¿CHUMAFUIÑ TAIÑ ÜDECHEHUENOAL?

3 | Nentufinge tati üdehun tami raquiduam mu

Biblia tañi quimeltuqueel:

“Hue raquiduam ta nietumün femngechi ta nietuaimün cangelu mongen ca femngechi quimaimün Ngünechen tañi ayüqueelchi dungu, fei tüfa lle tati cümelu, tati tutelu, ca tati norngelu com dungu meu” (ROMANOS 12:2).

¿Chem quimeltuqueiñmu?

Taiñ raquiduamqueel tati pu che mu falin-ngei Chau Dios meu (Jeremías 17:10). Feimu cuñiutucuhuaiñ taiñ üdenoafiel pu che taiñ feipin cam femün meu. Huelu fei ca müten no, ca cuñiutucuhuaiñ taiñ üdenoafiel pu che taiñ piuque cam raquiduam meu. Feimu nieliyiñ üdehun taiñ piuque cam raquiduam meu, mülei taiñ nentuafiel. Femliyiñ tüfa, hue raquiduam nieaiñ ca üdehuelayafiyiñ pu che.

¿Chumngechi inayafuiñ tüfachi ngülam?

Inaduamuunge chumngechi pequefimi tati caquelu pu che, doyelchi mai feiti pu che ca troquiñche ca caque tuhun-ngelu. Ramtuunge: “¿Chem raquiduamquen tüfachi pu che meu? Iñche tañi raquiduamqueel quisu engün meu, ¿nüucülepei mai tañi quimfiel mu cam tañi feipingeel meu müten?”. ¿Chem quelluafeimu tami cüme raquiduamal tati pu che meu? Eluunge tami allcütunoal cam penoal chem dungu rume, nüucülelu quehuatun dungu mu cam üdehun meu.

Biblia quelluqueiñmu taiñ entual ti üdehun taiñ raquiduam mu ca taiñ piuque mu

Quiñeque mu quimlayafuiñ chi ñi cümepen mai taiñ raquiduamcülen, huelu Ngünechen tañi Huirin Chillca quelluafeiñmu. Tati Biblia “quimfalcünuquei tati che ñi raquiduam ca chem ñi ayünieel piuque meu” (Hebreos 4:12, TNM). Feimu amulepe tami inaduamfiel Biblia. Ca femngechi inaduamuunge, femngechi quimaimi tami raquiduam ñi nüucülepen mai Biblia tañi quimeltuqueel meu. Ca nehuentuunge tami raquiduam mu ayühulafiel ta Chau Dios. Biblia tañi feipin quelluafeiñmu taiñ nentual taiñ üdehun ca “taiñ teifücayafiel” com huesaque raquiduam (2 Corintios 10:4, 5).

Ñi rupan tañi mongen mu: STEPHEN

Cüme elcünutui tañi raquiduam

Pu fülang che rume cutrancaquefui ta Stephen ca tañi pu che tañi curü chengen meu. Feimeu Stephen quiñehui quiñe troquiñ politico mu ñi incañpeafiel tati pu che. Rupachi antü meu huesaque dungu mu coni. Stephen feipi: “Tañi hueni iñchiñ amuquefuiñ cine mu ñi pemeafiel pelicula pengelquefulu chumngechi ñi cutrancangequefel pu curü che. Pefiel mu tüfa rume illcuquefuiñ, feimu hulelcaquefuiñ com pu fülang che mülefulu tati cine meu ca fente taiñ illculen mu, quintuquefuiñ caquelu fülang che taiñ hulelcayafiel”.

Stephen eluulu ñi chillcatual Biblia pu Dunguquelu Ineingen Jehová engün, cüme elcünutui tañi raquiduam. Stephen feipi: “Iñche rume dullintuchefengefun, feimu afmatulehuen pefiel mu ñi fente dullintuchequenon pu Dunguquelu Ineingen Jehová. Por ejemplo, quiñe rupa müna afmatuleneu pefiel mu quiñe familia fülang chengelu cañpüle amulu, elcünulelfi tañi pichiqueche quiñe familia curü chengelu. Cafei afmatuleneu quiñe fülang familia lloufilu quiñe curü che ñi müleal tañi ruca mu”. Femngechi Stephen ngüneduami pu testigo quiñe fütra familia reque feleingün müna piuqueyeuquelu. Jesús feipi pu rüfngechi cristiano ñi rüf piuqueyehual engün. Feimu Stephen pefilu ñi femqueel pu testigo, ngüneduami ñi inaniequeel Jesús tañi feipin (Juan 13:35).

¿Chem quellueyu ta Stephen ñi üdechefengehuenoal ca quehuatuchefengehuenoal? Ñi feipin Romanos 12:2 rume quellueyu. Stephen feipi: “Eluhun ñi doi cüme chengeal, rume yafüluhun tañi quehuatuchefengehuenoal ca tañi ñom piuquengerpual”. Stephen feula yeniei meli mari tripantu tañi quehuatuchefengehuenon ca rume ayüucülei.