“Janiw khitis pä patronarojj sirvkaspati”

1-3. 1) ¿Kuna jan walinakansa qollqe toqet waljanejj uñjasipjje, ukat kunjamsa yaqhepajj uka jan walir saykatapjje? (Aka janankir foto uñjjattʼam.) 2) Wawa uywañ toqetjja, ¿kuna llakinakansa uñjasipjjaspa?

MARÍAa sat kullakajj chachapat akham siwa: “Sapüruw Santiagojj trabajopat wali qarita kuttʼaniri, ukampis kunatï jakañatak munaskäna ukanak alañatakikiw qollqejj utjiri [...]. Jan qariñapatakejj yanaptʼañwa munayäta, ukhamat Jaime wawajatak kunanakatï escuelankir masinakapan utjkäna ukanak alarapiñataki” sasa. Ukhamarus María kullakajj familiaranakaparuw yanaptʼañ munäna, jutïritakis qollq imasiñ munarakïnwa. Amigonakapat waljanejja, jukʼamp qollqe jikjjatañatakejj yaqha markaruw sarapjjäna. Mariajj jupanakjam yaqha markar sarañ amtkäna ukhajja, wal llakthapisïna. ¿Kunatsa?

² Mariarojj munat familiap jaytañasa, jan familiapamp chika Diosar yupaychañas wal llakisiyäna. Ukampis mayninakar mä qawqha tiempo yaqha markar sarirwa uñjäna, amuyuparjamajj uka familianakajj janjamakiw Diosar serviñan aynachtʼapkänti. Ukampis akham sasaw kullakajj jisktʼasïna: “¿Kunjamsa wawajarojj jayankasin uywirista?” sasa. Internet toqnamajja, wawaparojj janiw Jehová Diosatakjam ‘cheqapar yatichasina sum uywkaspänti’ (Efe. 6:4).

³ Kullakajj yanaptʼa thaqañ amtäna. Chachapajj janiw sarañap munkänti, ukampis sarañtï munstajja, sarasmawa sasaw Mariar säna. Ukhamarus irpir chuyman jilatanakasa, tamankir jilat kullakanakas jan saramti sasaw sapjjäna, ukampis yaqhep kullakanakaw yaqha markar sarañapatak chʼamañchtʼapjjäna, akham sasa: “Jumatï familiamar munasstajja, sarätawa. Jehová Diosarus serviskarakismawa” sasa. Mariajj pächaskchïnsa, chachaparu wawapar jaytasaw yaqha markar trabajir sarjjäna. Mariajj akham sasaw jupanakar sawayäna: “Mä qawqha tiempot kuttʼanjjakïwa” sasa.

FAMILIAR UÑJAÑ TOQET BIBLIAJJ KAMSISA

4. ¿Kunatsa waljanejj yaqha markar sarapjje, ukat khitinakarus wawanakap jaytapjje?

⁴ Jehová Diosajj janiw servirinakapan pisin jakapjjañap munkiti. Khä nayra tiemponjja, pisinkañat mistuñatakejj ukhamarakiw yaqha markar sarapjjerïna (Sal. 37:25; Pro. 30:8). Jan manqʼat jiwañatakejja, Jacob chachajj wawanakaparuw Egipto markar manqʼanaka alanipjjañapatak khitäna (Gén. 42:1, 2).b Jichhürunakanjja, yaqha markar sarañ amtirinakajja, janiw manqʼa pistʼayasipjjatap laykojj sarapkiti. Inas manunak phoqañataki jan ukajj nayrar sartañatak ukham lurapjjchi. Ukatwa waljanejj yaqha markana jan ukajj pachpa markapansa familiapat jayarstʼat jakapjje. Niya sapakutiw chacharuki jan ukajj warmiruki wawanak jaytapjje, awisajj achachilanakaru, yaqha familiaranakaru jan ukajj amigonakapar jaytapjje. Ukham lurasin llakitas uñjasipkchejja, uk lurañakis utj-jjaspa ukhamwa waljanejj amuyapjje.

