Cwinyi bed tek nia anyong’a ubenego Yehova i kumi

1. Jutic pa Yehova moko giromo penjiri ku penji ma kani?

ETIE lembe mi tielocwiny ma lee ning’eyo nia anyong’a nego Yehova i kum jutic pare ceke! Biblia de uyero nia “anyong’a nego Yehova [i] kum dhanu pare.” (Zab. 149:4) Ento cwiny jumoko romo tur cil ma gipenjiri ko kumae: ‘Nyo andha anyong’a nego Yehova i kuma athothi?’ Saa moko jutic pa Yehova ma weg bedopwe dupa ma con de gibed gipenjiri kumeno.—1 Sam. 1:6-10; Yob 29:2, 4; Zab. 51:11.

2. Anyong’a nego Yehova i kum jukani?

² Biblia unyutho kamaleng’ nia ecopere iwa ninyayu anyong’a i Yehova kadok watie ku dubalaga. Nenedi? Wacikara ninyutho yiyoyic i Yesu Kristu man nilimo batizo. (Yoh. 3:16) E kumeno wanyutho i wang’ dhanu ceke nia waloko cwinywa man nia wang’olo ni Yehova nia wabitimo yeny pare. (Tic. 2:38; 3:19) Anyong’a nege lee tek watimo lembe maeno pi nibedo ku winjiri ma ceng’ini kude. Tek wabeii nikwo nimakere ku lembang’olane, efoyo kudwa man ekwanuwa ni jurimbe ma ceng’ini.—Zab. 25:14.

3. Wabidwoko wang’ penji adek ma kani?

³ Dong’ pirang’o saa moko jumoko giparu nia anyong’a nego ngo Yehova i kumgi? Yehova nyutho nenedi nia anyong’a ubenege i kumwa? Man wacopo timo ang’o kara cwinywa ubed tek nia anyong’a ubenege i kumwa? Wakenenu.

PIRANG’O JUMOKO GIPARU NIA ANYONG’A NEGO NGO YEHOVA I KUMGI?

4-5. Kadok wabenwang’u nia tijwa mbe, cwinywa copo bedo tek i kum lembang’o?

⁴ Dupa m’i kindwa gicaku nyego ku pidoic ma nia tijgi mbe niai ma gi thindho. (Zab. 88:15) Ku lapor, umego moko ma nyinge Adrián ukoro kumae: “Saa ceke abed aparu nia tija mbe. Abepoy nia kinde m’abino nyanok, abed arwo nia timba jufwa gimond i Paradizo, kadok cwinya ubino tek nia an aromo mondo ngo i iye de.” Umego Tony m’udongo ngo i ot mi Jumulembe ke uyero kumae: “Junyodo para gibed giyero ngo ira nyanok de nia gimara kunoke nia anyong’a ubenegogi i kuma, uketho saa zoo abed aparu nia abesendara mananu.”

⁵ Tek wabenyego ku pidoic ma nia tijwa mbe, ukwayu wapoy nia Yehova utelowa i bang’e pilembe emaruwa. (Yoh. 6:44) Eneno gin ma ber m’i iwa ma wan giwa wambe ku copo mi neno, man eng’eyo adundewa cuu. (1 Sam. 16:7; 2 Kei. 6:30) Pieno wacopo gene kan ebeyero nia piwa tek i iye.—1 Yoh. 3:19, 20.

6. Jakwenda Paulo ugam uwinjere nenedi pi dubo pare ma coni?

⁶ I wang’ niponjo lemandha, jumoko m’i kindwa gibed gitimo lembe m’ubedieng’o cwinygi cil kawoni. (1 Pet. 4:3) Kadok Jukristu ma weg bedopwe de gibenyego ku ng’ico migi. Nyo adundeni ubepoko lembe i wii? Tek eyo, icopo nwang’u tielocwiny ning’eyo nia jutic pa Yehova ma weg bedopwe mange de gituc niwinjiri kumeno. Ku lapor, kinde ma jakwenda Paulo uparu pi ng’ico pare, eyero nia can i wiye. (Rum. 7:24) Nwang’u dong’ eloko cwinye i kum dubo pare man elimo batizo. Re asu eyero nia e “nok ma sagu jukwenda ceke” man nia etie jadubo “ma kwong’a.”.—1 Kor. 15:9; 1 Tim. 1:15.

