Inayentuafiyiñ Jehová ñi ñom piuquengen

1. ¿Chumngelu afmatufali Jehová tañi ñom piuquengen?

FACHANTÜ fentren gobernante mülelu mapu mu ñom piuquengelai, ¿felelai am chi? ¿Jehová cai? Fei com nehuen nielu rume, ñom piuquengei llemai (Sal. 113:5-8). Chau Jehová hunelei tañi ñom piuquengen. Fei quimlafi rume ta mallmahun dungu. Feitachi troquiñ peaiñ 4 dungu chumngechi pengelquei Jehová tañi ñom piuquengen ca chumngechi Jesús inayentufi tañi Chau ñi ñom piuquengen. Com tüfa quelluaiñmu taiñ doi hueniyeafiel Jehová ca taiñ doi ñom piuquengeal.

JEHOVÁ CÜME LLOUQUEFI PU CHE

2. Ñi feipin Salmo 62:8, ¿chem quimeltueiñmu Jehová mu? (Ca inaduamnge ti adentun ).

² Cüdaungei ñi nütramcangeal mallmangechi che. Rume falin che troquiuqueingün, huesa duamelquefingün ta caquelu, feimu famentungequeingün. Huelu Chau Jehová femngechi femquelai. Ñom piuquengelu am, feipiqueiñmu taiñ llellipuafiel ca taiñ feipiafiel chem ñi mülen taiñ piuque mu (papeltunge Salmo 62:8). Quiñe cüme chau ayüniei ñi allcütuafiel tañi pu pichiqueche. Ca femngechi Jehová ayüniei ñi allcütual taiñ llellipun. Jehová adcünui ñi huirintucungeal fentren che ñi llellipun Biblia mu. Tüfa pengeli fente ñi ayüqueel tañi llellipungeal (Jos. 10:12-14; 1 Sam. 1:10-18). Huelu quiñeque mu, “¿inei am ta iñche ñi llellipuafiel Jehová?” piafuiñ. ¿Chem quelluafeiñmu? Peafiyiñ.

3. ¿Chumngelu feipiafuimi Jehová ayüquei tami llellipunieafiel?

³ Piuqueyenoeteu Jehová troquiuliyiñ rume, ca llellipuafuiñ, ¿chumngelu cai? Raquiduamaiñ quiñe nütram ñi entuel Jesús. Quiñe fotüm elcünui tañi poyen chau. Huesaque dungu mu coni. Rupachi antü mu cüpa huiñotufui, huelu “müna huesa portan, lloupeafeneu tañi chau” pi. Feiti chau pefilu müten ñi fotüm ñi huiñotun, ‘lefi ñi trafmeafiel, pancofi ca piuqueyen mu truyufi’ (Luc. 15:17-20). Tüfachi chau reque femquei ta Jehová. Fill raquiduamcüleliyiñ ca hueñancüleliyiñ taiñ huelulcan mu, fei allcütuñmaqueiñmu taiñ llellipun (Lam. 3:19, 20). Jehová cutranpiuqueyequeiñmeu, fei lefquei reque taiñ yafültucuaeteu ca pengeli taiñ piuqueyenieteu (Is. 57:15). ¿Chumngechi femquei? Adcünuquefi pu loncolelu, taiñ familia testigongelu ca caquelu peñi ca lamngen (Sant. 5:14, 15). Felei llemai, Chau Jehová ayüquei taiñ hueniyenieafiel, feimu quelluqueiñmu.

4. ¿Chumngelu feipiafuiñ Jesús ñi cüme llouquefiel pu che?

⁴ Jesús inayentuquefi tañi Chau, fei ñom piuquengei. Feimu mülepalu mapu meu, pu che ayüquefui ñi püllecontuafiel. Llicaquelafuingün tañi ramtuafiel chem rume (Mar 4:10, 11). Chem ñi ramtueteu Jesús, feipiquefuingün müten tañi raquiduamqueel (Mat. 16:13-16). Quimniefuingün Jesús ñi cutranpiuqueyechequen ca ñi lladcüfemquenon. Feimu huelulcaulu engün, llicaquelafuingün tañi chem piaeteu Jesús (Mat. 17:24-27). Jesús tañi cüme inayentufiel tañi Chau, fei tañi pu inanieteu cüme quimürpufingün Chau Jehová (Juan 14:9). Fei ñom piuquengei ca cüme llouquefi pu che. Trürlai pu loncolechi religioso mu ñi mülen feichi mu.

