Diciembre

Etiopía markankir palacion trabajir jaqejja, ¿bautisasiñatak wakichtʼatänti? Uka jaqejja, “Diosar adoririw Jerusalén markar saratayna” (Hech. 8:27). Ukhamajj judionakan religionaparuw jupajj mantäna. Hebreo Arut Qellqatanak uñtʼänwa, uka taypiw Jehová Diosat yateqäna. Ukampis jupajj jukʼampinak yatiñ munäna. Kunapachatï Felipejj thakin jikjjatkäna ukhajja, uka chachajj Isaías profetan mä rollop liyiskäna (Hech. 8:28). Ukhamajj wal jupajj yateqañ munäna. Jehová Diosar adorañatakejja, Etiopía markat Jerusalén markankir temploruw viajirakïna. Kuntï Etiopía markankir jaqejj jan yatkäna ukwa Felipejj qhanañchäna, cheqas wali wakiskir cheqa yatichäwinakwa qhanañchäna. Ukanakat mayajja Jesusajj Mesiasätapawa (Hech. 8:34, 35). Ukanak yatisajja, uka jaqejj Jehová Diosarus Jesusarus jukʼampiw munasïna, ukatwa bautisasiñ amtäna, Jesusan arkiripäjjañwa amtarakïna. Felipejj bautisasiñapatak wakichtʼatätap amuyänwa, ukatwa uka jaqer bautisäna. w23.03 págs. 8, 9 párrs. 3-6

Janitï cheq parlkañänejja, janiw Jehová Diosarojj kusisiykañäniti (Prov. 6:16, 17). Jaqenakatakejj kʼarisiñajj walikïskchisa, jiwasajj Jehová Diosjam amuyañwa muntanjja (Sal. 15:1, 2). Cheqas jiwasajj janiw jan phenqʼan kʼarinak parlkañäniti, ukampis mayninakan mayj amuyapjjañapatak kunatï cheqäki uk imtʼañajj janiw walïkarakiti. Janirakiw arunak apnaqerïñasäkiti (Prov. 25:23; 2 Tes. 3:11). Jumatï mayniru mayninakjjat parlir istʼäta ukhajja, ratukiw yaqha toqet parlañama, kunatï chʼamañchtʼkaspa ukwa parlañamaraki. Akapachanjja jan walinak parlir jaqenak taypinwa jaktanjja. Ukatwa kunjamtï Jehová Diosajj parlañas munki ukham parlañatak chʼamachasiñasa. Jiwasatï predicacionansa, tantachäwinakansa, mayninakamp parlkasas Jehová Diosar parlatasamp jachʼañchañatak chʼamachasiñäni ukhajja, jupajj bendisistaniwa. Jan walinak parlir jaqenakajj jan utj-jjani ukhajja, Jehová Diosar parlatasamp jachʼañchañajj jukʼamp facilakëjjaniwa (Jud. 15). w22.04 pág. 9 párrs. 18-20

Jehová Diosas Jesusas qhawqsa munasistu uka toqet amuytʼtan ukhajja, jupanakarojj munasiraktanwa (1 Juan 4:10). Jesusajj sapa mayni jiwasanak layku jiwatap amuytan ukhajja, jukʼampiw jupar munastanjja. Apóstol Pablojj Jesusajj jupa layku jiwatapat walpun yuspäräna. Ukatwa Galaciankirinakar qellqkäna uka cartapan akham säna: “Diosan Yoqapa[jja] […] nayarojj wal munasitu, naya laykurakiw jakäwip churäna” sasa (Gál. 2:20). Cheqas Jesusan sacrificiot loqtasitapatwa Jehová Diosajj amigopäñamatak jupan ukar irpasintamjja (Juan 6:44). Jehová Diosajj suma chuymanïtamwa uñjäna, amigomäñatakis wali jila precio pagawayi, ¿janit uk yatiñajj chuymamar purtʼktamjja? ¿Janit Jehová Diosampiru Jesusampir jukʼamp munasiñatak yanaptʼkaraktamjja? Ukatwa taqenis akham jisktʼasiñasa: “¿Jehová Diosampi Jesusampi nayar munasipjjatapajj kun lurañatakis yanaptʼitu?” sasa. Cheqas Diosampiru Cristompir munasitasatwa mayninakar munasiraktanjja (2 Cor. 5:14, 15; 6:1, 2). w23.01 pág. 28 párrs. 6, 7

Servirinakapan ‘mayachtʼat servipjjañapatakejja’, Biblia toqew Jehová Diosajj yanaptʼi. Jupajj humilde chuyman jaqenakan entiendipjjañapatakikiw Biblian walja partenakap qellqayäna (Luc. 10:21). Cheqas oraqpachankir taqe jaqenakaw Biblia liyipjje. Ukampis humilde chuyman jaqenakakiw kuntï Bibliajj siski uk entiendipjjaspa, ukarjamas sarnaqapjjarakispa (2 Cor. 3:15, 16). Kunjamsa Jehová Diosan yatiñapajj Biblian uñachtʼayasi uk uñjañäni. Jehová Diosajj janiw mä gruporjam uñjasakejj Biblia toqejj yatichkistuti, jan ukasti sapa mayniruw yatichistu, chuymacharakistu. Diosan Arup liyisajj sapa mayni jiwasanakat llakisitapwa amuytanjja (Is. 30:21). ¿Jiwasatakjam mä texto liytʼirïtanti? Jïsa, walja kutiw liytʼpachätanjja. Niyakejjay Bibliajj millón millón jaqenakatak qellqatächejja, ¿kunjamarak yatichäwinakapajj jichha tiempon jakir jaqenakarojj sapa maynir yanaptʼaspasti? Kuna laykutejj Biblia qellqayki ukat sipans jukʼamp yatiñanejj janiw yaqhajj utjkiti (2 Tim. 3:16, 17). w23.02 págs. 4, 5 párrs. 8-10