5, 6. 1) ¿Kunsa Jesusajj kusisiñata ukhamarak sum jakasiñat yatichäna? 2) ¿Kuna toqet mayisiñsa Jesusajj arkirinakapar yatichäna? 3) ¿Kunjamsa Jehová Diosajj bendicistu?

⁵ Jesusajj jakkäna uka tiemponjja, ukhamarakiw waljanejj pisina, jan suma uñjata jakasipjjäna. Ukat walja qollqenïsakis kusisita, sum jakasiñajj utjkaspa ukham inas amuyapjjchïna (Mar. 14:7). Ukampis Jesusajj janiw yänakar confiyapjjañap munkänti, jan ukasti Jehová Diosar confiyapjjañapwa munäna, Jupaw wiñay bendicionanak churirejja. Jesusajj Wali Uñtʼat Arstʼäwipanjja, Diosamp sum apasisakiw cheqpach kusisiñsa, sumankañsa jikjjatañäni sasaw säna, janiw qollqesa ni yänakas kusisit jakañ churkistaspati.

⁶ Jesusajj arkirinakapar yatichkäna uka mayisïwinjja, janiw qollqe jikjjatañatak mayiñ yatichkänti, jan ukasti sapürojj kunanakatï wakiski, mä arunjja, “sapürutak manqʼañ churanipjjeta” sas mayisiñwa yatichäna. Ukatsti akham sänwa: “Akapachanjja jan imapjjamti walja yänakjja, [...] jan ukasti jumanakajj alajjpacharu suma yänaka imasipjjam” sasa (Mat. 6:9, 11, 19, 20). Jehová Diosajj kunjamtï arsuwayki ukarjamaw bendicistani sasaw confiyañasa. Ukhamarus Jupajj askitwa uñjistu ukatwa bendicionanak churistu. Ukhamasti cheqpach kusisiña, sum jakasiñjja janiw qollqejj churkistaspati, jan ukasti munasir Awkisar confiyasakiw jikjjatsna (Mateo 6:24, 25, 31-34 liytʼañataki).

7. 1) ¿Khitinakarus Jehová Diosajj wawanakar uñjapjjañapatak jayti? 2) ¿Kunatsa awk taykanakajj wawanakapar panpachan yanaptʼapjjañapa?

⁷ “Kunatejj cheqäki” uk nayrar uchañäni ukhajja, Jehová Diosajj kunjamtï familiasar uñjañas munki ukhamwa uñjarakiñäni. Moisesan Leyiparjamajja, awk taykanakaw wawanakapar Jehová Diosar serviñ yatichapjjañapäna, jichhürunakan ukhamarakiwa (Deuteronomio 6:6, 7 liytʼañataki). Jehová Diosaw uka luräwi awk taykanakar churawayi, janiw achachilarusa awicharusa ni khitirus churawaykiti. Salomón reyejj akham sänwa: “Wawajjay, istʼam awkimana yatichäwinakapa, janikiy taykaman yatichäwinakapjja jiskʼachamti” sasa (Pro. 1:8). Awk taykanakajj wawanakapar sum yanaptʼapjjaspa, yatichapjjaspa ukwa Diosajj muni (Pro. 31:10, 27, 28). Wawanakajja, awk taykapar Diosat parlir istʼasina, ukat kunjamsa jupanakajj Diosar servipjje uk uñjasaw Jehová Diosar serviñ yateqapjje.

KUNANAKAS PASASPA

8, 9. 1) Familiajj jan mayachtʼat jakasajja, ¿kuna jan walinakansa uñjasispa? 2) Chacha warmjam jayarstʼat jakapki ukhajja, ¿kunjamansa uñjasipjje?