5. Pu che, ¿chumngelu doi ayüquei ñi fülmayafiel pu ñom piuquengelu?

⁵ ¿Chumngechi inayentuafuiñ Jehová? Ñom piuquengeliyiñ, caquelu che doi ayüafui taiñ püllecontuaeteu. Pu ñom piuquengenolu ütrirchequei, mallma piuquengei ca perdonachequelai, feimu famentungequei. Huelu pu ñom piuquengelu duamtuchequei, perdonachequei ca pürüm lladcüfemquelai, feimu hueniyefali (Col. 3:12-14). Doyelchi mai pu loncolelu mülei ñi cüme duamelafiel pu peñi ca pu lamngen tañi fülmayaeteu. Ñi femngechi femal, duamfali pu loncolelu ñi trür müleal pu peñi ca pu lamngen engün. Pepi femle engün, amuqueingün Trahunhue Ruca mu, doyümquelaingün conectahual internet mu. Ca amuldunguqueingün pu peñi ca pu lamngen engün. Femngechi ti trahunche doi quimürpuafi engün, fei doi eluhuai tañi nütramcayafiel.

JEHOVÁ NGÜNEDUAMQUEFI CAQUELU CHE ÑI RAQUIDUAM

6, 7. Jehová, ¿eluucülepei mai ñi femal tañi chem pieteu tañi pu che? Feipinge quiñeque rupan dungu.

⁶ Tati mallma che eluucülelai tañi cacünutual tañi raquiduam. Jehová turpu huelulcauquelai ca niei rume fentren quimün, huelu ñom piuquengei ca ngüneduamquei chem ñi raquiduamqueel caquelu. Raquiduamaiñ feichi mu Míriam ca Aarón chaftudungufilu Moisés. ¡Müna huesa femingu! Moisés, Jehová tañi huerquen-ngefui. Fei ta chaftudungungelu troquihui Jehová, feimu rume lladcütufi Míriam, feimu cutranelfi ñi nieal lepra. Fei Aarón dungufi ta Moisés, fürenemuchi, quellufinge ta Míriam pifi. Fei Moisés llellipufi Jehová ñi tremoltuafiel Míriam. ¿Chumi cai Jehová? Mallma piuquengefule, “felecape müten” piafui. Huelu Jehová am ñom piuquengelu, allcütufi Moisés, fei tremoltufi Míriam (Núm. 12:1-15).

⁷ Ca peaiñ ñi rupan ti lonco ülmen Ezequías. Fei rume cutrancülefui, feimu Jehová feipieyu ñi pichilehuen tañi mongeleal. Ezequías ngümalen mu llellipufi Jehová tañi tremoltuaeteu. Jehová fente tañi cutranpiuqueyefiel, eluñmafi tañi mongelerpual 15 tripantu (2 Rey. 20:1, 5, 6). ¡Felei llemai! Jehová ñom piuquengei, feimu cutranpiuqueyefi pu che ca allcütuquefi tañi chem pieteu.

8. Jesús, ¿chumngechi inayentuquefi tañi Chau? (Marcos 3:1-6).

⁸ Jesús inayentuquefi tañi Chau. Mülepalu Jesús mapu meu, cümelcafi pu che tunte tañi pepi femel. Chem pifeliyu rume pu loncolechi religioso, Jesús tremoltufi pu che ürcütun antü mu fente tañi cutranpiuqueyechequen (papeltunge Marcos 3:1-6). Fachantü, Jesús loncolei tati pu trahunche mu, fei amulei ñi inayentuquefiel tañi Chau. Quiñe che fütra culpalu, Jesús niei paciencia ca eluñmaquefi tañi repentiutual (Apoc. 2:2-5).

9. ¿Chumngechi inayentuafuiñ Jehová? (Ca inaduamnge ti adentun).

⁹ ¿Chumngechi inayentuafuiñ Jehová? Ñom piuque mu adümafiyiñ Jehová ñi raquiduamqueel ca ñi femquen, femngechi inayentuafiyiñ (Sant. 3:17). Pu chau inayentuquefilu Jehová eluquelafi tañi pichiqueche ñi quisu ngünehual. Huelu ca feipiquelafi tañi pu yall ñi femal tañi pepilnoel. Femngechi femi Jacob, fei quimniefui tañi pu yall ca quimniefui chem tañi pepi femün engün, fei cutranpiuqueyefi (Gén. 33:12-14). Cafei tati pu chau inayentuquefilu Jehová trürümquelafi tañi pu yall. Pu loncolelu ca mülei ñi inayentuafiel Jehová. Trürnole ñi raquiduam caquelu loncolelu mu, “femngepe iñche ñi feipin” pilayai. Doi mai, quelluntucuai ñi dulliel caquelu loncolelu nüucülele Biblia mu (1 Tim. 3:2, 3). Ca com iñchiñ eluhuaiñ taiñ allcütuafiel caquelu che ñi raquiduam trürnole rume iñchiñ taiñ raquiduam mu (Rom. 14:1). Com yafüluuqueiñ taiñ inayafiel feitachi ngülam: “Com pu che quimpe tamün ngünefal chengen eimün” (Filip. 4:5).