Cheqpach cristianonakajja, Jehová Diosarojj wal munastanjja, ukatwa jupar jukʼamp sum serviñ muntanjja. Ukampis jupar jukʼamp serviñatakejj amtanakanïñasawa. Sañäni, suma cristianöñatakiw chʼamachasiñasa, kunanaktï jan lurirïktan ukanak lurañwa amtañasa, kunjamanakatsa mayninakar yanaptʼsna ukwa amtañasaraki. ¿Kunatsa Diosar serviñan amtanakanïñasa, ukanak phoqañatak chʼamachasiñasaraki? Nayraqatjja, alajjpachankiri munasir Awkisaruw kusisiyañ muntanjja. Kunanaktï sum lurañ yatktan ukanakamp Jehová Diosar sirvtan ukhajja, jupajj wal kusisi. Ukatjja jilat kullakanakasar yanaptʼañatakejj jukʼamp suma cristianöñatakiw chʼamachasiñ munaraktanjja (1 Tes. 4:9, 10). Qhawqha tiemposay Diosar serviskstanjja, taqeniw Diosar serviñan jiltaskaksna. w22.04 pág. 22 párrs. 1, 2

Aka mundonkir politiconakajj niyaw Jachʼa Babiloniaru, mä arunjja oraqpachankir taqe falso religionanakar tʼunjapjjani. Ukampiw jachʼa tʼaqesiñ tiempojj qalltani. Ukham pasatapatjja, ¿walja jaqenakat Jehová Diosar adorapjjpachäni? Janiwa. Jan ukasti, kunjamtï Apocalipsis capítulo 6 ukan siskejja, Diosar jan servipki ukanakajj aka mundonkir politiconakaru ukat negocionak luririnakaruw jarkʼaqasiñatak thaqapjjani. Uka capitulorjamajja, jupanakajj qollunakampi sasipjjewa. Niyakejjay jupanakajj Diosan Reinop toqet jan saytʼasipkchinejja, Jehová Diosajj enemigonakaparjamaw uñj-jjani (Luc. 11:23; Apoc. 6:15-17). Jan wali jachʼa tʼaqesiñ tiemponjja, Jehová Diosar jan jitheqtas servirinakan mayjäpjjatapajj qhanaw amuyasini. Jupanakakiw aka oraqen Diosar servisipkani, janirakiw ‘salvaje animalarus’ apoyapkaniti (Apoc. 13:14-17). w22.05 págs. 16, 17 párrs. 8, 9

Diosan servirinakapajj janiw “Reinon suma yatiyäwinakapak” yatiyapkiti (Mat. 24:14). Jan ukasti, Apocalipsis 8-10 capitulonakan parlki uka angelanakaruw apoyapjjañaparaki. Uka angelanakajja, khitinakatï Diosan Reinop jan katoqañ munapki ukanakajj kuna jan walinakansa uñjasipjjani ukwa yatiyapjje. Ukatwa Jehová Diosan Testigonakapajj ‘chhijchhimpiru ninampiru’ uñtasitäki uka juchañchäw yatiyäwi yatiyasktanjja. Uka yatiyäwejja, Supayan apnaqat aka jan wali pachan kunanakatï utjki ukanakarojj Diosajj kamachanisa ukwa qhanañchi (Apoc. 8:7, 13). Akapachan tukusiñapajj jakʼankatap jaqenakajj yatipjjañapawa. Ukhamatakwa Jehová Diosan wali colerasiñ urupat salvasiñatakejj cambiapjjaspa (Sof. 2:2, 3). Ukampis uka yatiyäwjja, janiw taqenejj istʼañ munapkiti, ukatwa jan ajjsartʼirïñasajj wakisi. Jachʼa tʼaqesiña tiemponjja, uka juchañchäwi yatiyäwejj jukʼampiw jaqenakar colertʼayani (Apoc. 16:21). w22.05 pág. 7 párrs. 18, 19

Inas mä matrimoniojj wawanak uywañ toqet walja discursonak istʼawaychi. Ukampis wawanëjjapjje ukhajja, taqe kunas janiw nayrjamäjjeti. Wawanak uywañ toqet parlki taqe uka wiñay yatichäwinakapajja, jupanakatakejj jukʼamp importantëjjewa. ¡Awk taykjamajj jukʼamp jachʼa responsabilidadanëjjapjjaniwa! Kunapachatï jakäwisan cambionakajj utjki ukhajja, sum uñtʼkayätan uka wiñay yatichäwinakarojj janiw nayrjam uñj-jjtanti. Ukatwa Jehová Diosan servirinakapajj kunjamtï Israel markan reyinakapajj lurapjjañapäkäna ukham Biblia ‘sapüru’ liytanjja, ukat lupʼiraktanjja (Deut. 17:19). Awk taykanaka, cristianjamajj Jehová Diosar uñtʼapjjañapatakiw wawanakamar yanaptʼapjjañama, ukajj mä jachʼa privilegiowa. Ukampis janiw Diosat aleq ukhamak yatichapjjañamäkiti, jan ukasti Jehová Diosar taqe chuyma munasipjjañapatakiw yanaptʼapjjañama. w22.05 pág. 26 párrs. 2, 3