⁸ Yaqha markar sarañatak familiapar jaytañ amtirinakajja, familiapat jayarstʼasajj kuna jan walinakans uñjasipjjani uk janiw sum amuyapkiti (Pro. 22:3).c María kullakajj sarjjasinsti wal llakisïna, chachapasa Jaimitosa ukhamarakiw llakisipjjäna. Wawapajj “¿kunatsa jaytjawayista?” sasaw sapa kuti mamapar jisktʼäna. Mariajj qawqha phajjsinaktï yaqha markan trabajiñ amtkäna ukajj pasjjänwa, walja maranakaw ukan qheparjjäna. Ukhamïpansti familiapan mayjtʼatapwa Mariajj amuyäna. Wawapajj janiw mamapamp añch parljjänti. Kullakajj akham sasaw wali llaktʼat amti: “Janiw nayrjam munasjjetanti” sasa.

⁹ Awk taykanakasa, wawanakas familjam juntuk jan jakasjjapjje ukhajja, llakita chuymapans qʼala aynachtʼataw uñjasipjje.d Wawanakatï jiskʼäsipkchi ukat walja tiempo awk taykapat jayankapchi ukhajja, jukʼamp jan walinwa uñjasipjjaspa. María kullakajj wawaparojj sänwa: “Juman askimatakiw akham trabajiskta” sasa. Ukampis wawapajj amanutsa mamapajj jaytanukkaspa ukham amuyäna. Qalltan jan utankatapatwa mamapar uñisïna, ukampis qhepatjja utar mamapajj visittʼir sarkäna ukhajja, jupar uñjasajj janiw sum jikjjataskänti. Jaimitojj mamapar istʼañasa, munasiñasa janis wakiskaspa ukhamwa amuyäna. Jaytjata wawanakajj ukhamwa amuyapjjaraki (Proverbios 29:15 liytʼañataki).

10. 1) Awk taykajj wawanakar regalonakak churasipkaspa ukhajja, ¿kunas pasaspa? 2) Awk taykanakat maynitï familiat jayankchi ukhajja, ¿kunas jan utjki?

¹⁰ María kullakajj qollqe, regalonaka apayasinwa wawapamp sum uñjayasiñ munäna. Ukampis janiw ukhamäkänti, antisakiw wawapat jayarstʼaskäna. Familiaparu ukhamarak Diosaru munasiñat sipansa, yänak munañwa wawapar yatichaskäna (Pro. 22:6). Jaimitojj akham sasaw mamapar säna: “Jan jutjjamti, regalonak apayasinkakita” sasa. Mariajja wawaparojj janiw carta toqnamsa, telefonot jawsasinsa, ni Internet toqnam parlasinsa uywirjamäkänti. Jupajj akham siwa: “Internet toqnamajj wawamarojj janiw qhomantkasmati, ni janïr ikintkasas jampʼattʼkasmati” sasa.

11. 1) ¿Kunjamsa chacha warmirojj jayarstʼat jakañajj jan waltʼayaspa? 2) ¿Kunas mä kullakar utapar kuttʼañatak yanaptʼäna?

¹¹ María kullakajj janiw Jehová Diosamp sum apasjjänti. Semanansa mä urukiw Diosan Arupat yatiyir mistjjäna. Ukhamarus chachampejj janiw waltʼayasirjamäjjapjjänti. Mariarojj patronapaw jan wali amtamp parljjayäna, ukampis jupajj janiw ukar istʼkänti. Chacha warmjam jan walinakan jikjjatasisajj janiw jupanak pura parltʼasipkänti. Mariasa, chachapasa kunjamansa jikjjatasipjjäna uk yaqhanakarukiw yatiyapjjäna, ukat niyaw wachoq juchar purtʼasipjjäna. Ukampis janis wachoq juchar purtʼasipkchïnjja, jayarstʼat jakasajj kuntï chacha warmjam ‘phoqapjjañap’ Bibliajj mayki uk janiw phoqerjamäpkänti. Mariampi Santiagompejj janiw parltʼasipkänsa, uñkattʼasipkänsa, lartʼasipkänsa, qhomanttʼasipkänsa ni ‘munasiñas’ utjjänti (Cant. de Cant. 1:2; 1 Cor. 7:3, 5). Familjamas janiw Diosar taqe chuyma yupaychjjapjjänti. Mariajj akham siwa: “Diosan jachʼa urupat qhespiñatakejja, familjam Diosar yupaychañajj wali wakiskiriwa sasaw mä jachʼa tantachäwin arstʼasïna, ukatwa utar kuttʼañ amtayäta. Wasitatwa familiajampi ukhamarak Diosamp sum apasiñ qalltañajäna” sasa.

