Kimsa uru jachʼa tantachäwinakajj Diosan cheqa yatichäwipwa qhanañchi
1. Fiestanakan tantachasipjjäna ukhajja, ¿kuna toqenakatsa isrelitanakajj lupʼipjjañapäna?
1 Israelitanakajj maranjja, kimsa kutiw wakiskir fiestanakap amtañatak tantachasipjjerïna. Chachanakakis ukar sarapjjañapäkchïnjja, familpachaw uka fiestanakat askinak apsuñatakejj Jerusalenar sarapjjerïna (Deu. 16:15, 16). Ukanwa Diosan cheqa yatichäwinakapat amuykiptʼapjjañapäna. Sañäni: Jehová Diosajj kunja munasirisa ukat loqtirinakaparojj kunjams yanaptʼi (Deu. 15:4, 5), ukat Jupaw irpaskitani, jan walinakats jarkʼaqetani sasin confiyañatsa (Deu. 32:9, 10), jan ukajj Diosan ajllit markapjamajj kunatï Diosatakejj cheqapäki ukarjam sarnaqañ toqenakatsa amuykipapjjañapäna (Deu. 7:6, 11). Jichhürunakanjja, kimsa uru jachʼa tantachäwinakajj ukhamarakiw amuykiptʼañatak yanaptʼistu.
2. ¿Jachʼa tantachäwinakatak wakichäwejj kunjamsa cheqa yatichäw sum amuytʼañatakejj yanaptʼistu?
2 Wakichäwejj Diosan cheqa yatichäwinakapat amuytʼañatakiw yanaptʼistu. Kimsa uru jachʼa tantachäwinakanjja arstʼäwinaka, dramanaka, demostracionanaka ukat entrevistanakaw utjaraki, ukanakaw Biblian cheqa yatichäwinakap amuyañatakejj yanaptʼistu (Juan 17:17). Jehová Diosan markapajja, mä suma wakichäwi wakichañatakejj jan tiemponiw irnaqtʼapjje, ukhamat Diosar yupaychañ toqet taqenir yanaptʼañataki (Mat. 24:45-47). Uka suma yatichäwinak yateqañajj wali askipunïniwa.
3. ¿Wakichäwit askinak apsuñatakejj kunanaks lursna?
3 Uka wakichäwinakat wali askinak apsuñatakejja, kimsürpachaw ukankañasa ukat sum istʼañasaraki. Trabajosat permiso mayisiñjja, janiw armasiñasäkiti. Sum istʼañatakejj urutwa ikintjjañasa, ukat tantachäwinjja arstʼiriruw uñtañasa, wakiskir yatichäwinaks qellqtʼasiñasarakiwa. Ukat janiw celularanaka ukat yaqha ukhamanaksa apnaqañasäkiti, ukham lurasajj jiwasasa, yaqhanakasa janiw arstʼäw sum istʼjjapjjaspati. Ukat janirakiw celularat mensajenak qellqas apayaskañasäkiti ni parlañasäkisa ukat tantachäw qalltjje ukhajj janirakiw manqʼañasäkisa ni umañasäkisa.
4. ¿Kunjamsa awk taykanakajj tantachäwit wawanakapajj askinak apsupjjañapatakejj yanaptʼapjjaspa?
4 Israelitanakajj sapa paqallq maraw samarañ maranjja, Leyinak leytʼaski uk istʼañatak tantachasipjjerïna ukajj chhojjllanakan fiestapa sasin uñtʼatänwa. Ukanjja familpachäw jiskʼa ‘wawanakapampi’ istʼañatak ukat yateqañatak tantachasipjjerïna (Deu. 31:12). Jichhürunakanjja, tantachäwinakanjj ukhamarakiw familpach qontʼasipjje ukat jiskʼa wawanakas jan ikipki sum istʼapjje uk uñjañajj kusiskañarakiwa. Ukat kuntï tantachäwin qellqtʼasktan ukanakat sapa arum amtañajj inas wakischispa. Niyakejjay ‘pisi amuytʼamp lurañajj waynanakan’ chuymapankchejja, awk taykanakajj tantachäw samartʼäwinakansa ukat qorpachasiñ utansa janiw wawanakaparojj ‘munañapar sarnaqañapatak’ jaytapjjañapäkiti. Jan ukasti sum uñjapjjañapa. Ukat qʼajjo wayn tawaqonakarus uñjapjjañaparakiwa (Pro. 22:15; 29:15).
