Igwa Ka daw nin ‘Pusong Magmimidbid’ ki Jehova?

1, 2. Taano ta tibaad magin interesado sa igos an iba?

DAKUL an nasisiraman sa prutas na igos, bagong guno man iyan o pinaalang. An igos pinapahalagahan kan suanoy na mga Judio. (Nah. 3:12; Luc. 13:6-9) Igwa iyan nin fiber, mga antioxidant, asin mga mineral; kaya may mga nagsasabi na marahay iyan sa puso.

² An igos ikinonektar kaidto ni Jehova sa puso. Bako man an nakukuang nutrisyon sa pagkakan nin igos an pinapanungdan nin Diyos. Siya nagtataram sa piguratibong paagi. An sinabi niya paagi ki propeta Jeremias igwa nin koneksiyon sa saimong puso asin sa puso kan saimong mga namumutan. Mantang pinag-uulayan ta an sinabi niya, isipon kun ano an puwedeng magin kahulugan kaini sa mga Kristiyano.

3. Sa ano nanunungod an mga igos na sinambit sa Jeremias kapitulo 24?

³ Pag-ulayan ta nguna an sinabi nin Diyos dapit sa igos kaidtong panahon ni Jeremias. Kan 617 B.C.E., maraot an kamugtakan sa espirituwal kan nasyon nin Juda. Si Jehova nagtao nin bisyon dapit sa maabot na panahon, na iniilustrar iyan paagi sa duwang klase nin igos—an mga igos na ‘kaniguan karahay’ asin an mga ‘labi-labi karaot.’ (Basahon an Jeremias 24:1-3.) An maraot na igos nanunungod ki Hading Zedequias asin sa iba pang arog niya na napaatubang sa maringis na pagtratar ni Hading Nabucodonosor asin kan saiyang mga soldados. Pero kumusta man si Ezequiel, si Daniel saka an tulo niyang kairiba na nasa Babilonya na, asin an nagkapirang Judio na madali nang darahon duman? Arog sinda sa marahay na mga igos. May matatada sa sainda na mabalik tanganing itugdok liwat an Jerusalem asin an templo kaiyan. Kan huri, talagang nangyari iyan.—Jer. 24:8-10; 25:11, 12; 29:10.

4. Anong pamparigon sa buot an makukua niyato sa sinabi nin Diyos dapit sa marahay na mga igos?

⁴ Mapadapit sa mga pinapanungdan kan marahay na mga igos, si Jehova nagsabi: ‘Tatawan ko sinda nin pusong magmimidbid sako, na ako si Jehova; asin sinda magigin sakuyang banwaan.’ (Jer. 24:7) Iyo iyan an pinakatemang teksto kan artikulong ini, asin nakakaparigon nanggad iyan! Andam an Diyos na tawan an mga indibiduwal nin ‘pusong magmimidbid’ sa saiya. Digdi, an “puso” igwa nin koneksiyon sa disposisyon nin saro. Siyertong gusto mong magkaigwa nin siring na puso asin magin kabilang sa saiyang banwaan. Kalabot sa paggibo kaiyan an pag-adal asin pag-aplikar kan saiyang Tataramon, pagsulsol asin pagbakli, pagdusay kan saimong buhay sa Diyos, saka pagpabawtismo sa ngaran kan Ama, Aki, asin banal na espiritu. (Mat. 28:19, 20; Gui. 3:19) Puwedeng nagibo mo na an mga lakdang na iyan, o tibaad regular ka nang nakikiasosyar sa mga Saksi ni Jehova asin nasa proseso nin paggibo kaiyan.