SUMA EWJJANAKAMPI JAN WALI EWJJANAKAMPI

12. Familiapat jayan jakapki ukanakarojja, ¿Biblian kawkïr ewjjanakapas yanaptʼaspa?

¹² Marian utar kuttʼañ amtatapatjja, yaqhepajj walikiwa sapjjänwa, yaqhepasti janiw ukham sapkarakïnti. Uka markankir irpir chuymaninakajj walik ukham amttajja sasaw sapjjäna, ukham amtasajj Diosar iyawsatapa, jan ajjsarirïtapwa uñachtʼayaskäna. Ukampis María kullakjam familianakapat jayan jakirinakajj janiw ukham amuyapkänti. Jupat yateqasiñat sipansa, akham sapjjänwa: “Akan trabajiskakim, saräta ukhajj ¿kunampirak jakätasti?” sasa. Cristianonakajj ukham arunakamp sañat sipansa, ‘tawaq warminakarojj chachanakaparu, ukhamarak wawanakapar munasiñwa yatichapjjañapa, utapsa sum apnaqañapatakiw’ chʼamañchapjjañapa, ukhamat “jan khitisa Diosan arupatjja jan wali parlañapataki” (Tito 2:3-5 liytʼañataki).

13, 14. Familiaranakan munañap lurañat sipansa, ¿kunatsa Diosan munañap lurañajj wakisi? Mä uñachtʼäwimp qhanañchtʼam.

¹³ Yaqhep markanakanjja, awk taykar istʼañajj wali wakiskiriwa, ukatwa yaqha markar saririnakajja, familiaranakaparu ukat awk taykapar istʼasajj familiap jaytasin yaqha markar trabajir sarapjje. Ukampis cristianonakajja, Jehová Diosar kusisiyañatakejj janiw familiap jaytapkiti. Ukatakisti Jehová Diosar confiyañaw wakisi.

¹⁴ Carmen sat kullakajj akham siwa: “Kunapachatï Juan wawajajj naskäna ukhajja, chachajampiw yaqha markan trabajisipkayäta. Ukhakiw Bibliat yateqañ qalltayäta. Familiajajja, wawajar awk taykajan ukar apayirista ukwa munapjjäna, ukhamat nanakajj qollqe jikjjatapjjañajataki” sasa. Carmen kullakajj nayaw wawaj uywaskä sasaw säna, ukampis familiaranakapasa, chachapasa jayra sasaw jiskʼachapjjäna. Kullakajj saskakiwa: “Kunatsa wawajar awk taykajampi mä qawqha maranak jaytañajj jan walïki uk janiw sum amuykayätti. Ukampis Jehová Diosajj awk taykaruw wawanak uywañapatak jaytawayi uk sum yatiyäta” sasa. Carmenajj wasitamp usurëjjän ukhajja, chachapajj uka wawa apsuyañ munäna, jupajj janiw cristianökänti. Ukampis kullakajj janiw munkänti, nayrïr wawaparojj janiw awk taykapar uywañapatak churkänti, ukaw kunatï Diosatak askïki uk lurañatak yanaptʼäna. Jichhajj uka familiajj wali kusisitaw jikjjatasipjje. Carmen kullakatï maynir wawaparu yaqhanakan uywapjjañapatak churaspäna ukhajja, janiw ukhamäkaspänti.