5. ¿Suma sarnaqäwisajj kunjamsa cheqa yatichäwir jachʼañchi?
5 Suma sarnaqäwisajj wali askiwa. Kawki markantï jachʼa tantachäwejj apaski ukanjja suma sarnaqäwisajj cheqa yatichäwirojj jachʼañchiwa (Tito 2:10). Hotelanakan irnaqapki ukanakajj paciencianïpki, yanaptʼasirïpki uka qorpachasirinakar katoqtʼañjja wal munapjje (Col. 4:6). Pasïr marajja, hotel alquilañatak mä sucursalankir jilatanakajj hoteljjat parlir sarapjjatayna ukhajja, hotel uñjirejj akham sataynawa: “Jehová Diosan Qhanañchirinakapajj hoteläjan qorpachasiñapjja wal munapjjta. Jupanakajj munasiri, suma jaqenakäpjjewa, akan irnaqerinakarus wal respetapjje ukat qorpachasiñ utsa wali sum uñjapjje” sasa.
6. ¿Kunjamsa isisitasampejj Diosan cheqa yatichäwiparojj jachʼañchsna?
6 Tarjeta tʼirkatasktan ukajj janiw jilat kullakanakan jiwasar uñtʼañapataki ukat tantachäw utjatap yatipjjañapatakikïkiti jan ukasti Diosar jachʼañchañatakirakiwa. Ukhamasti yäparu, qʼoma isthaptʼatäñäni ukhajja, jaqenakajj qhanwa Diosar loqtirïtas amuyapjjani (1 Tim. 2:9, 10). Ukhamajj kawkhantï jachʼa tantachäwejj apaskani ukhansa ukat hotelansa cristianjamaw isthaptʼasiñasa. Khuchhoqatäkaspas ukham pantalonampi jan ukajj pelot anatañ camisetamp isthapit sarsna ukhajja, janiw Diosan loqtiripjamäksnati. Jachʼa tantachäwejj mä estadions apaskchinejja, suma isthaptʼatäskakiñasawa. Ukat tantachäw tukuyjjepan manqʼer sarañatak yaqha isimp uchasiñ munstan ukhasa, cristianjamaw isthaptʼasiñasa.
7. ¿Kunjamsa jilat kullakanakasampejj jachʼa tantachäwin maynit maynikama chʼamañchtʼasna?
7 Fiestanakapanjja, israelitanakajj jaya markat ukat yaqha markanakat jutir jilat kullakanakampiw kusisita mä wawak tantachtʼasipjjerïna (Hech. 2:1, 5). Ukhamarakiw kimsa uru jachʼa tantachäwinjj mä wawak tantachastanjja. Uk uñjasinjja jaqenakajj wal muspharapjje (Sal. 133:1). Ukat chika urun anqat maqʼa alañat sipansa, jiwas kikpa mä jukʼa manqʼa apasiñäni ukhajja, yaqha jilat kullakanakar uñtʼañatakis tiempojj utjistaniwa.
8. ¿Yanaptʼirjamästan ukhajj kunatsa jachʼa tantachäwin yanaptʼañajj wakisipuni?