5. Kiisay na puso an panginot na tinawan nin atensiyon ni Jeremias?

⁵ Baga man nagibo na niyato an nagkapira o an gabos na nasambit na lakdang, kaipuhan ta pa man giraray na tawan nin atensiyon an satong kaisipan asin paggawi. Taano? Masasabutan mo ini sa iba pang isinurat ni Jeremias mapadapit sa puso. An nagkapirang kapitulo kan libro nin Jeremias nanunungod sa nakapalibot na mga nasyon, alagad an pinakapokus kaiyan iyo an nasyon nin Juda kan mamahala an lima sa mga hadi kaiyan. (Jer. 1:15, 16) Iyo, sa panginot, si Jeremias nagsurat manungod sa mga lalaki, mga babayi, asin mga aki na dusay ki Jehova. Gikan sa buot na pinili kan saindang mga apuon na magin sarong nasyon na dusay sa Saiya. (Ex. 19:3-8) Asin kan panahon ni Jeremias, kinumpirmar kan banwaan an saindang pagigin dusay sa Diyos. Sinda nagsarabi: ‘Kami nagdulok sa saimo, huli ta ika si Jehova na samuyang Diyos.’ (Jer. 3:22) Alagad, ano sa paghuna mo an kamugtakan kan saindang puso?

KAIPUHAN DAW AN PIGURATIBONG OPERASYON SA PUSO?

6. Taano ta maninigo kitang magin nangurugnang interesado sa sinabi nin Diyos dapit sa puso?

⁶ An mga doktor ngunyan puwedeng gumamit nin modernong teknolohiya tanganing maaraman an kondisyon kan puso asin kun baga nagpupunsiyonar iyan nin marahay. Pero, urog pa diyan an kayang gibuhon ni Jehova, arog kan ginibo niya kan panahon ni Jeremias. An Diyos kuwalipikadong marhay, arog kan mahihiling ta sa sinabi niya: ‘Madaya an puso nin labi sa gabos na bagay, asin maraot. Siisay an makakamidbid kaiyan? Ako, si Jehova, nalaladop ko an puso, sa pagtao sa balang saro kan bagay sa saiyang dalan, siring sa bunga kan saiyang mga gibo.’ (Jer. 17:9, 10) An ‘pagladop,’ o pagsiyasat, kan puso dai nangangaipo nin medikal na eksaminasyon kan literal na puso, na puwedeng magkutab-kutab nin mga tulong bilyon sa laog nin 70 o 80 taon. Imbes, si Jehova nagtataram manungod sa piguratibong puso. An siring na “puso” nanunungod sa bilog na panglaog na pagkatawo nin saro, kaiba na an saiyang mga kamawutan, kaisipan, disposisyon, ugali, asin pasuhan. Igwa ka kan siring na puso. Puwede iyan siyasaton nin Diyos, asin maski paano magigibo mo man iyan.

7. Paano ilinadawan ni Jeremias an puso kan kadaklan na Judio kan panahon niya?

⁷ Bilang pag-andam sa siring na pagsiyasat, puwede tang ihapot, ‘Ano an kamugtakan kan piguratibong puso kan kadaklan na Judio kan panahon ni Jeremias?’ Tanganing masimbag iyan, estudyari an naiibang pananaram na ginamit ni Jeremias: “An bilog na harong nin Israel bakong turi sa puso.” Dai siya nagtataram dapit sa literal na pagturi sa mga lalaking Judio, huling siya nagsabi: “‘Uya! Maabot an mga aldaw,’ an sabi ni Jehova, ‘asin papanimbagon ko an gabos na turi pero yaon pa man giraray sa kamugtakan na bakong turi.’” Kaya dawa an turi na mga lalaking Judio “bakong turi sa puso.” (Jer. 9:25, 26, NW) Ano an buot sabihon kaini?

8, 9. Kun mapadapit sa saindang puso, ano an kinaipuhan na gibuhon kan kadaklan na Judio?

