo umego ku nyimego i saa mi thong’om. Etie lembe ma ber mandha ka wan ceke wabemedara ‘nitielo cwinywa i kindwa man niteng’ara’ i kindwa!​—1 Thes. 5:11.

KONY JUMANGE MA GIBENWANG’IRI KU PEKO MA WOK REK

7. Peko ma wok rek romo miyo can ma kani?

⁷ Peko ma wok rek tundo mbwang’ iwi ng’atini. Jumoko piny migi copo nyothere, ot migi, kunoke wedi migi romo tho i lembene. Lembuno ukoyo ngo kadok umego ku nyimego mwa de. Dong’ wacopo timo ang’o pi nikonyogi?

8. Judong cokiri ku juwi ot gicopo timo ang’o ma fodi peko ma wok rek k’utundo ngo?

⁸ Gin ma judong cokiri copo timo. Judong cokiri, wukony umego ku nyimego gilar giyikiri ma fodi peko ma wok rek utundo ngo. Wuketh dhanu ceke m’i cokiri ging’ey gin m’ukwayu gitim kara gibed agwoka man ninyutho lembene ni judong cokiri. Margaret ma waweco pire i thiwiwec m’ukadhu uwacu kumae: “I saa mi theng ponji mi yeny mi cokiri, judong cokiri mwa gibed gipoyowa nia fodi ariti mi mac ma wang’u piny utie asu. Giwacu nia, tek judongo pa gavmenti ung’olo nia juwek pacu kunoke nia lembe udoko rac, mito watim piyo waai.” Lembuno ubino tap i saane, pilembe yenga abic kende i ng’eye ci, mac umoc wang’ acel. I saa mi thier mi juruot, juwi ot copo dwogo iwi lembe ma ng’atuman ucikere nitimo. Tek wun kud awiya mwu wular wuyikuru, kumwu bimiel ungo hai ka peko ma wok rek utundo.

9. Judong cokiri copo timo kero ma kani i wang’ peko ma wok rek man i ng’eye?

⁹ Tek itie janen wi ungu mi lembanyong’a, kud ikur peko ma wok rek ukeutundi kadong’ ibed ku namba simu kud adres ma tap mi dhanu ceke mir ungu peri. Nen nia itie ku namba simu man adres migi ma kawoni. I ng’eye tek peko ma wok rek utundo, ibibedo ku copo mi ng’eyo kaka ma ng’atuman n’i iye pi ning’eyo yeny pare. I ng’eye ke inyuth lembene ndhundhu ni janen wi tic mi guriri mi judong cokiri, ma en de ebidok nyutho lembene ni jaliew mi twodiri. Lembene bibedo yot ka junyoke anyoka. Kinde ma mac uwang’u piny i kabedo pa Margaret, jaliew mi twodiri pare unindo ngo pi saa 36 zoo pi nipangu lembe ku judong cokiri ma gibelwong’o man gidieng’ pir umego ku nyimego 450 ma giweko pacu migi. (2 Kor. 11:27) I ayi maeno re ma gikonyo dhanu ceke ma gibino ku yeny mi kaka ma givogiri i iye.

10. Pirang’o judong cokiri gicikiri nineno liewo umego ku nyimego ni gin ma pire teki? (Yohana 21:15)

¹⁰ Judong cokiri gitie ku rwom mi tielo cwiny umego ku nyimego ku giragora man mi konyogi i saa mir ang’abacwiny. (1 Pet. 5:2) Saa ma peko ma wok rek utundo, gicikiri nineno nia umego ku nyamegoman utie agwoka, etie ku cam, kendi, man kaka m’evogere i iye. Re dwi ma lee i ng’eye, umego giromo bedo asu ku yeny mi kony mi thenge mi tipo man mi nyutho nia jumarugi. (Som Yohana 21:15.) Umego Harold ma tie acel m’i Komite mi filial udaru weco kud umego ku nyimego dupa ma peko ma wok rek umulo kumgi. Ewacu kumae: “Etie lembe ma ting’o nindo kara kwo udok ma ber calu m’i wang’e. Kwo migi copo caku yikere, ento paru mi wedi migi m’utho, piny migi m’unyothere man lembe ma pek ma gikadhu kud i iye copo rwinyo ngo pio kud i wigi. Paru mi lembuno copo benyolo can kendo kendo i cwinygi. Eno nyutho ngo nia gimbe ku yiyoyic, ento etie lembe ma wok i kwo pa dhanu.”