8 Jachʼa tantachäwinakasan suma wakichtʼata ukat ukan irnaqerinakas jan kun katoqasak yanaptʼapjjatap amuyasajja, jaqenakajj wal muspharapjje. ¿Jumajj jachʼa tantachäwin ‘taqe chuym yanaptʼarakismati’? (Sal. 110:3, NM.) Walja awk taykanakajj wawanakapampiw yanaptʼirejj sarapjje, ukhamatwa yaqhanakar yanaptʼañ wawanakapar yatichapjje. Ukat inas jumajj ajjsarirïsta, tantachäwin yanaptʼasaw yaqhanakar uñtʼasma, amigonaksa jikjjatarakisma. Mä kullakajja akham siwa: “Familiajaru ukat mä qhawqha amigonakarukiw jachʼa tantachäwinjj uñtʼayäta. Ukat tantachäwin qomachañ yanaptʼasajja, walja jilat kullakanakaruw uñtʼawayta. Ukajj ¡wali askipunïnwa!” sasa. Ukham yanaptʼasajja, walja amigonakwa jikjjatañäni ukat kusisitarakïñäniwa (2 Cor. 6:12, 13). Inas jan yanaptʼirïkstati ukhamächi ukhajja, irpir chuymaninakaruw kuna mayitanaks phoqhañama uk jisktʼasma.
9. ¿Jachʼa tantachäwir invittʼañatakejja kuns lurañäni?
9 Kunatï cheqäki uk istʼapjjañapatak invittʼapjjañäni. Pasïr maranakjamarakiw jachʼa tantachäwir jutapjjañapatakejj kimsa seman faltkipan invitación lakiraskañäni. Tamanakajj kawkhantï yatiyañapäki uka cheqanakan taqenir invitación lakirañatakiw chʼamachasipjjani (“¿Kunjamsa invitacionajj lakirasiskani?” siski uka cheq uñjjattʼäta). Invitacionanak jiltʼani ukhajja, jachʼa tantachäwiruw apasma, ukhamat tantachasirinakajj kawkhantï jikjjatasipkani ukhan yaqhanakar invittʼapjjañapataki.
10. Jaqenakar invittʼkasinjja, ¿kuna experiencianakas utji? Uk qhanañchtʼma.
10 ¿Jaqenakar invittʼañajj wakisipuniti? Mä tantachäwinjja katoqtʼir jilatajj mä casarat chacha warmiruw qonuñ jikjjatañ yanaptʼäna. Jupanakajj akham sapjjänwa: “Invitación katoqapjjta, ukat kunapunirakipacha sarañäni” sasaw 300 kilometronak autot sarapjjatayna. Ukat mä kullakajj utat uta yatiykasajja, mä chacharuw invittʼatayna, uka chachajj sumwa istʼarakitayna. Ukhamïpansti kullakajj kunatï invitacionan qellqatäki uk sum qhanañcharakïna. Ukat kullakajja, uka chacharuw mä amigopampi ukat machaq qellqatanak aptʼasita jachʼa tantachäwin uñj-jjatayna.
11. ¿Kunatsa kimsür jachʼa tantachäwir sapa mara sarañajj wali wakiskirejja?
11 Israelitanakan fiestanakapajja Jehová Diosan suma churäwipänwa “suma chuymampi” ukat cheqapar servipjjañapatakïnwa (Jos. 24:14). Ukhamarakiw kimsür jachʼa tantachäwinakajj “kunatï cheqapäki” ukarjam sarnaqañatak yanaptʼistu, ukat ukanwa Jehová Diosar jachʼañcharaktanjja (3 Juan 3). Ukhamajj khitinakatï cheqa yatichäwir munasipki ukat jachʼa tantachäwinakar sapa mara sarañataki ukat sum yateqañatak chʼamachasipki ukanakar Jehová Diosajj bendisispa uk muntanjja.
[12 janan qhanañchäwipa]
Kawki markantï jachʼa tantachäwejj apaski ukanjja suma sarnaqäwisajj cheqa yatichäwirojj jachʼañchiwa
[13 janan qhanañchäwipa]
Jachʼa tantachäwir jutapjjañapatakejj kimsa seman faltkipan invitación lakiraskañäni
[11 janan recuadropa]
KIMSA URU JACHʼA TANTACHÄWITAK AMTÄWINAKA, 2012
◼ Kuna horas qalltani. Kimsürpachaw tantachäwejj 9.20 alwa horasar qalltani. Ukat 8.00 alwa horasaruw punkojj jistʼaratäjjani. Kunapachatï musicajj qalltjjani ukhajja, qontʼasjjañasawa jan ukajj uttʼasjjañasawa ukhamat wakichäwejj sum qalltañapataki. Viernes urumpi sábado urumpejja 4.55 jaypʼu horasaruw tukuyani, ukat domingo urusti 3.40 jaypʼu horasaruw tukuyarakini.
