በአገልግሎት ረገድ ክህሎታችንን ማዳበር—ለተበሳጨ የቤት ባለቤት መልስ መስጠት

አስፈላጊ የሆነው ለምንድን ነው? በአገልግሎት ላይ የምናገኛቸው አብዛኞቹ ሰዎች ሰው አክባሪ ናቸው። ሆኖም ኢየሱስ አስቀድሞ እንደተናገረው አንዳንድ ሰዎች ይጠሉናል። (ዮሐ. 17:14) በመሆኑም አንድ ሰው ስናነጋግረው ቢበሳጭ አያስገርመንም። እንዲህ ዓይነት ሁኔታ ሲያጋጥመን ይህን ተልእኮ የሰጠንን ይሖዋን በሚያስደስት መንገድ መልስ መስጠት እንፈልጋለን። (ሮም 12:17-21፤ 1 ጴጥ. 3:15) እንዲህ ማድረጋችን ሁኔታው እንዳይባባስ ሊያደርግ ይችላል። ከዚህም በተጨማሪ ለቤቱ ባለቤትም ሆነ ሁኔታውን ለሚመለከቱ ሌሎች ሰዎች ጥሩ ምሥክርነት የሚሰጥ ከመሆኑም ባሻገር የይሖዋ ምሥክሮች ሌላ ጊዜ መጥተው ሲያነጋግሯቸው ጥሩ ምላሽ እንዲሰጡ ሊያደርጋቸው ይችላል።—2 ቆሮ. 6:3

ይህን ማድረግ የሚቻለው እንዴት ነው?

ምንጊዜም የተረጋጋና ወዳጃዊ የሆነ መንፈስ አሳይ። ይህም ሁኔታው እንዲረግብ ሊያደርግ ይችላል። ሰውየው ለአንተ የተለየ ጥላቻ እንዳለው አድርገህ አታስብ። (መክ. 7:9) ግለሰቡ የተበሳጨው ባለበት የግል ችግር የተነሳ ወይም በአጉል ሰዓት ስለመጣህ ሊሆን ይችላል። የተበሳጨው በነገርነው መልእክት የተነሳ ቢሆን እንኳ እንዲህ የተሰማው የተሳሳተ አመለካከት ስላደረበት ሊሆን ይችላል።—2 ቆሮ. 4:4
የሚማርኩ ቃላትን በመጠቀም በገርነት መንፈስ መልስ ስጥ። (ምሳሌ 15:1) የቤቱን ባለቤት ከእንቅልፉ ቀስቅሰኸው ወይም ከሥራ ላይ አስነስተኸው ይሆን? እርግጥ ነው ልንሰብክለት በመምጣታችን ይቅርታ መጠየቅ አይኖርብንም፤ ይሁን እንጂ በአጉል ሰዓት በመምጣታችን በትሕትና ይቅርታ ልንጠይቀው እንችላለን። የተበሳጨው ስለ እኛ የተሳሳተ ወሬ ሰምቶ ይሆን? ከሆነ እንዲህ ማለት ትችላለህ፦ “የተናደዱት ለምን እንደሆነ ይገባኛል። ይሁን እንጂ ስለ እኛ የሰሙት ነገር ትክክል ላይሆን ይችላል። ስለዚህ ጉዳይ ያለንን አመለካከት ብነግርዎት ደስ ይለኛል።” ግለሰቡ ከምናምንባቸው ነገሮች አንዳንዶቹን ለምሳሌ ስለ ውገዳ ወይም ስለ ደም ያለንን አቋም አጥብቆ ይቃወማል? ከሆነ እንዲህ ማለት ትችላለህ፦ “ስሜትዎ ይገባኛል። ሌሎችም እንዲህ ያለ አመለካከት እንዳላቸው ይናገራሉ። እንዲህ ያለ አቋም እንድንይዝ ያደረገን ምን እንደሆነ ከመጽሐፍ ቅዱስ ላይ ላሳይዎት?”
ግለሰቡ በጣም ከተበሳጨ ምንም መልስ ሳትሰጥ ከአካባቢው መሄዱ የተሻለ ነው። ግለሰቡ የይሖዋ ምሥክሮች ዳግመኛ እንዲመጡበት እንደማይፈልግ ከተናገረ፣ ፍላጎቱ እንደሚከበርለት ልትነግረው ትችላለህ።

በዚህ ወር እንዲህ ለማድረግ ሞክሩ፦

ይህን ማድረግ የምትችሉት እንዴት እንደሆነ በቤተሰብ አምልኮ ፕሮግራማችሁ ወቅት ተለማመዱ።
ከተበሳጨው ግለሰብ ጋር ከተለያያችሁ በኋላ ከዚህ የተሻለ ምን መልስ መስጠት ትችሉ እንደነበር ከአገልግሎት ጓደኛችሁ ጋር ተወያዩ።