Kony ni mon ma jubesendo
“ JUBESENDO mon ku jumanyir milioni dupa i wang’ ng’om. Nyo in de itie acel m’i kindgi? Ka eyo, nwang’ thelembe m’uketho Mungu ubedieng’ pi bedomoth peri man gin m’epangu nitimo i nindo m’ubino pi mon ma jubesendogi.”
Thiwiwec “La sécurité des femmes : Ce qu’en dit la Bible” m’uwok i jw.org ucaku ku wec maeno. Piny i thum mi thiwiwecne, junwang’u kaka ma jucopo toko ko PDF mi girasomane, ma jucopo dok wodhe iwi karatasi man jubane edoko ni trakt mi mbaya ang’wen. Nyamego Stacy ma kwo i Amerika uyero kumae: “Awodho girasomane iwi karatasi, man ku nyamego moko waterogi ni mon ma jubesendogi i kaka ma jugwokogi i iye i teritwar mi cokiri mwa.”
Dhaku ma timo tic i kabedone ukwayu nia jumed wend traktne mange kara jumii ni mon mange ma kwo i kabedone. E nyimego mwa ario gidok gipoko trakt mange ma kadhu 40 karacelo ku kart 30 ma terojo i jw.org. Kinde ma gidok i liew, dhaku ma neno wi kabedone ukwayu nia junyuth ayi ma juponjo ko Biblia ni mon ma bedo keca.
Nyamego Stacy ku nyimego mange ario ginwang’u adwogi ma rom i kabedo mange kaka ma jupoko traktne abic i iye, man jukwayu mange de dupa. Dhaku acel ma timo tic keca uwacu kumae: “Watie ku yeny mi girasoma maeni; gibikonyo mon ma bedo keni.” Nindo mange kinde ma gidok kendo, jumamon dupa ucokiri pi nineno kite ma ponji mi Biblia kadhu ko, man mon ario m’i kindgi uyero nia gibicidho i coko mi thum mi yenga maeca.
Stacy uwacu kumae: “Ayi ma jujolo ko girasoma maeni uwang’u iwa lii. Tek juwodhe iwi karatasi man jubane, ebedo yo ma ber mandha mi twong’o rwonglembe mi Ker ni mon ma jubesendogi. Ayi ma jujolo ko lembene umulo adundewa lee. Watie bende kud anyong’a nineno ayi ma Yehova bipoko ko mugisa iwi kero ma wabetimo kara mon mange dupa de giwinj lembanyong’a.”