Xidmətdə püxtələşək. Qeydlər aparmaqla

«Özünə və verdiyin təlimə həmişə diqqət yetir» (1 Tim. 4:16). Həvari Pavelin Allahdan ilham alaraq Timoteyə verdiyi bu məsləhət göstərir ki, biz yeni və ya təcrübəli təbliğçi olmağımızdan asılı olmayaraq, püxtələşməyə çalışmalıyıq. Bu işdə bizə «Bizim Padşahlıq Xidmətimiz»də çıxacaq «Xidmətdə püxtələşək» adlı yeni rubrika kömək edəcək. Hər məqalədə vacib bir bacarıq və həmin sahədə püxtələşmək üçün məsləhətlər müzakirə ediləcək. Ay ərzində hamı həmin bacarığa xüsusilə diqqət yetirməyə təşviq olunacaq. Ay bitdikdən sonra Xidməti görüşün bir bəndində şərait yaradılacaq ki, biz həmin bacarığa diqqət verməklə hansı faydanı əldə etdiyimiz barədə şərh verək. Bu ay biz maraqlanan insan haqda qeydlər aparmağa təşviq olunuruq.

Nə üçün vacibdir? Bizə həvalə olunan işi yerinə yetirmək üçün yalnız təbliğ etməklə kifayətlənməməliyik. Biz maraqlanan insanlara təkrar baş çəkməli, onları öyrətməli, əkdiyimiz həqiqət toxumlarını sulamalıyıq (Mat. 28:19, 20; 1 Kor. 3:6—9). Bunun üçün İnsanı yenidən tapmaq, onu narahat edən şeylər haqda danışmaq və keçən dəfəki söhbətimizin davamını gətirmək tələb olunur. Buna görə də maraqlanan insan tapanda qeydlər aparmaq vacibdir.