PONJI MIR 11
Gin m’iromo timo kara inwang’ kony lee niai i Biblia
Nyo nindo moko idaru mito de nia icak the tic moko ma lee, re ilund inwang’u nia tije romo bedo pek akeca? Kara tije udok yot, cicopere nia ipoko iye poto poto man iwotho cidho kude nok nok. Somo Biblia de nen ni lembe ma lee man ma pek kumeno. Saa moko nyo ibepenjiri nia, ‘abicaku somne kani?’ I ponji maeni, wabineno lembe moko ma yot m’iromo timo kara somo man ponjo Biblia udok ni gin ma nyeng’i.
1. Pirang’o wacikara nisomo Biblia kubang’ nindo?
Ka wabed wasomo Biblia kunoke “cik pa Yehova” kubang’ ceng’, eno ketho wabedo kud anyong’a man lembe wotho miero iwa. (Som Zaburi 1:1-3.) I acaki, kepim nibesomo Lembe pa Mungu kadok pi dakika ma nok kende ci, re kubang’ ceng’. E nok nok ibing’iyo man ibicaku maru somne lee.
2. Icopo timo ang’o kara inwang’ kony lee niai i som mi Biblia?
Kara wanwang’ kony lee niai i som mwa mi Biblia, kwayu wawoth cungo man wanyam kunoke wapar i lembe ma wabesomo. Wacikara nisomo asoma kende ngo, ento bende ‘wapid’ niwacu wanyam iye. (Yocuwa 1:8) Kinde m’ibesomo, woth penjiri kumae: ‘Gin m’abesomo eni ubeponja ku lembang’o iwi Yehova Mungu? Acopo tiyo kude nenedi i kwo para? Acopo tiyo ku verse maeni nenedi pi nikonyo dhanu mange?’
3. Icopo besomo Biblia saa ma kani?
Nyo ibecuku nwang’u ngo saa m’isom ko Biblia? Lembuno ubetimo dhanu ma pol m’i kindwa. Dong’ tim kero ‘nitiyo ma ber mandha ku saa peri.’ (Juefeso 5:16) Pieno, icopo koyo saa moko athothi kubang’ ceng’ ubed ni saa mi somo Biblia. Jumoko gisomo Biblia con kugweno. Jumange gibed ginwang’u saa mi some dieceng’ i saa mi yom. Jumange ke gisomo Biblia nja uthieno i wang’ nivuto. Saa ma kani m’inwang’u nia romo bedo ber iri?
MED NYANG’ PERI
Wanen kawoni gin m’iromo timo kara somo Biblia ubed unyeng’i. Wanen bende kite m’iromo yikiri ko cuu kara inwang’ kony lee i kum ponjo Biblia.
Wacopo ponjo nimaru somo Biblia tap calu ma wacopo ponjo ko nok nok nicamu kit cam ma wang’iyo ko ngo
4. Ponj niketho som mi Biblia udok ni gin ma nyeng’i
Ecopo bedo yot ungo nicaku somo Biblia. Ento icopo ponjo niketho som mi Biblia udok ni gin ma nyeng’i, tap calu m’iromo ponjo bende nicamu cam ma fodi nwang’u icamu ngo i wang’e. Som 1 Pethro 2:2, man i ng’eye wuwec iwi penji m’ulubo e:
Kan icaku besomo Biblia kubang’ ceng’, iparu nia somne copo caku nyeng’i man ava mi some copo benegi? Kekor.
Nen VIDEO pi ning’eyo gin m’ukonyo aradu moko kara gicak maru nisomo Biblia. I ng’eye, wuwec iwi penji m’ulubo e:
Aradu ma waneno i video maeni ginyego ku peko ma kani?
Lembang’o m’ukonyogi kara gimediri asu ku lembakeca migi mi somo Biblia kubang’ ceng’?
Gitimo ang’o kara gimar somo Biblia?
Lembe ma romo konyi kara icaki ma ber:
Ng’ii Biblia ma juloko tap tap man ma jutiyo ku wec ma yot i iye. Kepim nitiyo ku Lok mi ng’om ma nyen tekene etie i dhok peri kunoke i dhok mange m’ing’eyo ma ber.