Perdonatäñatakejja, janiw jucha luratanakasat aleq ukhamak llakisiñasakïkiti, jan ukasti luratanakasampiw arrepentisitas uñachtʼayañasa. Jehová Diosamp perdonatäñatakejja, maynejj kuttʼanjjañaparakiwa. Kuttʼaniña siski ukajja, jan wali thak apanukuña, kunjamtï Jehová Diosajj munki ukarjam jakañ qalltaña sañ muni (Is. 55:7). Kuttʼanki uka jaqejja, amuyup cambiañapawa, ukhamat Jehová Diosan amuyunakapamp irpayasiñataki (Rom. 12:2; Efes. 4:23). Jan wali amuyunakapa, jan wali luräwinakap apanukuñatakis jankʼakïñapawa (Col. 3:7-9). Ukampis janipun ak armañäniti, Jehová Diosan perdonatäñatakisa, juchanakasat qʼomachatäñatakis Jesusan sacrificiot loqtasitaparuw confiyañasa. Kunapachatï Jehová Diosajj cambiañatak chʼamachasitas uñjki ukhajja, Yoqapan sacrificiot loqtasitapjjaruw perdonistu (1 Juan 1:7). w22.06 pág. 6 párrs. 16, 17

Nayra maranakatpachasa jaqenakajj jupanakpachpaw jan waltʼayasipjje (Ecl. 8:9). Autoridadanïpki ukanakajj yaqhanakarojj tʼaqesiyapjjewa, yaqhepajj jaqe masipar nuwjasaw jan waltʼayapjje, yaqhepajj escuela masinakaparuw insultapjje ukat amenazapjje, yaqhepajj pachpa familiaparuw tʼaqesiyapjje. ¡Uka razonatwa jaqenakajj yaqha jaqenakar ajjsarapjje! Jaqenakar ajjsaratasat ¿kunanaksa Supayajj lurayistaspa? Jaqenakar ajjsarañat jan predikjjsna jan ukajj Jehová Diosan mandamientonakap jan phoqjjsna ukwa Supayajj muni. Yaqhep gobiernonakarus predicación jarkʼapjjañapataki, jiwasar arknaqapjjañapatakiw amtayi (Luc. 21:12). Supayan apnaqat akapachanjja, walja jaqenakaw Jehová Diosan Testigonakapat qʼewjat yatiyäwinak yatiyapjje, jan ukajj jan wali amtampiw kʼarinak parlapjje. Uka kʼarinak creyirinakajj inas jiwasat sawkasipjjchini jan ukajj tʼaqesiyapjjchistani (Mat. 10:36). Ukampis Supayan uka jan wali amtanakap yatjjtanwa; nayrïr patak maranakansa uka pachparakwa luräna (Hech. 5:27, 28, 40). w22.06 pág. 16 párrs. 10, 11

Niyakejjay kunatï cheqapäki ukar ‘waljanir’ apaschinejja, ¿khitinakas uka taypinkapjjani? Jiwatat jaktanirinakampi, Armagedón jakkir pasirinakampi, machaq oraqen nasir wawanakampi. Waranqa Maranak tukuyatarojja, oraqen taqe jakirinakajj perfectöjjapjjaniwa. Ukampis ak amtañasawa, maynejj perfectöjjchinisa, janiw wiñay jakañ katoqañatakejj derechonïkaspas ukham sañ munkiti. Adanampit Evampit amuytʼañäni, jupanakajj perfectöpkchïnsa, wiñay jakañ katoqañatakejj Jehová Diosar istʼapjjatapwa uñachtʼayapjjañapäna. Ukampis jupanakajj janiw istʼapkänti (Rom. 5:12). Waranqa Maranak tukuyarojj taqeniw aka oraqen jakirinakajj perfectöjjapjjani. ¿Taqe uka perfecto jaqenakat Jehová Diosan gobiernoparojj wiñayatak apoyapjjpachäni? Jan ukajj ¿yaqhepanakajj perfectökasin Diosat jitheqtapkäna uka Adán Evar uñtasitäpjjpachänicha? Uka tiemponwa uka jisktʼanakarojj qhanañchasini. w22.09 págs. 22, 23 párrs. 12-14

Kuna jan walinakatï akapachan pasaski ukanak uñjasajja, jutïrin ukanakajj askichasjjaniwa sasin creyiñajj ¿jumatak chʼamakiti? Walja familianakajj janiw nayrjam munasjjapjjeti. Jilaparte jaqenakajj jukʼamp nuwasiri, jupanak pachpatak llakisiri, chʼajjwiri ukhamäjjapjjewa. Waljanitakejja autoridadanïpki ukanakar confiyañajj chʼamawa. Ukampis taqe ukanakajja, jutïrin taqe kunas askichasjjaniwa sasin confiyañatakiw yanaptʼistaspa. ¿Kunatsa ukham sistanjja? ‘Qhepa urunakat’ Biblian parlki uka profeciarjamaw jaqenakajj sarnaqasipki (2 Tim. 3:1-5). Uka profecian phoqasitapajja, Jesucristojj Diosan Reinopan Reyjam apnaqjjatapwa uñachtʼayistu. Suma chuyman jaqenakat janiw khitis “ukajj janiw phoqaskiti” sasin siskaspati. Ukampis Reino toqet parlir jukʼamp profecianakaw utji. Taqe uka profecianakajja, mä rompecabezan partenakapjamaw armthapisi, ukanakaw Jehová Diosan horariopan kuna tiemponsa jakasktan uk amuyañatak yanaptʼistu. w22.07 pág. 2 párrs. 1, 2

