Pag-aatubang kan Maogmang Bareta—Sa Gabos
1 Mantang naghulit si Jesu-Cristo nagpaheling sia nin dakulang interes sa pag-abot sa pinakadakol na tawo sagkod na posible. (Mar. 6:34; Juan 4:7, 40, 41) Kita man maninigong magmaigot na aboton an pinakadakol na tawo sagkod sa mapupuwede. Kalabot an mga buhay—an sainda asin an sato. (1 Tim. 4:16) Mawot niatong tabangan an iba na mamidbid si Jehova tanganing sinda man makaapod sa saiyang ngaran asin makaligtas.—Gibo 2:21.
2 An sarong ordinaryong problema na naaatubang kan dakol sato iyo an paghanap kaidtong mga mayo sa harong kan enot niatong pagsongko. Naprobaran na daw nindon magsongko pakalihis nin pirang oras sa iyo man sanang aldaw? Dakol an nagkaigwa nin marahay na kapangganahan sa paggibo nin siring. O magprobar na magsongko sa ibang aldaw. Idtong perming mayo sa harong tibaad maabot paagi sa surat. Sa paghulit sa teritoryo nin siudad, magkaigwa nin inisyatiba na makipag-olay sa mga naheheling nindo sa mga agihan nin saradit na apartment o sa gilid kan tinampo. Kun kaipuhan na magin halipot an saindong pakipag-olay, tibaad manompongan nindong kapakipakinabang na iatubang minsan an saro sa apat na tract: Why You Can Trust the Bible, What Do Jehovah’s Witnesses Believe?, Life in a Peaceful New World, asin What Future for Dead Loved Ones?
PAGPATOTOO SA TINAMPO ASIN SA MGA TINDAHAN
3 An pakikabtang sa pagpatotoo sa tinampo tibaad makatabang saindo na mapatotoohan an mga indibiduwal na parateng mayo sa harong kun nagsosongko kita. Kun nagdodolok sa mga tawo, kapakipakinabang na magin makikatood asin direkta sa pagmamaigot nindong makapoon nin pag-orolay. An pag-atubang nin halipot, direktang hapot puwedeng makatabang saindo tanganing pukawon an interes. Posibleng manompongan nindong pinakapasil na dumolok sa mga dai naghihidali. Nagin mapanggana an iba sa pagsabay sa paglakaw sa sarong tawo mantang iinaatubang ninda sa halipot an mga magasin. Kun pano-pano an tinampo, nanompongan nin iba na praktikal na makipag-olay sa mga nasa hudian kan kadaklan. An pagpatotoo sa mga tindahan makatatabang saindo tanganing mapatotoohan an mga kagsadiri asin mga empleado na parateng dai nanonompongan kun nagsosongko kita sa saindang mga harong. Probaran na magsongko sa panahon na dikit sana an mga parabakal sa tindahan.
4 Kun nasa gibohon sa tinampo asin sa gibohon sa mga tindahan, dai paghonaon na limitado kamo sa pag-alok nin mga magasin. An mga libro asin brochure puwede man na ialok. Sarong mapangganang parahayag an nagpopoon sa pag-orolay paagi sa paghapot, “Naheling na daw nindo an pinakabagong libro niamo?” An saro pa simple sanang nagsasabi, “Igwa akong mawot na ipaheling saindo.”
5 Paano orog pang makukultibar an interes na nanompongan sa paghuhulit sa tinampo asin sa mga tindahan? Dakol an nagkaigwa nin kapangganahan sa paghagad sa mga interesado kan saindang direksion tanganing orog sindang makaolay sa mas kombenyenteng panahon. Kun maaraman nindong dai sinda nag-iistar sa saindong teritoryo, an pagsongko puwedeng itao sa angay na kongregasyon. An nangengenot na paraataman sa saindong kongregasyon maoogmang tabangan kamo sa bagay na ini.
6 Kabotan ni Jehova na an gabos matawan nin oportunidad na makadangog kan katotoohan. “An siisay man na napapaha dumolok; an siisay man na boot kumua kan tubig nin buhay na daing bayad.” (Kap. 22:17) Kun ginigibo niato an odok na pagmamaigot na makaolay an gabos na tawo, ipinaheheling niato na namomotan ta an iba siring ki Jehova.—Juan 3:16.