THIWIWEC MI 47
WER 38 Yehova bidwoki tek
‘ Itie ng’atu ma pire tek lee’!
“ Itie ng’atu . . . ma pire tek lee.”—DAN. 9:23.
I ADUNDO
I thiwiwec maeni, wabino lembe ma copo konyo ju ma giparu nia tijgi mbe ninyang’ nia pigi tie tek i ii Yehova.
1-2. Ang’o ma copo tego cwinywa nia piwa tie tek i ii Yehova?
KADOK Yehova neno nia jutic pare ceke pigi tie tek lee i iye de, re ju moko m’i kindgi giparu nia pigi tie tek ungo. Saa moko nyo ng’atu moko utimogi rac uketho giparu kumeno. Nyo in de ibenwang’u nia tiji mbe? Ka eyo, ang’o ma copo tego cwinyi nia piri tek lee i ii Yehova?
2 Kpawa mi Biblia copo konyi nineno ayi ma Yehova ubemito dhanu gineniri ko. Yesu ubed umiyo yung man woro ni dhanu. I ayi maeno re m’enyutho nia giku Won gineno ju ma gicayiri ni dhanu ma pigi tek lee. (Yoh. 5:19; Ebr. 1:3) I thiwiwec maeni wabineno: (1) Ayi ma Yesu ukonyo ko dhanu nineno nia pigi tek man (2) gin ma copo tego cwinywa nia piwa tie tek lee i ii Yehova.—Hag. 2:7.
AYI MA YESU UKONYO KO DHANU KARA GING’EY NIA PIGI TEK
3. Yesu utimo ang’o ni Jugalilaya m’ubino sayu kony i bang’e?
3 Kinde ma Yesu ubino rweyo lembanyong’a i Galilaya, udul dhanu ucokiri pi niwinje man kara ekey kumgi. Yesu uneno nia jubino “sendogi man juwenjogi calu rombe ma jakwac migi mbe.” (Mat. 9:36) Judong dini ubed unenogi ni dhanu ma tijgi mbe, man gibed gilwong’ogi nia gitie “dhanu ma julamu.” (Yoh. 7:47-49) Ento Yesu ubed umiyo igi yung man woro nikadhu kud i saa m’ebed ekoyo pi niponjogi man nikeyo kumgi. (Mat. 9:35) M’umedo maeno, kara ekony wend dhanu dupa, eponjo Jukwenda pare ku tic mi rweyo lembanyong’a man emiyo igi copo mi keyo twoyo.—Mat. 10:5-8.
4. Woro ma Yesu unyutho ni dhanu ma jubed jucayu ubemiyo iri ponji ma kani?
4 Woro ma Yesu unyutho ni dhanu ma jubed jucayu ubenyutho kamaleng’ nia pi dhanu maeno ubino tek i igi giku Won. Tek ibetimo ni Yehova, re ibeparu nia tiji mbe, wakweyi ipar pi woro ma Yesu unyutho ni dhanu maeno. Kan itimo kumeno, ibinyang’ nia kara piri tek lee i ii Yehova.
5. Dhaku moko ma Yesu unwang’u i tic mi lembanyong’a i Galilaya ubino ku peko ma kani?
5 Yesu ujik ungo kende kende niponjo udul dhanu, ento ebed edieng’ pi ng’atuman m’i kindgi. Ku lapor, kinde m’ebino rweyo lembanyong’a i Galilaya, enwang’u dhaku moko ma rimo ubino oy i kume ma oro udoko 12. (Mark. 5:25) Nimakere ku Cik pa Musa, dhaku eno utie ng’atu m’ucido, man kadok ng’atu m’umulo kume de bedo m’ecido. Lembuno ubed ucere nidikere ku dhanu mange. M’umedo maeno, ecopo dikere ngo ku dhanu mange i Sinagog man i saa mi timo foc. (Law. 15:19, 25) M’umbe jiji, dhaku eno ubino remo ngo arema kende, ebino winjere bende nia tije mbe.—Mark. 5:26.
