Israel markana ukhamarak uka jakʼankir markanakanwa guerrajj utji | ¿Bibliajj uka toqet kamsisa?

Estados Unidos markasa, Israel markasa ukhamarak Irán markas jan waltʼayasisipki ukajj walja jaqenakaruw llakisiyi. ¿Uka guerrajj jukʼamp markanakarut jan waltʼaypachäni? ¿Gobiernonakat uka guerra chhaqtayapjjpachäni? ¿Jupanakat aka oraqpachan sumankañsa utjayapjjpachäni?

Biblian profecianakapat mä jukʼa yatipki uka jaqenakajj inas akham sasin jisktʼasipjjchi: “¿Israel markana ukhamarak uka jakʼankir markanakan guerrajj utjki ukajj Armagedón guerran qalltapäpachati?” sasa. Biblian Apocalipsis librow Armagedón guerrat parli.

¿Bibliajj uka toqet kamsisa?

Israel markana ukhamarak uka jakʼankir markanakan guerrajj utjki ukjja, ¿gobiernonakat chhaqtayapjjpachäni?

Bibliajj akham siwa: “Principenakarojj jan confiyapjjamti, janirak khiti jaqenakarus confiyapjjamti, kuna laykutejj janiw jupanakajj salvapkaspati” sasa (Salmo 146:3).

Uka markanakan guerrajj utjki ukan sumankañ mä jukʼa utjañapatakejja, gobiernonakajj yanaptʼapjjpachäniti janicha uk janiw yatktanti. Ukampis Bibliarjamajja, janiw khiti político jaqesa, jaqen apnaqat kuna gobiernosa ni kuna grupo jaqenakas guerranak jan mayampitak chhaqtayapkaniti, ni cheqpach sumankañsa aka oraqen utjayapkaniti. ‘Diosakiw oraqpachanjja guerranak qʼal chhaqtayani’ (Salmo 46:9).

• Jukʼamp yatiñatakejja, “¿Aka oraqen guerranakajj tukusjjpachäniti?” sat pʼeqeñchäwini Yatiyañataki revista liytʼam.

¿Bibliankir mä profeciarjamat uka guerrajj phoqasiski?

Bibliajj akham siwa: “Jumanakajj taqe cheqan guerranak utjatap istʼapjjäta. [...] Mä jachʼa markajj yaqha jachʼa marka contraw nuwasini, mä gobiernosti yaqha gobierno contrarakiw nuwasini” sasa (Mateo 24:6, 7).

Israel markana ukhamarak uka jakʼankir markanakan guerrajj utjki ukajja, ‘akapachan tukusiñap tiempona’, mä arunjja, “qhepa urunakan” jakataswa uñachtʼayi (Mateo 24:3; 2 Timoteo 3:1). Ukhamajj niyaw Diosajj guerranak qʼal chhaqtayjjani, wal tʼaqesiykistu uka jan waltʼäwinaksa niyaw chhaqtayjjarakini.

• Jukʼamp yatiñatakejja, “¿Cuál es la señal de ‘los últimos días’ o ‘los tiempos finales’?” sat pʼeqeñchäwini yatichäwi liytʼam.

¿Armagedón guerrajj Israel markana ukhamarak uka jakʼankir markanakanti qalltpachäni?

Bibliajj akham siwa: “Hebreo arun Armagedón sat lugararuw reyinakar tantachthapipjjäna” sasa (Apocalipsis 16:16).

Armagedonajj janiw jaqenakan apnaqata gobiernonakan guerrapäkiti, janirakiw Israel markana ukhamarak uka jakʼankir markanakan qalltkaniti. Jan ukasti, Armagedonajj Diosan guerrapawa, jupaw uka guerran oraqpachankir gobiernonakamp nuwasini.

• Jukʼamp yatiñatakejja, “¿Qué es el Armagedón?” sat pʼeqeñchäwini yatichäwi liytʼam.

¿Kunas jan sint llakisiñatak yanaptʼistaspa?

Bibliajj akham siwa: “Jan jumanakajj kunatsa llakisipjjamti, jan ukasti taqe llakinakamjja Diosaru oracionan yatiyapjjam, taqe chuym ruwtʼasisa yuspärasa jupar oración lurapjjam” sasa (Filipenses 4:6).

Jehováa Diosajj jupar orasiñaswa muni. Diosajj jiwasat wal llakisi, ukatwa oracionanakas istʼi, jan sint llakisiñatakiw yanaptʼarakistu (1 Pedro 5:7). ¿Kunjamsa yanaptʼistu? Guerranakajj kunatsa utji, kunjamatsa ukanakajj tukusjjani ukanakwa jupajj qhanañchtʼistu, kunanakatï wal tʼaqesiykistu ukanak kunjamsa askichani ukwa Diosajj qhanañcharakistu (Apocalipsis 21:3, 4).

• Kunjamanakatsa Diosajj yanaptʼistu uka toqet jukʼamp yatiñatakejja, “¿Puedo encontrar consuelo en la Biblia?” sat pʼeqeñchäwini yatichäwi liytʼam.