7. Ukwayu wang’ey ang’o i kum dubo mwa ma coni?

⁷ Wegwa m’i polo ung’olo nia ebiweko dubo mwa tek waloko cwinywa i andha. (Zab. 86:5) Pieno tek can ubenegowa pi dubo ma watimo, cwinywa bed tek nia Yehova udaru weko iwa calu m’eng’olo.—Kol. 2:13.

8-9. Wacopo timo ang’o pi nivoyo paru ma nia wacopo nyayu ngo anyong’a i Yehova?

⁸ Wan zoo wabemito watim ni Yehova ku copo mwa ceke. Ento jumoko giparu nia gicopo nyayu ngo anyong’a i iye nyanok de. Ku lapor, nyamego moko ma nyinge Amanda uyero kumae: “Abed ageno nia pi nimiyo gin ceke m’acopo ni Yehova, ukwayu atim lee nisagu; uketho saa zoo abed aii nitimo gin m’ukadhu kero para. Tek ‘evoya,’ acaku paru nia anyong’a ubenego ngo Yehova i kuma tap calu ma an de anyong’a ubenega ngo i kuma gira.”

⁹ Wacopo timo ang’o pi nivoyo paru ma nia ecopere ngo iwa nyanok de ninyayu anyong’a i Yehova? Ku kwong’a, poy nia i lembe pare tek ungo. Ebekwayu ngo nia watim ire gin ma voyowa. Tek wabetimo ire ku copo mwa ceke ci, efoyo kudwa. Nyam bende i lembe iwi lapor mi dhanu ma con ma gitimo ire kud adundegi ceke. Kepar pi jakwenda Paulo. Egam etimo ni Mungu kud amora pi oro ma dupa; ewotho pi kilometre elufu swa, man ecaku the cokiri dupa. Kinde ma lembe ucere nitimo calu ma naka, nyo eno unyutho nia anyong’a ubino nego ngo Yehova i kume? Ungo. Emedere asu nitimo gin m’ecopo, Yehova de umiyo ire mugisa. (Tic. 28:30, 31) Wan de saa moko kadhiri mi tic ma wabetimo ni Yehova romo wilere. Ento poy nia gin ma pire tek i iye utie thelembe ma cwaluwa nitimo ire. Kawoni wakenenu yore moko m’enyutho ko nia anyong’a ubenege i kumwa.

YEHOVA NYUTHO NENEDI NIA ANYONG’A UBENEGE I KUMWA?

10. Wacopo “winjo” dwand Yehova nenedi kinde m’ebeyero iwa nia anyong’a ubenege i kumwa? (Yohana 16:27)

¹⁰ Nikadhu kud i Biblia. Yehova yenyo kaka mi nyutho ni dhanu pare nia emarugi man nia anyong’a ubenege i kumgi. Ku lapor, Lembagora uweco pi kaka ario m’eyero iye ni Yesu nia etie Wode m’emaru man m’anyong’a nege i kume. (Mat. 3:17; 17:5) Nyo in de ibemito iwinj dwande ku ithi m’ebeyero iri nia anyong’a ubenege i kumi? Tin eweco ngo i bang’wa niai kud i polo, ento nikadhu kud i Biblia. Wacopo “winjo” m’ebeyero iwa nia anyong’a nege i kumwa nwang’u wabesomo wec pa Yesu ma nwang’ere i Injili. (Som Yohana 16:27.) Yesu ulubo lapor mi kite pa Won tap tap. Pieno ka wabesomo nia ebeyero ni julub pare ma weg bedopwe ma re gibino ku dubalaga nia anyong’a ubenege i kumgi, wawinj wec maeno ni lembe ma Yehova ubeyero iwa athothi.—Yoh. 15:9, 15.

11. Wang’eyo nenedi nia ka wabekadhu kud i peko, eno nyutho ngo nia anyong’a ubenego ngo Yehova i kumwa? (Yakobo 1:12)

¹¹ Nikadhu kud i gin m’ebetimo. Yehova utie ayika nikonyowa; ku lapor, epong’o yeny mwa mi thenge mi kum. Ento saa moko, eweko wanen can calu Yob. (Yob 1:8-11) Re ka wan’i peko, eno nyutho ngo nia dong’ ebefoyo ngo kudwa; ento peko miyo iwa kaka mi nyutho kadhiri ma wamare ko man ma wagene ko. (Som Yakobo 1:12.) Kan ebekonyowa niciro peko, waneno mer man gwok pare.