6. Dhaku ma rimo ubino oy i kume ukey nenedi?
6 Dhaku maeno m’ubesendere, ubino mito Yesu ukey kume. Ento ecidh ekwaye ngo nia ekey kume. Pirang’o? Saa moko nyo lworo ubino nege pi twoyo pare, kunoke nia Yesu bidhau i wiye pilembe emondo i kind dhanu ma ke ecido. Pieno, emulo kende kende dhu bongu pa Yesu ma cwinye tek nia eno kende ci bikeyo kume. (Mark. 5:27, 28) Yiyoyic pare ubodhe, ekey de andha. Kinde ma Yesu upenjo nia ng’a m’umulo kume; e eyero nia en re m’emulo. Yesu udok utimo ang’o?
7. Yesu utimo ang’o ni dhaku ma rimo ubino oy i kume? (Marko 5:34)
7 Yesu unyutho woro ni dhaku ma rimo ubino oy i kume. Eneno nia “lworo ubenege man kume de ubemiel.” (Mark. 5:33) Kisa unege i kume man ejuko cwinye. Elwong’e bende nia “nyara.” Wec maeno ubenyutho ngo kende kende nia enyutho ire woro, ento bende mer. (Som Marko 5:34.) Yesu ulwong’o dhaku nia “nyara” i giragora maeni kende, saa moko nyo nikum peko pa dhaku maeni kunoke pi kume ‘m’ubemiel.’ Kepar pi jukocwiny ma dhaku eno unwang’u saa maeno! Ka nwang’u Yesu uyero ngo ire wec maeno, nwang’u andha ecidho ma kume ukey, ento nwang’u cwinye cipido nia eturo cik. Tung’ kumaeno, Yesu ukonye nineno nia pire tie tek i ii Won mi polo ma jamer.
8. Nyamego moko mi Brazil unwang’ere ku peko ma kani?
8 Tin bende jutic pa Mungu moko gibenyego ku peko mi remokum m’uketho giwinjiri nia tijgi mbe. Ku lapor, Mariaa ma jayab yo ma nja i ng’om mi Brazil, unyolere ma tiende ario ceke ku cinge ma yor acam umbe. Ekoro kumae: “Jubed junywara i somo nikum goru para. Awiya kalasi wada ucaku nying’ mir anyware i kuma. Kadok jufwa de saa moko ubed unywara.”
9. Ang’o m’ukonyo Maria ninyang’ nia pire tie tek lee i ii Yehova?
9 Ang’o m’ukonyo Maria ninyang’ nia pire tie teki? Kinde m’edoko Jamulembe pa Yehova, umego ku nyimego gibed gijuko cwinye man gikonye kara enenere calu ma Yehova ubenene ko. Ewacu kumae: “Kaka mbe i buku para m’akiew ko nying umego ku nyimego ceke ma gikonya! Abefoyo Yehova kud adundena ceke pi juruot maeni mi tipo m’emiyo ira.” Nikum kony mir umego ku nyimego, Maria unyang’ nia pire tie tek lee i ii Yehova.
10. Maria Magdalene ubino nwang’ere ku peko ma kani? (Nen bende cal.)
10 Ng’atu mange ma Yesu ukonyo athothi utie Maria Magdalene, ma pajogi abiro umondo i iye! (Luka 8:2) Calu m’ebino ku pajogi i iye, copere ebino ku timo ma tung’ m’uketho dhanu ubed ulwore. I kind nindo maeno, ecopo nwang’u nia juwenje, en’i i ariti man m’umbe kony. Kinde ma pajogi uwok kud i iye, ma copere Yesu re m’uwodho, e edoko jalub pa Yesu.
Yesu utego cwiny Maria Magdalene nenedi nia pire tie tek i ii Yehova? (Nen udukuwec mir 10-11)
11. Yesu unyutho nenedi nia pi Maria Magdalene tie tek lee i Mungu? (Nen bende cal.)
11 Yesu ukonyo Maria Magdalene ninyang’ nia pire tie tek i ii Mungu i yo mange bende. Nenedi? Yesu ulwong’e nia elub toke i tic pare mi lembanyong’a.b Lembuno uketho ebed enwang’u kony i kum ponji ma Yesu ubed uponjo ko dhanu. Bende, Yesu unyuthere ire i nindo m’ecer i iye. Maria Magdalene ubino jalub ma kwang’a ma Yesu uweco i bang’e cing’ nica. Yesu umiyo ire bende rwom mi cinyutho ni jukwenda pare nia ecer. Eno tie rwom ma dit mandha m’unyutho nia pi Maria tie tek lee i ii Yehova!—Yoh. 20:11-18.
