“An Sekreto” na Nanodan Mi sa Samong Sagradong Paglilingkod

Isinaysay ni Olivier Randriamora

“Aram ko nanggad kun paano magkulang nin mga kinakaipuhan, aram ko nanggad kun paano magin abunda. Sa gabos na bagay asin sa gabos na kamugtakan nanodan ko an sekreto nin pagigin basog sagkod nin pagigin gutom . . . Igwa ako kan kosog para sa gabos na bagay huli sa saiya na nagtatao nin puersa sa sako.”—Fil. 4:12, 13, NW.

AN MGA tataramon na iyan ni apostol Pablo haloy nang nagpapakosog na marhay sa sako asin sa agom kong si Oly. Arog ni Pablo, nanodan mi “an sekreto” paagi sa lubos na pagsarig ki Jehova mantang naglilingkod sa Saiya digdi sa Madagascar.

Magkailusyon na kami ni Oly kan an mga Saksi ni Jehova nagpoon na tokdoan sa Biblia an ina ni Oly kan 1982. Nag-ako man ako nin pag-adal sa Biblia, asin paghaloyhaloy iyo na man si Oly. Ikinasal kami kan 1983, nabautismohan kan 1985, asin tolos-tolos na nag-auxiliary payunir. Kan Hulyo 1986, nagregular payunir kami.

Kan Setyembre 1987, nagin espesyal payunir kami. An enot ming destino iyo an sadit na banwaan na mayong kongregasyon sa amihanan-solnopan na parte nin Madagascar. Sa nasyon na iyan, igwa nin mga 18 pangenot na grupong etniko saka dai mabilang na saradit na grupo, asin laen-laen nanggad an mga kostumbre asin tradisyon ninda. Malagasy an opisyal na lenguahe, pero may laen-laen na dialekto man. Kaya pinonan ming adalan an dialekto sa bagong destino mi, asin nakatabang iyan na mas madali kaming akoon sa komunidad.

Kan enot, nagtatao ako nin pampublikong pahayag kada Domingo, asin pagkatapos kaiyan obligadong minapalakpak si Oly. Kami sana an presente. May kompletong programa man kami para sa Teokratikong Paadalan sa Pagmiministro, asin iniimahinar sana ni Oly na may kaolay siang kagharong. Nakaginhawa nanggad kami kan maboot na isuherir kan nagdadalaw na paraataman nin sirkito na puede ming liwaton nin kadikit an mga pagtiripon!

Huling dai maaasahan an koreo, dai mi nareresibi nin regular an samong bulanan na allowance. Sa siring, nanodan mi kun paano mamuhay na tios. Sarong beses, kulang an pamplete mi sa bus tanganing mag-atender sa pansirkitong asamblea, na mga 130 kilometros an rayo. Nagirumdoman mi an marahay na sadol nin kapwa Saksi: “Sabihon nindo ki Jehova an saindong mga problema. Total, sa saiya hale an trabaho nindo.” Kaya namibi kami asin nagdesisyon na maglakaw na sana. Minsan siring, kan pahale na kami, biglang nagbisita sa samo an sarong brother asin tinawan kami nin regalong kuarta—igo nanggad na pamplete sa bus!

PANSIRKITONG GIBOHON

Kan Pebrero 1991, nagin paraataman ako nin sirkito. Kan panahon na idto, an samong sadit na grupo nagin 9 na parahayag, na 3 sa sainda an bautisado, asin sa parate mga 50 an nag-aatender sa pagtiripon. Pagkatapos kan pagsasanay, naglingkod kami sa sarong sirkito sa kabisera, an Antananarivo. Kan 1993, ibinalyo kami sa sarong sirkito sa sirangan na parte kan nasyon. An kamugtakan kan pamumuhay duman laen na marhay sa mga nasa siudad.

Tanganing maabot an mga kongregasyon asin napapasuway na mga grupo, naglalakaw sana kami, na kun beses sagkod 145 kilometros an rayo asin minaagi sa makahoyon na kabukidan. Dikit sanang bagahe an dinadara mi. Siempre, kun an pampublikong pahayag kan paraataman nin sirkito may kaibang slide show, siring kan ginigibo kaidto kun minsan, mas magabat an bagahe mi. Dara ni Oly an projector, mantang dara ko man an sarong bateria sa auto.

