JOEL
1 Jehová Diosajj Petuel chachan Joel* sat yoqaparojj aka arunak arsuñapatakiw parläna:
2 “Ancianonaka,* ak istʼapjjam,
markan taqe jakirinaka, wali atencionamp istʼapjjam.
¿Urunakaman akhamajj pasänti,
jan ukajj nayra awkinakaman urunakapancha pasäna?+
3 Wawanakamar uk cuentapjjam,
wawanakamajj wawanakapar uk cuentapjjpan,
jupanakan wawanakapajj jutïr wawanakapar cuentapjjarakpan.
4 Kunanaktï manqʼantir langostanakajj* jiltʼayapki ukjja, chheqanakani langostanakaw manqʼantapjje.+
Chheqanakani langostanakajj jiltʼayapki ukjja, jan chheqanakani langostanakaw manqʼantapjje.
Jan chheqanakani langostanakajj jiltʼayapki ukjja, wal manqʼthapir langostanakaw manqʼantapjjaraki.+
5 ¡Machjatanaka,+ sartapjjam, jachapjjarakim!
Taqe khitinakatï vino umapkta ukanakajj llakisipjjam,
kuna laykutejj jumanakarojj mosqʼa vino lakanakamat aparapjjtamjja.+
6 Wali chʼamani mä markar uñtasitaw jan jaktʼkaya walja langostanakajj oraqejar mantanipjje.+
Laka chʼakhanakapajj leonan laka chʼakhanakapar uñtasitawa,+ quijadanakapajj leonan quijadapar uñtasitarakiwa.
7 Nayan uvasaj tukji, higos qoqajarojj* khuchoqat jiskʼa troncoruw tukuyjje.
Qʼararasaw maysar jaqti,
jiskʼa ramanakaps qʼarak jaytjje.
8 Kunjamtï llakisiñ isimpi* isthapisisajj virgen tawaqojj llakiski,
tawaqökasin noviopat* llakiski ukham llakisipjjam.
9 Janiw grano ofrendasa+ vino ofrendasa+ Jehová Diosan temploparojj* apasjjeti.
Jehová Diosan servirinakapäki uka sacerdotenakas llakitäsipkiwa.
10 Campojj tukjatawa, oraqejj llakitawa.+
Granojj tukjatawa, machaq vinojj wañtʼjjewa, aceites tukusjjarakiwa.+
11 Yapuchirinakajj janiw kuns kamachtʼirjamäpkiti, uvas apthapirinakajj jachapjjewa,
trigosa cebadas jan utjatap layku.
Camponkir yapunakajj tukusitawa.
12 Uvas alejj wañsjjewa,
higo qoqajj* suwartjjewa.
Granada qoqasa, palmera qoqasa, manzana qoqasa,
camponkir taqe qoqanakas wañsjjarakiwa.+
Kusisiñajj marka taypin phenqʼasiñar tukuyatäjjatap layku.
13 Sacerdotenaka, llakisiñ isinakamp isthapisipjjam, llakisipjjam.*
Altaran servirinakapa, jachapjjam.+
Diosajan servirinakapa, templor jutapjjam, llakisiñ isimpi uchasita arum paqar uñnaqapjjam.
Kuna laykutejj Diosan templopar janiw khitis grano ofrendsa+ ni vino ofrendsa+ apjjeti.
14 Ayuno utjañapatak yatiyapjjam, mä sagrado tantachäwir jawsthapipjjam.+
Ancianonakarojj markankir taqe jaqenakamp chik tantachthapipjjam,
Jehová Diosan templopana,+ Jehová Diosarojj yanaptʼa mayiñatak arnaqasipjjam.
15 ¡Uka urojj jan wali urupunïniwa!
Jehová Diosan urupaw jakʼanki,+
uka urojja Taqe Chʼamani Diosatwa mä tʼunjäwir uñtata jutani.
16 ¿Janit pachpa nayranakasat manqʼañajj apaqatäki?
¿Janit Diosasan templopat kusisiñasa, wal kusisiñas apaqatäki?
17 Lampanakampi satapki uka jathanakajj* wañsjjewa,
imañ utanakas chʼusakiwa.