Cak somo thenge m’ineno nia romo nyeng’i akeca. Pi nikonyi, iromo neno thiwiwec “Pi nicaku somo Biblia.”
Bed ikiew pi thenge m’idaru somo. Tii ku thiwiwec “Lub kaka m’iwok i iye ku som mi Biblia” ma nwang’ere i buku maeni.
Tii ku program mi JW Library®. Eromo konyi ku kaka moko ci m’ibenweng’iri i iye nisomo Biblia man niwinjo somne ma judaru maku i dhok dupa, m’ibetiyo ke ku telefon kunoke ku jamticne mange.
Tii ku Thenge ma jumedo i Biblia Lok mi ng’om ma nyen. Thenge maeno tie ku kart ma tung’ tung’, cal m’akuba, man thelembe mi wec ma copo konyi kara isom Biblia i ayi ma romo nyeng’i lee.
5. Lar iyikiri pi ponjiman mi Biblia ma wubitimo ku japonjo peri
Som Zaburi 119:34, man i ng’eye wuwec iwi penji m’ulubo e:
Pirang’o etie ber nilar rwo i wang’ somo Biblia kunoke i wang’ yiko ponji mi Biblia ma wubitimo ku japonjo peri?
Iromo timo ang’o kara inwang’ bero lee niai i ponji mi Biblia mi nindoman? Kan ibeyikiri pi ponjiman mi buku maeni, kepim nibetimo kumae:
Som udukuwec ceke m’i wang’ nyathi thiwiwec m’uyero “Med nyang’ peri.”
Yeny man som verse ceke ma jukiewo i ng’etgi nia “som,” man tim kero inen ka versene urombo nenedi ku lembe ma jubeweco i wiye.
Riedi the wec kunoke leni ma pigi tek m’udwoko wang’ penjiman kunoke keth rangi i wigi; eno bikonyi kara wuwok wuyar i ponjiman ma ber karacelo ku japonjo peri.
Nyo ing’eyo?
Wa Jumulembe pa Yehova wadaru tiyo ku lok ma tung’ tung’ mi Biblia. Ento, wamaru asagane Biblia—Lok mi ng’om ma nyen pilembe juloke tap tap, wec mi iye de tie terere, man nying’ Mungu tie i iye.—Nen i jw.org thiwiwec m’uyero “Nyo Jumulembe pa Yehova gitie ku Biblia ma migi gigi?”
DHANU MOKO BEYERO KUMAE: “Somo man ponjo Biblia tie tek dit. An ambe ku saa.”
In ke iparu nenedi?
I ADUNDO
Kara inwang’ kony lee niai i Biblia, koy saa m’ibed isome ko kubang’ ceng’, lar irwo pi ninyang’ i gin m’ibesomo, man lar iyikiri pi ponjiman ma wubitimo karacelo ku japonjo peri.
Penji mi poyowic
Ang’o ma bikonyi kara inwang’ kony lee niai i Biblia?
Icopo koyo saa ma kani pi nibesomo Biblia man niponje in giri?
Pirang’o etie ber nia ilar iyikiri i wang’ ponjiman ma wubitimo karacelo ku japonjo peri?
TIM SAYUSAC
Kenen paru moko ma copo konyi kara inwang’ kony lee niai i som mi Biblia.
“Pi ninwang’u kony lee niai i som mi Biblia” (Otkur ma Wiw Na. 1, 2017)
Nen ayi adek m’icopo somo ko Biblia.
“Biblia copo konya nenedi?—Thenge mi 1: Yar i Biblia peri” (Thiwiwec mi jw.org)
Nen gin ma copo konyi kara imar somo Biblia.
“Biblia copo konya nenedi?—Thenge mir 2: Som Biblia i ayi ma romo nyeng’i” (Thiwiwec mi jw.org)
Kelub gin m’ubekonyo dhanu moko ma gidaru ng’iyo ku somo Biblia kara gimediri nimaru somne.