Jaypʼunakajj ¿yatiyir mistsnati?
1. Mä qellqatarjamajja, ¿kuna horatsa apóstol Pablojj utat uta yatiyirïna?
1 Apóstol Pablojj utat uta yatiyañatakejj “pusi jaypʼu horasat arumkamaw yatiyirïna” sasaw mä qellqatajj qhanañchi (Daily Life in Bible Times). Cheqas uka horapuniw yatiyirïna sasajj janiw sisksnati, ukampis jupajj taqe chuymaw “Tatitun arunakap parlañ” munirïna (1 Cor. 9:19-23). Ukhamajj kuna horasas walja jaqenakamp parltʼaspa ukatakjamaw utat uta yatiyañatakejj tiemp apstʼasirïna.
2. ¿Kunats jaypʼunak yatiyir sarañajj jukʼamp wakiskirejja?
2 Walja cheqanakanjja, yatiyirinakajj alwanakapuniw utat uta yatiyapjje. Yatiyktan ukawjanakanjja, ¿alwanakakit jaqenak jikjjatañjama? Mä precursor jilatajj akham sänwa: “Urojja janiw walja jaqenak jikjjatapkti antisas arumaruw jikjjatapjjta” sasa. Uka horasarojj jaqenakajj tiemponïpjjewa ukat parltʼatas istʼapjjarakiwa. Ukat chachanakarus yatiyañjamarakiwa. Jaypʼunak yatiyañjamächi ukhajja, irpir chuymaninakaw kawkhansa yatiyasini uk amtjjapjjañapa.
3. Arumanak yatiyir sarasajj ¿kunjamsa amuytʼasirïtas uñachtʼaysna?
3 Amuyumpiw yatiyañasa. Arumanakajj wali amuyumpiw yatiyañasa. Kunattejj jan wakiski uka ratuw pursna, sañäni, inas manqʼasipkchispa, ukhamächi ukhajja mä jukʼampjaruw kuttʼanï sañasawa. Chʼamakäjjchi ukhajja, uñjkistaspas ukharuw saytʼasiñasa ukat khitïtansa kunats utapar sartan ukanak jankʼakiw yatiyañasa. Ukat panini jan ukajj grupo jakʼana, luza qhanajj utjki uka callenakanwa yatiyañasaraki, janiw chʼusawjanakan yatiyañasäkiti. Ukat janiw sinti arumanak yatiyañajj wakisjjaspati, kunattejj jaqenakajj niyaw ikiñatak wakichasjjapjjaspa (2 Cor. 6:3). Ukat arum sarnaqañajj ajjsarayasiñjamäjje ukawjanakanjja, janïr chʼamaktʼkipanwa yatiyañajj wakisispa (Prov. 22:3).
4. Jaypʼunak yatiyañäni ukhajja, ¿kuna bendicionanaksa jikjjatañäni?
4 ¿Kuna bendicionanakas utji? Diosan arunakap walja jaqer yatiyasajj jukʼamp kusisitätänwa. Ukhamajj Diosan arunakap jukʼamp yatiyañatak chʼamachasiñäni ukhajja, jukʼamp walja jaqenakaw Diosar uñtʼapjjani ukat qhespipjjarakini (1 Tim. 2:3, 4). Jaypʼu toqer yatiyañatakejj lurañanakasat ¿tiemp apstʼassnati?