Penji Mi Jusom
I ng’ey nyoliri pa Yesu, pirang’o Yosefu giku Maria gibedo asu i Bethlehem kakare nidok i pacu migi i Nazarethi?
Biblia ukoro ngo thelembene. Ento ekoro lembe moko ma ber ma saa moko nyo uketho gidok ungo i Nazarethi pi saa maeca.
Malaika ular uwacu ni Maria nia ebinwang’u iye man ebinyolo nyathin. Kinde ma malaika ubino yero lembuno, nwang’u Maria giku Yosefu gibino kwo i Nazarethi, i Galilaya ma tie adhura pagi Yosefu. (Luka 1:26-31; 2:4) I ng’eye, kinde ma gidwogo kud i Misiri, gidok wang’ acel i Nazarethi, kaka ma Yesu udongo i iye uketho julwong’e nia Janazarethi. (Mat. 2:19-23) Pieno, ka wabeweco iwi Yesu, Yosefu man Maria, wapoy wang’ acel i kum pacu mi Nazarethi.
Wat pa Maria moko ubino nuti ma nyinge Elisabeti, m’ubino kwo i Yuda. Ebino dhaku pa Zekaria ma jalam, man en re m’ebino min Yohana ma Jababutisi. (Luka 1:5, 9, 13, 36) Maria ucidh uliewo Elisabeti i Yuda man gibedo kude kuca pi dwi adek. I ng’eye ke Maria ulokere udok i Nazarethi. (Luka 1:39, 40, 56) Eno re m’uketho Maria ung’eyo ng’om mi Yuda.
I ng’eye, Yosefu uai kud i Nazarethi ecidho i Bethlehem pi ‘nicikiewiri ng’atuman i adhura ma thugi ma dhe.’ Nimakere ku lembila, Bethlehem ubino bende adhura ma Masiya ucikere ninyolere i iye. (Luka 2:3, 4; 1 Sam. 17:15; 20:6; Mik. 5:2) I ng’eye, kinde ma Maria unyolo Yesu kuca, Yosefu umito ngo giting’ woth ma bor ku nyathin ma mukere pi nidok i Nazarethi. Ento gidong’ i Bethlehem, ma tie kago kilometre abung’wen ku Yeruzalem. Calu ma gin’i ceng’ini ku Yeruzalem, ebibedo igi yot nitero nyathin migi i hekalu man nithiero lam m’ukwayere.—Law. 12:2, 6-8; Luka 2:22-24.
Malaika pa Mungu ular uyero ni Maria nia wode bilagu “komker pa Daudi” man “ebibimo” i wiye. Nyo Yosefu giku Maria giparu nia ninyolo Yesu i adhura pa Daudi utie ku thelembe moko? (Luka 1:32, 33; 2:11, 17) Saa moko nyo giparu nia etie ber nibedo asu kuca pi nikuro telowic ma Mungu bimiyo igi.
Wang’eyo ngo nia gibedo i Bethlehem pi nindo ma rukani nitundo ma jururieko moko ubin uliewogi. Saa maeno nang’u gibekwo i ot migi, man wodgi utie ngo mukere, ento “nyathin.” (Mat. 2:11) Ubenen nia kakare nidok ku ng’eygi i Nazarethi, gibedo asu pi nindo m’ulwar i Bethlehem uketho edoko igi ve pacu migi.
Herode ung’olo nia “juneg awiya ceke ma co mi Bethlehem . . . niai oro ario nidok piny.” (Mat. 2:16) Saa ma Mungu upoyo Yosefu giku Maria pi lembuno, giringo ku Yesu i Misiri man gibedo kuca nitundo ma Herode utho ko. I ng’eye, Yosefu udok ku juruot pare i Nazarethi. Pirang’o gidok ungo i Bethlehemi? Pilembe gibino lworo Arkelao ma wod Herode ubimo mi Yudea, m’ubino ng’atu ma kwiny man gibino woro poyowic pa Mungu. Bende, i Nazarethi re ma Yosefu romo tungo Yesu ma ber pi niworo Mungu.—Mat. 2:19-22; 13:55; Luka 2:39, 52.
Copere nia Yosefu ular utho ma fodi Yesu uyabu ngo yo pi kwo m’i polo. Pieno, Yosefu bicer pi nikwo iwi ng’om. Ju dupa birombo kude, man ebikoro igi thelembe m’uketho giku Maria gigam gidong’ asu i Bethlehem i ng’ey nyol pa Yesu.