PONJI MIR 10
Bero m’icopo nwang’u i coko mi Jumulembe pa Yehova
Nyo judaru lwong’i de nindo moko nia icidh i coko mi Jumulembe pa Yehova? Ka fodi icidho ngo i coko migi, cicopere nia lworo cidho wang’ ma kwong’a ubenegi nyanok. Saa moko nyo ibepenjiri kumae: ‘Cokone bekadhu nenedi? Pirang’o pire tie tek nicidho i cokone? Pirang’o ubekwayu an de acidh i iye?’ I ponji maeni wabineno nia, nicokiri karacelo ku jumange copo konyowa kara kindwa udok ceng’ini mandha ku Mungu. Wabineno bende bero ma cokone copo miyo i kwo mwa giwa.
1. Pirang’o wa Jumulembe pa Yehova wabed wacokara karacelo?
Jagor Biblia moko unyutho thelembe ma pire tek akeca mi cokiri karacelo ku jumange. Eyero kumae: ‘Abipaku [Yehova] i kind cokiri.’ (Zaburi 22:22) Calu m’i rundi ma con, tin bende Jumulembe pa Yehova ginwang’u anyong’a lee dit ka gibecokiri karacelo. I wang’ ng’om zoo, gibed gicokiri kubang’ yenga pi nipaku Yehova, niwer ire, man nirwo i bang’e karacelo. Kubang’ oro, gibed gitimo bende coko moko ma dongo pi niworo Mungu karacelo.
2. Ibiwoponjo lembang’o i coko mwa?
I coko mwa, wabed waponjo Lembe pa Mungu; jusome man jukoro iwa iye cuu mandha. (Som Nehemia 8:8.) Kan ibino, ibiwoponjo lembe dupa iwi Yehova man iwi kite pare ma beco. Ibicaku nyang’ nia emeri lee man eno bicweli kara idok jarimbe ma ceng’ini. Ibiponjo bende ayi ma Mungu copo konyi ko kara ibed ku kwo ma cuu man mir anyong’a.—Isaya 48:17, 18.
3. Bero m’iromo nwang’u kan ibedikiri kud umego ku nyimego mange i coko mwa
Yehova ubekwayu nia “iwa pid piwa ng’atuman pi wadi man pi wadi kara wacwalara i mer man i tic ma beco, man kud wawek nicokara karacelo.” (Juebrania 10:24, 25) I coko mwa, ibiwonwang’u dhanu ma gidieng’ cuu mandha ng’atuman pi wadi man pi wadi. Bende, calu in, dhanu maeno ceke gimaru niponjo lembe lee iwi Mungu. Ibiwinjo gibekoro paru ma beco man ma tielo cwinyjo niai kud i Biblia. (Som Jurumi 1:11, 12.) Wubiwong’eyuru bende ku dhanu mange dupa ma gitie kud anyong’a kadok gibenwang’iri bende ku peko i kwo migi. Eno tie kende kende thelembe moko ma nyanok m’uketho Yehova ubemito nia wabed wacokara nja!
MED NYANG’ PERI
Wakenen nia coko mi Jumulembe pa Yehova bekadhu nenedi man nia pirang’o pire tie tek nibecokiri i igi.
4. Coko mi Jumulembe pa Yehova
I rundi mi jukwenda, Jukristu gibed gicokiri karacelo pi nitimo thier ni Yehova, niwacu niwore. (Jurumi 16:3-5) Som Jukolosai 3:16, man i ng’eye wuwec iwi penji m’ulubo e:
Jukristu mi rundi mi jukwenda gibed giworo Yehova nenedi?
Tin bende, Jumulembe gibed gicokiri kubang’ yenga i Ot Ker migi. Pi ning’eyo kite ma coko migi bekadhu ko, nen VIDEO. I ng’eye, nen cal mi coko ma jukubo man wuwec iwi penji m’ulubo e.