Granonakan wañtʼatapatjja grano imañ lugaranakas allthapitawa.
18 ¡Uywanakas wararipjjewa!
¡Tama vacanakas jan pasto utjatapat jan kun kamachirjamaw mays maysa sarnaqapjje!
Ovej tamanakas castigotwa tʼaqesipjje.
19 Jehová Dios Tata, jumaruw jawsäma,+
wasarankir pastoni oraqenakajj ninamp phichantatawa,
camponkir taqe qoqanakajj* ninamp phichantatarakiwa.
20 Salvaje animalanakas artʼasipjjtamwa,
jalir umanakan wañtʼjjatap layku,
wasarankir pastoni oraqenakas ninamp phichantatätap layku”.
2 “¡Sionan pututu phustʼapjjam!+
Sagrado qollujan guerran nuwasiñatak arnaqasipjjam,
markan jakirinakajj taqeni khatatipjjpan,
¡Jehová Diosan urupaw jutaski!+ ¡Uka urojj jakʼankjjewa!
2 Uka urojj sinti chʼamak uruwa,+
qenayanakani sinti chʼamak uruwa,+
willjtan qhanapajj qollunak patjjar saratatki ukar uñtasitawa.
Mä markaw utji, waljaniwa, chʼamanirakiwa.+
Janiw kunapachas uka markjamajj utjkänti,
janirakiw mayampis utjkaniti,
ni akjjar jutiri taqe wawanakan wawanakapan maranakapans utjkaniti.
3 Mä ninjamaw taqe kunatï jupa nayraqatankki uk nakhanti,
mä ninjamaw kunatï jupan qhepäjjapankki uk nakhantaraki.+
Nayräjjankki uka oraqejj Edén jardinar uñtasitawa,+
ukampis qhepäjjankirejj mä wasara oraqeruw tuku,
janiw khitis escapkaspati.
4 Jupanakajj caballonakar uñtasitäpjjewa,
guerran nuwasiñatak caballonakar uñtataw tʼijupjjaraki.+
5 Jupanakajj qollunak patjjanakan thoqtiri carronakar uñtasitaw suynapjje,+
wal aqaskir ninajj waña pajar nakhantki ukar uñtasitäpjjewa.
Guerran nuwasiñatak formtʼasipki uka wali chʼamani markar uñtasitäpjjewa.+
6 Jupanak kawsaw markanakajj khatatipjjani,
taqe ajanunakanwa ajjsarapjjatapajj uñjasini.
7 Jupanakajj guerran nuwasiri chachanakar uñtasitaw atacapjje,
soldadonakar uñtasitaw murallanak makatapjje,
sapa maynirakiw thakip saranti,
janiw ni maynis thakipat saranukkiti.
8 Jupanakajj janiw jupanakkamajj nuktʼasipkiti.
Sapa mayni chachaw thakip saranti.
Yaqhepanakatï armanakampi jiwayatäpjjchejja,
mayninakajj janiw nuwasiñatak filanakapat saraqapkiti.
9 Markanakaruw mantapjje, muralla patjjanak tʼijupjje.
Utanakaruw mistupjje, mä lunthatar uñtasitaw ventananakat mantapjje.
10 Langostanakajj* sarantapjje ukhajja, oraqes khatatiwa, alajjpachanakas khatatirakiwa.
Intisa phajjsisa chʼamaktʼiwa,+
warawaranakas janirakiw sum qhanjjapjjeti.
11 Jehová Diosajj ejercitop nayraqatanwa wali jachʼat artʼasini,+ ejercitopan sinti waljätap layku.+
Diosajj arunakap phoqewa, jupajj chʼamanirakiwa.
Jehová Diosan urupajj jachʼawa, wali musparkañarakiwa.+
¿Khitis uka urut escapaspa?”.+
12 “Kuttʼaniñatakejj tiempöskiwa”, siw Jehová Diosajja, “nayan ukarojj taqe chuymampi kuttʼanjjapjjam,+
ayuno lurañampi,+ jachañampi, ayqoñampi.