12. Ang’o m’uketho Lidia ubino winjere nia etie dhanu ma raci?
12 Calu Maria Magdalene, tin de dhanu ma dupa gibewinjiri nia juwenjogi. Nyamego Lidia mi ng’om mir Espagne (Spain) uwacu nia ma fodi en’i ic, min umito ewodh iye cen. Kadok i ng’eye ma dong’ enyolere de, min ubed uwenje man ebed eweco ire ku kwinyo man ku dhoge ma rac. Lidia uwacu kumae: “Lembakeca para ubino nia anwang’ dhanu ma copo mara man ma romo bedo jurimba. Re gin ma mama utimo uketho abayu genogen nia acopo nwang’u ngo dhanu ma kumeno, pilembe atie dhanu ma rac.”
13. Ang’o m’ukonyo Lidia ninyang’ nia karaman pire tie tek i ii Yehova?
13 Lembe udoko ber ni Lidia kinde m’enwang’u lemandha. Ponji pare ma segi, rwo man wec ku timo ma ber mir umego ku nyimego, ukonye ninyang’ nia karaman pire tie tek i ii Yehova. Ewacu kumae: “Won ot para yero wang’ ma pol nia emara. Epoyo wiya thiri thiri i kum kite para ma beco. Jurimba mange de giweko ngo niketho cwinya.” Nyo ng’atu moko nuti i cokiri peri m’ubewinjere calu Lidia, m’umito juketh cwinye nia pire tie tek i ii Yehova? Ka eyo, wec man timo peri ma ber bikonye lee mandha.
NENIRI I AYI MA YEHOVA DE UBENENI KO
14. Giragora pa 1 Samwel 16:7 ubekonyowa nenedi ninyang’ i ayi ma Yehova neno kojo? (Nen bende sanduku ma thiwiye tie “Pi dhanu pa Yehova tie tek i iye.”)
14 Poy nia Yehova ubeneni ngo calu ma dhanu mi ng’om maeni neni ko. (Som 1 Samwel 16:7.) Dhanu mi ng’om maeni gineno nia piri tek nikum leng’o peri, jamcingi kunoke Somo peri. (Isa. 55:8, 9) Pieno, kud ineniri i ayi ma dhanu mi ng’om maeni neno kojo, ento i ayi ma Yehova ubeneni ko en. Icopo somo kpawa mi Biblia m’uweco pi dhanu ma gibed giparu nia pigi tek ungo, calu ve Eliya, Naomi man Ana. Icopo kiewo kadok lembe m’ineno i kwo peri m’unyutho nia andha Yehova umeri man nia piri tek i iye. M’umedo maeno, icopo somo thiwiwec ma tung’ tung’ i girasomac mwa m’unyutho nia piwa tie tek lee i ii Mungu.
15. Pirang’o pi Daniel ubino “tek lee” i ii Yehova? (Daniel 9:23)
15 Ng’ey nia gwoko bedoleng’ peri uketho piri tie tek lee i ii Yehova. Kinde ma jabila Daniel ubino ku oro ma romo kago 100, Biblia uwacu nia ‘eol lee mandha’ man evoc. (Dan. 9:20, 21) Yehova utielo cwinye nenedi? Eoro malaika Gabriel ucidh uyer ire nia “etie ng’atu . . . ma pire tek lee” man nia rwo pare udaru winjere. (Som Daniel 9:23.) Ang’o m’uketho pi Daniel ubino tek lee i ii Mungu? Kud i kind kite ma beco m’uketho pire ubino tek, moko utie bedopwe m’emaru man gwoko bedoleng’ pare. (Eze. 14:14) Yehova ugwoko kpawa mi lembe maeno i Biblia kara ubed iwa ni jukocwiny. (Rum. 15:4) Ng’ey nia Yehova ubewinjo rwo peri bende man piri tek i iye nikum mer peri mi timo bedopwe man gwoko bedoleng’ peri.—Mik. 6:8; Ebr. 6:10.