◼ Auto saytʼayañanaka. Kawki cheqanakantejj auto saytʼayañanakajj jiwasankani ukhajja, janiw qollqejj mayitäkaniti ukatjja purinitarjamaw autonak saytʼayapjjarakini. Niyakejjay auto saytʼayañ cheqajj jiskʼakïchejja, mä autotak waljan sarapjjasma ukhajja wali askipunïspawa.
◼ Qonuñanaka jan ukajj uttʼañanaka. Jiwasamp chika jutirinakataki ukat jiwasamp chika pachpa utan jakasirinakataki jan ukajj Bibliat jumamp yateqapki ukanakatakikiw qonuñanak imsnajja (1 Cor. 13:5).
◼ Manqʼañ toqeta. Chikürojj manqʼa alasir anqar mistuñat sipansa manqʼa apasiñajj wali askiwa. Ukampisa, manqʼjja janiw jachʼa qʼepi apañasäkiti janirakiw manqʼa apañatak vidriot luratajj utjki ukarus apañasäkiti.
◼ Qollqempi yanaptʼañataki. Kunjamtï chuymasan amtawayktan ukhamarjamaw Oraqpachan yatiyasiski ukar qollqemp yanaptʼsna, ukhamatwa yuspäratas uñachtʼaysna, uksti Tantachasiñ Utanwa jan ukajj jachʼa tantachäwinwa irantarakisma.
◼ Chijinakampi ukat akatjamat usuchjasiñanakampi. Jachʼa tantachäwintï maynejj mä akatjamat usuchjasispa jan ukajj jan waltʼjjaspa ukhajja, mä katoqtʼir jilataruw yatiyañama, jupaw Primeros Auxilios sat irnaqtʼir jilat kullakanakarojj yatiyani, ukhamatwa jupanakajj hospitalar jawsañajj wakisiti janicha uk sum amuykiptʼapjjani.
◼ Medicamentonaka. Jumatï medicamentonak umsta ukhajja, mirä amp suma qhawqtï wakisirjamäni ukjwa apasiñama, kunattejj jachʼa tantachäwinjja janiw uka medicamentonak jikjjatkätati
◼ Zapatonaka. Sapa maraw kay usuchjasipjje jan ukajj qʼewsusipjje. Ukatwa ukürunakatak jan usuchjirjamäki uka zapato uchtʼasiñajj wakisi, ukhamat gradanakansa rejillanakansa ukat yaqha cheqanakansa sum sarnaqañataki.
◼ Jan sum istʼapki ukanakataki. Pachpa jachʼa tantachäwinjja wakichäwejj FM radiot istʼasini. Istʼañatakejj mä jiskʼa radio ukat jiñchur usktʼasis mä ischʼukiñampiw munasini.
◼ Wawa nuknaqañ cochenaka ukat apthapiñ sillanaka. Jachʼa tantachäwirojj janiw wawa nuknaqañ cochenakasa apthapiñ jachʼa sillanakasa apasiñapäkiti. Jiskʼa wawanakar qontʼayañ sillanakjja apasisipkasmawa, ukampis uka sillanakajj janiw mä qonuñat jiläñapäkiti.
◼ Sírvase visitar sat formulario. Jachʼa tantachäwinkkasin Diosat yatjjatañ munirinakampi parltʼäta ukhajja, jupanakajj kawkjans jakapjje uk qellqtʼañatakejja Sírvase visitar (S-43) sat formularioruw qellqtʼasiñama. Jachʼa tantachäwinjja Departamento de Publicaciones sat uñjiri jilatanakaruw uka formulario jaytasma jan ukajj tamankir secretario jilataruw tamamar kutʼjjasajj churarakisma (Diosan Apnaqäwipat Yatiyañataki mayo 2011, 3 jana uñjjatäta).