13 Jan jumanakajj isinakamak chʼiyanoqasipjjamti,+ antisas chuymanakam chʼiyanoqasipjjam,+
jumanakan Jehová Diosamar kuttʼanjjapjjam,
jupajj sinttʼasiriwa, khuyaptʼayasiriwa, paciencianiwa,*+ wali munasiñat jan jaytjasir Diosawa,+
jupajj jan walinak apaniñ amtki uka amtap cambianiwa.
14 Inas jupajj kuntï amtki uk mayjtʼayasajj+
jumanakar bendisipjjchïtam,
ukhamat grano ofrendampi vino ofrendampi jumanakan Jehová Diosamar loqtapjjañamataki.
15 ¡Sionan pututu phustʼapjjam!
Mä ayuno utjañapatak yatiyapjjam, mä sagrado tantachäwir jawsthapipjjam.+
16 Markar tantachthapipjjam, congregacionarojj sagrador tukuyapjjam.+
Jilïr chachanakar* tantachtʼapjjam. Jiskʼanakampiru ñuñuskir wawanakampir tantachtʼapjjam.+
Noviosa noviasa cuartonakapat mistunipjjpan.
17 Pórtico sat mantañ cheqampit altarampit chika taypipansti,+
Jehová Diosar servipki uka sacerdotenakajj jachapjjpan, jupanakajj akham sapjjarakpan:
‘Jehová Dios Tata, markamat khuyaptʼayasikimaya.
Janikiy herenciamarojj* jiskʼachayamti,
markanakampi apnaqatäpjjañapatak jaytasa.
¿Kunatsa markanakajj “kawkinkarak jupanakan Diosapasti” sasin sapjjañapäspa?’+ sasa.
18 Jehová Diosajj taqe chuymaw oraqep arjjatani,
markapat khuyaptʼayasitapwa uñachtʼayani.+
19 Jehová Diosajj markaparojj akham saniwa:
‘Nayaw jumanakarojj granompi, machaq vinompi, aceitempi churasipksma,
jumanakajj wali sistʼatäpjjätawa.+
Janiw yaqha markanakampejj jiskʼachayjjapjjämati.+
20 Alay toqet* jutir enemigorojj jumanakat wali jayaruw apäjja.
Mä waña ukhamarak chʼusa oraqeruw anatatäjja,
nayraqatankir ejercitoparusti inti jalsu toqenkir qotaruw* escapayäjja,
qhepäjjankir ejercitoparusti mar occidental* sat lamar qotaruw escapayäjja.
Jan wali olorapajj alayaruw mistuni,
wali ajjtaskañ olorapajj alayar mistuskakiniwa.+
Kuna laykutejj Diosajj musparkañ luräwinak lurani’.
21 Oraqe, jan ajjsaramti.
Kusisim, wal kusisirakim, Jehová Diosajj musparkañ luräwinak lurani.
22 Salvaje animalanaka, jan jumanakajj ajjsarapjjamti,
wasarankir pastoni camponakajj chʼojjñatataniwa,+
Higo qoqas uvas alis walpun achoqani.+
23 Sionan wawanakapa, jumanakajj Jehová Diosam laykojj kusisipjjam, walpun kusisipjjarakim.+
Jupaw wakisitarjam nayra jallu churapjjätam.
Jumanakatakejj wal jalluntayani,
nayrjamarakiw nayra jallsa qhepa jallsa purjjatayani.+
24 Grano takiyañ cheqanakajj granompi phoqantatäniwa,
chʼirwañ lugaranakanjja machaq vinos aceites jilararakiniwa.+
25 Nayaw jumanakarojj kuntï mara mara aptʼasipkta ukanak kuttʼayjjapjjäma,
kunapachatï cosechanakamajj chheqanakani langostanakampi, jan chheqanakani langostanakampi, manqʼantiri langostanakampi, wali manqʼthapiri langostanakampi manqʼsutäkäna ukapachana,
jupanakajj jumanak contra apayankayäta uka jachʼa ejercitojäpjjewa.+
26 Jumanakajj sistʼasiñkamaw manqtʼasipjjäta,+
jumanakan Jehová Diosaman sutip jachʼañchapjjarakïta,+
jupaw jumanakatakejj musparkañanak luri.