⁸ Mapadapit sa kahulugan kan “bakong turi sa puso,” magkakaigwa kita nin ideya base sa sadol nin Diyos sa mga Judio: ‘Halia nindo an kublit kan saindong puso, mga lalaki sa Juda asin mga nag-uuruntok sa Jerusalem; ta [tibaad] an sakuyang kabangisan lumuwas huli kan karatan kan saindong mga gibo.’ Pero sain naggikan an saindang maraot na mga gibo? Sa laog, sa puso ninda. (Basahon an Marcos 7:20-23.) Iyo, paagi ki Jeremias, eksaktong sinabi nin Diyos an pinaggikanan kan maraot na mga gibo kan mga Judio. An puso ninda sutil asin rebelyoso. An saindang mga motibo asin kaisipan dai nakakapaugma sa saiya. (Basahon an Jeremias 5:23, 24; 7:24-26.) Sinabihan sinda nin Diyos: ‘Pagpaturi kamo ki Jehova, asin halia nindo an kublit kan saindong puso.’—Jer. 4:4; 18:11, 12.

⁹ Huli kaini, kinaipuhan kan mga Judio kan panahon ni Jeremias an piguratibong operasyon sa puso—an ‘pagturi sa puso’—arog kan panahon ni Moises. (Deut. 10:16; 30:6) An ‘paghali sa kublit kan saindang puso’ nangangahulugan nin paghali kan mga dahilan kun taano ta nawaran nin pagmati an saindang puso—an saindang kaisipan, mga kamawutan, o mga motibo na dai inuuyunan nin Diyos.—Gui. 7:51.

‘PUSONG NAGMIMIDBID’ SA SAIYA NGUNYAN

10. Arog ni David, ano an maninigo niyatong mawuton na gibuhon?

¹⁰ Nagpapasalamat nanggad kita na tinatawan kita nin Diyos nin pakasabot sa piguratibong puso! ‘Pero, taano ta kaipuhan na magin interesado digdi an mga Saksi ni Jehova ngunyan?’ an tibaad isipon nin iba. Dai man nangangahulugan na dakul na Kristiyano sa mga kongregasyon an may maraot na pamumuhay o nagigin ‘maraot na igos,’ arog kan dakul na Judio kaidto. Sa kabaliktaran, an mga lingkod nin Diyos ngunyan sarong maimbod asin malinig na banwaan. Pero, hurop-hurupa an pakiulay ni David ki Jehova: ‘Siyasaton mo ako, O Diyos, asin midbida an sakuyang puso. Baluon mo ako, asin midbidon mo an sakuyang mga pag-isip, asin hilingon mo kun igwa sa sakuya nin dalan sa karatan.’—Sal. 17:3; 139:23, 24.

11, 12. (a) Taano ta maninigong siyasaton kan lambang saro sa sato an sadiri niyang puso? (b) Ano an dai gigibuhon nin Diyos?

¹¹ Gusto ni Jehova na an lambang saro sa sato makaabot asin makapagdanay sa kamugtakan na inaako niya. Mapadapit sa mga matanos, sinabi ni Jeremias: ‘O Jehova kan mga hukbo, narururop mo an mga banal; nahihiling mo an mga pag-isip asin an puso.’ (Jer. 20:12) Kun sinisiyasat kan Makakamhan sa Gabos an puso dawa kan mga matanos, bako daw na kita mismo maninigo man na gumibo nin sinserong pagsiyasat kan satong sadiri? (Basahon an Salmo 11:5.) Mantang ginigibo ta iyan, tibaad may marisa kitang kaisipan, pasuhan, o hararom na pagmati na nangangaipo nin atensiyon. Puwedeng may marisa kitang sarong bagay na nagigin dahilan na an satong puso magin bakong gayong sensitibo, na garo baga ‘kublit kan satong puso’ na narealisar tang dapat halion. Iyan piguratibong operasyon sa puso. Kun uyon ka na marahay na siyasaton an saimong piguratibong puso, ano an puwede mong hanapon? Asin paano ka magibo nin ano man na kinakaipuhan na pagbabago?—Jer. 4:4.

¹² Sarong bagay an sigurado: Dai ta maninigong asahan na pupuwersahon kita ni Jehova na magbago. Dapit sa ‘marahay na mga igos,’ sinabi niya na ‘tatawan niya sinda nin pusong magmimidbid’ sa saiya. Dai niya sinabi na pupuwersahon niya sinda na baguhon an saindang puso. Kaipuhan nindang mawuton na magkaigwa nin sensitibong puso na nagpapahiling na midbid ninda an Diyos. Bako daw na kaipuhan ta man iyan?