12. Lembe m’umego Dmitrii ukadhu kud i iye ubeponjowa ku lembang’o?

¹² Wakewec iwi umego moko mir Azia ma nyinge Dmitrii. Saa ma tic uweke, esayu mange kwe pi dwi ma dupa. E eng’iyo nirweyo pi saa ma lee pi ninyutho nia egeno Yehova. Dwi mange swa ukadhu ma fodi enwang’u ngo tic. I ng’eye twoyo ma pek ugoye man ugonje iwi kavuto. Ecaku paru nia etie ngo won ot man wego ma cuu, man epenjere ka nyo andha anyong’a ubenego Yehova i kume. Uthieno moko, nyaku pare ukiewo wec mi giragora pa Isaya 30:15; verse eno uyero kumae: “Tego mu bibedo nuti ni kum bedoyo man genogen.” Ecidho kude i ng’et kavuto pa won, man eyero ire kumae: “Baba, tek can umondo i ii, poy i kum giragora ma e.” Umego Dmitrii uneno nia ku kony pa Yehova, juode gikoso ngo cam, kendi man kabedo. Eyero kumae: “Abino kende kende ku yeny mi bedo yoo man mi medara nigeno Munguna.” Tek ibekadhu kud i peko ma rom, cwinyi bed tek nia Yehova ubedieng’ piri man nia ebikonyi niciro.

13. Yehova romo tiyo ku jukani pi ninyutho iwa nia anyong’a ubenege i kumwa, man etiyo kugi nenedi?

¹³ Nikadhu kud i bang’ juyic wadwa. Yehova tiyo kud umego ku nyimego mwa pi ninyutho iwa nia anyong’a ubenege i kumwa. Ku lapor, eromo cwalugi niyero iwa wec mi tielocwiny tap i saane. Nyamego moko mir Azia uneno lembuno kinde m’ebino i peko ma lee. Tic uweke, man twoyo ma pek ugoye. I ng’eye won ot pare upodho i dubo ma pek, man ebayu rwom pare mi bedo jadit cokiri. Nyamegwa uyero kumae: “Asayu kwe nia pirang’o lembuno ceke uwok i wiya. Aparu nia nyo utie pilembe atimo racu moko man dong’ Yehova ubefoyo ngo kuda.” Ekwayu Yehova unyuth ire nia anyong’a ubenege i kume. Yehova utimo ang’o? Emedo kumae: “Judong cokiri giweco kuda man gitielo cwinya nia Yehova umara.” I ng’eye ekwayu kony kendo i bang’ Yehova. Emedo kumae: “Cing’ nica anwang’u barua m’uai i bang’ umego ku nyimego mi cokiri para. Kinde m’abesomo wec mi jukocwiny ma gikiewo, anyang’ nia Yehova uwinja.” M’umbe jiji, wang’ ma pol Yehova nyutho iwa nia anyong’a ubenege i kumwa nikadhu kud i wec mi juyic wadwa.—Zab. 10:17.

14. Yehova nyutho iwa nia anyong’a ubenege i kumwa i ayi mange ma kani?

¹⁴ Pi ninyutho nia anyong’a ubenege i kumwa, Yehova tiyo bende ku juyic wadwa pi nimiyo iwa juk i saa ma watie ku yenyne. Ku lapor, i rundi ma kwong’a etiyo ku jakwenda Paulo pi nikiewo barua 14 ku kony mi tipo ma leng’ ni juyic wagi. I baruane ekiewo bende juk ma ngbeng’ i ayi mi mer. Pirang’o Yehova utelo wiye pi nikiewo juk ma kumeno? Yehova tie Wego ma ber, man etwinyo awiya pare “m’emaru.” (Rie. 3:11, 12) Pieno tek wanwang’u juk m’ujengere iwi Biblia, ukwayu wanen nia eno ubenyutho nia anyong’a ubenege i kumwa, ento ungo nia ng’eicwiny re m’ubenege i kumwa. (Ebr. 12:6) Ang’o mange ma nyutho nia anyong’a ubenege i kumwa?