Markajajj janipuniw mayampis phenqʼachatäkaniti.+
27 Jumanakajj Israel marka taypinkatajwa yatipjjäta,+
nayätwa jumanakan Jehová Diosamajja,+ uks yatipjjarakïtawa. ¡Janiw yaqhajj utjkiti!
Markajajj janipuniw mayampis phenqʼachatäkaniti.
28 Ukatsti taqe kasta jaqenakjjaruw espirituj warjjatanëjja.+
Yoqanakapas phuchanakapas profecía arunak arsupjjani.
Jilïr jaqenakapas samkanak samkasipjjani,
waynanakas visionanak uñjapjjani.+
29 Esclavojäpki esclavajäpki ukanakjjarus
espíritu santojwa uka urunakan warjjatanëjja.
30 Alajjpachanakansa oraqensa musparkañanakwa luräjja,
wilampi, ninampi, columnanakar uñtasit jewqʼempiw utjani.+
31 Intejj chʼamaktʼayatäniwa, phajjsis wilar tukuyatäniwa,+
Jehová Diosan wali musparkañ jachʼa urupajj janïra jutkani ukapachana.+
32 Taqe khititï Jehová Diosan sutip artʼaski ukajj salvatäniwa.+
Jehová Diosajj arskäna ukarjamaw escapirinakajj Sion Qollunkapjjani Jerusalén markankapjjani,+
khitinakarutï Jehová Diosajj jawski uka salvasirinaka”.
3 “Uka urunakansa uka tiemponsa,
kunapachatï Judá ukhamarak Jerusalén markanakat preso apatäpkäna ukanakar kuttʼayanjjä ukhajja,+
2 taqe markanakaruw tantachtʼarakëjja,
Jehosafat* sat valleruw saraqayanëjja.
Ukanwa jupanakarojj juzgäjja,+
kunanaktï markajäki herenciajäkaraki uka Israelar lurapkäna ukanak layku.
Jupanakajj yaqha markanak taypiruw israelitanakar anatatapjjäna,
oraqejsa jalanoqasipjjänwa.+
3 Jupanakasti markaj jalanoqasiñatakejj suertenak willtapjjäna.+
Mä prostitutamp ikintasiñatakejj mä yoqall wawa aljapjjäna,
vino umañ munasajj mä imill wawa aljapjjarakïna.
4 ¿Kunas naya contrajj utji,
Tiro, Sidón ukhamarak Filistean taqe oraqenakapa?
¿Kunatcha naya contrajj vengasisipkpta?
Jumanakatï nayat vengasisipkstajja,
nayajj ratukiw luratanakamarjam jumanakar kuttʼayapjjäma.+
5 Kuna laykutejj jumanakaw qollqejsa qorijsa apasjjapjjtajja,+
kunanakatï nayan wali valoranïki ukanak diosanakaman templonakaparuw apantasipjjtajja.
6 Judá ukhamarak Jerusalén markanakan jakirinakarojj griegonakaruw aljantapjjtajja,+
ukhamat oraqepat jayarstʼayañataki.
7 Ukampis nayajj kawkirutï aljapkta uka cheqatwa jupanakar apanjjäjja,+
jumanakarojj luratanakamarjamaw kuttʼayapjjäma.
8 Jumanakan yoqanakamarus phuchanakamarus Judá markaruw aljantäjja,+
jupanakasti Saba* markankir jaqenakaruw aljantapjjani, wali jayankir markaru,
naya Jehová Dios pachpaw uk arsta.
9 Yaqha markanak taypin ak yatiyapjjam:+
‘¡Guerratak wakichasipjjam! ¡Wali chʼamani chachanakajj sartasipjjpan!
¡Taqe soldadonakajj jakʼachasipjjpan! ¡Nayrar sarantapjjpan!+
10 Yapuchañatak rejanakam espadanakar tukuyapjjam, jusinakam* lanzanakar tukuyapjjam.
Jan chʼamanïki ukajj akham sispan: “¡Nayajj chʼamanïtwa!” sasa.
