২০০৫ চনত হʼবলগীয়া যিহোৱাৰ সাক্ষীসকলৰ জিলা অধিৱেশনৰ বিষয়টো হৈছে “ঈশ্বৰীয় আজ্ঞাকাৰীতা”
১ আমাৰ মহান শিক্ষক যিহোৱা ঈশ্বৰে তেওঁৰ পথত চলিবলৈ আমাক একত্ৰিত কৰি শিক্ষাদান কৰিবলৈ ব্যৱস্থা কৰিছে। (যিচ. ৩০:২০, ২১; ৫৪:১৩) তেওঁ বিশ্বাসী বুদ্ধিমান দাসবৰ্গৰ জড়িয়তে আমাৰ বাবে বছেৰেকীয়া জিলা অধিৱেশনৰ প্ৰবন্ধ কৰিছে। (মথি ২৪:৪৫-৪৭) সেয়েহে আমিও দায়ূদৰ দৰে একেইদৰে অনুভৱ কৰিছোঁ, যʼত তেওঁ এইদৰে কৈছিল: “মই সমাজবোৰৰ মাজত যিহোৱাৰ ধন্যবাদ কৰিম।” (গীত ২৬:১২) যিহোৱা ঈশ্বৰে দিয়া শিক্ষা কিমান মূল্যৱান, সেই বিষয়ে ৰজা দায়ূদে স্পষ্টকৈ বুজি পাইছিল আৰু যেতিয়া লোকসকলে একত্ৰিত হয় তেতিয়া তেওঁলোকৰ মাজত উপস্থিত থাকিবলৈ নিশ্চিত কৰিছিল।
২ আপুনিও এই বছৰত হʼবলগীয়া “ঈশ্বৰীয় আজ্ঞাকাৰীতা” জিলা অধিৱেশনত “সমাজবোৰৰ মাজত” উপস্থিত হোৱা লোকসকলৰ মাজত থাকিবলৈ বিচাৰিবনে? যদি বিচাৰে, তেন্তে তলত দিয়া পৰামৰ্শবোৰে আপোনাক অধিৱেশনত উপস্থিত হোৱাৰ পূৰ্বেই নিজকে সাজু কৰিবলৈ সহায়ক প্ৰমাণিত হʼব।
৩ প্ৰত্যেক দিনা উপস্থিত থাকিবলৈ আঁচনি বনাওক: “পৰিশ্ৰমী লোকৰ চিন্তাই কেৱল লাভহে জন্মায়।” (হিতো. ২১:৫) এই বাক্যশাৰীয়ে অধিৱেশনত উপস্থিত হʼবলৈ অনতিপলমে কাৰ্য্যকাৰী আঁচনি বনোৱাৰ বিষয়ে গুৰুত্ব নিদিয়েনে? আধ্যাত্মিকতাত সতেজ কৰি তুলা সেই কাৰ্য্যক্ৰমৰ সম্পূৰ্ণ তিনি দিন উপস্থিত থকাটো নিশ্চিত কৰিবলৈ এতিয়াৰে পৰা পৰিকল্পনা কৰিলে বুদ্ধিমানৰ কাৰ্য্য হʼব। যিহেতু ছুটিৰ দিন, স্কুলত পৰীক্ষাৰ সময় ঠাই অনুযায়ী ভিন্ন হোৱাৰ বাবে সকলোৰে সুবিধা অনুসাৰে অধিৱেশনৰ তালিকা তৈয়াৰ কৰাটো প্ৰায়ে অসম্ভৱঃ যেন প্ৰমাণিত হৈছে। সেয়েহে এই বিষয়ে মনত ৰাখি এই বছৰত অধিৱেশন আগতীয়াকৈ, অৰ্থাৎ বাৰিষা কালত পাতিবলৈ ঠিৰাং কৰা হৈছে, যাতে থকা-মেলাৰ ব্যৱস্থা আৰু অধিৱেশনৰ বাবে সহজে ভৱন উপলব্ধ থাকে। ইয়াত কোনো সন্দেহ নাই যে অধিৱেশনত উপস্থিত হʼবলৈ আমাৰ সকলোৱে অতিৰিক্ত আঁচনি তৈয়াৰ কৰা আৱশ্যক। যদি আপুনি চাকৰিৰ পৰা ছুটি লʼবলগীয়া হয়, তেন্তে এতিয়াই কাৰ্য্যকৰ্তাক সেই বিষয়ে অৱগত কৰক। যদি অধিৱেশনত উপস্থিত