በአገልግሎት ረገድ ክህሎታችንን ማዳበር—ውይይት የሚያስቆሙ ሐሳቦች ሲሰነዘሩ መልስ መስጠት

አስፈላጊ የሆነው ለምንድን ነው? አንድ የተፈጥሮ አደጋ በአካባቢህ ሊደርስ እንደሆነ አወቅህ እንበል። ሰዎች ከዚያ አካባቢ ሸሽተው ካላመለጡ ሕይወታቸው አደጋ ላይ ነው። በመሆኑም ጎረቤትህን ልታስጠነቅቀው ወደ ቤቱ ሄድክ፤ ይሁን እንጂ ጉዳዩን እየነገርከው እያለ ጎረቤትህ ያቋርጥህና አሁን ሥራ እንደሚበዛበት ነገረህ። ታዲያ እሱን ለመርዳት የምታደርገውን ጥረት ወዲያውኑ ታቆማለህ? እንዲህ እንደማታደርግ የታወቀ ነው! በተመሳሳይም በክልላችን የሚገኙ ብዙ ሰዎች መልእክታችን ሕይወት አድን መሆኑን ስለማያውቁ ውይይቱን ለማስቆም የተለያዩ ሐሳቦችን ይሰነዝራሉ። ምናልባትም ቤታቸው በሄድንበት ወቅት በሥራ ተወጥረው ይሆናል። (ማቴ. 24:37-39) ወይም ደግሞ የሰሙት የውሸት ወሬ በእኛ ላይ ጥላቻ አሳድሮባቸው ሊሆን ይችላል። (ማቴ. 11:18, 19) በመሆኑም እኛም መጥፎ ፍሬ ከሚያፈሩት ሌሎች ሃይማኖቶች እንደማንለይ ያስቡ ይሆናል። (2 ጴጥ. 2:1, 2) እንግዲያው ያነጋገርነው ሰው መጀመሪያ ላይ ለመልእክታችን ፍላጎት ባያሳይ ቶሎ ተስፋ መቁረጥ አይኖርብንም።

ይህን ማድረግ የሚቻለው እንዴት ነው?

ከቤት ወደ ቤት ለመስበክ ከመሄዳችሁ በፊት ጥቂት ጊዜ ወስዳችሁ ሊያጋጥሟችሁ የሚችሉ ውይይት የሚያስቆሙ ሐሳቦችን እንዲሁም ለእነሱ ምን ምላሽ መስጠት እንደምትችሉ አስቡ።
የምታነጋግሩት ሰው የተቃውሞ ሐሳብ ከሰነዘረ በእርጋታ ውይይቱ እንዲቀጥል ለማድረግ ሞክሩ። ምናልባትም ግለሰቡን በማመስገን እንዲህ ማድረግ ትችሉ ይሆናል። ለምሳሌ ያህል፣ ግለሰቡ የራሱ ሃይማኖት እንዳለው ከነገራችሁ እንዲህ ልትሉት ትችላላችሁ፦ “እኔም እንደ እርስዎ መንፈሳዊ ፍላጎት ካላቸው ሰዎች ጋር መነጋገር ያስደስተኛል።” አንዳንድ ጊዜ ደግሞ የግለሰቡን ስሜት ወይም ያለበትን ሁኔታ እንደምትረዱለት መግለጻችሁ በራሱ ውይይታችሁን እንድትቀጥሉ ያስችላችሁ ይሆናል። ለምሳሌ፣ ግለሰቡ ሥራ እንደሚበዛበት ቢነግራችሁ እንዲህ ልትሉት ትችላላችሁ፦ “እውነት ነው፣ ሥራ ስለሚበዛብዎት አሁን መነጋገር አይመችም። ነገር ግን ይህን ጽሑፍ ትቼልዎት ብሄድ ደስ ይለኛል።” በሌላ በኩል ደግሞ የምታነጋግሩት ሰው ፍላጎት እንደሌለው ከነገራችሁ አንዳንድ ጥያቄዎችን ልትጠይቁት ትችላላችሁ። እንዲህ ልትሉት ትችላላችሁ፦ “የማይፈልጉት መጽሐፍ ቅዱስን ነው? ወይስ በአጠቃላይ ለሃይማኖት ፍላጎት የለዎትም?”
የማመዛዘን ችሎታችሁን ተጠቀሙ። ይሖዋ፣ ሰዎች እንዲያዳምጡት እንደማያስገድድ አስታውሱ። (ዘዳ. 30:19) መንፈሳዊ ኃላፊነትን በመወጣት ረገድ እያንዳንዱ ሰው የራሱን የኃላፊነት ሸክም መሸከም አለበት። (ገላ. 6:5) አንድ ሰው ፍላጎት እንደሌለው አጥብቆ ከነገራችሁ ግለሰቡን ትታችሁ መሄዳችሁ የተሻለ ነው። የግለሰቡን ስሜት ማክበራችሁ ወደፊት ሌሎች አስፋፊዎች መልእክቱን ሲነግሩት ለመስማት ፈቃደኛ እንዲሆን ሊያነሳሳው ይችላል።—1 ጴጥ. 3:15

በዚህ ወር እንዲህ ለማድረግ ሞክሩ፦

በአገልግሎት ላይ የምታገኙት አንድ ሰው ውይይት የሚያስቆም ሐሳብ ከሰነዘረ ከግለሰቡ ጋር ከተለያያችሁ በኋላ እንዴት አድርጋችሁ መልስ ብትሰጡ ኖሮ የተሻለ ይሆን እንደነበር ከአገልግሎት ጓደኛችሁ ጋር ተወያዩ።