COVID-19 pandemianjja tantachäwinakatakisa predicañatakis qhana instruccionanakwa katoqawaytanjja. Jankʼakiw tantachäwinakas asambleanakas videoconferencia toqe apasjjäna, carta toqes teléfono toqes predicasjjarakïnwa. Jehová Diosasti, chʼamachasitasarojj bendisiwayarakiwa. Walja sucursalanakajja, publicadoranakajj wal jiljjattawayi sapjjewa. Pandemianjja walja jilat kullakanakaw suma experiencianak jikjjatawayapjje. Yaqhep jilat kullakanakajja, Diosan markapajj sintjamakiw cuidjjestu sasin inas amuyapjjchïna. Ukampis kutin kutiniw kunjamsa Diosan markapajj wali yatiñampi irpistu uk amuyawaytanjja. Jiwasatï kunjamsa Jesusajj wali munasiñampi irpistu uka toqet lupʼiñäni ukhajja, janiw aka toqet payachaskañäniti: kunasay jutir urunakan pasaskpan, Jehová Diosampi munat Yoqapampejj jiwasampïpjjaniwa (Heb. 13:5, 6). w22.07 pág. 13 párrs. 15, 16

Jehová Diosar jachʼañchañasäkchisa, taqe kunanaktï churkistu ukanakat oracionanakasan yuspärañasarakiwa. Kunayman suma coloranakan panqaranakata, kunayman suma manqʼanakata, amigonakasatwa yuspärsna. Munasir Awkisajja, taqe ukanaksa, yaqha ukhamanaksa jiwasan kusisitäñasatakiw churistu (Sal. 104:12-15, 24). Jehová Diosajj jupar confiyaskakiñatakejj walja yatichäwinakwa churistu, jutïritak mä suytʼäwsa churarakistuwa, ukanakatwa jupar jukʼamp yuspärañasa. Taqe kunanaktï Jehová Diosajj jiwasanak layku lurki ukanakat jupar yuspärañ facilakwa armassna. ¿Kunsa jan armasiñatakejj lursna? Kunanaktï mayisktan ukanakwa mä listar qellqtʼassna, ukatjja sapa kutiw kunjamsa Jehová Diosajj mayisitasar jaysistu uk listasan uñjjatsna. Ukatsti oracionanwa jiwasar yanaptʼatapat yuspärsna (Col. 3:15). w22.07 pág. 22 párrs. 8, 9

Cheqa yatichäwinakat askinak apsuñatakejj janiw aleq ukhamak yatjjatañasäkiti, jan ukasti cheqa yatichäwinakarjamaw sarnaqañasa, mä arunjja yateqktan ukarjamaw lurañasa. Ukham lurasakiw wali kusisitäñäni (Sant. 1:25). ¿Kunjamsa cheqa yatichäwinakarjam sarnaqaskatas yatsna? Kunanaksa sum lurasktan, kunanakan cambiañatakis chʼamachasiñasa ukanak yatiñatakejj jiwaspachpaw uñakiptʼasiñasa sasaw mä jilatajj säna. Apóstol Pablojj akham sänwa: “Kawkjakamajjay Diosar serviñan jiltawaystan uka thaknam sum sarnaqaskakiñäni” sasa (Filip. 3:16). ‘Cheqa yatichäwinakarjam sarnaqañatak’ wal chʼamachasiñajj kunjamsa yanaptʼistu ukanakat amuytʼañäni. Cheqa yatichäwinakarjam sarnaqasajj kusisitaw jakastanjja, Jehová Diosarusa jilat kullakanakarus kusisiyaraktanwa (Prov. 27:11; 3 Juan 4). Uka razonanakatwa cheqa yatichäwinakar munastanjja, ukarjamas sarnaqaraktanjja. w22.08 pág. 19 párrs. 16-18

¿Kunjamsa ancianonakajj Jehová Diosampir Jesusampir munasipjjatap uñachtʼayapjjaspa? Jesusan ovejanakapar munasiñamp cuidasaw uñachtʼayapjjaspa (1 Ped. 5:1, 2). Uka toqetjja Diosan Yoqapajj wali qhanwa apóstol Pedror ewjjtʼäna. Niyakejjay Pedrojj Jesusar kimsa kuti jan uñtʼir tukchïnjja, Jesusar munasitap wal uñachtʼayañ munäna. Jesusajj jaktjjäna ukhajja, akham sasaw Pedror jisktʼäna: “Simón, Juanan yoqapa, ¿jumajj nayar munasistati?” sasa. Cheqas Pedrojj kunaymanitwa Jesusar munasitap uñachtʼayaspäna. Jesusasti juparojj akham sarakïnwa: “Jiskʼa ovejanakajar awatirapita” sasa (Juan 21:15-17). Ukat uksarojja, Pedrojj munasiñampiw Tatitun ovejanakapar cuidäna, ukhamatwa jupar munasitap uñachtʼayäna. ¿Kunjamsa ancianonakajj kuntï Jesusajj Pedror siskäna uka arunakarjam taqe chuym phoqapjjaspa? Jehová Diosampir Jesusampir munasipjjatap uñachtʼayañatakejja, jilat kullakanakar chʼamañchtʼañatakiw tiempo apstʼasipjjañapa, inactivonakar yanaptʼañatakiw chʼamachasipjjañaparaki (Ezeq. 34:11, 12). w23.01 pág. 29 párrs. 10, 11