হোৱাৰ বিষয়ে সত্যত নথকা আপোনাৰ সঙ্গীক জনাবলগীয়া হয়, তেন্তে কোনো পলম নকৰিব। আপুনি যিয়ে কঠিন পৰিস্থিতিৰ সম্মুখীন নহওঁক কিয়, “অভিপ্ৰায় সিদ্ধ হব” বুলি ভাৰসা ৰাখি সেই বিষয়ে যিহোৱা ঈশ্বৰলৈ প্ৰাৰ্থনা কৰক। (হিতো. ১৬:৩) তদুপৰি আপোনাৰ বাইবেল বিদ্যাৰ্থীসকলক অধিৱেশনৰ সম্পূৰ্ণ তিনি দিন উপস্থিত থাকিবলৈ তেওঁলোকে সাজু হোৱাত সহায় কৰিলে অধিক উত্তম হʼব।
৪ থকা-মেলাৰ ব্যৱস্থা: আপোনালোকৰ সুবিধাৰ বাবে প্ৰত্যেকখন চহৰত আগতীয়াকৈ অধিৱেশনত থকা-মেলাৰ ব্যৱস্থাৰ আয়োজন কৰা হৈছে। বাছনি কৰা হোটেল আৰু তাৰ ভাড়াসমূহৰ তালিকা যেনেকৈ উপলব্ধ হʼব, অনতিপলমে আপোনালোকৰ মণ্ডলীৰ জাননী বৰ্ডত লগোৱা হʼব। বহুতো ক্ষেত্ৰত ভাইসকলে আমাৰ অধিৱেশনৰ প্ৰতিনিধিসকলৰ বাবে সুলভ মূল্যত হোটেলৰ ৰুম পাবলৈ হোটেলৰ কৰ্তৃপক্ষৰ সৈতে আলোচনা কৰে। গতিকে উপস্থিত হʼবলগীয়া অধিৱেশনৰ তালিকাত উল্লেখ কৰা হোটেল বা লজৰ সৈতে আপুনি যেতিয়া যোগাযোগ কৰে, তেতিয়া কেৱল ভাইসকলে তালিকাত উল্লেখ কৰা হোটেলবোৰৰ সৈতেহে কৰা উচিত। যদি হোটেলৰ মালিকে তেওঁ মান্তি হোৱা মূল্যত ৰুম দিবলৈ নিবিচাৰে, তেন্তে মণ্ডলীৰ চেক্ৰেটাৰীৰ দ্বাৰা ৰুমিং বিভাগক অনতিপলমে জনাওক। আপোনালোকৰ সহযোগৰ বাবে শাখা কাৰ্য্যালয়ে একেৰাহে সুলভ মূল্যত ভাল সা-সুবিধা থকা ৰুমৰ ব্যৱস্থা কৰিবলৈ পাৰিব। কিন্তু এটা কথা মনত ৰাখক যে উত্তম সা-সুবিধা থকা হোটেল অধিৱেশন ভৱনৰ কাষত নাথাকিবও পাৰে। আপুনি কোনো হোটেলত ৰোম সংৰক্ষিত কৰিবলৈ টেলিফোনেৰে জনোৱাৰ পূৰ্বেই “আপুনি কেনেকৈ থকা-মেলাৰ ব্যৱস্থাক সহযোগ কৰিব পাৰে” নামৰ বক্সটোত দিয়া পৰামৰ্শবোৰক নিৰীক্ষণ কৰিলে অধিক লাভজনক হʼব। আপুনি হোটেলত টেলিফোনেৰে জনোৱাৰ সময়ত “হোটেলত ৰুম সংৰক্ষিত কৰাৰ উত্তম পদ্ধতি কি?” নামৰ বক্সটোত দিয়া পৰামৰ্শবোৰক লক্ষ্য কৰক।