Lembang’o ma betimere i Ot Ker mwa m’ineno urombo ku m’ilar isomo i Jukolosai 3:16?
Nyo lembe moko mange nuti m’unyeng’i i video kunoke i cal m’iai ineno?
Som 2 Jukorintho 9:7, man i ng’eye wuwec iwi penji m’ulubo e:
Pirang’o Jumulembe pa Yehova gibed gikwayu ngo sente i coko migi?
Karacelo ku japonjo peri, wunen lembe ma jubiponjo i coko acel mi yenga maeni.
Theng cokone ma kani dhe m’uyenyo telo nen peri man m’ineno nia romo konyi?
Nyo ing’eyo?
I jw.org, ibinwang’u kaka man saa ma coko mwa betimere i iye i ng’om zoo.
Program mi coko mwa bebedo i iye ku korolembe, lanyuth iwi kite mi rweyo lembanyong’a, man video ma tung’ tung’. Cokone becaku man ethum ku wer man rwo
I theng cokone moko, jukwayu bende juwinj giweci pi nidwoko wang’ penji
Dhanu ceke tie ajola i coko mwa, nik’ebed jumaco, jumamon, juruot, judongo, man awiya
Cokone tie mi mananu. Jumulembe pa Yehova gikwayu ngo sente man giketho ngo nia jubol thier i coko migi
5. Ubekwayu nitimo kero moko kokoro pi nicidho i coko
Wakenen lapor mi juruot pagi Yesu. Pi nicidho i Yeruzalem i coko ma jubed jutimo kubang’ oro, ubed ukwayu giai i Nazarethi man gitim kilometre dak acel (100) kumeni, ke i ng’om mi gudi man pi nindo ma romo adek. Som Luka 2:39-42, man i ng’eye wuwec iwi penji m’ulubo e:
Nyo woth mi cidho i Yeruzalem ubed ukwayu miyiri moko de? Kekor.
Pirang’o etie lembe ma romo kwayu miyiri kara ituc nicidho i coko?
Iparu nia pire tie tek nitimo kero maeno? Pirang’o idwoko kumeno?
Biblia uyero nia pire tie tek lee mandha nibecokiri pi nitimo thier ni Mungu mwa karacelo. Som Juebrania 10:24, 25, man i ng’eye wuwec iwi penji m’ulubo e:
Pirang’o wacikara nicidho i coko mwa nja kubang’ nindone?
DHANU MOKO BEYERO KUMAE: “Pire tek ungo nicicokiri ku jumange. Kan ibesomo Biblia i pacu ci, eno romo.”
Giragora kunoke lapor ma kani mi Biblia m’ubenyutho nia Yehova ubemito wabed wacokara karacelo?
I ADUNDO
Nicidho i coko mwa bikonyi kara iponj lembe lee iwi Yehova, ibed jarimbe ma ceng’ini, man iwore karacelo ku jumange.
Penji mi poyowic
Pirang’o Yehova ubekwayu nia wabed wacokara karacelo?
Ibiwoponjo lembang’o i coko mi Jumulembe pa Yehova?
Nicidho i coko mwa copo konyi bende i lembe mange ma kani?
TIM SAYUSAC
Ka nyo lworo ubenegi nicidho i coko ke? Jalwo moko ubino bende ku nyathi lworo moko. Kenen gin m’ukonye kara edok emar coko.
Nen gin m’ukonyo jalawobi moko nimaru coko man gin m’etimo kara kud ebed ekos coko moko.
Nen bero ma jumange ukoro nia ginwang’u i kum cidho i coko.
“Pirang’o ukwayu nicidho i coko i Ot Ker?” (Thiwiwec mi jw.org)
Nen kite ma kwo pa jalwo moko m’ubino jarop ma lee ugam ulokere ko i ng’ei m’ecidho i coko mi Jumulembe pa Yehova.
“M’umbe atum para ci, kaka m’acidho i iye ubino mbe” (Otkur ma Wiw, nindo 1, dwi mir 7, 2014)