Parate kaming naglalakaw nin mga 40 kilometros kada aldaw tanganing maabot an sunod na kongregasyon. Sa paglakaw mi, minatukad dangan minababa kami sa mga agihan sa bukid, minabalyo sa mga salog, asin minalugbo sa laboy. Kun beses, nagtotorog kami sa gilid kan tinampo, alagad parate ming pinagmamaigotan na makahanap nin baryo na puede kaming makakua nin madadagosan sa banggi. Kun beses nakikitorog kami sa mga dai mi lamang kamidbid. Pakakua nin madadagosan, maandam na kami nin pagkakan. Nagsusubli si Oly nin kaldero asin nagsasakdo sa pinakaharaning salog o danaw. Ako man nagsusubli nin patok tanganing magtiak nin panggatong. Dakol na panahon an kaipuhan sa mga gibohon na ini. Kun minsan, nagbabakal kami nin buhay na manok, na kaipuhan ming bunoon asin linigan.

Pagkakakan, minasakdo na man kami nin pangkarigos. Kun beses nagtotorog kami sa kusina. Kun nag-ooran, may beses na nagtotorog kaming nakasandig sa lanob tanganing dai kami maturoan hale sa labot na atop.

Pirme niamong sinisierto na magpatotoo sa mga nagpapadagos sa samo. Kun nakaabot na kami sa samong padudumanan, nakakaogmang gayo an kabootan asin pagkamapag-istimar kan Kristianong mga tugang. Huli sa odok sa pusong pag-apresyar ninda sa samong pagbisita, sulit an mga sakit na inagihan mi.

Kun nakikidagos sa harong nin mga kapwa Saksi, naoogma kaming tabangan sinda sa mga gibohon sa harong. Huli kaini, libre na sindang umiba sa samo sa ministeryo sa langtad. Dai kami nag-aasa nin luho o espesyal na kakanon, na dai kaya kan mga nagpapadagos sa samo.

PAGDALAW SA NAPAPASUWAY NA MGA GRUPO

Naoogma kaming magdalaw sa napapasuway na mga grupo, na duman maogma kaming inaako kan mga tugang na nag-iiskedyul nin dakol na aktibidad. Bihira kaming magkapanahon na ‘makapahingalo nin kadikit.’ (Mar. 6:31) Sa sarong lugar, inimbitaran nin mag-agom na Saksi sa saindang harong an gabos na 40 tinotokdoan ninda sa Biblia tanganing ibanan mi sinda sa pag-adal. Inibanan ni Oly an sister sa pagtokdo sa mga 20 inaadalan sa Biblia, asin inibanan ko man an brother sa 20 iba pa. Pagkatapos nin sarong estudyante, pinoponan mi tolos an sunod na pag-adal. Paghaloyhaloy, nagpopondo kami para sa mga pagtiripon kan kongregasyon, dangan ipinapadagos mi an mga pag-adal sa Biblia. An mga aktibidad sa sibot-sibot na aldaw posibleng matapos nin pasado alas otso nin banggi!

Kan nagdalaw kami sa saro pang grupo, gabos kami nagpasiring sa kaharaning baryo, mga alas otso nin aga. Nakasulot kami gabos nin lumang bado. Pagkatapos nin halawig na pagbaklay sa kadlagan, mga udto na kami nakaabot sa teritoryo. Nagsulot kami nin malinig na bado asin tolos-tolos naghulit sa harong-harong. Dikit sana an harong asin dakol an parahayag. Kaya natapos mi an bilog na teritoryo nin mga 30 minutos. Dangan nagpasiring kami sa sunod na baryo. Pagkatapos maghulit duman, kaipuhan ming magbaklay nin halawig papuli. Kan primero, medyo nangluya an boot mi huling dakol na panahon asin kosog an nagamit mi alagad mga sarong oras sana kaming naghulit sa harong-harong. Minsan siring, dai nagreklamo an mga Saksing taga duman. Nagdanay sindang entusiastiko.

Sarong napapasuway na grupo sa Taviranambo an harani sa alituktok nin bukid. Nanompongan mi duman an sarong pamilyang Saksi na nakaistar sa harong na saro sana an kuarto. Sa kaharani kaiyan may sadit na nakatogdok na ginagamit na tiriponan. Bigla na sana, an nagpadagos sa samo nagpoon na magkurahaw, “Mga tugang!” Hale sa sunod na alituktok nin bukid, may nagsimbag, “Ano!” An nagpadagos sa samo nagkurahaw giraray, “Nag-abot na an paraataman nin sirkito!” An simbag, “Sige!” Minalataw na ipinapasa-pasa an mensahe sa mga nakaistar sa mas harayo pa. Dai nahaloy, nagpoon na mag-arabot an mga tawo, asin kan magpoon na an pagtiripon, labing 100 an presente.