11 Uka jakʼankir taqe markanaka, ¡jutapjjam, purapat yanaptʼasipjjam! ¡Tantachtʼasipjjam!’”.+
Jehová Dios Tata, guerran nuwasiri chʼamaninakamar uka lugarar saraqayanim.
12 “Yaqha markanakajj onjjtasipjjpan, Jehosafat sat valler makatapjjpan.
Ukanwa nayajj uka jakʼankir taqe markanakar juzgañatak qontʼasëjja.+
13 Jusimp* yawthapipjjam, cosechanakajj poqoratäjjewa.
Saraqapjjam, taksupjjarakim, uvas chʼirwañ lugarajj phoqawa.+
Chʼirwañ lugaranakan wakullanakapajj phoqaratäjjewa, uka markanakan jan walinakapajj sinti waljätap layku.
14 Amtar Puriña sat vallen sinti walja jaqenakaw utji,
Amtar Puriña sat vallen Jehová Diosan urupajj jakʼankjjatap layku.+
15 Intisa phajjsisa chʼamaktʼaniwa,
warawaranakajj janiw qhantʼjjapjjaniti.
16 Jehová Diosajj mä leonar uñtataw Sionatpach warartatani,
Jerusalenatpach artʼasinini.
Alajjpachasa oraqesa khatatiniwa,
ukampis Jehová Diosajj markapatak mä imantasiñäniwa,+
Israel markatakejj jachʼa perqanakamp muyuntat lugaräniwa.
17 Jumanakajj yatipjjätawa, nayätwa jumanakan Jehová Diosamajja, nayajj Sionan jakirïtwa, sagrado qollujana,+
Jerusalenajj sagrado lugaräniwa,+
jan uñtʼatanakajj* janipuniw mayampis uka cheq pasapkaniti.+
18 Uka urunsti, qollunakat mosqʼa vinow chʼaqarani,+
jiskʼa qollunakat lechew jalarani,
Judá markan taqe uma jalsunakapat umaw jalsurakini.
19 Ukampis Egiptojj chʼusa oraqer tukuyatäniwa,+
Edom markajj mä wasara oraqer tukuyatarakïniwa,+
Judá markar jan wal lurapjjatap layku,+
uka oraqenwa jan juchaninakan wilap wartapjjarakïna.+
20 Ukampis Judá markan jakirinakajj utjapuniniwa,
Jerusalenans ukhamaraki, wawanakapans wawanakapataki.+
21 Nayrajj janiw jupanakarojj jan juchanjam uñjkayätti, ukampis jichhajj jan juchanjam jupanakar uñj-jjäjja.+
Jehová Diosajj Sionan jakani”.+
Uka sutejja, “Diosajj Jehová Diosawa” sañ muni.
Jan ukajja, “Jilïr irpirinaka”.
“Langosta” siski uk glosarion liytʼäta.
Jan ukajja, “arbolajarojj”.
“Llakisiñ isi” siski uk glosarion liytʼäta.
Jan ukajja, “esposopat”.
Hebreo arunjja, “utaparojj”.
Jan ukajja, “arbolajj”.
Jan ukajja, “pechonakam leqʼesipjjam”.
Ukajja, “waña higonakajj” sasaw jaqokipasirakispa.
Jan ukajja, “arbolanakajj”.
“Langosta” siski uk glosarion liytʼäta.
Jan ukajja, “jan ratuk colerasiriwa”.
Jan ukajja, “Ancianonakar”.
Jan ukajja, “markamarojj”.
Jan ukajja, “Norte toqet”.
Ukajja, Mar Muerto qotatwa parlaski.
Ukajja, Mediterráneo sat lamar qotatwa parlaski.
Jan ukajja, “arbolanakas”.
Uka sutejja, “Jehová Diosaw Juezajja” sañ muni.
Jan ukajja, “Seba”.
Jan ukajja, “segaderanakam”.
Jan ukajja, “Segaderamp”.
Jan ukajja, “extranjeronakajj”.
Hebreo arunjja, “utapat”.