যেতিয়া হঠাতে কোনো দুৰ্যোগ হয়

যদি আপুনিও প্ৰাকৃতিক দুৰ্যোগৰ সন্মুখীন হৈছে, তেনেহʼলে ইয়াৰ সন্মুখীন হোৱা লোকসকলে কেনে অনুভৱ কৰে সেয়া আপুনি ভালদৰে বুজিব পাৰিব। তেওঁলোকে মনত বহুত আঘাত পায়, এইদৰে হৈছে বুলি তেওঁলোকে বিশ্বাসেই কৰিব নোৱাৰে, তেওঁলোকে বুজি নাপায় যে আগলৈ কি হʼব। ইয়াৰ লগতে তেওঁলোকক চিন্তাই আগুৰি ধৰে আৰু বেয়া বেয়া সপোন দেখে। বহুতো লোকে সাহস হেৰুৱাই পেলায় আৰু জীয়াই থাকিব নিবিচাৰে।

যদি কোনো এটা দুৰ্যোগত আপুনি নিজৰ সকলোবোৰ হেৰুৱাইছে আৰু সকলোবোৰ ঠিক কৰিবলৈ আপোনাৰ বাবে বহুত কঠিন হৈ পৰিছে। এনে পৰিস্থিতিত আপোনাৰ মনত আহিব পাৰে যে মই আৰু সহন কৰিব নোৱাৰোঁ, মই মৰি যোৱাটোৱেই ভাল হʼব। কিন্তু এইদৰে নাভাবিব। পবিত্ৰ শাস্ত্ৰ বাইবেলত কোৱা হৈছে যে আপোনাৰ জীৱনটো বহুত মূল্যৱান আৰু আপুনি সম্পূৰ্ণ বিশ্বাস ৰাখিব পাৰে যে আগলৈ গৈ সকলোবোৰ ঠিক হৈ যাব।

পবিত্ৰ শাস্ত্ৰই আপোনাক জীয়াই থকাৰ আশা দিব পাৰে

পবিত্ৰ শাস্ত্ৰত লিখা আছে, “আমি বিশ্বাস কৰোঁ যে যিসকলে ধৈৰ্য্য ধৰে, তেওঁলোক সুখী।” (যাকোব ৫:১১) কোনো দুৰ্যোগৰ মাজেদি পাৰ হোৱাৰ পাছত জীৱন নতুনকৈ আৰম্ভ কৰাটো ইমান সহজ নহয়। ইয়াৰ বাবে সময়ৰ প্ৰয়োজন হয়। সেইবাবে, ধৈৰ্য্য ধৰক। জীৱনটো নিয়মীয়া কৰি তুলিবলৈ যদি আপুনি পৰিশ্ৰম কৰি থাকে, তেনেহʼলে লাহে লাহে সকলোবোৰ ঠিক হৈ যাব।

পবিত্ৰ শাস্ত্ৰত কোৱা হৈছে যে অতি সোনকালে এনে এটা সময় আহিবলগীয়া আছে, যʼত “ক্ৰন্দনৰ শব্দ কি কাতৰোক্তিৰ শব্দ আৰু শুনা নাযাব।” (যিচয়া ৬৫:১৯) গোটেই পৃথিৱীত ঈশ্বৰে শাসন কৰিব আৰু ইয়াক এটা ধুনীয়া বাগিছাৰে পৰিৱৰ্তন কৰিব। (গীতমালা ৩৭:১১, ২৯) তাৰ পাছত কোনো প্ৰাকৃতিক দুৰ্যোগ নহʼব আৰু এতিয়া যিসকলে দুৰ্যোগৰ সন্মুখীন হৈ আছে, সেই সময়ত তেওঁলোকৰ বেয়া স্মৃতিবোৰ মনত নপৰিব। কাৰণ সৰ্বশক্তিমান ঈশ্বৰে প্ৰতিজ্ঞা কৰিছে, “পূৰ্ব্বকালৰ কথাবোৰ সোঁৱৰণ কৰা বা মনত কৰাও নহব।”—যিচয়া ৬৫:১৭.

খন্তেকৰ বাবে চিন্তা কৰকচোন, আমাৰ সৃষ্টিকৰ্তাই আপোনাক এটা ভাল ভৱিষ্যত দিব বিচাৰে। তেওঁ যেতিয়া এই পৃথিৱীত শাসন কৰিব, তেতিয়া তেওঁ আপোনাক এটা ভাল ভৱিষ্যত দিবলৈ প্ৰতিজ্ঞা কৰিছে। সেইবাবে, “আশা” ৰাখিব পাৰে যে তেওঁ যেতিয়া শাসন কৰিব, তেতিয়া আপুনি সুখ আৰু শান্তিৰে জীয়াই থাকিব পাৰিব। (যিৰিমিয়া ২৯:১১) আগলৈ গৈ আপুনি এটা ভাল জীৱন পাব, এয়া জানি আপুনি এতিয়া জীয়াই থকাৰ উৎসাহ লাভ নকৰে নে? নিশ্চয় লাভ কৰে। আগৰ লেখত উল্লেখ কৰা চেলীয়ে কৈছে, “ভৱিষ্যতে ঈশ্বৰে যেতিয়া শাসন কৰিব, তেতিয়া তেওঁ আমাৰ বাবে কি কি কৰিব তাৰ বিষয়ে যেতিয়া এজন ব্যক্তিয়ে ধ্যান দিয়ে, তেতিয়া নিজৰ বেয়া স্মৃতি আৰু দুখ-কষ্টবোৰ সহন কৰিবলৈ তেওঁ সহায় লাভ কৰে।”

যেতিয়া ঈশ্বৰে শাসন কৰিব, তেতিয়া তেওঁ মানুহৰ বাবে কি কি কৰিব তাৰ বিষয়ে বেছিকৈ জানিবলৈ চেষ্টা কৰক। যদিও প্ৰাকৃতিক দুৰ্যোগত আপোনাৰ বহুত ক্ষতি হৈছে, তথাপিও আপুনি ইয়াৰ বিষয়ে জানিলে এতিয়া ভালদৰে জীৱন-যাপন কৰিব পাৰিব। আপুনি সেই সময়ৰ বাবে অপেক্ষা কৰিব পাৰে, য’ত কেতিয়াও বেয়া ঘটনা নঘটিব। যদিও আজি আপুনি সমস্যাবোৰৰ সন্মুখীন হৈ আছে, তথাপিও বাইবেলত দিয়া পৰামৰ্শবোৰ পালন কৰিলে আপুনি সেইবোৰ ভালদৰে সন্মুখীন হʼব পাৰিব। আহক বাইবেলৰ কিছুমান পৰামৰ্শৰ ওপৰত ধ্যান দিওঁ।