11. Juruot copo bedo asu ku yeny ma kani?

¹¹ Judong cokiri giwil ungo ku juk m’uwacu nia “wuwak ku ju m’ubewak.” (Rum. 12:15) Ju ma gikadhu kud i peko ma wok rek gitie ku yeny ma jutiel ko cwinygi nia Yehova umarugi man nia umego ku nyimego de umarugi. Judong cokiri gimito gikony juruot nibedo asu ku ng’iyo mi lembe mi tipo, calu ve nirwo, nitimo ponji ma segi, nicidho i coko, man nirweyo lembanyong’a. Giromo tielo bende cwiny jurunyodo nia gikony awiya migi giketh wigi i kum gin ma peko ma wok rek copo nyotho ngo. Jurunyodo, wunyuth ni awiya mwu nia saa ceke Yehova bibedo jarimbgi man nia ebikonyogi. Wukor igi bende nia giromo bedo i kind juruot mir umego ku nyimego i wang’ ng’om zoo ma gitie ayika nikonyogi.​—1 Pet. 2:17.

12. Jumange copo timo ang’o pi nimiyo kony i saa mi peko ma wok reki? (Nen cal.)

¹² Gin ma jumange copo timo. Tek peko ma wok rek utimere ceng’ini ku kaka m’ini iye, penj judong cokiri pi ning’eyo ayi m’icopo miyo ko kony. Icopo miyo ot peri kara dhanu ma pekone umulo kumgi kunoke ju m’ubino miyo kony gibed i iye pi kare moko. Icopo konyo tic mi miyo cam man jamtic mange ni ju ma gitie ku yeny. Kadok peko ma wok rek utundo bor ku kaka m’ikwo i iye de, asu icopo konyo. Nenedi? Icopo rwo pi ju ma pekone umulo kumgi. (2 Kor. 1:8-11) Iromo tielo bende tic mi miyo kony ni dhanu ma pekone unwang’u nikadhu kud i giramiya mi sente pi tic m’ubetimere i wang’ ng’om zoo. (2 Kor. 8:2-5) Tek itie ku copo mi cidho i kabedo ma pekone uwok i iye ke, penj judong cokiri pi ning’eyo gin m’iromo timo. Tek julwong’i pi nicimiyo kony, copere nia ibilar nwang’u ponji kara imii kony i ayi ma cuu.

KONY JUMANGE UCIR RAGEDO

13. Umego mwa gibenwang’iri ku peko ma kani i ng’om ma jukwero tic mwa i iye?

¹³ I ng’om ma jukwero tic mwa i iye, ragedo ketho kwo doko tek nisagu. Umego ma n’i ng’om maeno de gitie ku peko mi sente, mi remokum, man wedi migi de ubetho. Bende, calu ma jukwero tic mwa i ng’ombe, ecopo bedo tek ni judong cokiri nicinenogi, kunoke niweco yot yot ku ju m’utie ku yeny mi tielocwiny. Andrei ma waweco pire i thiwiwec m’ukadhu unwang’ere i lembuno. Nyamego moko mir ungu pare mi rweyo lembanyong’a ubino ku peko mi nwang’u sente. I ng’eye, elund enwang’u ret ku mutukari. Ebino ku yeny ma mito jutime ko operasio dupa, man timo tic de ubino tek ire. Re kadok jukwero tic mwa, man thong’om de ubedo nuti, umego gitimo tego pi nikonye man Yehova ubino neno peko pare.