13, 14. Paano an sarong Kristiyano puwedeng ipahamak kan saiyang puso?

¹³ Sinabi ni Jesus: ‘Sa puso minagikan an mga maraot na kaisipan, mga paggadan, mga pagsambay, mga pakikiapid, mga paghabon, mga pagsasaksing putik, mga paglanghad.’ (Mat. 15:19, An Banal na Biblia) Malinaw nanggad, kun an bakong sensitibong puso nin sarong tugang nagpahiro sa saiya na magsambay o makisaro pero dai siya nagsusulsol, puwedeng mawara niya nin permanente an pag-uyon nin Diyos. Pero, dawa dai nakagibo nin siring na kasalan an saro, tibaad tinutugutan niyang tumalubo sa saiyang puso an salang pagmawot. (Basahon an Mateo 5:27, 28.)a Makakatabang digdi an personal na pagsiyasat sa puso. Kun sisiyasaton mo an saimong puso, may mahihiling ka daw na salang pagmati sa saro na bakong kasekso, nakatagong mga pagmawot na dai kokonsintihon nin Diyos kaya kaipuhan halion?

¹⁴ O tibaad tinutugutan nin sarong tugang, na dai man nakakomiter nin “paggadan,” na grumabe an kaanggutan sa saiyang puso sagkod na ikaungis niya na an sarong kapwa Kristiyano. (Lev. 19:17) Magmamaigot daw siya na halion an siring na emosyon na puwedeng magin dahilan na an saiyang puso mawaran nin pagmati?—Mat. 5:21, 22.

15, 16. (a) Magtao nin halimbawa kun paano an sarong Kristiyano puwedeng magin “bakong turi sa puso.” (b) Sa hiling mo, taano ta dai nakakapaugma ki Jehova an ‘bakong turi na puso’?

¹⁵ Nakakaugma, mayo kan siring na ‘problema sa puso’ an kadaklan na Kristiyano. Alagad, si Jesus nagtaram man dapit sa “mga maraot na kaisipan.” Ini mga pagmansay o kaisipan na makakaraot sa dakul na aspekto nin buhay. Halimbawa, an saro puwedeng mag-isip na mas mahalaga an kaimbudan sa paryentes kisa sa ano pa man. Siyempre, gusto kan mga Kristiyano na magkaigwa nin ‘pagkamuot’ sa mga paryentes, bakong arog kan dakul na mayo kan siring na pagkamuot sa ‘mga huring aldaw’ na ini. (2 Tim. 3:1, 3) Pero, posibleng masobrahan an pagpahiling kaiyan. Sa pagmati nin dakul, “mas matimbang an dugo kisa sa tubig.” Kaya, tibaad idepensa o kampihan ninda an mga paryentes ano man an mangyari, na pinepersonal iyan kun an sarong paryentes nakulgan. Isip-isipa kun ano an ginibo kan mga tugang na lalaki ni Dina huli sa grabeng pakamati nin arog kaiyan. (Gen. 34:13, 25-30) Asin imahinara kun ano an nasa puso ni Absalom, kaya nagibo niyang gadanon si Amnon na tugang niya sa ama. (2 Sam. 13:1-30) Bako daw na “mga maraot na kaisipan” an nasa likod kan mga pangyayaring iyan?

¹⁶ Totoo, an tunay na mga Kristiyano dai nanggagadan. Alagad, posible daw na magraot an buot ninda sa sarong kapagtubod na nakakulog o iniisip nindang nakakulog sa saro nindang paryentes? Tibaad magsayuma sindang istimaron o dai na istimaron an kapagtubod na iyan. (Heb. 13:1, 2) An siring kanegatibong mga pagmati asin pagigin bakong mapag-istimar nagpaparisa nin kawaran nin pagkamuot asin dai dapat basta pagpabayaan. Iyo, an Parasiyasat nin puso puwede iyan ibilang na ‘pagkabakong turi kan puso.’ (Jer. 9:25, 26, NW) Girumdumon idtong mga sinadol ni Jehova: ‘Halia nindo an kublit kan saindong puso.’—Jer. 4:4.