JEHOVÁ NIEI FENTREN PACIENCIA

10. ¿Chumngechi pengeli Jehová tañi nien fentren paciencia?

¹⁰ Tati che mallmangelu müte nielai paciencia, feimu ayüquelai tañi esperayal. Pichi trürlaingün rume Jehová mu. Jehová niei rume fentren paciencia. Noé tañi antü mu, feipi tañi üngümal 120 tripantu tañi apümcayafiel hula pu huesaque che (Gén. 6:3). Femngechi Noé tremümürpufi tañi pu yall ca trür deumafingün ti fütra huampo ruca. Rupachi tripantu mu, Jehová dulliniefui ñi apümcayafiel Sodoma ca Gomorra, fei Abrahán ramtucaeyu. Jehová mallma piuquengefule, feipiafui: “¿Inei troquihuimi am tami ramtucadunguafiel iñche?”. Huelu Jehová femlai, ñom piuque mu allcütufi (Gén. 18:20-33).

11. Ñi feipilen 2 Pedro 3:9, ¿chemu Jehová esperalei fachantü?

¹¹ Fachantü, Jehová ca pengelquei tañi nien paciencia. Fei üngümcülei feichi antü ñi dullicünuel ñi apümafiel huesaque dungu. ¿Chemu am üngümcülei? “Fei ayünielai ta inei no rume ñi apümcangeal. Ayüniei ta com pu che ñi nor raquiduamtual” (papeltunge 2 Pedro 3:9). ¿Ngüman esperamequepei mai? Femlai llemai. Fei am nielu paciencia, doi alün che quimürpueyu ca hueniyerpueyu. Maneluucüleiñ doi alün che tañi femürpual. Huelu quiñe antü Jehová fentepuai ñi paciencia. Jehová piuqueyefi pu che, huelu ayüquelai tañi huesa femmequeal, feimu apümcayafi ti huesaque dungu (Hab. 2:3).

12. Jesús, ¿chumngechi inayentuquefi Jehová tañi paciencia?

¹² Jesús inayentuquefi tañi Chau. Fentren tripantu mu inayentuquefi tañi Chau ñi paciencia. ¿Chemu feipiafuiñ? Jesús quimniei Huecüfü tañi feipiquen coilaque dungu Jehová mu ca tañi pu che mu (Gén. 3:4, 5; Job 1:11; Apoc. 12:10). Ca pequefi alün che tañi cutrancauquen. ¿Rume ayüniepelai ñi apümcayafiel Huecüfü ñi huesa femmequen? (1 Juan 3:8). Huelu Jesús üngümcülei Jehová tañi feipiaeteu ñi puhun ti antü. ¿Chem quelluqueyu? Tañi ñom piuquengen. Fei quimniei tañi Fütra Chau müten elantücünuquei tunten mu ñi rupayal ti dungu (Hech. 1:7).

13. Jesús, ¿chem dungu meu pengeli tañi nien paciencia ca chemu?

¹³ Jesús mülepalu mapu mu, ca pengeli ñi nielfiel paciencia tañi pu apostol. Fei engün fentren rupa yafcauquefuingün inei tañi hunelen. Huelu Jesús afduamquelafui ca feipiquelafui “tüfa engün felecayaingün müten”. Doi mai, amulei tañi nielfiel paciencia ca maneluhui tañi ñom chengerpual engün (Luc. 9:46; 22:24-27). Iñchiñ, ¿ca huelulcauqueiñ quiñeque dungu mu alün rupa? Feimu rume mañumcüleiñ Jesús taiñ Lonco Ülmen ñi ñom piuquengen ca ñi nien paciencia.

14. ¿Chem quelluaiñmeu taiñ nieal doi paciencia?