◼ Manqʼa aljañ utanaka. Uka utanakar sarasin jilat kullakanakasajj respetomp sarnaqapjje ukhajja, Jehová Diosaruw jachʼañchapjje.
◼ Qorpachasiñ utanaka. Aka amtäwinakajja, janiw taqe cheqanakatakïkiti:
1) Janiw inamayak utanak mayïtati, janirakiw yaqhanakarus uka utar qorpachañatak jawstʼätati.
2) Uka qorpachasiñ utanjja, kawkhantï phayasiñapäki uka cheqanakwa phayasma.
3) Qorpachaskäta uka utan irnaqerinakarojj sapüruw qollqe wajjtʼasma.
4) Juntʼümas chhullunkhayas inakiw qorpachasirinakarojj churapjje, ukhamajj janiw jilpach apsusiñamäkiti.
5) Qorpachasiñ utan irnaqerinakarojj munasiñampi ukat respetompiw uñjañasa. Jupanakajj waljaniruw yanaptʼasipki, ukhamajj jiwasan amuytʼasirïtasatsa suytʼirïtasatsa ukat jupanakar yanaptʼirïtasatsa wal yuspärapjje.
◼ Yanaptʼañataki. Jachʼa tantachäwinakar sarañajj wali kusiskañapuniwa, ukampis kunanakantï ukan yanaptʼañajj wakisini ukar yanaptʼäta ukhajja, jukʼamp kusisitaw jikjjatasïta (Hech. 20:35). Taqe khitinakatï yanaptʼañ munapjjani ukanakajja, Departamento de Servicio Voluntario ukaruw sarapjjañapa. Ukat khitinakatï janïr 16 maranïpki ukanakas yanaptʼapjjarakispawa, ukampis awk taykapan uñjatäpjjañapawa.
◼ Katoqtʼirinaka. Kawkïr jilatanakatï experiencianïpkta, yämas irpir chuymaninakaru ukhamarak yanapirinakaparuw katoqtʼirinakjam irnaqtʼapjjañapatak chʼamañchtʼanipjjsma, jilat kullakanakar sum yanaptʼapjjañapataki ukhamat mä wawakjam tantachasiñajj utjarakini. Ukham irnaqtʼañajj Jehová Diosar wal kusisiyi.
◼ Horasar puriña. Kawkhantï jachʼa tantachäwejj apaskäni ukarojj horasapar puriñatak chʼamachtʼasiñäni ukhajja wali chʼamañchtʼataw jikjjatasiñäni. Kunattejj jilat kullakanakasampiw parltʼañäni, música usktʼaskani uksa istʼañäni, qallta qʼochsa qʼochuñäni, qallta mayisiwsa ukat wali suma katoqtʼatäpjjtaw siskani uka arunaksa istʼarakiñäniwa. Horasapar tantachäwir puriñäni ukhajja, jilat kullakanakasajj wakichäwi sum istʼapjjani ukat taqe kun sum lurirïtapat Jehová Diosar respetatassa yuspäratassa uñachtʼayarakiñäni (1 Cor. 14:40).
[14 janan recuadropa]
¿Kunjamsa invitacionajj lakirasiskani?
Waljanir invittʼañatakejj jukʼa arunakampikiw parlañasa. Inas akham sissna: “Kamisaraki. Oraqpachanwa aka invitacionajj churasiski. Jumatak jayttʼawayañ munaraktwa. Kunatakisa ukat kawkhansa apasiskani ukajj akanwa qhanañchasiski” sasa. Taqe chuymaw irnaqtʼañama. Sabadomp domingompejj invitacions jaytkchïtajja, wakisirjamäni ukhajj revistanak churarakismawa.