Jalawobi moko ubeneno dhanu m’ubecidho i Ot Ker

PENJI M’ARADU GIPENJIRI KO

Pirang’o ukwayu nicidho i coko i Ot Ker?

Wang’ ario kubang’ yenga, Jumulembe pa Yehova gibed gicokiri i kabedo ma tung’ tung’ ma giworo iye Mungu, ma julwong’o Udi Ker. Lembang’o ma bekadhu i coko mwa man iromo nwang’u bero ma kani kan icidho kuca?

Lembang’o ma bekadhu i Ot Ker?

Ot Ker utie kaka ma waworo i iye Mungu man ma waponjo i iye nitiyo ku cik mi Biblia i kwo mwa. Coko ma jutimo kuca copo konyi kara:

iponj lemandha iwi Mungu.
inyang’ i lembe m’ubetimere kawoni.
idok dhanu ma ber mandha.
inwang’ jurimo ma beco.

Nyo ing’eyo? Jumulembe pa Yehova gilwong’o kaka ma gitimo i iye coko nia Ot Ker, pilembe kuca giweco akecane iwi Ker pa Mungu.—Matayo 6:9, 10; 24:14; Luka 4:43.

Pirang’o icikiri nicidho i coko?

Lembe m’ibiwinjo kuca bikonyi. Cik mir ukungu mi Biblia ma jung’iyo igi i coko mi Jumulembe pa Yehova bikonyi kara ‘inwang’ rieko.’ (Lembrieko 4:5) Eno unyutho nia Biblia copo konyi kara imak yub ma beco i kwo peri. Eromo konyi bende ninwang’u wang’ penji ma dongo mi kwo, calu ve:

Lembe m’ulubo e utie kende kende thiwi korolembe moko i kind korolembe ma jubed jumiyo i coko mwa mi thum pa yenga:

Pirang’o wacikara niweko Biblia re m’utel wiwa?
Icopo nwang’u kony kani i saa mir ang’abacwiny?
Ker pa Mungu ubetimo iwa lembang’o tin?

“Nyathin moko ma wasomo kugi ubino i coko mwa acel. Wawok wabedo kugi karacelo ku jufwa, man walubo kugi coko karacelo i girasoma mwa. I ng’ei coko, ewacu ira nia iye uwang’ lii pi dwokowang’ penji ma beco ma dhanu miyo i cokone. Ewacu ira bende nia i kanisa migi, gimbe ku jamtic mi ponjo piny calu wan.”—Brenda.

Nyo ing’eyo? Jumondo m’umbe cul i Ot Ker, man jukwayu ngo sadaka de i bang’ ng’atu moko.

Nidikiri karacelo ku jumange bitielo cwinyi. Biblia uwacu nia thelembe acel m’uketho Jukristu gicikiri nicokiri karacelo utie kara ‘gijukiri i kindgi.’ (Juebrania 10:24, 25) Nidikri karacelo ku dhanu ma gidieng’ akeca pi Mungu man pi juwadi nisagu pigi gigi, utie lembe ma kwiyo cwinyjo nisagu i ng’om maeni ma dhanu m’i iye gidieng’ kwa pigi gigi.

“I ng’ei m’asendara duu lekeleke, anwang’u nia atie ma rac man aol, ento saa ceke dhanu m’anwang’u i Ot Ker giketho adok awinjara kendo ma ber. I ng’ei coko kinde m’abedok i pacu, anwang’u nia atie ku mutoro man kero udwogo i kuma pi niii ku lembe mi nindo m’ulubo.”—Elisa.

Nyo ing’eyo? I ng’om zoo, junwang’u cokiri mi Jumulembe pa Yehova ma kadhu 120 000, man gicokiri i udi ma tung’ tung’ ma kadhu 60 000 ma giworo iye Mungu. Kubang’ oro, jucuku begiero Udi Ker ma romo 1 500 pi nipong’o yeny mi wend dhanu m’ubemedere ameda.a

Paru mir aradu wedu

“Kinde m’abino i somo ma malu, wabed wacidho i coko mwa moko ku nyaku wada ma wasomo kugi, man iye uwang’ lii kinde m’eneno dhanu mi oro ma tung’ tung’ gibeponjo Biblia karacelo. Nindo m’ukadhu ceng’ini eni, jadit tic para ubino i coko man iye uwok uwang’ lii kinde m’eneno nia saa ceke wabetiyo ku Biblia. Saa m’aneno kite m’efoyo ko coko, lembuno umedo foyofoc para an gira de!”—Jessica.

“Abed anwang’u nia kinde m’ani coko, wiya wil i kum adieng’acwiny para ma kubang’ ceng’. Kuca, waponjo kite ma wacopo kwo ko ma ber, kite ma wacopo bedo ko dhanu ma beco man lembe mange de dupa. Saa ceke awok kud i Ot Ker nang’ anwang’u tielocwiny man nwang’u kero udwogo i kuma.”—Timothy.

“Ng’atu moko m’agam alwong’o i coko mwa uyero kumae i ng’ei cokone: ‘Abino kende kende kara adok atal dhogwu nia wuyiyo lemandha ngo. Ento adog anwang’u nia kara an re m’ayiyo vupo!’ Bende iye uwok uwang’ lii pi jol ma Jumulembe pa Yehova gijole ko. Eyero kumae: ‘Kadok nwang’u ebino wang’ ma kwong’a ma warombo kudwu de, re wujola udog ubedo ve wang’eyara niai con!’”—Jacob.

“Saa moko abed aparu kumae, ‘kinde ma coko thum tap ci, abiwok wang’ acel.’ Ento kinde ma coko ubekadhu, paru maeno gam rwinyo cen. I ng’ei coko acaku weco i bang’ dhanu man apoi de ngo nia pirang’o alar aparu lembe maeno. Ka nwang’u i coko ngo, nang’u acinwang’u ngo jurimo ma beco m’atie ko kawoni.”—Madison.

a Pi ninwang’u kaka ma jutimo iye coko, mond i the thiwiwec “Coko mi Jumulembe pa Yehova” man dii wi “Sai kabedo ma ceng’ini kudi.”