Nyo ibepoy?
Nyo isomo cuu thiwiwec ma tung’ tung’ m’ubed uwok i Otkur ma Wiw mi oro maeni? Ka eyo, kenen nyo icopo dwoko wang’ penji m’ulubo e:
Yehova umiyo lapor ma ber ma kani iwi kite mi tiyo ku jumamon?
Etiyo kugi m’umbe akoyakoya; eneno ngo nia jumaco gisagu jumamon. Mungu winjo jumamon; edieng’ i kum kite ma gibewinjiri ko man i kum peko migi. Man etie ku genogen i wigi nia gitimo tic pare cuu.—w24.01, mba. 15-16.
Wacopo tiyo nenedi ku giragora mi Juefeso 5:7 m’uwacu: “Kud wudikuru kugi”?
Jakwenda Paulo ubino cimo wang’wa nia kud wabed jurimb dhanu ma giromo ketho ebedo iwa tek niworo cik mir ukungu pa Yehova. Jurimo ma kumeno ma wambe ku yeny migi, udiko dhanu ma wanen kugi wang’ ku wang’ man bende ju ma waweco kugi i kusika mir Internet.—w24.03, mba. 22-23.
Ukwayu wagwokara i kum kit lembatada mi vupo ma nenedi?
Ukwayu wabed ku wang’wa i kum lembatada m’uai i bang’ jurimbwa mandha ma gibemewo lembe ma ginyang’ ungo i iye, i kum mesaj mir Internet m’utundo rek m’uai i bang’ dhanu ma wang’eyo ngo, man m’uai i bang’ jujai m’uyenyo nen nia lemandha unyang’ugi.—w24.04, mba. 12.
Lembang’o ma wang’eyo man ma wang’eyo ngo iwi kite ma Yehova bipoko ko lembe p’ubimo Suleman ku mi jumange ma githo i Sodoma ku Gomora man ku pii ma dit m’uumo ng’om zoo?
Wang’eyo ngo ka nyo Yehova ukelo nyoth ma rondo ku rondo i wigi. Ento wang’eyo nia eng’eyo lembe ceke m’ugwaku kumgi man nia etie won kisa ma lee.—w24.05, mba. 3-4.
Calu Mungu tie “Cana,” eno ubetego cwinywa i kum lembang’o? (Poy. 32:4)
Wacopo sayu kapondo i bang’ Yehova. Etie Ng’atu ma jugeno; saa ceke epong’o lembang’ola pare. Man ebedo nging’ nging’, niwacu ewilo ngo kite pare man lembakeca pare.—w24.06, mba. 26-28.
Ang’o ma copo konyi ning’iyo i cokiri ma nyen?
Jengiri iwi Yehova, kum ebikonyi tap calu m’ekonyo ko jutic pare ma con. Kud ipor cokiri peri ma nyen ku ma con. Miyiri zoo i tic mi cokiri peri ma nyen, man tim kero isay jurimo ma nyen.—w24.07, mba. 26-28.
Lapor adek ma nwang’iri i Matayo thek 25 ubeponjowa ku lembang’o?
Lapor mi rombe ku diegi ubenyutho nia pire tie tek nigwoko bedoleng’ ni Yehova. Lapor mi jumanyir ma sumba ma riek ku ma jukusegu ubeketho nwoc nia wabed ayika man ma wabekiyo. Man lapor mi talanto uweco iwi timo tic ku kero man kud amora.—w24.09, mba. 20-24.
Dongo pa pond hekalu pa Suleman ubino rukani?
I 2 Lemkei 3:4, gor moko ma con uweco pi “bot dak pier ario,” pi ninyutho nia dongo pa pond hekalu ubino metre 53. Ento gor mange ma juworo lee uweco pi “bot pier ario,” pi ninyutho nia dongo pare ubino metre abung’wen. Kwan ma tokcen e ubeyenyo rombo ku diny mi wang’ kor ot mir hekalu.—w24.10, mba. 31.
Ka Biblia uyero nia jakony tic ucikere nibedo “cwar dhaku acel,” eno ubenyutho ang’o? (1 Tim. 3:12)
Eno ubenyutho nia egamu dhaku acel kende man ecikere ngo nitimo lemsasa mi tarwang’. Bende, ecikere ngo ninyekini nyanok de i kum dhaku mange.—w24.11, mba. 19.
Pirang’o wabeyero nia Yohana 6:53 uweco ngo pi lembe ma timere i saa mi Cemo mir uthieno pa Rwoth?
Yohana 6:53 unyutho nia pire tie tek nicamu ring’kum Yesu man nimadhu rimbe. Yesu uyero wec maeno i Galilaya i oro 32 N.N.Y. ni Juyahudi ma gibino asu ku yeny mi bedo ku yiyoyic i iye. Ento ecaku the Cemo mir uthieno pa Rwoth oro acel i ng’eye i Yeruzalem. I saa maeca Yesu uweco i bang’ ju ma gibibimo kude i polo.—w24.12, mba. 10-11.