Mä jan wal apanukuñatak chʼamachasiskta uk janiw khitis entiendkitaspati sasin janiw amuyañasäkiti. Ukham amuyañajj mä trampäspawa, mä jan wal jaytañatak chʼamachasitasajj inamayäkaspasa, janipunis ukajj jaytañjamäkaspa ukham amuyjjsna. Ukampis ukham amuyañajj janiw Bibliarjamäkiti, Bibliajj akham siwa: “Jupaw yantʼanakan aguantapjjañamatakejj yanaptʼapjjätam” sasa. Ukhamajj chuymasantï mä jan wal lurañajj wal utjchejja, Jehová Diosarojj jan jitheqtas serviskaksnawa. Diosan yanaptʼapampejja, uka jan wal lurañ munañampejj janiw apayaskañäniti. Ak amtapjjapuniñäni: pantjasirïtas laykojja, mä jan wal lurañ munañajj chuymasan utjakipuniniwa. Ukampis mä jan wal lurañ munañäni ukhajja, José waynjamarakiw ukanak jankʼak apanukuñasa, jupajj Potifaran esposap nayraqatat jankʼakiw escapjjäna (Gén. 39:12). Janipuniw mä jan wal lurañ munktan ukarojj mä esclavjam katuyasiñasäkiti. w23.01 págs. 12, 13 párrs. 16, 17

Jehová Diosajj cheqapar uñjir Diosawa (Deut. 32:4). Khititejj cheqapar uñjirïki ukajja, janiw khitirus yaqhachkiti, Jehová Diosajj janiw khitirus yaqhachkarakiti (Hech. 10:34, 35). Kawkïr arunakarus Bibliajj qellqasini uk ajllisaw jan yaqhachasirïtap uñachtʼayäna. Tukuy urunakan ‘kunatï cheqäki uk uñtʼañajj waljäniwa’, mä arunjja walja jaqenakaw kuntï Bibliajj siski uk amuyapjjani sasaw Jehová Diosajj arsüna (Dan. 12:4). Ukatakejj Bibliasa, Bibliat apstʼat qellqatanakas walja arunakaruw traducisiwayi, imprimisiwayi, lakirasiwayaraki. Jehová Diosan markapajja, phoqatpachasa jan ukajj mä partekis 240 jila arunakaruw Biblia traduciwayapjje, taqeniw mä Biblia gratisak katoqapjjarakispa. Ukhamatwa janïr akapachan tukusiñapkamajj taqe markanakankir millón millón jaqenakajj ‘Reinon suma yatiyäwinakap’ katoqasipki (Mat. 24:14). Jehová Diosajj cheqapar uñjir Diosawa, jukʼamp jaqenakajj Biblia liytʼasin jupar uñtʼapjjaspa ukwa munaraki. Kuna laykutejj taqeniruw wal munasistu. w23.02 pág. 5 párrs. 11, 12

¿Kunatï Jehová Diosatakejj cheqapäki ukar munastati? Munaspachätawa. Ukampis taqeniw pantjasirïtanjja, jiwasatï jan amuyaskañäni ukhajja, kunatï aka mundotakejj walïki jan walïkaraki ukampejj facilakwa apayassna (Is. 5:20). Jesusajj aka oraqenkkäna ukhajja, religión pʼeqtʼirinakajj cheqapar sarnaqerïpkaspas ukhamwa amuyasipjjäna. Ukampis Jesusajja, mayninakar jan munasiñamp uñjapjjatapata, kunatï walïki jan walïki ukanak jupanak pachpa amtapjjatapat jupanakar juchañchänwa (Ecl. 7:16; Luc. 16:15). Jichha tiemponjja, jaqenakajj jupanakjamäpjjarakiwa. Janis kuna jan walsa lurapkaspa ukhamwa jupanakajj amuyapjje. Mayninakat jilankapkaspas ukhamwa amuyasipjje, mayninakats jan wal parlapjjaraki. Ukham jaqenakarojj Jehová Diosajj wal uñisi, ukham jaqëñajj janirakiw kunatï Jehová Diosatak cheqapäki ukarjamäkiti. Kunatï cheqapäki ukarjam lurañajj wali askiwa, mä arunjja kunatï cheqapäki ukarjam lurañajj kunatï Jehová Diosatakejj walïki ukarjam luraña sañwa muni. “Cheqapa” jan ukajj “justicia” sasin Biblian traducisiwayki uka arunakajja, Jehová Diosan leyinakaparjam jakaña sañwa muni. w22.08 pág. 27 párrs. 3-5

Discipulonakapajj pantjasipkchïnsa, Jesusajj jupanakar confiyänwa (Juan 15:16). Santiagompi Juanampejj Diosan Reinopan jupamp chik qontʼasiñwa mayipjjäna, ukampis Jesusajj janiw kuna razonatsa Jehová Diosar servipjjpacha sasin amuykänti, janirakiw jupanakarojj janiw apostolonakäjjapjjätati sasins siskänti (Mar. 10:35-40). Katuntapkäna uka arumajja, taqpach discipulonakapaw jupar jaytanukjjapjjäna (Mat. 26:56). Ukampis Jesusajj jupanakar confiyaskakïnwa. Pantjasitanakap yatkchïnsa, “tukuykamaw jupanakar munasïna” (Juan 13:1). Jaktjjäna uka qhepatsa, Diosat jan jitheqtiri 11 apostolonakaparojj jaqenakar discipulor tukuyapjjañapataki, wali valorani ovejitanakapar uñjapjjañapatakiw mä jachʼa responsabilidad churäna (Mat. 28:19, 20; Juan 21:15-17). Pantjasiri uka chachanakar confiyasajj janiw pantjaskänti. Apostolonakajj jiwañkamaw Jehová Diosar jan jitheqtas servipjjäna. Kunjamtï uñjawayktanjja, Jesusajj pantjasir jaqenakaruw confiyäna. Jupat yateqasiñajj mayninakar confiyañatakiw chʼamañchtʼistu. w22.09 pág. 6 párr. 12

