Bibliat yatiqañ munapki jupanakan ukar kuttʼapxapuniñäni
1. ¿Kunatsa Bibliat yatiqañ munapki jupanakan ukar kuttʼañasapuni?
1 Kunapachatï maynix mä jatha satantki ukhaxa, alsuniñapatakix umampi wartʼañaw wakisi. Yatiyir sarkasin Diosan chiqa yatichäwinakapamp jaqinakan chuymapar purtʼktan ukhaxa, mä jatsa satantksna ukhamawa ukat alsuniñapatakix uka pachparakwa lurañasa (1 Cor. 3:6). Ukatwa revisitanak lurañax wakiskirixa, ukat Diosan Arupat yatichasax umampis wartʼksna ukhamäspawa. Ukhamatwa jaqin chuymapanx Diosan Arupax saphintaspa, jiltaspa ukat achuqarakispa.
2. ¿Kunsa wasitat kuttʼañatakix lurañasa?
2 Mä jisktʼwa jaytañasa. Yatiyir sarañatak wakichtʼasiñäni ukhaxa, jaqix kunsa yatxatañ munaspa ukarjamaw mä jisktʼa wakichtʼasiñasa, ukat uka jisktʼxa wasitat kuttʼañatakiw jaytañasa. Uka jisktʼxa janïr parlañ tukuykasaw jisktʼañasa ukat uk qhanañchañatakix kunürus kuttʼañäni ukxa jupampiw amtxañasa. Waljanixa Kunsa yatichi sat libron jikxataski uka jisktʼanakwa jisktʼapxi ukat ukaw Bibliat yatichañ qalltañatak yanaptʼi.
3. Maynitï Bibliat yatxatañ munchi ukhaxa, ¿kunanaksa qillqtʼasiñasa?
3 Qillqtʼasiñasawa. Qalltan maynimp parltʼañ tukuyxañäni ukhaxa, jankʼakiw sutipsa direccionapsa, kuna horasa, kunürusa, kuna tuqitsa parlwaytan ukat Bibliat apstʼat kawkïr qillqatsa jaytawaytan uk sumwa qillqtʼasiñasa. Ukat kawkïr religionarus sari, familianiti janicha ukat kunanakas llakisiyi jan ukax kuna tuqinakatsa yatxatañ muni uk qillqtʼasiñas wali askirakïspawa. Ukanakaw wasitat kuttʼañatak suma wakichtʼatäñatakix yanaptʼistani. Kunürus kuttʼañamatak amtawayapxta ukat kuna jisktʼarus qhanañchañama uk qillqtʼasiñ janipun armasimti.
4. Maynitï Bibliat yatiqañ munani ukhaxa, ¿kunatsa yatiqañ munaskakiñapatakix jan qarjtas kuttʼaskakiñasa?
4 Janiw qarjtañasäkiti. Kunaymanitwa “supayax jutasin chuymanakapat uka arunakxa qʼal chhaqta[yañ]” munani (Mar. 4:14, 15). Ukatpï, Bibliat yatiqañ munirin utapar kuttʼasax jupar jan jikxatkäta ukhaxa, janipun qarjtamti. ¿Janit mä papelar qillqtʼawayasin mä nota jaytawaykasma, jan ukax mä carta apaykasma? Mä kullakaxa, mä warmiruw uta punkupan Bibliat yatichañ qalltatayna, ukampis wasitat kuttʼkäna ukhax janiw jikxatkataynati, ukatwa mä carta apayatayna. Kunapachatï uka warmir wasitat jikxatxatayna ukhaxa, ukham qillqanitamatx wal chuym chʼallxtayitu sasaw uka warmix satayna. Ukham sapa kuti kuttʼasaxa, mä satantat jatharus alsuniña, jilsuña ukat “mayat kimsa tunkaru, mayat suxta tunkaru, yaqhipasti patakaru” achuqir uñjsna ukhamawa, ukat uk uñjasax wali kusisitaw jikxatastanxa (Mar. 4:20).