৫ বিশেষ আৱশ্যকতাসমূহ: পাঁচনি পৌলে কোনো কোনো ভাইসকলক “শক্তিশালী সহায়ক” বুলি উল্লেখ কৰিছিল। (কল. ৪:৭-১১, NW) তেওঁলোকে পৌললৈ ব্যক্তিগতভাৱে সেৱা আগবঢ়াই এক প্ৰকাৰে সহায় কৰিছিল। অধিৱেশনৰ ক্ষেত্ৰত আপুনি কেনেকৈ আনৰ বাবে “শক্তিশালী সহায়ক” হʼব পাৰে? বৃদ্ধ, শাৰীৰিকভাৱে অক্ষম, পূৰ্ণ-সময়ৰ সেৱা আৰু আন ভাই-ভনীসকলক যাতায়ত বা থকা-মেলাৰ ব্যৱস্থাৰ বাবে ব্যৱহাৰিক সহায়ৰ আৱশ্যকতা হʼব পাৰে। তেনে লোকসকলক সহায় কৰাটো সৰ্ব্বপ্ৰথমে আত্মীয় লোকৰ কৰ্তব্য। (১ তীম. ৫:৪) কিন্তু যদি তেওঁলোকে সহায় কৰিব নোৱাৰে, তেন্তে মণ্ডলীৰ সঙ্গী বিশ্বাসী ভাই-ভনীয়ে সহায় কৰিব পাৰে। (যাকো. ১:২৭) পুস্তক অধ্যয়ন অধ্যক্ষই তেওঁৰ সমূহত থকা তেনে বিশেষ সহায়ৰ আৱশ্যক হোৱা কোনো ভাই-ভনী আছেনে নাই সেই বিষয়ে নিশ্চিত কৰা প্ৰয়োজন, যাতে অধিৱেশনত উপস্থিত হʼবলৈ আগতীয়াকৈ পৰিকল্পনা কৰিব পাৰে।
৬ থকা-মেলাৰ ব্যৱস্থাৰ বিশেষ আৱেদন ফৰ্ম কেৱল সেইসকল প্ৰকাশকৰ বাবে উপলব্ধ আছে, যিসকলৰ চোৱা-চিতা পৰিয়ালৰ সদস্য বা তেওঁলোকৰ মণ্ডলীয়ে কৰিব নোৱাৰে। সংস্থাই মণ্ডলীৰ প্ৰাচীন গোষ্ঠীক উদ্দেশ্য কৰি লিখা ডিচেম্বৰ ১৪, ২০০৪ চনৰ পত্ৰখনৰ সামঞ্জস্যত তেনে প্ৰকাশকসকল উপযুক্ত হয়নে নহয় সেই বিষয়ে সেৱা কমিটিয়ে আলোচনা কৰা উচিত। এই সুবিধা কেৱল সেইসকল প্ৰকাশকৰ বাবে, যিসকল প্ৰকাশক নিয়মীয়াকৈ সকলো আধ্যাত্মিক কাৰ্য্যত ভাগ লয় আৰু তেওঁলোকৰ উত্তম আচাৰ-ব্যৱহাৰ কৰা লʼৰা-ছোৱালী আছে।
৭ নিযুক্তি অধিৱেশনৰ বাহিৰে আন এখনত উপস্থিত হোৱা: এই বছৰত কেইখনো ইংৰাজী ভাষাৰ অধিৱেশনৰ বাবে ব্যৱস্থা কৰা হৈছে। গতিকে যদিও ভাই-ভনীসকলক স্থানীয় ভাষাৰ অধিৱেশনত উপস্থিত হʼবলৈ নিযুক্ত কৰা হয়, তথাপিও ইংৰাজী ভালকৈ লিখিব-পঢ়িব জানাসকলক ইংৰাজী ভাষাৰ অধিৱেশনত উপস্থিত হʼবলৈ আগ্ৰহ কৰা হৈছে। এনে কৰাৰ দ্বাৰা স্থানীয় ভাষাৰ অধিৱেশনত উপস্থিত হোৱাসকলৰ সংখ্যা হ্ৰাস পাব। তদুপৰি ইয়াৰ দ্বাৰা কিমান আসন, সাহিত্য, থকা-মেলাৰ ব্যৱস্থা আৰু আন আন সুবিধাসমূহৰ আৱশ্যক, সেই বিষয়ে নিশ্চিত কৰাত সহায় হʼব। যদি আপুনি নিযুক্তি অধিৱেশনৰ বাহিৰে আন এখনত উপস্থিত হʼবলৈ সক্ষম হয়, তেন্তে অনুগ্ৰহ কৰি এপ্ৰিল ২০০৫ চনৰ আমাৰ ৰাজ্য পৰিচৰ্য্যাʼত ভাৰতত অনুস্থিত হʼবলগীয়া সকলোবোৰ অধিৱেশনৰ আৱশ্যকীয় ঠিকনাত সেই বিষয়ে জনাওক। আপুনি আৱেদন কৰি লিখা পত্ৰখনৰ সৈতে থকা-মেলাৰ ব্যৱস্থা বা আন অতিৰিক্ত সংবাদৰ বিষয়ে জানিবলৈ আন এখন লেফাফাত ঠিকনা আৰু ডাক টিকট লগাই পঠাওক। যদি চহৰখনত এখনতকৈ অধিক অধিৱেশন হʼবলগীয়া আছে, তেন্তে আপুনি উপস্থিত হʼবলৈ বিচৰা অধিৱেশনৰ তাৰিখ লিখি পঠিয়াওক।