14. Lapor ma kani ma judong cokiri gibenyutho mi jengiri iwi Yehova?

¹⁴ Gin ma judong cokiri copo timo. Andrei ubed urwo man etimo lembe m’ecopo. Yehova udwoko wang’ rwo pare nenedi? Ecwalu juyic mange ma tung’ tung’ m’i cokiri ma gibino ku bedagonya moko pi nimiyo kony ni nyamego mwa. Jumoko ubed utere i yath, jumange ke ukonye ku sente. Yehova ucwalugi nitimo lembe ma gicopo man emiyo mugisa pi bedo i acel migi man iwi kero ma gitimo. (Ebr. 13:16) Pieno wu judong cokiri, tek jucero tic mwa i ng’om mwu, wukway jumange ukonywu. (Yer. 36:5, 6) M’usagu zoo, wujenguru iwi Yehova. Eromo konyowu nipong’o yeny mir umego ku nyimego.

15. Wacopo gwoko bedo i acel mwa nenedi i saa mi ragedo?

¹⁵ Gin ma jumange copo timo. Ka jukwero tic mwa, wacopo berombo i ungu ma thindho thindho kende. Pieno, pire tie tek nia wabed ku kwiyocwiny i kindwa. Wakiedu i dhu Sitani, ento ungo i kindwa. Bed ikadh kud iwi kosa mir umego, kunoke tim tego wuyik lembe m’i kindwu pio pio. (Rie. 19:11; Efe. 4:26) Wabed ayika nikonyara i kindwa. (Tito 3:14) Kony ma jumange ukonyo ko nyamego ma waweco pire, ubedo kud adwogi ma ber iwi ungu mi lembanyong’a pare. Kindgi udoko ceng’ini mandha calu juruot acel.​—Zab. 133:1.

16. Nimakere ku Jukolosai 4:3, 18, wacopo konyo nenedi umego ku nyimego mwa ma jubenyayu ragedo i kumgi?

¹⁶ Umego ku nyimego mwa elufu swa gibetimo asu ni Yehova kadok gavmenti ukwero tic mwa de. Jumoko jutwiyogi pi yiyoyic migi. Wacopo rwo pigi, pi juruot migi, man pi ju ma gibeketho bedagonya migi i ariti pi nimiyo igi kony mi tipo, mi kum man mi cero bang’gi i wang’ cik.c (Som Jukolosai 4:3, 18.) Kud inen nia kony mi rwo peri umbe igi!​—2 Thes. 3:1, 2; 1 Tim. 2:1, 2.

17. Icopo yikiri nenedi niai kawoni pi ragedo?

¹⁷ Icopo yikiri ku juruot peri niai kawoni pi ragedo. (Tic. 14:22) Kud iketh wii i kum lembe ma rac ma copo timere saa maeca. Ento keth mer peri ku Yehova ubed ma tek, man kony awiya peri de gitim lembe ma rom. Tek saa moko ibenwang’u nia cwinyi ung’abere, rwo i bang’ Yehova kud adundeni ceke. (Zab. 62:7, 8) Wuwec i ot mwu iwi thelembe ceke m’uketho wugene.d Calu ma yikiri pi peko ma wok rek konyojo, yikiri peri man genogen peri iwi Yehova de bikonyo awiya mwu nibedo ku tegocwiny man kwiyocwiny i saa mi ragedo.

18. Lembang’o m’ubekurowa i nindo m’ubino?

¹⁸ Kwiyocwiny pa Mungu ketho wabedo agwoka. (Filip. 4:6, 7) Yehova tiyo kude pi nijuko adundewa kadok i saa mi thong’om, i saa mi peko ma wok rek, man i saa mi ragedo ma romo nwang’uwa tin. Ebetiyo ku judong cokiri ma gibetimo tic ma tek pi nitelo wiwa. Bende, wan ceke emiyo iwa rwom mi konyara i kindwa. Kwiyocwiny ma wabenwang’u tin, bikonyowa i ragedo ma dit m’ubebino, kadok i saa mi “masendi ma dit.” (Mat. 24:21) Saa maeno wabibedo ku yeny mi gwoko kwiyocwiny mwa, man mi konyo jumange bende ugwok migi. I ng’ey lembuno, wabibedo mbe kendo ku gin ma ketho cwinywa ng’abere. Wabidong’ kwo ku kwiyocwiny man m’umbe ku kum mi dubo rondo ku rondo calu ma Yehova ukeco piwa niai con.​—Isa. 26:3, 4.