16. Ang’o ma copo konyi nineno Yehova calu Wego m’umeri?
16 Nen Yehova calu Wego m’umeri. Yehova ubesayu ngo kosa i ii ento ebemito ekonyi. (Zab. 130:3; Mat. 7:11; Luka 12:6, 7) Nyamu i lembe iwi lemandha maeno ukonyo dhanu dupa ma gineniri nia pigi tek ungo. Ku lapor, nyamego Michelle ma kwo i Espagne, ubed uwinjere nia tije mbe nikum wec ma rac ma cware ubed uyero ire. Ewacu kumae: “Kare ceke ma tek abenwang’u nia tija mbe, aneno Yehova ni Wego m’uting’a i kore, m’ubegwoka man m’umara.” (Zab. 28:9) Lauren ma tie nyamego mi ng’om mir Afrika ma yo piny ke uwacu kumae: “Tek Yehova utela i bang’e ku mer, man eketho kindwa udoko ceg’ini kude pi oro ma dupa, man etiyo kuda kadok pi niponjo jumange de, nyutho nia andha ebenena ni ng’atu ma pire tek lee i iye.”—Hos. 11:4.
17. Ang’o ma copo konyi ning’eyo nia anyong’a ubenego Yehova i kumi? (Zaburi 5:12) (Nen bende cal.)
17 Cwinyi bed tek nia anyong’a ubenego Yehova i kumi. (Som Zaburi 5:12.) Daudi uporo bero pa Yehova ku “ban ma lac” ma gwoko dhanu pare. Ka cwinyi tek nia anyong’a ubenego Yehova i kumi man nia ebegwoki, lembene copo gwoki i kum pidoic mi ceyiri giri nia tiji mbe. Dong’ icopo ng’eyo nenedi nia anyong’a ubenego Yehova i kumi? Calu ma waneno, tie nikadhu kud i Biblia ma Lembe pare. M’umedo maeno, ebetiyo bende ku judong cokiri, jurimo, man jumange pi nipoyo wii nia piri tie tek lee i iye. Dong’ icopo timo ang’o pi lembe maeno ceke?
Ning’eyo nia anyong’a ubenego Yehova i kumwa, copo konyowa niwodho paru mi cayiri gijo cen kud i iwa (Nen udukuwec mir 17)
18. Pirang’o mito ngo ibed ikwer wec mi foyofoc ma jumange ubeyero iri?
18 Kud ibed ikwer wec mi foyofoc ma dhanu m’umeri gibeyero iri. Ng’ey nia Yehova copo tiyo kugi pi niketho ing’ey nia anyong’a ubenege i kumi. Nyamego Michelle ma waweco pire uyero kumae: “Nok nok acaku ponjo niyiyo wec ma beco ma jumange ubeyero ira. Etie lembe ma tek, re ang’ayo nia etie gin ma Yehova ubemito atim.” Michelle unwang’u bero i kum kero ma judong cokiri utimo pi nikonye. Kawoni etie jayab yo ma nja man ebekonyo tic mi Bethel ku bor.
19. Pirang’o cwinywa tek nia piwa tie tek i ii Yehova?
19 Yesu ubepoyo wiwa nia piwa tie tek lee i Wegwa mi polo. (Luka 12:24) Pieno, cwinywa ubed tek nia piwa tie tek i ii Yehova. Kud wawil ki ku lembuno! Dong’ watimu kero mwa ceke wakony jumange de ging’ey nia pigi tie tek lee i ii Yehova!
WER 139 Kepar kite m’ibikwo ko i ng’om ma nyen
a Juloko nyig’ moko.
b Ubenen nia Maria Magdalene ubino acel m’i kind mon m’ubed uwotho ku Yesu. Mon maeno gitiyo ku jamcing’gi pi nipong’o yeny pa Yesu ku jukwenda pare.—Mat. 27:55, 56; Luka 8:1-3.
c Ku lapor, nen buku Approchez- vous de Jéhovah wicne mi 24 man som giragora ma tung’ tung’ ma junyutho. Som bende kpawa mi Biblia i the thiwiwec “Jiji” i buku Lembagora pi Kwo mi Jukristu.