৮ স্বেচ্ছাকৰ্মীৰ আৱশ্যক: এই ক্ষেত্ৰত যীচুৱে আনৰ আৱশ্যকতাৰ প্ৰতি মনোযোগ দি নম্ৰতাৰ এক উত্তম আৰ্হি প্ৰস্তুত কৰিলে। (লূক ৯:১২-১৭; যোহ. ১৩:৫, ১৪-১৬) যিসকলে অধিৱেশনত তেনে কাৰ্য্য কৰিবলৈ আগবাঢ়ি আহে, দৰাচলতে তেওঁলোকে যীচুৰ আৰ্হিক অনুকৰণ কৰে। অধিৱেশনৰ বিভিন্ন বিভাগৰ আৱশ্যকতাসমূহ পূৰণ কৰিবলৈ অতি সোনকালে স্থানীয় অধিৱেশন সমিটিয়ে তেওঁলোকৰ সৈতে কাৰ্য্য কৰিবলৈ আনক আমন্ত্ৰণ কৰিব। স্বেচ্ছাকৰ্মী হিচাপে কাৰ্য্য আৰু নিযুক্তিবোৰ গ্ৰহণ কৰিবলৈ বিশেষকৈ প্ৰাচীনসকলৰ আৱশ্যক আছে। তেওঁলোকৰ আগ্ৰহী মনোবৃত্তিয়ে মণ্ডলীৰ বাবে এক উত্তম আৰ্হি প্ৰস্তুত কৰিব।—১ পিত. ৫:২, ৩.
৯ আনে কি লক্ষ্য কৰে: এখন হোটেলৰ এগৰাকী মহিলা মেনেজাৰে এইদৰে কয়: “আপোনালোক আমাৰ মন পছন্দৰ লোক। আন লোকসমূহৰ তুলনাত আপোনালোকে অতি ভদ্ৰতাৰে আচাৰ-ব্যৱহাৰ কৰে। ৰুম চোৱাচিতা কৰা কৰ্মচাৰীসকলে মন্তব্য দিছে যে তেওঁলোকৰ সৈতে কেনে ভদ্ৰ আচৰণ কৰা হৈছে আৰু বকসিচ লাভ কৰিছে। দৰাচলতে, আপোনালোকে থকা শনিবাৰ, দেওবাৰে সকলোৱে কাম কৰিব বিচাৰে।” আন এখন হোটেলৰ এজন কৰ্মচাৰীয়ে এইদৰে কয়: “যিহোৱাৰ সাক্ষীসকলৰ সৈতে কাম কৰিবলৈ সহজ।” সম্ভৱতঃ আপোনাৰ এনে উত্তম আৰ্হিৰ বাবে লোকসকলে তেনে মন্তব্য দিয়ে। খন্তেক কল্পনা কৰক, আমাৰ এনে ভদ্ৰ আচৰণ দেখি যিহোৱা ঈশ্বৰে কিমান যে আনন্দিত হয়!—১ পিত. ২:১২.
১০ এই বছৰতো যিহোৱা ঈশ্বৰে তেওঁৰ লোকসকলক শিক্ষাদান কৰিবলৈ “বিশ্বাসী আৰু বুদ্ধিমান ঘৰগিৰী” দ্বাৰা ব্যৱস্থা কৰিছে। (লূক ১২:৪২) অধিৱেশনৰ সম্পূৰ্ণ তিনি দিন উপস্থিত থাকিবলৈ যদিও অধিক পৰিশ্ৰম কৰা আৱশ্যক, তথাপিও তেনে কৰাটো একেবাৰে উপযুক্ত। এই বছৰত হʼবলগীয়া “ঈশ্বৰীয় আজ্ঞাকাৰীতা” জিলা অধিৱেশনে অৱশ্যেই বৰ্তমান আৰু চিৰকালৰ বাবে আমাৰ বিশ্বাস দৃঢ় কৰি তুলিব। এতেকে আঁহক আমি গীতমালা লিখকৰ দৰে এইদৰে কওঁহঁক: “সমাজবোৰৰ মাজত ঈশ্বৰৰ ধন্যবাদ” কৰিম।—গীত ৬৮:২৬.