Jehová Diosajj jiwasar munasitapata, jiwasamp chikäskatapat jan payachaskañäni ukhajja, Supayajj janiw ajjsaraykistaniti. Salmo 118 qellqerejj kuna llakinakansa uñjasïna uka toqet parltʼañäni. Jupajj walja enemigonakanïnwa, enemigonakap taypinjja wali importante jaqenakaw utjäna (versículos 9, 10). Awisajj sinti jan walinakpunwa aguantañapäna (versículo 13). Jehová Diosas cheqañcharakïnwa (versículo 18). Ukhamanakan uñjaskasas akham sasaw cancionapan säna: “Janiw ajjsarkäti” sasa. Alajjpachankir awkipajj cheqañchkchïnsa, qhawqsa jupar munasïna uk yatiñaw jan ajjsarañatak yanaptʼäna. Salmistajja, kunas kunäskpan munasir Diosajajj nayar yanaptʼañatakejj jankʼakïniwa sasaw taqe chuyma confiyäna (Sal. 118:29). Sapa mayni cristianow Jehová Diosajj nayar munasituwa sasin taqe chuyma confiyañapa. Ukham confiyañaw akanakar jan ajjsarañatak yanaptʼistani: 1) janjamakiw familiajar mantiniñ puedkäti sasin ajjsaraña, 2) jaqenakar ajjsaraña, 3) jiwañar ajjsaraña. w22.06 págs. 14, 15 párrs. 3, 4

Jakäwisanjja Jehová Diosar adorañaw nayrankañapa. Niyakejjay Jehová Diosajj jiwasan Luririsächejja, adoratäñatakejj derechoniwa (Apoc. 4:11; 14:6, 7). Ukhamajj kunjamtï jupajj munki ukhamwa “espiritumpi cheqampi” adorañasa, ukaw jakäwisan jukʼamp importantëñapa (Juan 4:23, 24). Biblian cheqa yatichäwinakaparjam Diosar adorañatakejja, espíritu santopampiw irpayasiñasa. Jakasktan uka cheqantï predicacionajj jarkʼatächejja, jiwasatakejj Diosar serviñaw jukʼamp importantëñapa. Jichhürunakanjja, Jehová Diosan Testigopätap laykojj 100 jilaw jilat kullakanakasajj carcelan llawintatäpjje. Ukhaman uñjaskasinsa, jupanakajj kusisitäsipkakiwa, Diosar orasiñatakisa, Bibliat yatjjatañatakisa, Diosampit Reinopampit yaqhanakar parlañatakisa wal chʼamachasipjjaraki. Insultatpachasa arknaqatpachasa, jiwasajj kusisitakïsktanwa, kuna laykutejj Jehová Diosaw jiwasampïski, juparakiw ukanakat bendisiskistani (1 Ped. 4:14). w22.10 pág. 9 párr. 13

Proverbios libronjja, kunayman tiempon jakasir jaqenakatakiw suma ewjjtʼanakajj utji, ukarjam sarnaqasajj sumwa jakastanjja. Uka yatiñani ewjjanakat pay uñjañäni. Maya, kunanakatï utjkistu ukampejj kusisitakïpjjañäni. Proverbios 23:4, 5 textojj akham sasaw ewjjtʼistu: “Yänak jikjjatañ laykojj jan inamay chʼam tukumti […]. Kunjamtï pakarojj chheqanakajj jilarkejja, ukhamarakiw uka yänakarojj chheqanakajj jilarani, ukatsti jaltawayasaw alajjpachar sarjjapjjani” sasa. Wali utjirininakasa pobrenakas qollq ganañatakiw wal chʼamachasipjje. Qollqet sinti llakisipjjatapatjja, jupanak pachpaw jan walit uñjayasipjje, yaqhanakampis jan waltʼayasipjjewa, usuntjjapjjarakiwa (Prov. 28:20; 1 Tim. 6:9, 10). Paya, janïr parlkasajj amuytʼasipjjañäni. Janitï amuytʼasksna ukhajja, arunakasampejj mayninakar jan waltʼaysnawa. Proverbios 12:18 textojj akham siwa: “Jan amuytʼasis arsut arunakajja espadampi usuchjañamp sasiwa, ukampis amuytʼasir jaqen arunakapajj heridanak qolltʼiriwa” sasa. Jiwasatï mayninakan pantjasitanakapjjat jan parlkañäni ukhajja, mayninakampejj wali sumwa apasiñäni (Prov. 20:19). w22.10 pág. 21 párr. 14; pág. 22 párrs. 16, 17

Ezequielajj yatiyañapäkäna ukjja, taqpachwa sum amuyañapäna. Uka yatiyäwejj chuymaparuw purtʼañapäna, ukhamat taqe chuyma predicañapataki. Ukatsti jan suykäna ukaw pasäna. Ezequielatakejj uka rollojj ‘miskʼjam wali mosqʼänwa’ (Ezeq. 3:3). ¿Kunatsa ukhamäna? Jupatakejj Jehová Diosan representantepäñajj wali mosqʼänwa jan ukajj sumänwa (Sal. 19:8-11). Jehová Diosajj profetapäñapatak ajllitapatjja, walpun Ezequielajj yuspäräna. Qhepatjja, Jehová Diosajj akham sasaw Ezequielar säna: “Istʼam, kuntï siskäma taqe uka arunak chuymamar katoqasim” sasa (Ezeq. 3:10). Ukham sasinjja, rollon qellqatäki uka arunak amtam lupʼirakim sasaw Jehová Diosajj saskäna. Ukham lurañajj Diosar jukʼamp confiyañatakiw Ezequielar yanaptʼaspäna, uka yatiyäwi jaqenakar yatiyañ wakisitapwa amuyañaparakïna (Ezeq. 3:11). Diosan yatiyäwipajj lakapankäna chuymapankarakïna ukhajja, Ezequielajj predicañ qalltañatakisa predicacionamp phoqañatakis wakichtʼatäjjänwa. w22.11 pág. 6 párrs. 12-14