MGA KADEPISILAN SA TRANSPORTASYON

Kan 1996 ibinalyo kami sa sarong sirkito na mas harani sa Antananarivo, sa tahaw kan mabulod na lugar. Sa sirkitong ini, laen man an mga kadepisilan. Mayo nin regular na pampublikong transportasyon pasiring sa hararayong lugar. Nakaiskedyul kaming magdalaw sa sarong grupo sa Beankàna (Besakay), mga 240 kilometros hale sa Antananarivo. Pagkatapos ming kaolayon an drayber, suminakay kami sa sadit na trak na paduman. Mga 30 pang pasahero an nasa trak, may mga nasa atop asin an iba pa nakakabit sa likodan.

Arog kan parateng nangyayari, naraotan an trak, kaya naglakaw na lang kami. Kan nagkapirang oras na kaming nagbabaklay, sarong dakulang trak an nag-agi. Pano-pano na iyan nin mga tawo asin gamit, alagad nagpondo man giraray an drayber. Nagsakay pa man giraray kami, dawa mayo nang matutukawan. Paghaloyhaloy nakaabot kami sa sarong salog, alagad hinihirahay an tulay. Sa giraray naglakaw kami asin sa katapustapusi nakaabot sa sadit na baryo, kun saen may nakaistar na mga espesyal payunir. Minsan ngani mayong nakaiskedyul na pagdalaw, ginamit mi an panahon sa paghuhulit kaiba ninda mantang hinahalat na mahirahay an tulay asin na may mag-agi na saro pang malulunadan.

Luminihis an sarong semana bago may nag-aging lunadan, asin ipinagpadagos mi an samong pagbiahe. Kadakol nin darakulang lubak sa tinampo. Sa parate, kaipuhan ming tumabang na itulod an lunadan tanganing makaagi sa patuhod na tubig, na pirmeng nadadapla mantang ginigibo iyan. Amay na aga kaming nakaabot sa sadit na baryo, na duman kami nagbaba. Hale sa mayor na tinampo, nagpadagos kaming maglakaw sa kaomahan, na sagkod habayan an malaboy na tubig, pasiring sa dudumanan niamo.

Iyan an enot ming pagdalaw sa lugar na idto, kaya nagdesisyon kaming magpatotoo sa nagkapirang nagtatrabaho sa oma asin maghapot kun saen nakaistar an mga Saksi duman. Kanigoan an kaogmahan mi na maaraman na espirituwal na mga tugang mi palan an mga trabahador na iyan!

PAGDAGKA SA IBA NA LUMAOG SA BILOG NA PANAHON NA MINISTERYO

Sa nag-aging mga taon, dakulang kagayagayahan sa samo na mahiling an mga resulta sa pagdagka sa iba na lumaog sa bilog na panahon na ministeryo. Mantang nagdadalaw sa sarong kongregasyon na may siyam na regular payunir, dinagka mi an kada payunir na gibohon na pasohan na may matabangan na saro pang parahayag na magpayunir. Kan nagdalaw kami pakalihis nin anom na bulan, biglang nagin 22 an regular payunir. Nadagka kan duwang payunir na sister an saindang mga ama, na pareho elder, na magregular payunir. Dangan, namotibar kan duwang brother na ini an saro pang elder na magpayunir man. Dai naghaloy, an ikatolong elder ninombrahan na espesyal payunir. Kan huri, sia asin an agom nia naasignaran sa pansirkitong gibohon. Kumusta man an duwa pang elder? An saro naglilingkod bilang paraataman nin sirkito, asin an saro pa boluntaryo sa pagtogdok nin Kingdom Hall.

Nagpapasalamat kami aroaldaw ki Jehova para sa tabang nia, mantang inaadmitir niamo na mayo kaming magigibo kun sa sadiri mi sanang kosog. Totoo, kun beses napapagal asin nagkakahelang kami, pero maogma kami kun hinohorophorop niamo an mga resulta kan samong ministeryo. Ginigibo ni Jehova na mapanggana an gibohon nia. Maogma kami na igwa kami nin dikit na kabtang dian, na pinaglilingkodan sia ngonyan bilang espesyal payunir. Iyo, nanodan mi “an sekreto” paagi sa pagsarig ki Jehova, “na nagtatao nin puersa” sa samo.

[Blurb sa pahina 6]

Nanodan mi “an sekreto” paagi sa pagsarig ki Jehova

[Mapa/Mga Ritrato sa pahina 4]

An Madagascar, na inaapod na Big Red Island, an ikaapat na pinakadakulang isla sa daga. An daga kaiyan kolor pula, asin dakol na klase nin hayop asin tanom an duman sana manonompongan

[Ritrato sa pahina 5]

An pagbiahe an saro sa pinakadakulang mga kadepisilan na inatubang mi

[Ritrato sa pahina 5]

Naoogma kaming makiiba sa mga pag-adal sa Biblia