[Box on page 3]
কাৰ্য্যক্ৰমৰ সময় তালিকা
শুকুৰবাৰ আৰু শনিবাৰ
পুৱা ৯:৩০ বজাৰ পৰা আবেলি ৫:০৫ বজালৈ
দেওবাৰ
পুৱা ৯:৩০ বজাৰ পৰা আবেলি ৪:১০ বজালৈ
[Box on page 4]
আপুনি কেনেকৈ থকা-মেলাৰ ব্যৱস্থাক সহযোগ কৰিব পাৰে
▪ তালিকাত দিয়া হোটেলবোৰৰ সৈতে যোগাযোগ কৰিবলৈ ব্যক্তিগতভাৱে ব্যৱস্থা কৰক।
▪ যদি আপোনাৰ সৈতে অতিৰিক্ত কোনো ব্যক্তি, লʼৰা-ছোৱালী বা বয়সস্থ লোক একেটা ৰুমত থাকিবলগীয়া হয়, তেন্তে হোটেলৰ কৰ্তৃপক্ষক আপোনাৰ আৱশ্যকতাৰ বিষয়ে স্পষ্টকৈ জনোৱা উচিত।
▪ যদি তালিকাত দিয়া হোটেলবোৰত আপুনি ফোন কৰি কোনো ৰুম নাপায় বা হোটেলৰ সৈতে কোনো সমস্যা হয়, তেন্তে মণ্ডলীৰ চেক্ৰেটাৰীক জনোৱা আৱশ্যক। তেওঁ তালিকাৰ ওপৰ ভাগত দিয়া সংবাদবোৰ ব্যৱহাৰ কৰি অধিৱেশনৰ থকা-মেলাৰ আয়োজন কৰা বিভাগক সেই বিষয়ে অৱগত কৰিব আৰু আপোনাৰ বাবে অতিৰিক্ত হোটেলৰ নাম দিয়া হʼব।
▪ কেৱল আপোনাক আৱশ্যক হোৱা ৰুমহে সংৰক্ষিত কৰক।
▪ আপুনি সংৰক্ষিত কৰা হোটেলৰ ৰুমৰ বাবে নিশ্চিত হʼবলৈ আপোনাক আৱশ্যক হোৱা ৰুমৰ বাবে আগতীয়াকৈ টকা জমা কৰক। অন্যথা হোটেলে আপোনাৰ ৰুমতো আনক দিব পাৰে।
▪ আপুনি আন এখন ভাল হোটেল বিচাৰি পালেও সংৰক্ষিত কৰা হোটলৰ ৰুমতহে থাকিবলৈ নিশ্চিত কৰক।
[Box on page 4]
হোটেলত ৰুম সংৰক্ষিত কৰাৰ উত্তম পদ্ধতি কি?
১. তালিকাত দিয়া টেলিফোন নম্বৰ ব্যৱহাৰ কৰি নিয়মিত ব্যৱসায়ৰ সময়ছোৱাতহে টেলিফোন কৰা আৱশ্যক।
২. হোটেলক জনাওক যে আপুনি যিহোৱাৰ সাক্ষীসকলৰ অধিৱেশনত উপস্থিত হʼবলৈ আহিছে।
৩. আপুনি হোটেলত উপস্থিত হোৱা আৰু এৰাৰ নিৰ্দিষ্ট তাৰিখৰ বিষয়ে জনাওক।
৪. যদি কোনো বিশেষ হোটেলত ৰুম উপলব্ধ নাই, তেন্তে তালিকাত দিয়া আনখন হোটেলত ফোন কৰক।
৫. তালিকাত দিয়া ভাড়াতকৈ অধিক ভাড়া নিদিব।
৬. ৰুম সংৰক্ষিত কৰিবলৈ দহ দিনৰ ভিতৰত টকা ডিমান্ড ড্ৰাফ্ট বা মনি অৰ্ডাৰ দ্বাৰা পঠাওক। কেতিয়াও নগদ টকা নপঠিয়াব।
৭. সংৰক্ষণ নিশ্চিত কৰিবলৈ ডিমান্ড ড্ৰাফ্ট বা মনি অৰ্ডাৰ ৰচিদখনত ৰুম নম্বৰ লিখি পঠিয়াবলৈ কওক।