Diosan markapan mä cambiojj utjki ukhajj ¿kunas Diosat jan jitheqtañatakejj yanaptʼistaspa? Uka cambionakarojj taqe chuymaw yanaptʼañasa. Israelitanakajj wasarnam viajipjjäna ukhajja, cohatitanakajj taqe israelitanakan uñjkataw pactor mantat arca apapjjäna (Núm. 3:29, 31; 10:33; Jos. 3:2-4). ¡Ukajj mä jachʼa bendicionänwa! Ukampis israelitanakajj Suma Oraqen jakjjapjjäna ukhajja, taqe kunas janiw nayrjamäjjänti. Mä cheqat yaqha cheqar Arca apañajj janiw wakisjjänti. Ukatwa cohatitanakajj yaqha lurañanak katoqapjjäna (1 Crón. 6:31-33; 26:1, 24). Coatitanakajj nayrajj wali suma luräwinïpkchïnsa, Bibliajj janiw quejasipjjänwa, jukʼamp suma luräwinakwa munapjjäna sasajj siskiti. ¿Kunsa ukat yateqsna? Kuna cambionaktï Jehová Diosan markapajj lurki ukar taqe chuym yanaptʼam, kuntï jumajj luraskta ukajj mayjtʼkchinisa taqe chuym yanaptʼaskakim. Kuna lurañ churatas kusisit luram. Ak amtapunim: Jehová Diosajj janiw kuna lurañtï markapan katoqkta ukarjam valoranit uñjktamti, jan ukasti mä lurañ katoqañat sipansa jupatakejj istʼasirïtamaw jukʼamp importantejja. w22.11 pág. 23 párrs. 10, 11

Onesíforo jilatajj apóstol Pablomp jikisiñatakejj wal chʼamachasïna. Jupamp jikisisajja, kunan yanaptʼatäñtï munkäna ukampiw yanaptʼäna. ¡Jupa laykojj niyaw vidaps aptʼasïna! ¿Kunsa ukat yateqsna? Jaqenakar ajjsaratam laykojja, arknaqat uñjasipki uka jilatanakar yanaptʼañ jan jaytamti. Jupanakar arjjatañatakisa, yanaptʼañatakis chʼamachasipunim (Prov. 17:17). Jupanakar munassna yanaptʼaraksna ukwa uka jilatanakajj munapjje. Munat jilat kullakanakapar carcelar llawintapki ukhajj kunsa Rusia markankir jilat kullakanakajj lurapjje uk amuytʼañäni. Jupanakat yaqhepajj juchañchatäñatak tribunalar sarapki ukhajja, walja jilat kullakanakaw jupanakar apoyañatakejj sarapjjaraki. ¿Kunsa ukat yateqsna? Diosan markapan irpapki uka jilatanakarutï kʼarintapjjani, arrestapjjani jan ukajj arknaqapjjani ukhajja, jan sustjasimti. Jupanakatak orarapim, familianakaparojj yanaptʼam, jupanakarojj kunjamats yanaptʼapunim (Hech. 12:5; 2 Cor. 1:10, 11). w22.11 pág. 17 párrs. 11, 12

Ancianonakajj Bibliampiw jilat kullakanakar chʼamañchtʼapjjañapa, chuymachtʼapjjañaparakiwa (1 Ped. 5:2). Mä jan waltʼäwejj utjki ukhajja, jilat kullakanakajj walikïsipkiti, manqʼañanïpjjeti, isinïpjjeti, alojasipjjañapatak mä lugaras utjiti ukwa nayraqat uñjapjjañapa. Ukampis walja phajjsinak qhepatjja, jan waltʼäwin uñjasirinakajj Bibliamp chʼamañchtʼatäñsa chuymachtʼatäñsa munasipkakispawa (Juan 21:15). Comité de Sucursalankir Harold sat jilatajja, jan waltʼäwinakan uñjasipkäna ukanakampejj waljanimpiw parltʼäna, jupajj akham siwa: “Walikëjjañatakejj walja tiempow munasi. Jilat kullakanakajj wasitats nayrjam jakasjjapjjchejja, mä munat familiarapana jan ukajj mä munat amigopan jiwatapatsa, kunatï wali munatäkäna uk aptʼasipjjatapatsa jan ukajj mä jan waltʼäwin uñjasiwayapkäna ukanakatsa amtasisipkakispawa. Ukanak amtasinwa maynejj wasitat wal llakisjjaspa. Ukajj janis Diosar confiyapkaspa ukham janiw sañ munkiti, taqeniw ukhaman uñjassna” sasa. Ukatwa ancianonakajj “jachapki ukanakampejj jachapjjarakim” siski uka ewjjtʼarjam lurapjjañapa (Rom. 12:15). w22.12 pág. 22 párr. 1; págs. 24, 25 párrs. 10, 11

Jehová Diosajja, munasiñapatwa kunatï walïki uk lurañatak chʼamachasiskakiñasatakejj espíritu santopamp yanaptʼistu. Diosan Arupat yatjjatktan ukhajja, espíritu santopampiw yanaptʼayastanjja. Tantachäwinakar sarktan ukhajja, espíritu santo katoqaraktanjja. Ukanwa jilat kullakanakasampejj jikistanjja, jupanakajj jiwasjamarakiw kunatï walïki uk lurañatakejj chʼamachasisipki, ukajj walpun chʼamañchtʼistu (Heb. 10:24, 25; 13:7). Jehová Diosar chuymatpach orastan, mä jan walir atipañatak yanaptʼa mayistan ukhajja, jan aynachtʼañasataki ukhamarak chʼamachasiskakiñasatakiw espíritu santop churistu. Cheqas ukanak lurañatak chʼamachaskchiñänisa, jan wali munañanakajj inas jan chhaqtkchiniti, ukampis jan wali munañanakampi jan apayasiñasatakejj chʼamwa Diosajj churistani. Jiwasatï Jehová Diosamp sum apasiñatak yanaptʼkistaspa ukanak lurañ qalltjjstan ukhajja, ukanak janiw jaytañasäkiti, kunatï walïki uksa lupʼiskakiñasawa. w23.01 pág. 11 párrs. 13, 14