PINY MANGE MA NYUTHO NIA ANYONG’A UBENEGO YEHOVA I KUMWA

15. Yehova miyo tipo pare ma leng’ ni jukani, man eno copo miyo iwa tegocwiny ma kani?

¹⁵ Yehova miyo tipo ma leng’ pare ni ju m’anyong’a ubenege i kumgi. (Mat. 12:18) Wacopo kepenjara kumae: ‘Nyo abed anyutho nying tipo pa Mungu i kwo para de?’ Nyo ibenwang’u nia kawoni ibenyutho cirocir nisagu m’ibed inyutho i wang’ ning’eyo Yehova? Poy nia kan ibemediri nicego nying tipo pa Mungu, e ibineno kamaleng’ nia anyong’a ubenege i kumi.—Nen sanduku ma thiwiye tie, “Nying tipo utie . . .”

16. Yehova tiyo ku jukani pi nirweyo lembanyong’a, man eno uketho ibewinjiri nenedi? (1 Juthesaloniki 2:4)

¹⁶ Yehova umiyo tic mi rweyo lembanyong’a ni ju m’anyong’a nege i kumgi. (Som 1 Juthesaloniki 2:4.) Kenen bero ma nyamego moko ma nyinge Jocelyn unwang’u i lembanyong’a. Ceng’ acel, ecew m’ava lembe mbe i kume. Eyero kumae: “Anwang’ara ve gin m’acopo timo de mbe. Re abino jayab yo, man ebino nindo m’arweyo i iye. Pieno arwo, e acidho i lembanyong’a.” Kugweno nica, nyamego Jocelyn uwok urombo ku dhaku moko ma nyinge Mary m’uyiyo niponjo Biblia. I ng’ey dwi moko, Mary uyero nia saa ma Jocelyn udwong’o dhugola pare, nwang’u ebino rwo pi nikwayu kony i bang’ Mungu. Nyamego Jocelyn uyero pi lembuno kumae: “Udok ubedo ve Yehova ubeyero ira kumae: ‘Anyong’a ubenega i kumi.’” I andha, dhanu zoo ngo re ma bijolo lembanyong’a ma waberweyo igi. Ento cwinywa bed tek nia anyong’a nego Yehova i kumwa tek waberweyo ku kero mwa ceke.

17. Lapor pa Vicky ubemiyo iri ponji ma kani iwi jamgonyi? (Zaburi 5:12)

¹⁷ Yehova tiyo ku jamgony pi bero mi ju m’efoyo kugi. (1 Tim. 2:5, 6) Dong’ wacopo timo ang’o tek wabeparu nia anyong’a nege ngo i kumwa, kadok nwang’u watie ku yiyoyic i jamgony man wadaru limo batizo de? Poy nia wacikara ngo nigeno paru mwa ceke, ento wacikara nigeno Yehova. Eneno dhanu ceke ma gitie ku yiyoyic i jamgony ni weg bedopwe, man eng’olo nia ebimiyo igi mugisa. (Som Zaburi 5:12; Rum. 3:26) Nyamego moko ma nyinge Vicky unyamu i lembe lee iwi jamgony. Tokcenne eyero kumae: “Yehova ucira pi kare m’ulwar. . . . Re udok ubedo ve abeyero ire kumae: ‘Icopo maru ngo ng’atu ma ve an e. Lam pa Wodi de copo ruco ngo dubo para.’” Ninyamu i lembe iwi giramiya mi jamgony uketho ecaku nyang’ nia Yehova umare. Tek wabenyamu i lembe iwi jamgony, wan de wabinyang’ nia Yehova umaruwa man nia anyong’a nege i kumwa.

18. Tek wabemedara nimaru Wegwa m’i polo, cwinywa copo bedo tek iwi lembang’o?

¹⁸ Wacopo ii ku kero mwa zoo pi nitiyo ku lembe ma waneno malu no, re asu saa moko cwinywa romo tur man wapenjara ka nyo andha anyong’a ubenego Yehova i kumwa. Tek ibewinjiri kumeno, poy nia anyong’a nege i kum “dhanu ceke m’ubemediri nimare.” (Yak. 1:12) Pieno mediri nicoro ceng’ini i vute man say gin m’ubenyutho nia anyong’a ubenege i kumi. Kud iwil nyanok de nia “eni bor ungo ku ng’atuman m’i kindwa.”—Tic. 17:27.