በአገልግሎት ረገድ ክህሎታችንን ማዳበር—በንግድ አካባቢዎች መመሥከር

አስፈላጊ የሆነው ለምንድን ነው? ብዙ ሰዎች ለረጅም ሰዓት ስለሚሠሩ የመንግሥቱን ምሥራች እንዲሰሙ ከተፈለገ ሥራ ቦታቸው ድረስ ሄደን መመሥከር ይኖርብናል። በንግድ አካባቢዎች መመሥከር አስደሳች ብሎም ውጤታማ ሊሆን ይችላል፤ ምክንያቱም ሰዎች ቤታቸው ላይገኙ ይችላሉ ብለን አንሰጋም፤ ደግሞም ደንበኛቸው ልንሆን እንደምንችል በማሰብ አብዛኛውን ጊዜ በትሕትና ሊያነጋግሩን ይችላሉ። አስፋፊዎች ውጤታማ ለመሆን ከፈለጉ ጥሩ የማመዛዘን ችሎታ መጠቀም እንዲሁም በአለባበሳቸውና በአጋጌጣቸው ምሳሌ መሆን አለባቸው። (2 ቆሮ. 6:3) በመሆኑም የአገልግሎት የበላይ ተመልካቹ ንግድ የሚካሄድባቸው ክልሎች ምን ያህል በተደጋጋሚ እንደተሠራባቸውና በእነዚህ ክልሎች ማን እንዳገለገለ መከታተል ይኖርበታል።

ይህን ማድረግ የሚቻለው እንዴት ነው?

መልእክታችሁን በአጭሩ መናገር እንድትችሉ አስቀድማችሁ ጥሩ ዝግጅት አድርጉ። ባለሱቁን ለረጅም ጊዜ ካነጋገርነው ወደፊት እኛን ለማነጋገር ፈቃደኛ ላይሆን ይችላል።
የሚቻል ከሆነ ደንበኞች በማይበዙበት ሰዓት ለምሳሌ፣ የንግድ ቦታዎቹ እንደተከፈቱ መሄዱ የተሻለ ነው።
እንደሄዳችሁ መጀመሪያ ላይ ዋናውን ኃላፊ ለማነጋገር ጥረት አድርጉ። ሞቅ ባለና ወዳጃዊ በሆነ ስሜት አነጋግሩ። እንዲህ ማለት ትችሉ ይሆናል፦ “ዛሬ ወደ ሥራ ቦታችሁ የመጣነው ሰዎችን በቤታቸው ማግኘት አስቸጋሪ ስለሆነ ነው። ሥራ ላይ ስለሆናችሁ መልእክቴን አጠር አድርጌ ለመናገር እሞክራለሁ።” አጠር ያለ መግቢያ ተጠቅማችሁ ትራክት፣ መጽሔቶች ወይም ሌላ ጽሑፍ አበርክቱለት። ነጋዴዎች እንደሆንን ሊሰማቸው ስለሚችል ለሥራችን የገንዘብ ድጋፍ የምናገኘው እንዴት እንደሆነ ካልጠየቁን በስተቀር የገንዘብ አስተዋጽኦ እንዲያደርጉ ባንጠይቃቸው የተሻለ ነው።
ባለሱቁ ወይም ኃላፊው በጥሩ መንፈስ ከተቀበለን ሌሎቹን ሠራተኞች ለጥቂት ደቂቃዎች ለማነጋገር እንዲፈቅድልን ልንጠይቀው እንችላለን። በአንዳንድ የንግድ ቦታዎች ሠራተኞቹ አረፍ በሚሉበት ቦታ ላይ ጽሑፎች አስቀምጣችሁ መሄድ ትችሉ እንደሆነ መጠየቅ ትችላላችሁ።
ጥሩ የማመዛዘን ችሎታ ተጠቀሙ፤ እንዲሁም አንዳንድ ሁኔታዎችን ግምት ውስጥ አስገቡ። ለምሳሌ ያህል፣ አንድ ሠራተኛ ደንበኛ እያናገረ ከሆነ ወይም ሥራ ከበዛበት ነፃ እስኪሆን ድረስ መጠበቅ ሊያስፈልጋችሁ ይችላል።

በዚህ ወር እንዲህ ለማድረግ ሞክሩ፦

በቀጣዩ ጊዜ በምታደርጉት የቤተሰብ አምልኮ ፕሮግራማችሁ ላይ በንግድ አካባቢዎች ስታገለግሉ ልትጠቀሙበት የምትችሉትን አጠር ያለ አቀራረብ ተለማመዱ።