PAGKAIGWA ASIN PAGPADANAY NIN ‘PUSONG NAGMIMIDBID’ SA DIYOS

17. Paano an pagkatakot ki Jehova makakatabang sa sato na magkaigwa nin mas sensitibong puso?

¹⁷ Paano kun sa pagsiyasat mo sa saimong piguratibong puso, naaraman mo na bako iyan sensitibo sa konseho ni Jehova siring sa maninigo kaya puwedeng sabihon na iyan “bakong turi”? Tibaad may nahiling kang pagkatakot sa tawo, pagmawot na magin prominente o mayaman, o tendensiya pa ngani na magin sutil o independiyente. Bako lang ika an nakamati nin siring. (Jer. 7:24; 11:8) Si Jeremias nagsurat na an bakong maimbod na mga Judio kan panahon niya “suwail saka sutil an puso.” Sinabi pa niya: ‘Dai [sinda] nagsabi sa saindang puso: “Katakutan ta baya an KAGURANGNAN na satong Diyos, na iyo an nagtatao kan uran, sa tirikdagan saka tigburak.”’ (Jer. 5:23, 24, An Banal na Biblia) Bako daw na ipinapahiling kaiyan na an sarong pantabang sa paghali kan ‘kublit kan puso’ iyo an pagpatalubo nin urog na pagkatakot asin pag-apresyar ki Jehova? An siring na tamang pagkatakot makakatabang sa lambang saro sa sato na magkaigwa nin puso na mas sensitibo sa kun ano an mawot nin Diyos na gibuhon ta.

18. Ano an ipinanuga ni Jehova sa mga kabilang sa bagong tipan?

¹⁸ Puwede kitang makipagtabangan ki Jehova mantang tinatawan niya kita nin ‘pusong magmimidbid’ sa saiya. Sa katunayan, iyan an ipinanuga niyang gigibuhon para sa mga linahidan na kabilang sa bagong tipan: ‘Itatao ko an sakuyang pagbuot sa sainda, asin isusurat ko iyan sa saindang puso; asin sa sainda magigin ako Diyos, asin sinda magigin sakuyang banwaan.’ Pero, talaga daw na mamimidbid ninda siya? Sinabi niya pa: ‘Dai na sagkod man magtutukdo an siisay man sa saiyang kataid, minsan an siisay man sa saiyang tugang na lalaki, na magsabing “Midbida si Jehova,” huli ta gabos makakamidbid sa sakuya, magpuon sa urog kasadit sagkod sa urog kadakula. Huli ta ipapatawad ko an saindang karatan, asin dai na ako magrurumdom kan saindang kasalan.’—Jer. 31:31-34.b

19. Igwa nin anong marahayon na oportunidad an tunay na mga Kristiyano?

¹⁹ Sa langit man o digdi sa daga an linalauman mong daing sagkod na kapakinabangan sa bagong tipan na iyan, maninigong mawuton mo na mamidbid si Jehova asin mapabilang sa banwaan niya. Tanganing mag-ako kan kapakinabangan na iyan, kaipuhan ngunang mapatawad an saimong mga kasalan basado sa pantubos ni Cristo. An mismong bagay na puwede kang patawadon maninigong magpahiro sa saimo na magin mapagpatawad sa iba, dawa pa iyan garo baga dipisil gibuhon. Makakarahay sa saimong puso kun andam kang halion an ano man na raot nin buot. Sa siring, ikakapahiling mo na bako sanang gusto mong paglingkudan si Jehova kundi urog mo man siyang namimidbid. Ika magigin arog kaidtong mga sinabihan ni Jehova paagi ki Jeremias: “Hahanapon ako nindo saka makukua ako nindo, huli ta hahanapon ako nindo sa bilog nindong puso. Asin makukua ako nindo.”—Jer. 29:13, 14.