Müvəffəqiyyətlə Müqəddəs Kitab öyrənməsi keçir
1 Müqəddəs Kitabı öyrənən adam daima irəliləyiş etsin deyə, tədbirli olmaq və yaxşı planlaşdırma tələb olunur. Öyrənməni aydın məqsədlə başlamaq və keçirmək, yə’ni öyrənən adama İsa Məsihin fəal şagirdi olmaqda kömək etmək lazımdır (Mat. 13:23). Buna görə də, onlara İsanın buyurduğu hər şeyə riayət etməyi öyrətmək lazımdır (Mat. 28:19, 20). Öyrənənlərə başa sal ki, Allahın Kəlamındakı əsas bilikləri əldə etməkdə onlara kömək göstərmək üçün, öyrənmə hər həftə keçiriləcək. Həmçinin nəzakətlə qeyd et ki, əldə etdiyi biliyi həyata keçirməklə, öyrənən kəsin də öz tərəfindən nailiyyətlər etməsi gərəkdir (Sül. məs. 22:17; Filip. 3:16). Bəs əsasən hansı sahələrdə nailiyyətlər müşahidə edilməlidir?
2 Vaxtaşırı təbliğçi, Müqəddəs Kitabı öyrənən adamın etdiyi nailiyyətlər üzərində düşünməlidir. Özündən soruş: Həmin adam göstərilən, lakin sitat gətirilməyən ayələri nəzərdən keçirərək, məşğələyə hazırlaşırmı? (Həv. iş. 17:11; 1 Salon. 2:13). Öz sözləri ilə cavab verirmi və cavablarında, öyrəndiyi Müqəddəs Kitab həqiqətlərinə görə minnətdarlıq hissi əks olunurmu? (Sül. məs. 2:1-6). Müqəddəs Kitabı və Cəmiyyətin nəşrlərini əlavə olaraq oxumağa onu təşviq etmək münasib olardımı? O, ruhani cəhətdən elə bir səviyyəyə çatıbmı ki, Müqəddəs Yazıların gündəlik ayəsini araşdıra bilsin?
3 Onun danışığından, əhval-ruhiyyəsindən və davranışından Müqəddəs Kitabın əxlaq normalarını qəbul etdiyi görünürmü? (1 Kor. 6:9, 10). Xüsusiyyətlərində dəyişiklik edirmi? (Efes. 4:22-24). Müqəddəs Kitab həqiqətlərinə görə minnətdarlıq hissi onu təşviq edirmi ki, öyrəndiklərini qeyri-rəsmi surətdə qohumlarına, iş yoldaşları və qonşularına söyləsin? (Luka 6:45). Əgər onun səhhəti və vəziyyəti yol verirsə, yığıncaq görüşlərinə müntəzəm gəlirmi? (İbr. 10:23-25). Öyrənən adamın bu sahələrdə əldə etdiyi nailiyyəti nəzərdən keçirmək, onun “əkilən kəlamı həlimliklə” qəbul edib-etməməsini müəyyənləşdirməyə kömək edəcək (Yaq. 1:21).
4 Səmərəsiz öyrənməni dayandırmağın yolu. Əgər xeyli vaxt ərzində səbirlə kömək etdikdən sonra, öyrənən adam nəzərə çarpan irəliləyişlər etmirsə, bəlkə vaxtımızı buna ləyaqətli olan kəsləri axtarmağa sərf etmək daha yaxşı olar (Mat. 10:11-13). Vəziyyətdən asılı olaraq, bəlkə həmin öyrənməni davam etdirməmək müdriklik olar. Etdiyi nailiyyətə görə ev sahibini ürəkdən tə’riflə. Lakin qeyd et ki, öyrənilən Müqəddəs Kitab həqiqətlərini tətbiq etmək lazımdır. İsanın əkinçi barəsində olan məsəlini istifadə edərək, orada xatırlanan dörd torpaqdan hər birini müzakirə edib göstərə bilərsən ki, həmin məsəl Padşahlıq haqqındakı xəbərə müsbət cavab verməyin vacibliyini qeyd edir. Bu, öyrənənə kömək edəcək ki, daima irəliləyiş etməkdə ona nəyin mane olduğunu anlasın. Nəzərinə çarpan şeyləri deməyə münasib məqamlar ola bilər. Mülayim, amma düz və açıqsözlü ol (1 Kor. 14:8, 9). Ona de ki, lazımi dəyişikliyi etdikdə öyrənmə bərpa oluna bilər. Bununla bərabər, ruhlandırmaq üçün, vaxtaşırı ona baş çəkəcəksən.
5 Yığıncağın sahəsində, əvvəllər Müqəddəs Kitabı öyrənmiş insanlarla qarşılaşdıqda, onların nə qədər vaxt ərzində və kiminlə öyrəndiklərini soruşmaq müdriklik olardı. Öyrənməni nəyə görə dayandırıblar? Əgər həmin adamlarla əvvəllər öyrənmə keçirən məsihçini tanıyırsınızsa, öyrənməni bərpa etməzdən qabaq bu məsələni elə onunla və yığıncağın xidməti komitəsindən olan ağsaqqal ilə müzakirə etmək yaxşı olardı. Bəlkə sənin bilmədiyin amillər var. Bə’zi adamlar, heç bir irəliləyiş etmədən, illər uzunu ayrı-ayrı təbliğçilərlə Müqəddəs Kitabı öyrənirlər. Biz, həqiqətə səmimi maraq göstərən adamlara vaxt ayırmalıyıq.
6 Müqəddəs Kitab öyrənməsini dayandırmaq və ya əvvəllər keçirilən öyrənməni bərpa etmək qərarından asılı olmayaraq, yəqin ki, ev sahibi ilə “Gözətçi Qülləsi”nin “Sən Allaha nə üçün xidmət edirsən?” (w00 15.12, rus.) və ya “Mənə dönün, mən də sizə dönərəm” (w92 1.8, rus.) məqalələrindən maraqlı fikirləri müzakirə etmək faydalı olardı. Müvəffəqiyyətli Müqəddəs Kitab öyrənməsi keçirmək qabiliyyətini yaxılaşdırmaqla, çoxsaylı başqa insanların həqiqəti öyrənmələrinə, qəbul etmələrinə və həyata keçirmələrinə kömək etmək olar. Bu, Yehova Allahla xoş münasibətlərə, nəhayətdə isə əbədi həyata nail olmağa gətirib çıxara bilər (Filip. 4:9; Yəh. 17:3).