Bibliajj janiw kʼumaräskakiñatakejj kunanaksa lurañasa, kunanaksa manqʼañasa uka toqet parlir mä librökiti, ukampis kunsa taqe ukanakat Jehová Diosajj amuyi ukwa qhanañchistu. Amuytʼañataki, Diosajj akham sasaw ewjjtʼistu: “Kunanakatï cuerpomar jan waltʼaykaspa ukanakampejj jan jakʼayasimti” sasa (Ecl. 11:10). Jiljas manqʼañasa machantasiñas janiw walïkiti sasaw Bibliajj qhanañchi, ukham lurasajj usuntsnawa, jiwaraksnawa (Prov. 23:20). Ukhamajj kunsa manqʼañäni, qhawqsa manqʼañäni umarakiñäni ukanak amtañajj wakiskani ukhajja, Jehová Diosajj jan jiljañaswa muni (1 Cor. 9:25). Jupajj jakañ vida regalot churkistu ukat yuspäratas uñachtʼayañatakejja, wal amuytʼasisaw kuns amtañasa (Sal. 119:99, 100; Prov. 2:11). Kunsa manqʼañäni uk janïr amtkasinjja, amuytʼasirïñasaw wakisi. Mä manqʼatï wal gustchistu ukampis jiwasar usuyirïtap yatstan ukhajj ¿kunsa lurañäni? Amuytʼasirïtasat janiw manqʼkañäniti. Amuytʼasirïñäni ukhajja, qhawqhatï wakiski ukhwa iktʼasiñäni, sapa kutiw ejercicio lurañäni, cuerpossa jarisiñäniwa, utassa qʼomacharakiñäniwa. w23.02 pág. 21 párrs. 6, 7

¿Kunjamsa Biblian wali valorani yatichäwinakap jikjjatsna? Ukatakejj 2 Timoteo 3:16, 17 textot amuytʼañäni. Uka textorjamajj “taqpach Qellqatajj […] sumarakiw” aka pusi toqenakataki: 1) yatichañataki, 2) cheqañchañataki, 3) kunatejj jan walïki ukanak askichañataki, 4) kunatï walïki ukarjam yatichañataki. Biblian libronakapan kawkïrinakatï jan añcha aytatäki ukanakas taqe ukanakatak yanaptʼarakistuwa. Liytʼktan ukhajja, kunsa Jehová Diosatsa, amtapatsa, wiñay yatichäwinakapats yatichistu uk amuytʼañasawa. Biblian versiculonakapampi cheqañchayasiñatakejj ¿kunsa thaqañasa? Kunatï jan wali luratanakatsa jan wali amuyunakats amuyasiñataki ukhamarak apanukuñatak yanaptʼkistaspa ukwa thaqañasa, kunatï Jehová Diosar jan jitheqtas serviskakiñatak yanaptʼkistaspa ukwa thaqañasaraki. Kunjamsa Biblian versiculonakapajj kunatï jan walïki ukanak askichañataki jan ukajj pantjat amuyunak cheqañchañatak yanaptʼkistaspa ukwa amuyañasa, inas predicacionan ukham pantjat amuyunak sapjjchistu. Kunatï walïki ukarjam yatichayasiñatakejj ¿kunsa lurañasa? Taqe kunanakatï Jehová Diosjam amuyañatak yanaptʼkistaspa ukanakwa Biblian thaqañasa. Uka pusi ewjjtʼarjam lurañäni ukhajja, Biblia liytʼkasajj yanaptʼkir wali valorani yatichäwinakwa jikjjatañäni. w23.02 pág. 11 párr. 11

Daniel libron mä profeciaparjamajja, paqallq tiemponakat parlir profecía tukuyaruw Jesusajj apnaqañ qalltañapäna. Kunapachas uka profeciajj phoqasïna uk uñjañäni (Dan. 4:10-17). ‘Paqallqo tiemponakajja’, 2.520 maranakamp sasiwa. Uka tiemponakajj 607 antes de Cristo maranwa qalltäna. Uka maranwa Jehová Diosan tronopajj Jerusalén markankkäna, uka tronon qontʼatäkarakïna uka qhepïr reyirojj babilonionakajj reyïñat apaqapjjäna. Ukatjja, ‘paqallqo tiemponakajj’ 1914 maranwa tukuyjjäna, uka maranwa Diosajj Reinopan Reyïñapatak Jesusar uttʼayäna, jupaw ‘gobernañatak derechoni’ (Ezeq. 21:25-27). ¿Kunjamsa uka profeciajj yanaptʼistu? ‘Paqallqo tiemponakat’ parlir profeciat sum amuyañajja, Jehová Diosajj promesanakap horasarupuniw phoqe sasin confiyañatakiw yanaptʼistu. Kuna horasas Reinop uttʼayañapäna uk jupaw sum amtjjäna. Uka horasajj purinjjäna ukhasti, amtaparjamapuniw luräna. Phoqasiñapajj faltki uka mayni profecianakjja, amtawayki uka horasaruw phoqasiyarakini. Ukhamajj Jehová Diosan urupajj “janiw qheptʼankaniti” (Hab. 2:3). w22.07 pág. 3 párrs. 3-5