15, 16. 1) Awk taykapamp chik jan jilsuñajja, ¿kunjamsa mä kullakarojj jan waltʼayäna? 2) ¿Kunatsa Virginiajj taykapan ukar wawap jan khitkäna?

¹⁵ Virginia sat kullakajj akham sarakiwa: “Awichajaw mä qawqha maranak uywawayitu, ukampis sullkajarojj awk taykajaw uywawayi. Awk taykajan ukar kuttʼjjayäta ukhajja, jupanakarojj janiw nayrjam munasjjayätti. Kullakajajj jan ajjsarasaw jupanakampejj parltʼasiri ukat qhomanttʼarakiri. Wali sumwa apasipjjäna. Ukampis nayajj janiw ukhamakayätti. Jilirëjjta ukasa ukhamakïsktwa. Ukhamarus kullakajampejj akham sasaw awk taykajar sapjjayäta: ‘Nanakaw uñjasipkäma’ sasa. Nayajj phoqañ laykukiw uk luräjja, ukampis kullakajajj jupanakar munasiñatwa lurani” sasa.

¹⁶ Kullakajj akham saskakiwa: “Mamajajj wawajar jupan ukar khitirista ukwa munäna, kunjamtï nayampejj lurkäna ukhama. Ukampis jan chuym ustʼayasaw ‘janiwa’ sasin sirïta. Chachajampiw wawajar uywaña ukhamarak Jehová Diosar munasiñapatak yatichañ munapjjta. Wawajampejj sum apasiñwa muntjja” sasa. Virginia kullakajj taqe kun sum sarañapatakejj yänakaru ukat familiapar istʼañat sipansa, Jehová Diosan ewjjanakaparuw istʼäna. Jesusajj akham sänwa: “Janiw khitis pä patronarojj sirvkaspati, [...] Diosampiru qollqempirojj janiw khitis sirvkaspati” sasa (Mat. 6:24; Éxo. 23:2).

CHʼAMACHASITAS JEHOVÁ DIOSAJJ BENDICIWA

17, 18. 1) ¿Kunsa cristianonakajj amtapjjañapapuni? 2) ¿Kuna jisktʼanakatsa jutïr yatichäwin yatjjataskañäni?

¹⁷ Jehová Diosan arsutaparjamajja, Jupan Reinopa ukhamarak kunatï cheqäki uk jakäwisan nayrar uchañäni ukhajja, kunanakatï wakiski uk jikjjatañatakejj Diosajj yanaptʼistaniwa (Mat. 6:33). Ukhamajj kuna jan walinsa uñjaskchiñänejja, jiwasatï Diosan yatichäwinakap phoqañäni ukhajja, Jehová Diosaw ukanakar ‘atipjañ’ yanaptʼistani (1 Corintios 10:13 liytʼañataki). Jehová Diosar yatiña mayisa ukhamarak kamachinakaparjama, aski yatichäwiparjam sarnaqas Jupar confiyañäni ukhajja, Jupajj ‘yanaptʼistaniwa’ (Sal. 37:5, 7). Jehová Diosar cheqpach Uywirisarjam serviñatak chʼamachasiñäni ukhajja, bendicistaniwa. Jupaw taqe kunas walikïñapatak yanaptʼistani (Génesis 39:3 uñjjattʼarakismawa).

¹⁸ Ukhamajj familiat jayarstʼat jakañatï utjawaychejja, ¿kunjamsa ukajj askichasispa? Familiasan jan jayarstʼas qollqe toqet yanaptʼañatakejja, ¿kunanakas lurasispa? ¿Kunjamsa mayninakar familiapat jan jayarstʼañapatak yanaptʼsna? Uka jisktʼanakatjja, jutïr yatichäwinwa yatjjatasiskani.