¹⁴ ¿Chumngechi inayentuafuiñ Jehová? Taiñ doi cüme inayentuafiel, mülei taiñ adümafiel Jesús tañi raquiduam (1 Cor. 2:16). ¿Chem quelluaiñmu? Papeltuafiyiñ ti pu Evangelio ca elcünuaiñ tiempo taiñ raquiduamal, femngechi ngüneduamafiyiñ chumngechi pengelquei Jesús tañi raquiduam. Ca llellipuafiyiñ Jehová taiñ quelluaeteu taiñ ñom chengeal ca taiñ nieal paciencia Jesús reque. Doi adümfiliyiñ Jesús tañi raquiduam, doi cüme inayentuafiyiñ Jehová. Femngechi doi nieaiñ paciencia caquelu meu ca iñchiñ meu (Mat. 18:26-30, 35).

JEHOVÁ FALINTUQUEFI PU ÑOM PIUQUENGELU

15. ¿Chumngechi femürpui Jehová ñi feipin Salmo 138:6?

¹⁵ (Papeltunge Salmo 138:6). Jehová tati doi alüpüralelu ngüneduamquefi tati pu che ñom piuquengelu. Afmatufali. Ca adcünui ñi huirintucungeal Biblia mu ñi femün quiñeque che müte quimngequenofulu. Quiñe tüfa Débora. Feitachi domo cüdahuelfi Isaac ca Jacob ñi pu familia 125 tripantu. Müte quimngequelai com ñi femün feitachi domo. Huelu Jehová adcünui ñi huirintucungeal tañi üi Biblia mu ca ñi rume poyengequefel (Gén. 24:59; 35:8, nota). Rupachi tripantu mu, Jehová ca femngechi ngüneduamfi quiñe pichi hueche huentru, David pingei. Cuidaufisaquefui, huelu Jehová dullieyu tañi reyngerpual Israel mu (2 Sam. 22:1, 36). Pichiñma choyüngelu Jesús, Jehová huercüfi cümeque püllü quiñeque cuidaufisaquelu mu. Feipimefingün ñi deu choyüngen tati Mesías ngerpualu (Luc. 2:8-11). Hue yengelu Jesús templo mu, Jehová eluñmafi Simeón ca Ana ñi quimafiel tañi Fotüm. Tüfachi 2 che deu füchafuingu, huelu Jehová ngüneduameyu (Luc. 2:25-30, 36-38). Felei llemai, “Jehová alüpüralei rume tañi mülen mu, quisu ngüneduamniefi tati ñom piuquengelu”.

16. Jesús, ¿chumngechi inayentufi tañi Chau?

¹⁶ Jesús inayentuquefi tañi Chau. Fei ngüneduamfi pu che falintungequenolu. Ca quimeltulelfi Chau Dios ñi cümeque dungu pu che müte nienolu estudio ca illamcangequelu (Mat. 11:25; Hech. 4:13). Cafei tremoltufi tati pu cutrancülelu ca pengelelfi tañi piuqueyefiel ca respetafiel (Luc. 5:13). Feichi pun petu tañi lanon, ñom piuque mu cüchanamunfi tañi pu apostol. Tüfachi cüdau femquefui pu esclavo müten (Juan 13:5). Ca petu tañi amutunon huenu mu, elufi tañi pu inanieteu tati doi falin cüdau: quelluafiel pu che ñi nierpual rumel mongen (Mat. 28:19, 20).

17. ¿Chumngechi inayentuafuiñ Jehová? (Ca inaduamnge ti adentun).

¹⁷ ¿Chumngechi inayentuafuiñ Jehová? Amuldungulelquefiyiñ com pu che, chem tuhun-ngele rume, chem mollfüñ niele rume ca tunten estudio niele rume. Femngechi pengelelquefiyiñ taiñ piuqueyefiel ca respetafiel. Ca inayentuquefiyiñ Jehová trahunche mu. Chumte adümuuliyiñ rume cam chem elfal cüdau rume nieliyiñ, piuqueyefiyiñ ca respetaquefiyiñ com taiñ pu peñi, pu lamngen (Filip. 2:3). Chau Jehová rume ayüuquei pefiel mu tañi pu che ñi ñom piuquengen ca ñi hueluconque respetauquen (Sof. 3:12; Rom. 12:10).

18. ¿Chemu eluhuaiñ taiñ ñom piuquengeal Jehová reque?

¹⁸ Eluulu iñchiñ taiñ ñom piuquengeal Jehová reque, cüme llohuafiyiñ pu che. Feipiquelayafiyiñ caquelu ñi femal tañi pepi femnoel ca nieaiñ paciencia. Ca pengelelafiyiñ taiñ piuqueyefiel ca respetafiel chumngechi ñi femquen Jehová. Doi eluuliyiñ taiñ ñom piuquengeal taiñ inayentuafiel Jehová, doi falin-ngeaiñ fei tañi adquiñ mu (Is. 43:4).